Search form

GYUNG 9

Lhuiq kat Pwe Aiq Vlhain

1Israel dius jens Egutu masyah thuq thang lhyi aiq vzvn, cangxeih vkhyvp lyis, Sina mhanhdyvp mas Yhensain Moshe lhyi taiq, 2-3Haih lhamhmuh khyvp dvci nyei vnyeih, nyenhthang buiswvng masyah xi lha Israel dius jens nyah lyi nyah thungh yah dvyhangteh Lhuiq Kat Pwe kuot chah, ge. 4Housoeh las Moshe ka Israel dius jens lyis Lhuiq Kat Pwe kuot das zis taiq kat. 5Nyamoq eq Sina mhanhdyvp mas cangxeih vkhyvp, dvci nyei vnyeih nyenhthang lhyi Lhuiq Kat Pwe kuot. Dius jens gas Yhensain Moshe lhyi tying toh vgus dvnganh kuot.

6Nghuot laus eq mvng lyis zangh tanh yvmvyah ma lhoq las hauh nyeih lyis Lhuiq Kat Pwe ma xauh bos bang vbusbih dvyhamh bos. Nyamoq gas, Moshe yahge Aron jyank mas e lha taiq, 7Ngamoq gas, mvng lyis tanh goeus las ma lhoq, nghuot laus eq ngamoq gas doengs toh shishenh lyis Israel jens yah dvgeh Yhensain lhyi jyungshuk dyei das cho chamus tomp toh das lah, ge.

8Moshe phuk taiq zis gas, Ngos Yhensain jyank masyah taiq shet cho xauh yoeus shoq langh shih geh, ge.

9Yhensain Moshe lhyi taiq, 10Israel dius jens lyis taiq aq: Namoq eq namoq dah vnyau vshih dvyuk yuk mvng zangh tanh las ma lhoq, nghuot ya we gyung loh, nghuot laus eq Lhuiq Kat Pwe kuot mes lyis, 11lhamhmuh dvkhyvp thang lhyi hauh gungsthaiq lhamhmuh aiq vkhyvp dvci nyei vnyeih nyenhthang bicheih ma kat ohlhyoq yahge anghkhoh huq zo zis yah pwe kuot das toeuh bos. 12Zonoms lyis nungsnvp jweh shoq vnyhet toh, gaunyhauq shohyau eq vkhyauh. Lhuiq Kat Pwe vjungs vkho yah dvyhangteh dvnganh kuot chah. 13Nghuot laus eq dvyuk yuk lhoqshang, we gyung eq ma loh zis Lhuiq Kat Pwe mha ma bos nyeis soeu lhyi ka, doengs toh shishenh lyis nyang ngos lyis jyungshuk ma chi los yvmvyah, ngah dius dvyuk nghuot oen ma nghamh dyei lo das. Nyang nyah yaunos gvng mas nyang yobos xauh chah.

14Namoq mas nyeis dah lvbaus eq Lhuiq Kat Pwe bos kuot mes lyis nyah vjungs vkho yah dvyhangteh dvnganh kuot chah. Mau sain laus eq lvbaus laus eq yuk khanghmuh xiklyis lyi dvja dvtoh.

Bvng dah Jyommauh

(Dyu 40:34-38)

15-16Yhensain nyeis dah Zvng toeutsung nyeih lyis hau yvlyis jyommauh yah los nghop toh: Nyenh lyis hau jyommauh gas nyi teh doeus. 17Hauh jyommauh yop loh lyis Israel jens gyung tsain toq. Jyommauh gyoh los joqyos mas nyamoq doms thoeng. 18Yhensain vmingh yah Israel jens dyens toq; Yhensain vmingh yah nyamoq Zvng toeutsung lha thoeng: Zvng thoq mas jyommauh joq dvchank nyamoq dvyhangteh thoenggus mas nyeis. 19Hau jyommauh Zvng thoq mas nyangh nyangh joq lyis, nyamoq Yhensain domsyos gyo las ma loh. 20Dvlhain lhain ka Zvng thoq mas hau jyommauh nyangh nyangh ma joq; cha nghuot nghuot nyamoq gas Yhensain taiq vgus thoeng, nghuot ya loh. 21Dvlhain lhain hauh jyommauh gas nyenh masyah nvp jweh shoq kyingh dvjoq las, nyamoq gas hau jyommauh yop loh yah dvyih loh. Khanhamp laus eq jyommauh yop loh lyis nyamoq loh. 22Aiq nyeih laus eq, dvkhyvp laus eq, nyoshoq nyeih nyangh laus eq, Zvng thoq mas jyommauh nghop joq dvchank, nyamoq gyung ma loh, jyommauh yop loh lyis dvloh. 23Yhensain Moshe lhyi yah dyei toh dah tyingtoh dang domsyos gyo las thoenggus kuot, gyung suh.

Ngochang Common Language Bible

© Bible Society of Myanmar 2010

More Info | Version Index