Search form

GYUNG 31

Midian lyis Lvto Phuk

1Yhensain Moshe lhyi taiq, 2Midian jens lyis Israel jens xiklyis lvto phuk aq. Hauh zis dye thang lhyi nvng shei das, ge.

3Housoeh las Moshe eq dius jens lyis taiq: jeszan das xiklyis cicont kuot geh. Housoeh namoq Yhensain xiklyis Midian jens lyis zan las lvto yoh phuk das. 4Israel dvkoq masyah jeszan das dius dvkhyoengh khyoengh nhang aq, ge. 5Housoeh dvkoq mas dvkhyoengh khyoengh tsain khyen lha, dvnganh lyis dvmons aiq khyoengh jeszan das zis cicont nghuot. 6Moshe ka gyingshang vyhang yahge vlho dyei das zis muot das lvbuh yvwons yoeus soeu, phudyei Eleaza lo Phineha dah vmingh o mha jeszan das zis nyamoq lyis nhang kat. 7Yhensain Moshe lhyi tying toh vgus, nyamoq Midian lyis zan las, yukgis dvnganh sat. 8Houmha Ewi, Rekem, Zur, Hur, Reba ge Midian hwankti oeng yuk bos. Beor lo Balam lyis eq sat.

9Israel jens gas Midian vmesbih jens yahge loshang jens dvnganh nyhik los. Nyamoq dah noeu, yvng phung zisyos dvnganh lyis lvnyhvp khyvlyis yoeus. 10Nyamoq dah wus jens yahge thoenggus dvnganh ngheq. 11Nyamoq gas nyhik toh dah lvnyhvp ge thung dius, gaunyhauq dvnganh yoeus los. 12Nyamoq hauh yvlyis Yerikho twi twi Yodan lvng thyitvp Moab pa mha thoeng nyeis Moshe, phudyei Eleaza yahge Israel dius phung jyank mas tsain chi los.

Jesphung Tauh los

13Moshe, Eleaza yahge gohtoeu dius phung dah uhshe bang dvnganh gas, jesphung lyis zes das ge dvp masyah thuq e. 14Moshe ka, jeszan masyah tauh los bang, dius dvkhyoengh guon, dvxo guon zau jens yahge moqphung lyis nhaiqyo. 15Nyang nyamoq lyis nyei zis gas, Namoq hauh vmesbih jens dvnganh lyis chamus kang dwis nhang toh goh? 16Balam taiq shet cho chank dah vmesbih jens gas Peor mas dius jens lyis Yhensain lhyi lom ma luk shwih kuot zis soh geh. Houka Yhensain dah dius jens mas yomh she los zis nghuot. 17Housoeh las gvshih yukgislo dvnganh, yukgis yah yhetgoh goeus dah vmesbih dvnganh sat geh. 18Nye loshang jens yahge lonyi gyingh jens dvnganh lyis gas namoq xiklyis kang dwis nhang toh geh. 19Gvshih namoq dvnganh, dius sat soeu, mvng zangh soeu hank laus eq dvp nghe pheh nyhet nyeih thoeng nyeis chah. Somh vnyeih yahge nyhet vnyeih lyis namoq nyang yahge namoq nyhik los dah vmesbih jens lyis cheihshang geh. 20Namoq dah dyimis dvnganh, shohyeis yah, beq mauh yah, saiq yah kuot dah kyahsoe dvnganh lyis eq cheihshang chah, ge.

21Jeszan masyah tauh los bang lyis Phudyei Eleaza taiq, Heika Yhensain Moshe lhyi dyei toh dah lyi tsain nghuot. 22-23Ngwis, xing, thunk, thyeq, thunk thyoeu yahge cui teh, nyi mas ma ngeh dah vyhang lhyi ka nyi mas chilhyuot zis yah cheihshang chah. Vyhang dvnganh gas cheihshang das xiklyis jeis mas cheihshang chah. 24Nyhet vnyeih lyis namoq dyimis cheih chah. Hauh thang lhyi namoq lhoqshang lha dvp khau mha wvng das toeuh yoh das.

Lvnyhvp gvm

25Yhensain Moshe lhyi taiq, 26Nvng, phudyei Eleaza, dius phung uhshe bang yah dvgeh, nyhik los dah thung dius yahge gaunyhauq lyis suon geh. 27Hau yoeus los yvlyis aiq boms yih yih gvm geh. Dvboms gas jeslo jens xiklyis, gohtoeu dvboms gas nyet dah dius phung xiklyis nghuot. 28Jeslo jens yah sen dah vboms mas zis Yhensain xiklyis khoengh khyvlyis, thung dius oengxo mas dvyuk dyei das. Noeu, mauhlyihzoe, yvng shvbeq mas zis eq housoeh dvyhangteh nghuot. 29Hauh zis Yhensain lhyi lhyenwhei vlu khyvlyis phudyei Eleaza lyis kyauh geh. 30Nyet dah dius phung nyhenshang vboms mas zis thung dius oengci mha dvyuk, noeu, mauhlyihzoe, yvng shvbeq mas zis eq housoeh dvyhangteh nghuot. Hauh zis tsain yoeus las Yhensain dah Zvng muh wons bang Lewi jens lyis dyei geh, ge. 31Moshe yahge Eleaza gas Yhensain tying toh zis kuot.

32-35Jeslo jens nyhik los dah lvnyhvp masyah nyet shih zis gas yvng shvbeq khyuk sens nyhetmons oeng khyoengh, noeu nyhetmons aiq khyoengh, Mauhlyihzoe khyukmons dvkhyoengh, yahge Lonyi gyingh somh mons aiq khyoengh nghuot. 36-40Jeslo jens dah gvmboms dvgohyih gas, yvng shvbeq somhsens somhmons nyhet khyoengh oengxo nghuot. Hou mhayah khyukxo nyhetci oeng gas Yhensain xiklyis khoengh nghuot. Jeslo jens xiklyis noeu somhmons khyuk khyoengh mas nyhetci aiq gas Yhensain xiklyis khoengh nghuot. Jeslo jens xiklyis mauhlyihzoe somh mons oengxo mha khyukci das gas Yhensain xiklyis khoengh nghuot. Jeslo jens xiklyis lonyi gyingh dvmons khyuk khyoengh mas somhci aiq yuk gas Yhensain xiklyis khoengh nghuot. 41Housoeh las Moshe ka Yhensain tying toh vgus hauh khoengh Yhensain xiklyis lhyenwhei vlu khyvlyis Eleaza lyis kyauh.

42-46Dius phung dah gvmboms eq jeslo jens dah gvmboms yah dvyhangteh nghuot. Yvng shvbeq somhsens somhmons nyhet khyoengh oengxo, Noeu somhmons khyuk Khyoengh, Mauhlyihzoe somhmons oengxo yahge lonyi gyingh dvmons khyuk khyoengh nghuot. 47Moshe ka haih gvmboms masyah thung dius yahge gaunyhauq oengci mha dvkoeuq koeuq yoeus las Yhensain Zvng muh wons bang Lewi jens lyis dyei. Houka Yhensain Moshe lhyi tying toh cho nghuot.

48Hauh thang lhyi Jesphung dah jeszau jens Moshe jyank mas los taiq. 49Ngamoq dah o mha jeslo jens lyis suon lhyi dvyuk eq ma dyuk. 50Housoeh las ngamoq hank eq hank yoeus los dah xing shunkzis, Loqyom thoengh, thoengh, loqkyop, nodangh, ywi tsain chi los. Hauh zis Yhensain ngamoq dah yaunos khyuot dyei das xiklyis jyungshuk dyei. Housoeh nyang ngamoq lyis gos dyei das, ge. 51Moshe yahge Eleaza gas, nyamoq jyank mas dah xing shunkzis lyis lhom yoeus. 52Jeszau jens dyei dah vlu dvnganh lyis 400 paung vluk bos. 53Jeszau jens ma nghuot bang gas nyamoq yoeus los zis nyamoq nyang yoeus toh. 54Housoeh Moshe yahge Eleaza gas hauh xing lhyi Zvng mas yoeus los. Housoeh Yhensain ka Israel dius jens lyis gos toh dyei das.

Ngochang Common Language Bible

© Bible Society of Myanmar 2010

More Info | Version Index