Search form

GYUNG 25

Peor mas Israel jens

1Israel jens Akhesha langhkhau mha thoeng nyeis uhlyis, yukgis jens gas houmha nyeis dah Moab vmesbih jens yah yhetgoh. 2Haih vmesbih jens gas Moab jens dah mangso lyis paiq joqyos, phudyei pwe mha Israel jens lyis yus las nyamoq eq hauh zonoms zo, Peor Bal mangso lhyi tsain paiq. 3Housoeh Yhensain ka nyamoq lyis nhaiqyo las, 4Moshe lhyi taiq, Israel uhshe bang dvnganh lyis shwih las Yhensain xikkhonh, buis mas lhangh sat geh. Housoeh lyis ngos dius jens lyis nhaiq ma yo lo das, ge. 5Moshe zau jens lyis taiq, Namoq hank eq hank nyang dah vkoq mas Bala Peor lyis paiq bang yuk khanghmuh lyis sat geh, ge.

6Dius dvphung gonh Yhensain xikkhonh Zvng khomh mas tsain ngaus nyeis uhlyis nyamoq yahge Moshe dah nyoqlvtjvng mas Israel dvyuk gas Midian vmesbih dvyuk lyis nyah zvng mas shwih wvng loh. 7Hauh yvlyis phudyei Aron nyeilo, Eleaza lo Phineha nyvng lyis, nyang moq huom mhayah toq thuq loh. Nyang lham yoeus chi lha, 8hau vbusbih yahge vmesbih dah zvng khau mha chank wvng loh las hau aiq yuk gonh lyis hau lham yah guons kyank tyamp. Housoeh khyvlyis Israel jens lyis mhont loh nyeis dah yomh doms loh. 9Nghuot laus eq hauh yomh yah dius aiqmons nyei khyoengh sat goeus.

10Yhensain Moshe lhyi taiq zis gas, 11Phineha kuot goeus gvng mas ngos Israel dius jens lyis nhaiq ma yo lo. Nyang gas ngos mas lai las gohtoeu chah mangso lhyi paiq cho lhyi eq ma jhen. Housoeh las ngos nyamoq lyis nhaiqyo zis yah ma mhont lo. 12Housoeh las nvng nyang lyis taiq aq. Ngos nyang yah jweh los das shishenh dvnganh mas jus dah thanghchvp toh. 13Nyang yahge nyah vnyau vshih gas vjangh yah phudyei bang khyvlyis kuot nhang toh: khasoeh ge lyis ngos yah xiq yvlyis ma jhen, dius jens dah yaunos khyuot dyei das cho she los, ge.

14Hau Midian vmesbih yah dvgeh sat xauh soeu Israel dius dah nyings gas Simon vkoq, dvyhenbang dah uhshe soeu, Salu lo Zimri nghuot. 15Vmesbih nyings gas Khozbi nghuot. Nyah uwus Zur gas Midian vhuh dvphung dah vgyis nghuot.

16Yhensain Moshe lhyi tying toh, 17Midian jens lyis zan las mhont geh. 18Khasoeh ge lyis, Peor mas nyamoq nvng lyis mhuih uhlyis nyamoq nvng lyis ma gis zis kuot goeus. Peor mas yomh gyoh shishenh lyis sat xauh soeu Khozbi gvng mas eq nghuot.

Ngochang Common Language Bible

© Bible Society of Myanmar 2010

More Info | Version Index