Search form

GYUNG 16

Kora, Dathan, Abiram Gomloeus toq

1-2Lewi vhuh Kohat mas Izhar lo Kora gas, Ruben vkoq mas Eliab lotang Dathan yahge Abiram, Pelet lo Ona somh yuk moq yah dvgeh, gohtoeu dius phung mhayah khyen toh las nyings hoeuh dah Israel uhshe bang aiqxo oengci moq gas Moshe dah uhshe cho lhyi gomloeus tsain toq.3Nyamoq gas Moshe yahge Aron xikkhonh mas los huom lha taiq: Nah zomh gas dvmsunk: dius phung dvkoeuq gonh gas Yhensain yah sen. Yhensain eq yang dvnganh yah dvgeh nghuot. Housoeh lyis Moshe nvng chamus Yhensain dah dius phung thoq lyis chungh zo!

4Moshe haih zis xauhgyo lyis nyeisjvng mas gop las shvmanh dung. 5Hauh thang lhyi nyang Kora yahge nyah thang chank bang lyis taiq, Yhensain ka nvpyo yang lyis nyang yah hank sen zis chixoeuq das. Nyang yah sen soeu lhyi kuot nhang das. Houka nyang khyen yoeus soeu nghuot. Phon mha nyah jyank mas ni loh das. 6-7Nvpyo nvng yahge nah thang chank bang nyibvn yoeus, houmha nyigywe kat, hauh thoq mas loban kih las phon mha chi loh geh. Yang khayuk lyis Yhensain khyen yvlyis nyvng das. Lewi jens eh, namoq dvmsunk bang nghuot.

8Moshe ka Kora lyis tsoq taiq, Lewi jens eh, gyo geh: 9Israel Mangso ka namoq lyis dius phung mhayah kangh yoeus zis gas muhzains nghuot las yhaugyen yvlyis vnghamh yoeuh goh lah? Housoeh namoq gas nyah jyank mas yoh ni loh las Yhensain Zvng mas namoq dah muh wons wuq las dius phung lhyi shwih zis yah phuqsoe das. 10Nyang nvng lyis kuot nhang lha, gohtoeu Lewi jens dvnganh eq haih nyoqnho ngelang yoh laus eq, gvshih namoq phudyei muh xo nyeis shih nyvng! 11Namoq Aron lyis tyi lha lop lyis, houka nvng yahge nah thang chank bang jyoengh nyang Yhensain lhyi tyi lha gomloeus toq zis nghuot, ge.

12Hauh thang lhyi Moshe ka Dathan yahge Abiram lyis khi nhang kat laus eq, nyamoq taiq, Ngamoq ma los das. 13Nvng ngamoq lyis haih mhanhdyvp mas sat das ge, nyeis coeu bos mau Egutu masyah shwih thuq los zis ma geh shih lhyeh? Nvng ngamoq thoq mas eq zau kuot mes shih lhyeh? 14Nvng ngamoq lyis nyeis coeu bos mau mas jyoengh ma shwih loh; ngamoq vso khyvlyis yos yahge zvbiq khyam ma dyei. Nvng gvshih ngamoq lyis mhuih nyeis. Ngamoq ma los das, ge.

15Moshe nhaiqyo las Yhensain lhyi taiq, Haih dius jens chi los dah jyungshuk cha eq vlhom yoeus dyei. Ngos nyamoq hank lyis eq cha ma cu, nyamoq dah mauhlyihzoe dvdoeu yangh ma yoeus dyei, ge.

16Moshe Kora lyis taiq, Nvpyo nvng yahge nah thang chank bang aiqxo oengci Yhensain xikkhonh Zvng mas los chah. Aron eq houmha bos das. 17Namoq yuk khanghmuh vsainnyang nyi bvn yoeus, houmha loban kih las phon mha chi loh dyei aq, ge. 18Housoeh las nyamoq yuk khanghmuh hank eq hank nyi bvn yoeus, nyigywe kat, hauh thoq mas loban kih las Moshe yahge Aron yah dvgeh Zvng khomh mas yap joq. 19Hauh thang lhyi Kora eq dius phung gonh lyis tsainh toh las nyamoq gas Zvng khomh mas Moshe yahge Aron yah nyoqnho changh xoeu goh toh. Hau dius phung mha Yhensain dah phunk eq nyetlos nyettant bvng thuq los. 20Yhensain ka Moshe yahge Aron lyis taiq. 21Ngos haih dius jens lyis lvnyap mhont tyamp bah namoq phang geh, ge.

22Nghuot laus eq Moshe yahge Aron gas nyeisjvng mas dupaiq las, Mangso eh, nvng gas kang dvnganh dah vjyung nghuot. Dvyuk yaunos kuot lyis dius phung gonh lyis nhaiqyo das lah, ge dung.

23Yhensain Moshe lhyi taiq, 24Kora, Dathan, Abiram moq dah zvng masyah phang jhank loh geh, oen dius jens lyis taiq aq, ge.

25Hauh thang lhyi Moshe ka Israel jens dah uhshe bang yah dvgeh Dathan yahge Abiram moq jyank pheh loh. 26Nyang dius jens lyis taiq, Hai lhung bang dah zvng masyah phang jhank geh. Nyamoq yah sen dah vyhang cha lhyi eq vtanh goh, ma nghuot lyis namoq eq nyamoq dah yaunos gvng mas shenh tyamp zis xauh das, ge. 27Housoeh las nyamoq eq Kora, Dathan, Abiram moq dah zvng masyah tsain phang jhank loh.

Dathan yahge Abiram gas nyamoq dah yhensain nyhiq, lo jens yah dvgeh nyamoq zvng khomh mas los thuq yap joq. 28Moshe dius jens lyis taiq, Haih muh dvnganh ngah ehnyet yah kuot zis ma nghuot; Yhensain kuot nhang zis dvnghuot yvlyis namoq khasoeh yoh seq das lah oen lhyi: 29Haih bang Mangso jyank masyah joeng cho ma bos, soenghchoenk shei teh dvshei lhyi ka Yhensain ngos lyis nhang kat zis ma nghuot. 30Nghuot laus eq, ma xauhgyo ku cho Yhensain kuot las nyeisjvng gas nyah nhuot haq zis yah haih bang yahge nyamoq sain zis dvnganh nyhau tyamp las, nyamoq shei mau mas vdwis gyoh loh lyis, haih dius jens Yhensain lhyi peq tyamp zis seq das, ge.

31Nyang dye taiq yah dvyih Dathan yahge Abiram nang toh nyeisjvng goq ghoh los las, 32nyamoq eq, nyamoq yhenbang yah dvgeh Kora thang chank bang dvnganh yahge nyamoq sain zis dvnganh lyis nyhau tyamp. 33Housoeh nyamoq gas nyamoq sain zis yah dvgeh shei mau mas vdwis gyoh loh. Nyeisjvng gas nyamoq thoq mas nghop zis yah nyamoq jom tyamp. 34Houmha nyeis dah Israel jens dvnganh gas, nyamoq kaiq thwe xauhgyo lyis, Phang geh, yang lyis eq nyhau das, ge.

35Hauh thang lhyi Yhensain jyank masyah nyi kat kat las Loban chi los bang aiqxo oengci eq ngeh tyamp.

Nyi bvn

36Hauh thang lhyi Yhensain Moshe lhyi taiq, 37Phudyei Aron lo Eleaza lyis taiq aq. Hau nyi ngeh tyamp bang dah thunk nyi bvn gas gyingshang yvmvyah hauh yvlyis tsain yoeus las houmha dah nyigywe lyis dvyos mas sanh tyamp aq. 38Hauh zis nyamoq Yhensain dah phon mha tsain dyei goeus ya houka lhoqshang goeus. Housoeh las nyamoq dah yaunos gvng mas sat zis xauh bang dah nyi bvn lyis bu bu bat las phon nghop shonh nhang aq. Houka Israel jens lyis zaih nhang zis nghuot. 39Housoeh las phudyei Eleaza gas nyi bvn tsain yoeus las bu bu bat zis yah phon nghop kuot nhang. 40Housoeh las Aron dah vnyau vshih ma nghuot bang hank eq Yhensain xiklyis xangh ma los yoh ngheq dyei cho Israel lyis zaih nhang. Ma nghuot lyis gas nyang Kora yahge nyah thang chank bang teh mhont tyamp zis xauh das. Hai dvnganh gas Yhensain Moshe lhyi yah Eliaza lyis tying toh khyvlyis kuot.

Dius jens lyis Aron Khyuot

41Nungs nyeih Israel dius dvphung gonh gas Moshe yahge Aron lyis tyi lha lop zis gas, Nah zomh Yhensain dius jens lyis sat, ge. 42Hau dius phung gonh Moshe yahge Aron jyank mas huom lha tsuk tsuk taiq thang lhyi nyamoq Zvng shot pheh tauh los lyis, Zvng mas jyommauh nghop las Yhensain phunk bvng thuq los zis nyvng. 43Moshe yahge Aron eq Zvng xikkhonh mas los yap. 44Yhensain Moshe lhyi taiq, 45Haih dius jens masyah phang jhank geh. Ngos nyamoq lyis gvshih nyang mhont tyamp bah, ge.

Nyah zomh gas nyeisjvng mas paiq gop joq. 46Moshe Aron lyis taiq zis gas, Nah nyi bvn yoeus, phon mha dah nyigywe yoeus kat, hauh thoq mas loban kih aq. Dius jens jyank mas lvnyap wuih las nyamoq xiklyis cheihshang cho kuot dyei aq. Yhensain dah nhaiqyo zis jweh joq; yomh jweh nyeis goeus, ge. 47Aron eq domsyos gyo las nyah nyi bvn yoeus zis yah dius phung khau mha wuih loh. Nyang hau yomh bweh nyeis goeus yvlyis nyvng lyis, nyigywe mas loban kat dius jens xiklyis cheihshang cho kuot dyei. 48Haih zis yomh doms nhang lha nyang gas shei bang yahge dwis bang dah vjo mas yap joq. 49Kora gomloeus toq yvmas shei bang ma suon, yomh mas shei bang dvnganh dvmons nyei khyoengh nyhetxo nghuot. 50Aron eq hau yomh doms thang lhyi Zvng khomh, Moshe jyank tauh los.

Ngochang Common Language Bible

© Bible Society of Myanmar 2010

More Info | Version Index