Search form

GYUNG 5

Ma lhoq Bang

1Yhensain Moshe lhyi taiq, 2Dvmjot, ri nos, mvng zangh las ma lhoq bang yuk khanghmuh lyis, dvp nghe pheh thuq toh aq, oen Israel jens lyis tying toh aq. 3Lyi khyvlyis ma lhoq bang dvnganh lyis thuq nhang aq: housoeh lyis ngos ngah dius jens mas nyeis dah dvp lyis vwot v-oeu ma bweh das. 4Israel jens eq domsyos gyo las nyamoq dvnganh lyis dvp masyah thuq toh.

Cu cho Khyauh

5Yhensain Moshe lhyi 6Israel jens xiklyis o mha dah taiq shet cho dyei. Hank laus eq Yhensain lhyi lom ma luk dvyuk yuk lyis tyi lha kuot cu lhyi, 7Nyang nyah yaunos rhen lha nyang kuot cu soeu lhyi oengboms dvboms lung las dyingh shoq khyauh chah. 8Nghuot laus eq hauh soeu shei lha nyang yah ni dah boekyis ma bos lyis, houka phudyei soeu xiklyis Yhensain lhyi dyei chah. Hauh thoq lyis hai yobos bos soeu xiklyis yvnglus dvdoeu yah cheihshang cho kuot chah. 9Israel jens Yhensain lhyi lhyenwhei dyei dah jyungshuk khanghmuh gas, nyamoq e dyei dah phudyei soeu yah sen. 10Phudyei soeu khanghmuh eq nyang lyis los dyei dah jyungshuk lyis yoeus toh das.

Nyi Lvng Soe

11Yhensain Moshe lyis tying toh, 12-14Israel jens lyis o mha dah taiq shet cho dyei aq. Vbusbih dvyuk nyah yhensain nyhiq gohtoeu yukgis yah yhetgoh las nyah gungs lyis vwot v-oeu kuot zis yah nyang lyis lom ma luk ge tsuk. Nghuot laus eq nyah yhensain nyhiq gohyuk yah yhetgoh nyeis zis ma nyvng, kanghjyoeng eq ma bos, hauh cho zauh toh yvmvyah nyah yhensain phoq gas soh soh ma nghuot. Yhensain nyhiq nyang lyis lom ma luk ma bweh laus eq nyang ma jingh lyis, 15vbusbih gas nyah yhensain nyhiq lyis phudyei soeu jyank mas shwih e chah. Nyang dyei chah dah jyungshuk monh aiq paung eq chi e chah, nghuot laus eq nyang hauh monh mas tsanlun coeu ma gis kat, xangh coeu eq ma gis kih: khasoeh ge lyis houka yhensain phoq tsuk las jyoeng zis thuq los das xiklyis jyungshuk dvnghuot.

16Phudyei soeu eq hau vmesbih lyis shwih las phon xik mas yap nhang das. 17Phudyei soeu ka tsoh lang mas gyingshang jeis huot kat, Yhensain xikkhonh Zvng mas dah tsoh dvtsiq yoeus las hauh jeis mas kat das. 18Phudyei soeu ka hauh vmesbih dah cam pi khyoq dyei las monh jyungshuk lyis nyah loq mas kat dyei. Phudyei soeu nyah loq mas gas nhoengh dah jeis khoh khuq chi toh. 19Hauh thang lhyi phudyei soeu ka hauh vmesbih lyis nyang taiq dah kyamptang dang lyis lhom yoeus nhang das. Nvng lvng ma shuot lyis gas hai nhoengh dah jeis khoh nvng lyis ma zangh das. 20Nghuot laus eq nvng lvng shuot lyis gas, 21Yhensain ka nah dius jens mas nah nyings lyis nhoengh bas jungh. Nyang nah tanghbauh gyih nhang lha, womdau yam los nhang bas jungh. 22Hai nhoengh dah jeis khoh gas nah womdau mas wvng las nah womdau yam los zis yahge tanghbauh gyih bas jungh, ge.

Hauh vmesbih gas, Ngos lhom yoeus, Yhensain kuot bas jungh, ge das.

23Phudyei soeu ka, hai nhoengh dang lhaih toh lho lha, hauh zis hau jeis khoh khuq mas cheih kat das. 24Hau vmesbih lyis nos nhang das hau nhoengh dah jeis khoh ma shuk nhang shih lyis, 25phudyei soeu ka vmesbih loq masyah monh jyungshuk lyis yoeus das las Yhensain lhyi dyei das. Hauh thang lhyi hauh yvlyis phon mha kih das. 26Hauh thang lhyi nyang lhyenwhei jyungshuk khyvlyis hauh monh dvtsop yoeus las phon mha ngheq das. Thang thank lyis nyang hau vmesbih lyis hau jeis khoh shuk nhang das. 27Hauh vmesbih lvng shuot lyis gas, hauh jeis gas nyang lyis nos nhang das las nyah womdau yam, tanghbauh gyih loh das. Nyah dius jens mas nyah nyings gas nhoengh zis xauh das. 28Nghuot laus eq nyang yobos ma bos lyis gas, nyang lyis cha ma zangh las nyang loshang bos das.

29Heika vbusbih dvyuk nyah yhensain nyhiq lyis lvng shuot ge tsuk dah soe mha dah lyi nghuot. 30Vmesbih lyis phon xik mas loh yap nhang lha phudyei soeu ka haih lyi yah dvyhangteh kuot das. 31Yhensain phoq gas yobos luiq das, nghuot laus eq vmesbih gas nyang yobos bos lyis gas yobos kham chah, ge.

Ngochang Common Language Bible

© Bible Society of Myanmar 2010

More Info | Version Index