Search form

GYUNG 22

Moab Hwankti Balam lyis Khi

1Israel jens tsoq loh las Moab pa, Yodan lvng buisthuq tvp, Yerikho twi twi mha thoeng toh.

2Israel jens Amori lyis khasoeh kuot cho yahge nyamoq dius khanyhoq nyo cho, Zipo lo Moab hwankti Balak xauhgyo lyis, 3nyang yahge nyah dius jens dvnganh svsoh gyuk los. 4Moab jens Midian uhshe bang lyis taiq zis gas, Haih moqphung ka, noeu gas katjang mas mhanh zo tyeih teh, yah vyvm vwi mas zis dvnganh lyis mhont bah ge, ge. Housoeh las Zipo lo hwankti Balak gas, 5loeuskyoh bang nhang lha Beor lo Balam lyis khi. Nyang gas Amaw mau Uphrat lvng nvm Pethor mas nyeis. Nyamoq gas Balak jyank masyah haih loeus wons loh dyei. Egutu masyah jweh los dah dius dvnyau nyeis. Nyamoq mau gonh dvkhauyah nyoh loh. Nyamoq gas ngamoq mau lyis yoeus das ge kyuk nyeis zis ngos nvng lyis seq nhang.6Nyamoq gas ngah xiklyis yomsoq nyo bos. Housoeh las nyamoq lyis los jenh nhoengh dyei aq. Housoeh lyis ngos nyamoq lyis ung lha haih mau masyah yoh khat tyamp mvbeh. Nvng shvmanh lyis dius jens jyehjuh yoh zis eq, nvng nhoengh lyis nhoengh xauh zis eq ngos seq, ge.

7Housoeh las Moab yahge Midian uhshe bang gas, nhoengh dyei das phauh wons las Balam jyank mas jweh lyis Balak dah loeus dang dyei. 8Balam nyamoq lyis taiq, Khvnyens heimha yhet geh, Yhensain ngos lyis taiq zis nvpyo ngos namoq lyis kyoh das, ge. Housoeh Moab logis jens eq Balam yah dvgeh nyeis.

9Mangso Balam jyank mas jweh las nyei zis gas, Hai nvng yah nyeis bang gas hank nghuot, ge.

10Nyang phuk taiq, Moab hwankti Balak ngah jyank mas nhang lha taiq zis gas, 11Egutu masyah doq jweh los dah dius dvnyau dvmau gonh yah dyos loh. Nyang ngos lyis nyah xiklyis los nhoengh dyei das zis o, housoeh lyis nyang nyamoq lyis zan las yoh khat thuq das, ge.

12Mangso Balam lyis taiq, Nvng nyamoq yah vloh, Israel dius jens lyis eq vnhoengh: khasoeh ge lyis nyamoq gas ngah shvmanh yoh, ge.

13Nungsnvp Balam gas Balak dah loeuskyoh bang jyank mas loh taiq, Yhen pheh tauh loh geh, ngos namoq jyank mas chank das zis Yhensain ma gyo, ge. 14Housoeh nyamoq Balak jyank tauh loh las taiq, Balam ngamoq yah chank los das zis ngoek, ge.

15Hauh thang lhyi Balak gas xik lyis dah bang thoq lyis zes yhaugyen dah uhshe bang nyo nyo doms nhang. 16Nyamoq Balam jyank mas loh las Zipo lo Balak jyank mas dah loeus dyei. Nvng ngah jyank mas los das zis cha mha eq vjenh tho nhang. 17Ngos nvng lyis phauh gisgis shangh das: nvng cha sang cha dyei das; Ngah nyhenshang haih dius jens lyis los jenh nhoengh aq, ge.

18Nghuot laus eq Balam toeuh zis gas, Balak ngos lyis nyah hwankti yhen mha dah ngwis xing dvnganh dyei lyis yangh ngos Yhensain, ngah Mangso tying dang ma gyo, ngis thank zis yangh cha eq ma yoh kuot. 19Nghuot laus eq Yhensain ngos lyis cha taiq shih das zis yoh seq shoq gohyhamh bang yhet khoq teh khvnyens heimha jenh yhet shih geh, ge.

20Hauh nyenh lyis Mangso Balam jyank jweh taiq, Haih bang nvng lyis nyamoq yah loh goh ge khi lhyi, sont las bos loh aq, nghuot laus eq ngos taiq zis kyingh dvyoh kuot das, ge. 21Housoeh las nungsnvp lyis Balam nyah mauhlyihzoe anhzoe shauq las Moab uhshe bang yah loh.

Balam Mauhlyihzoe

22Balam loh nyeis lyis Mangso nhaiqyo. Balam gas nyah mauhlyihzoe ji loh, nyah jyeidwis aiq yuk eq bos loh. Yhensain dah loeuswons soeu ka nyah cho lhyi kyamp das ge cho mha yap joq. 23Loeuswons soeu sham yings las yap joq yvlyis mauhlyihzoe nyvng lyis nyang choyvm yos pheh jhank wvng loh: Balam gas hau mauhlyihzoe lyis lyuk las cho pheh doms lang kat. 24Hauh thang lhyi loeuswons soeu ka thyishot haqshot zvbiq aiq khyam dah luk ciank jo, cho zvvs yvmas yap joq. 25Mauhlyihzoe gas loeuswons soeu lhyi doms nyvng lyis khyam ciank dvshot pheh duon loh las Balam khyei nyhamh: Balam eq mauhlyihzoe lyis doms lyuk. 26Loeuswons soeu ka dvlhain doms cheh las kha shot pheh eq ma yoh lai loh dah cho jyvp yvmas yap joq. 27Mauhlyihzoe eq loeuswons soeu lyis doms nyvng lyis haq lhain ka whop loh. Balam gas nhaiqyo las, nyah lhamloq yah mauhlyihzoe lyis lyuk. 28Housoeh Yhensain ka hauh mauhlhyihzoe lyis dang taiq das yomsoq dyei las, hau mauhlhyihzoe Balam lyis taiq zis gas, Nvng ngos lyis chamus somh lhain jweh shoq lyuk? Ngos nvng lyis cha kuot, ge.

29Balam toeuh zis gas, Nvng ngos lyis zeh nyeis: ngos sham wons ya, nvng lyis heimha sat das, ge.

30Mauhlyihzoe doms taiq, Ngos gas nvng dvcaiq gonh ji nyeis dah mauhlyihzoe nghuot ma nghuot lhyeh? Ngos nvng lyis xikpheh housoeh khanhamp kuot ku, ge.

Balam gas, Ma kuot ku, ge.

31Hauh uhlyis Yhensain ka Balam lyis houmha sham yings las yap joq dah loeuswons soeu lyis nyvng nhang. Housoeh nyang nyeisjvng mas paiq gop joq. 32Loeuswons soeu nyang lyis sang zis gas, Nvng nah mauhlyihzoe lyis heisoeh chamus somh lhain shilo lyuk? Nvng ma gis loh yvmvyah ngos nah gyung cho lhyi los kyamp. 33Nah mauhlyihzoe gas ngos lyis nyvng las ngah xikkhonh masyah somh lhain jhank loh: housoeh ma jhank lyis gas ngos nvng lyis sat las mauhlyihzoe lyis dwis nyeis nhang das, ge.

34Balam doms taiq, Ngos cu goeus, nvng cho mha yap las ngos lyis kyamp zis ngos ma seq. Nghuot laus eq gvshih nvng nghamh lyis ngos loh das zis shuot ge lyis gas ngos yhen pheh tauh loh das, ge.

35Nghuot laus eq loeuswons soeu taiq, Haih bang yah loh aq; nghuot laus eq ngos nvng lyis taiq nhang zis kyingh dvtaiq aq, ge. Housoeh las Balam gas Balak dius jens yah bos loh.

Balak Balam lyis zes

36Balak gas Balam los nyeis ge zis xauhgyo lyis, nyang lyis zes das ge, Moab maukyo Arnon lvng yvm mas joq dah Ar wus mas loh. 37Balak, Balam lyis taiq, Ngos nvng lyis cangxeih vlhain khi nhang lhyi chamus ma los? Ngos nvng lyis phauh vlhomuh ma yoh shangh das oen nghamh lhyeh, ge.

38Balam gas Balak lyis, Ngos los goeus, ma nghuot lhyeh? Nghuot laus eq gvshih ngos chah yomsoq bos? Mangso ngos lyis taiq nhang zis kyingh dvyoh taiq, ge. 39Housoeh Balam gas Balak yah Kiriat Huzot wus mas jweh loh. 40Balak houmha noeu, yvng tsain sat las Balam yahge nyang yah dvgeh dah uhshe bang lyis shoh dvkhamh dyei.

Balam Cangxeih Pe

41Nungsnvp Balak gas Balam lyis Bamot Bala mas shwih doq loh. Hou mhayah Balam gas Israel dius dvyhamh lyis nyvng.

Ngochang Common Language Bible

© Bible Society of Myanmar 2010

More Info | Version Index