Search form

GYUNG 14

Dius jens Lop

1Dius jens gas dvnyens gonh kuk zis yah kaiq ngaus. 2Nyamoq gas Moshe yahge Aron lyis tyi lha lop zis gas, Ngamoq Egutu mas shei, nghuot ya hai mhanhdyvp mas shei lhyi zes gis. 3Yhensain ka ngamoq lyis haih mau mas chamus shwih los? Ngamoq jes mas gyoh shei das, ngamoq dah yhensain nyhiq, lo jens gas nyhik loh das; Egutu pheh tauh e lhyi zes gis ma nghuot lhyeh? 4Housoeh las Uhshe soeu dvyuk khyen lha Egutu pheh tauh e goh, ge dvyuk yah dvyuk taiq goh.

5Hauh thang lhyi Moshe yahge Aron gas dius jens dvnganh dah xikkhonh, nyeisjvng mas gop joq. 6Joh yoeuh bang mas aiq yuk Nun lo Yoshua yahge Yephun lo Khaleb gas nhaiqkuk zis yah nyamoq dah dyimis langchuiq las, 7dius jens lyis taiq zis gas, Ngamoq loh yoeuh khoq mau gas gis thank mau nghuot. 8Yhensain yang lyis nhaiqdoeus nghuot lyis, nyang yang lyis houmha shwih loh las hau dis las coeu bos mau yang lyis dyei das. 9Yhensain lhyi tyi lha gomloeus vtoq goh; hauh mau mas bang lyis eq vgyuk goh; nyamoq lyis lwis lwis ung das. Yhensain ka yang yah nyeis las, nyamoq lyis gos dah mangso jens lyis ung tyamp goeus. Housoeh las vgyuk goh, ge. 10Dius phung gonh gas nyah aiq yuk lyis luk yah doeuh sat das ge kyuk. Nghuot laus eq dius jens gas Zvng thoq mas Yhensain dah phunk bvng thuq los yvlyis nyetlos nyettant nyvng.

Moshe Dius jens xiklyis Dung

11Yhensain Moshe lhyi taiq zis gas, Haih dius jens khanyhank jweh shoq ngos lyis chaxwe ma nhang das lah? Ngos nyamoq lyis kuot xoeuq dah yomsoq muh lyis nyvng laus eq, khanhamp jweh shoq ngos lyis ma loms kuot das lah? 12Ngos nyamoq lyis yomh khyoq las mhont tyamp das, nghuot laus eq ngos nvng lyis nyamoq thoq lyis zes kuh las, yomsoq zes bos dah vnyau dah uwus kuot das, ge.

13Moshe Yhensain lhyi taiq zis gas, Nvng nah yomsoq yah haih dius jens lyis Egutu masyah shwih los. Nvng nah dius jens lyis khasoeh kuot cho Egutu mas bang xauhgyo lyis, 14nyamoq haih mau mas nyeis bang lyis taiq kyoh das. Houka Nvng Yhensain ngamoq yah nyeis las, nah jyommauh ngamoq thoq mas nghop toh, nvng gas nyeih lyis jyommauh punk mas, nyenh lyis nyizains yah ngamoq xik mas loh zis yah ngamoq nyoqlvtjvng mas thuq xoeuq cho haih dius jens xauhgyo goeus. 15Gvshih nvng nah dius dvnganh lyis sat lyis gas, nah nyings hoeuh cho xauhgyo dah dius nyau jens taiq das zis gas, 16Nvng nah dius jens lyis nvng nyamoq lyis dyei das ge thoengh toh dah mau mas ma thyeh shwih wvng yvmvyah nyamoq lyis mhanhdyvp mas sat, ge das. 17Housoeh las, Yhensain eh, gvshih ngos nvng lyis dung. Nah yomsoq chixoeuq las nvng thoengh toh zis kuot dyei aq. 18Nvng taiq: Ngos Yhensain ka nhaiq lvnyap ma yo, kuhxing jyetdap cho yahge wontang cho chixoeuq las, yaunos yahge gomloeus toq cho lhyi khyuot tyamp dyei. Nghuot laus eq nyhiphoq jens dah yaunos lyis nyamoq dah lo jens, nyei jens somh vcaiq nyei vcaiq ma joeng ma toh soeu nghuot. 19Ma thaiq loh dah nah kuhxing jyetdap cho yah dvyhangteh Yhensain eh, gvshih haih dius jens dah yaunos lyis nyamoq Egutu masyah thuq los lyis yah gvshih jweh shoq khyuot dyei vgus gvshih eq jenh khyuot dyei aq, oen dung.

20Yhensain toeuh zis gas, Nvng sang vgus ngos nyamoq lyis khyuot dyei das. 21Nghuot laus eq ngos dwis nyeis zis yah dvyhangteh ngah phunk gas nyeisjvng gonh dyingh das oen dangthoengh toh. 22Haih dius jens dvyuk eq hauh mau mas wvng das zis ma dwis nyeis das. Nyamoq ngah phunk lyis nyvng goeus. Egutu mas eq mhanhdyvp mas eq ngos kuot dah yomsoq muh lyis tsain nyvng goeus laus eq ngos jhen cho lhyi doms shi yoeuh yoeuh kuot zis yah ngah domsyos gyo das zis ngoek. 23Nyamoq dah phauh thyeih moq lyis ngos thoengh toh dah mau mas nyamoq khanhamp eq ma xauh wvng das. Ngos lyis peq tyamp bang dvyuk eq ma xauh wvng das. 24Nghuot laus eq ngah jyeidwis Khaleb gas shaih dah dyos bos zis yah ngos lyis lomluk goeus yvmvyah, nyang loh yoeuh goeus mau mas ngos shwih wvng loh das. Nyah vnyau vshih gas hauh mau lyis sain das. 25Gvshih Amalek jens yahge Khanan jens hau langhkhau mha tsain nyeis. Nvpyo Thomh Nes guih cho, mhanhdyvp pheh tauh loh geh, ge.

Dius jens Lop las Yhensain joeng

26Yhensain Moshe yahge Aron lyis taiq, 27Hai lhung dah dius jens ngos lyis tyi lha khanhamp jweh shoq lop nyeis das lah? Ngos nyamoq lop zis xauhgyo. 28Gvshih nyamoq lyis heisoeh taiq geh: Ngos jyoengh dwis nyeis zis yah dvyhangteh, namoq ngos lyis sang vgus ngos namoq lyis kuot das oen maukhi. Ngos Yhensain taiq goeus. 29Namoq hai mhanhdyvp lai yvmas shei lha namoq mvng sanh khoq das. Namoq ngos lyis tyi lha lop goeus yvmvyah, nyenhkyi aiqci zvn masyah lai bang hank eq hau mau mas ma xauh wvng das. 30Ngos namoq lyis nyeis nhang das oen maukhi toh mau mas, Khaleb yahge Nun lo Yoshua mas lai las hank eq ma jweh das. 31Nyhik loh zis xauh das ge namoq taiq, namoq dah loshang jens lyis ngos namoq peq tyamp dah mau mas shwih wvng das las hauh zis nyamoq dah yhen duot das. 32Nghuot laus eq namoq gas haih mhanhdyvp mas shei das. 33Namoq lom ma luk gvng mas namoq lo jens gas nyeici zvn top namoq mas bang dye shei shoq haih mhanhdyvp mas suh whang shanghsenh lo das. 34Hauh mau lyis joh yoeuh zis nyeici nyeih nghuot. Dvnyeih lyis dvzvn mulas nyeici zvn top, nyamoq yobos kham das. Ngos nhaiq ma doeus cho namoq seq das. 35Namoq dvgeh huom lha ngos lyis tyi dah lhung bang lyis ngos haih zis kuot das oen maukhi. Namoq dvnganhmoq haih mhanhdyvp mas shei das. Ngos Yhensain taiq goeus, ge.

36-37Moshe hauh mau lyis joh yoeuh nhang kat bang hauh mau cho ma jus loeus los tsain taiq. Hauh gvng mas dius jens Yhensain lhyi lop. Housoeh Yhensain ka yomh khyoq las dius jens shei. 38Joh loh yoeuh bang 12 yuk mas Nun lo Yoshua yahge Khaleb kyingh dvdoeng los lo.

Cangxeih Khanan wvng das

(Lyi 1:41-46)

39Moshe ka Yhensain taiq cho Israel jens lyis taiq kyoh lyis nyamoq svsoh kuk nyeis. 40Nungsnvp noq yah, Gvshih Yhensain ngamoq lyis taiq dah joqyos mas loh das zis cicont nghuot. Ngamoq yaunos kuot goeus, ge boms mau mas nyhenh wvng loh xi.

41Nghuot laus eq Moshe taiq, Gvshih namoq chamus Yhensain domsyos ma gyo goh? Namoq ma ung das. 42Vloh goh: Yhensain namoq yah dvgeh ma nghuot lo; Namoq dah jeswus namoq lyis ung das. 43Namoq Amalek jens yahge Khanan jens yah xauhgoh lyis namoq jes mas gyoh das. Namoq Yhensain thang chank das zis ngoek yvmvyah, nyang namoq yah dvgeh ma nyeis lo, ge.

44Yhensain dah Thanghchvp Kwi eq ma loh, Moshe eq dvp mas dvnyeis laus eq nyamoq gas boms mau mas womh womh tsain doq loh. 45Houmha nyeis dah Amalek yahge Khanan jens nyamoq lyis zan ung lha Horma wus jweh shoq chank khat los.

Ngochang Common Language Bible

© Bible Society of Myanmar 2010

More Info | Version Index