Search form

GYUNG 28

Nyeih yau Jyungshuk

(Dyu 29:38-46)

1Yhensain Moshe lhyi tying toh. 2Israel jens lyis cho shet aq. Mangso lhyi nhaiqdoeus nhang das zis chah dah zonoms jyungshuk lyis toeuq toh shishenh lyis nyah jyank mas chi los chah.

3Heika Yhensain jyank mas chi los das zonoms jyungshuk nghuot. Nyeih yau dah ngheq dyei jyungshuk xiklyis nos ma bos, dvzvn dyingh dah yvnglus lo aiq doeu. 4Yvnglo cangxeih vdoeu lyis nvpsangh pheh, aiq vdoeu lyis nyenhthang pheh phudyei chah. 5Yvnglo dvdoeu yah dvgeh jyo jyungshuk monh dvkilogram lyis gis thank tsanlun coeu dvliter yah lhoeuq zis bos chah. 6Heika Sina boms mas zonoms jyungshuk khyvlyis cangxeih phudyei dah nyeih yau ngheq dyei jyungshuk nghuot. Hauh jyungshuk gas dvnganh ngheq dyei chah. Hauh xangh shom ka Yhensain lhyi nhaiqdoeus nhang. 7Yvnglo dvdoeu yah dvgeh shukphoh jyungshuk khyvlyis zvbiq dvliter phon mha huot kat chah. 8Nyenhthang lhyi yvnglo aiq vdoeu phudyei chah. Houka nvpsangh jyungshuk yah dvyhangteh jyo jyungshuk yahge shukphoh jyungshuk bos chah. Hauh jyungshuk gas nyi yah ngheq dyei chah. Hauh xangh shom ka Yhensain lhyi nhaiqdoeus nhang.

No Nyeih Jyungshuk

9No nyeih lyis nos ma bos dvzvn dyingh yvnglus lo aiq doeu phudyei chah. Jyo jyungshuk khyvlyis tsanlun coeu yah lhoeuq dah monh 4 paung yahge zvbiq jyungshuk bos chah. 10Nyeih yau jyungshuk yah nyah zvbiq jyungshuk ma suon, hai ngheq dyei jyungshuk gas No nyeih khanghmuh tsank phudyei chah.

Lohcanh nyeih Jyungshuk

11Lhamhmuh canh nyeih khanghmuh, Yhensain jyank mas ngheq dyei jyungshuk chi los chah: houka noeulu kyoh aiq doeu, yvnglus dvdoeu, dvzvn dyingh dah yvnglus lo nyhet doeu phudyei chah. Hau dvnganh gas nos ma bos zis nghuot chah. 12Jyo jyungshuk khyvlyis tsanlun coeu yah lhoeuq dah monh phudyei chah: noeulu dvdoeu mas, monh 6 paung; yvnglus mas 4 paung; 13yvnglo dvdoeu mas 2 paung bos chah. Haih ngheq dyei jyungshuk gas Yhensain lhyi nhaiqdoeus nhang dah xangh shom zonoms jyungshuk nghuot. 14Vgus gus zvbiq jyungshuk eq, noeulu dvdoeu mas zvbiq aiq liter, yvnglus mas dvliter dvkhyamh, yvnglo dvdoeu mas dvliter bos chah. Heika dvzvn gonh lohcanh khanghmuh ngheq dyei jyungshuk dah lyi nghuot. 15Nyeih yau ngheq dyei jyungshuk yah nyah zvbiq jyungshuk ma suon, yaunos jyungshuk khyvlyis beqlus dvdoeu tsank phudyei chah.

Lhuiq kat Pwe Jyungshuk

(Lew 23:5-14)

16Cangxeih lhamhmuh khyvp, dvci nyei vnyeih lyis Yhensain lhyi chungh dah Lhuiq Kat Pwe kuot chah. 17Dvci oeng vnyeih lyis nyhet nyeih nyangh dah lomsnoq cho pwe xi. Hauh gyo lyis bicheih ma kat ohlhyoq kyingh zo chah. 18Hauh pwe cangxeih vnyeih lyis namoq gas paiq das nyhenshang huom chah: muh ma gis zwi. 19Yhensain lhyi zonoms jyungshuk khyvlyis ngheq dyei jyungshuk phudyei chah. Houka nos ma bos dah noeulu kyoh aiq doeu, yvnglus dvdoeu, zvn dyingh dah yvnglus lo nyhet doeu nghuot. 20Vgus gus jyo jyungshuk gas tsanlun coeu lhoeuq dah monh phudyei chah: noeulu dvdoeu mas 6 paung, yvnglus mas 4 paung, 21Yvnglo dvdoeu mas 2 paung nghuot. 22Yaunos jyungshuk khyvlyis beqlus dvdoeu eq phudyei chah. Heisoeh khyvlyis dius jens xiklyis cheihshang cho kuot chah. 23Nvpsangh vjangh ngheq dyei jyungshuk mas haih zis tsain tsank phudyei chah. 24Houyah dvyhangteh, nyhet nyeih gonh Yhensain lhyi nhaiqdoeus nhang dah zonoms jyungshuk nyang lyis phudyei chah. Heika nyeih yau ngheq dyei jyungshuk yahge zvbiq jyungshuk mas tsank phudyei chah. 25Nyhet vnyeih lyis paiq das nyhenshang huom chah, muh ma gis zwi.

Jyo Yhomh Pwe Jyungshuk

(Lew 23:15-22)

26Yhensain jyank mas jyo saiq jyungshuk chi los dah jyo yhomh pwe cangxeih vnyeih lyis namoq paiq das xiklyis huom chah, hauh nyeih lyis nyeih yau muh cha eq ma gis zwi. 27Yhensain lhyi nhaiqdoeus nhang dah xangh shom khyvlyis ngheq phudyei jyungshuk phudyei chah. Houka nos ma bos dah noeulu kyoh aiq doeu, yvnglus dvdoeu, dvzvn dyingh dah yvnglus lo nyhet doeu nghuot. 28Vgus gus jyo jyungshuk eq tsanlun coeu yah lhoeuq dah monh phudyei chah. Houka noeulu dvdoeu mas 6 paung, yvnglus mas 4 paung, 29yvnglo dvdoeu mas 2 paung nghuot. 30Yaunos jyungshuk khyvlyis beqlus dvdoeu eq phudyei chah. Heisoeh khyvlyis dius jens dah xiklyis cheihshang cho kuot dyei. 31Nyeih yau ngheq dyei jyungshuk yahge jyo jyungshuk mas haih zis yahge zvbiq jyungshuk tsank phudyei.

Ngochang Common Language Bible

© Bible Society of Myanmar 2010

More Info | Version Index