Search form

GYUNG 15

Phudyei Lyi

1Yhensain Moshe lhyi 2Nyang Israel dius jens lyis dyei das mau mas nyamoq chank das xiklyis o mha lyi dyei. 3Yhensain xiklyis ngheq dyei jyungshuk, nghuot ya nyhen toh zis tyink dyei zis phudyei jyungshuk, xihhonh jyungshuk, vjangh gyangh kuot dah loms noq pwe phudyei jyungshuk teh zis noeu, yvnglus, yvng, shvbeq yah Yhensain lhyi phudyei lyis haih zonoms jyungshuk xangh shom ka Yhensain lhyi nhaiqdoeus nhang. 4-5Yhensain jyank mas ngheq dyei jyungshuk khyvlyis yvng nghuot ya shvbeq phudyei soeu hank laus eq, gaunyhauq dvdoeu mas jyo jyungshuk khyvlyis tsanlun coeu 2 pint yah lhoeuq dah monh aiq paung yah dvgeh zvbiq aiq pint chi los chah. 6Yvnglus dyei lyis gas, jyo jyungshuk khyvlyis tsanlun coeu somh pint yah lhoeuq dah monh nyei paung 7yah dvgeh zvbiq nyei pint dyei chah. Hai phudyei dah xangh shom ka Yhensain lhyi nhaiqdoeus nhang. 8Yhensain lhyi ngheq phudyei jyungshuk, nyhen toh zis phudyei, nghuot ya nyenstap jyungshuk khyvlyis noeulu dyei lyis, 9tsanlun coeu nyei pint yah lhoeuq dah monh khyuk paung bos dah jyo jyungshuk dyei chah. 10Houyah dvgeh zvbiq nyei pint bos chah. Hai phudyei dah xangh shom ka Yhensain lhyi nhaiqdoeus nhang.

11Heika noeulu, yvnglus, yvnglo, beqlo dvdoeu dyei lyis bos chah zis nghuot. 12Gaunyhauq dvdoeu thoq lyis nyo las phudyei lyis, houyah dvgeh bos chah zis eq hounyhoq nyo chah. 13Mau sain Israel jens yuk khanghmuh Yhensain nhaiqdoeus dah xangh shom duot das xiklyis zonoms jyungshuk dyei lyis haih zis kuot chah. 14Namoq mas nyeis dah lvbaus, dvdvm dvsoq nyeis laus eq vcaiq caiq nyeis laus eq, khanhamp laus eq Yhensain nhaiqdoeus dah xangh shom zonoms jyungshuk kuot dyei lyis nyang eq hau dvyhangteh lyi yah chank kuot chah. 15Jweh los das shishenh dvnganh lyis, namoq yahge namoq mas nyeis dah lvbaus lyis dvlyi yah dvtwih toh. Yhensain dah nyoqlvtjvng mas namoq yahge nyamoq dvyih dvnghuot. 16Namoq yahge nyamoq xiklyis dvyhangteh lyi dvkoeuq, thungh eq dvkoeuq dvtoeuq toh, ge.

17Yhensain Moshe lhyi, 18nyang Israel jens lyis dyei das mau mas chank das xiklyis o mha dah lyi dyei. 19Hou mhayah thuq los dah zonoms cha laus eq zo uhlyis Yhensain lhyi lhyenwhei vlu khyvlyis dvkhamh gvm toh chah. 20Nvng ohlhyoq piq lyis, guk saiq masyah cangxeih kuot dah ohlhyoq mas cangxeih vlhyoq gas Yhensain lhyi lhyenwhei vlu khyvlyis dyei chah. Houka nvng thanjang mas nis dah jyungshuk khyvlyis phudyei zis nghuot. 21Jweh los das shishenh dvnganh lyis hai lhyenwhei jyungshuk gas namoq piq ohlhyoq masyah Yhensain lhyi dyei chah zis nghuot.

22Nghuot laus eq Yhensain Moshe lhyi yah dyei toh lyi dvyuk yuk ma soh chank. 23Thang pheh dius phung ka Yhensain Moshe lhyi yah tyingtoh zis dvnganh ma chank lyis, 24dius phung ka chaxwe ma nhang gvng mas cu lhyi nyamoq gas Yhensain lhyi ngheq dyei jyungshuk khyvlyis noeulu dvdoeu, nhaiqdoeus nhang dah xangh shom bweh das zis, jyo jyungshuk yahge zvbiq jyungshuk phudyei chah. Hauh thoq lyis yaunos jyungshuk khyvlyis beq lus dvdoeu phudyei chah. 25Phudyei soeu ka dius phung xiklyis cheihshang cho kuot dyei das. Nyamoq gas masoh mathamh dvcu yvmvyah yobos khyuot zis xauh das: nyamoq eq Yhensain jyank mas zonoms jyungshuk khyvlyis nyamoq dah yaunos jyungshuk chi los chah. 26Israel dius phung gonh yahge nyamoq mas nyeis lvbaus gas yobos khyuot zis xauh das. Khasoeh ge lyis yuk khanghmuh gas hau cu yvmas bos.

27Dvyuk masoh mathamh cu lhyi yaunos jyungshuk khyvlyis dvzvn bos dah beqmuh dvdoeu phudyei chah.28Phudyei soeu ka phon mha nyah yaunos masyah cheihshang cho kuot dyei las nyang yobos khyuot zis xauh das. 29Mau sain Israel laus eq nyeis goeus dah lvbaus laus eq masoh mathamh cu cho mha lyi dvyhangteh dvtoeuq.

30Nghuot laus eq dvyuk yuk, nyang mau sain laus eq, lvbaus laus eq, pa-i cu zis gas Yhensain lhyi maphauh madanh mhuih jyomh dah yobos nghuot las nyang sat zis xauh chah. 31Khasoeh ge lyis Yhensain taiq toh yvlyis peq las nyang tyingtoh dang dvkoeuq pa-i thyoq goeus. Nyang shei zis gas nyah yvwons nghuot.

No Nyeih Lyi Thyoq soeu

32Israel jens mhanhdyvp mas nyeis shih uhlyis, dvlhain ka No nyeih lyis dius dvyuk thangh xo nyeis yvlyis nyvng. 33Nyang lyis Moshe, Aron yahge dius phung dvnganh jyank mas shwih los. 34Nyang lyis khasoeh kuot chah zis bvng bvng ma seq yvmvyah zungh yvmas toh. 35Hauh thang lhyi Yhensain Moshe lhyi taiq, Hauh soeu lhyi sat chah. Dius phung gonh dvp nghe mha luk yah doeuh sat chah, ge. 36Housoeh las Yhensain Moshe lhyi tying toh vgus, dius phung gonh gas hauh soeu lhyi dvp nghe pheh shwih thuq las luk yah doeuh sat.

Bandyoms cho Lyi

37Yhensain Moshe lhyi taiq, 38Israel jens lyis taiq aq, Namoq dyithang mha bandyoms kuot las twih lanh yah lhangh chah. Namoq haih zis jweh los das shishenh dvnganh mas kuot chah. 39Hauh bandyoms gas taiq kyingh khyvlyis pangh jus das. Namoq hau bandyoms lyis nyvng khanghmuh, ngos tying toh zis soh das las domsyos yoh gyo das. Housoeh xikpheh ngah jyank masyah phanh las vsainnyang o khyvlyis kuot loh teh ma doms kuot lo das. 40Hauh bandyoms gas ngos tying toh zis dvnganh chank kuot das zis soh nhang lha namoq ngos yah vlhomuh sen das. 41Ngos gas Yhensain, namoq dah Mangso nghuot. Ngos namoq dah Mangso duot das oen namoq lyis Egutu masyah shwih los. Ngos Yhensain nghuot, ge.

Ngochang Common Language Bible

© Bible Society of Myanmar 2010

More Info | Version Index