Search form

Hechos 1

Ri ubi'im lo ri Jesús puwi ri Ruxlabixel ri Dios

1Chupa ri nabe nulibro, xintz'ibaj pan che rilal Teófilo, puwi tak ri xu'an ri Jesús y tak ri xuc'utu chwi lo ri jekebal re ruchac 2c'a chupa ri k'ij echiri' xc'ul chila' chicaj ruma ri Dios. Chwach c'u pan ri' rubenam chila' chicaj, Rire ruma ri Santowilaj Ruxlabixel ri Dios xuya can takanic chique rutako'n+ ebucha'om puwi tak ri chirajawaxic caqui'ano. 3Chwi c'u rucamic, xc'astaj lo chiquixo'l ri ecaminak y c'a xc'oji' cuarenta k'ij che ruwachulew. Chupa tak c'u la' la k'ij, uq'uiyal laj e la' xuc'ut uwach chiquiwach rutako'n y xch'a't cuc' puwi ri takanic re ri Dios. Jec'ula' ri', lic xuc'utu pakatzij wi Rire c'aslic.

4Echiri' ri Jesús e la' c'a c'o cuc' rutako'n, xubi'ij chique:

—Chixc'ola Jerusalem cha' quiwoy'ej rubi'tisinic ri Nukaw, ri nutzijom chi lo ri'in chiwe; wa' e ri bautismo re ri Ruxlabixel ri Dios. 5Pakatzij wi ri Juan xuya ri bautismo ruc' ya'; no'j ri bautismo quic'ul ri'ix e ruc' ri Santowilaj Ruxlabixel ri Dios; yey wa' cu'ana xa chupa tak wa' wa k'ij catajin lok —xcha chique.

Ri Jesús catzelej chila' chicaj

6Jun k'ij c'ut ri quimolom quib ruc' ri Jesús jewa' xquitz'onoj che:

—Kajawal, ¿chupa tak wa' wa k'ij oj c'o wi, cayac tanchi nawi la ri takanic re ri katinamit Israel jela' pacha' ri u'anom lo ojertan?+ —xecha'.

7Y ri Jesús xuc'ul uwach:

—Ri'ix na ya'tal ta chiwe quiweta'maj ruk'ijol y ru'orayil echiri' cu'ana tak wa' ri Nukaw, ma ronoje wa' xew puk'ab Rire c'o wi. 8Pero quic'ul c'u ichuk'ab ri'ix echiri' cakaj lo ri Santowilaj Ruxlabixel ri Dios piwi' y quixu'ana c'u ix tzijol we'in chupa wa tinamit Jerusalem, chupa ronoje ri luwar re Judea y re Samaria y c'a che ronoje luwar re ruwachulew —xcha chique.

9Ec'uchiri' xuq'uis ubi'xiquil tak wa', xc'am bi chila' chicaj; y ec'u la' caquitzutza' rutijo'n xsach bi chiquiwach chupa jun sutz'. 10C'a caquitzutza' c'u pan chila' chicaj pa xc'am wubi ri Jesús, echiri' xewinakir queb achijab cuc' yey wa' lic sak ri quik'u'.

11Wa'chijab xech'aw c'u chique, jewa' xquibi'ij:

—Achijab ix aj Galilea, ¿su'be c'a quixtzutzu'n chicaj? Ma wa Jesús, ri xel bi chixo'l ri'ix y xc'ul chila' chicaj, Rire cac'un tanchic. Jec'ula' pacha' xiwilo xe'ec, jela' cac'un tanchic —xecha chique.

Ri Matías cacha'ic re cac'oji' puc'axel ri Judas aj Iscariot

12Ec'uchiri', ri e tako'n xebel bi chwach ri juyub Olivos y xetzelej Jerusalem. (Wa juyub xa nakaj c'o wi lo che Jerusalem, laj jun kilómetro unajtijil; jec'ula' rique na xic'ow ta uwi' ri caquibinibej che ri ya'talic e chirij ri cojobal que raj judi'ab puwi ri k'ij re uxlanibal.)+

13Echiri' xebopon Jerusalem, xebak'an chicaj pa ri cale' ja pa ejekel wi ri Pedro, ri Jacobo, ri Juan, ri Andrés, ri Felipe, ri Tomás, ri Bartolomé, ri Mateo, ri Jacobo ruc'ajol ri Alfeo; ri Simón ri cabi'x “ri Zelote” che y ri Judas ruchak' ri Jacobo. 14E conoje rique lic xa jun quic'u'x quiya'om quib pa oración, junam cuc' jujun ixokib, ruc' ri María ruchu ri Jesús yey cuc' tak ruchak' ri Jesús.

15Chupa c'u tak la' la k'ij, ri Pedro xtaq'ui' chiquiwach ri hermanos quimolom quib, laj e ciento veinte chi conoje, y jec'uwa' xubi'ij chique:

16«Hermanos, lic chirajawaxic wi e cu'ana na ri tz'ibital can chupa Ruch'a'tem ri Dios puwi ri xubi'ij ri Santowilaj Ruxlabixel ruma ri David echiri' xch'a't puwi ri Judas aj Iscariot. Wa' e ri xnabej chiquiwach ri xechapaw bi ri Jesús, 17tob rire e jun kachbi'il y xya' che xchacun junam kuc' chupa wa chac re ri Dios» xcha'.

18(Xlok' c'u juch'akap ulew ruc' ri puak xya' che ri Judas ruma ri na jusuc' taj xu'ano echiri' xuc'ayij ri Jesús. Ec'u ri Judas xu'xuluba' lo rib chwi jun che' y echiri' xtzak lok, xrakaro'b rupa y ronoje ri rixcolob xquich ca'nic. 19Wa' xqueta'maj conoje ri ejekel Jerusalem. E uwari'che, xquicoj “Acéldama” che wa jun luwar; wa' que'elawi “Luwar re Quic'” pa ri quich'a'tem rique.)

20Xubi'ij c'u ri Pedro:

«Jec'uwa' tz'ibital can puwi ri Judas chupa ri libro re ri Salmos:

Ri luwar pa jekel wi chu'ana jun luwar catz'intz'otic,

y na jinta junok cajeki' chiri'. Sal. 69:25

Y jewa' cubi'ij tanchic:

Lic chirajawaxic catzucux jun chic aj chac cha' cac'oji' puc'axel Sal. 109:8

cacha'.

21»E c'o c'u jujun achijab chikaxo'l xex ojcachbilam echiri' c'a c'o ri Jesús kuc', 22chwi lo echiri' xuc'ul ri bautismo ruma ri Juan y c'a echiri' xel bi kuc' y xc'ul chila' chicaj ruma ri Dios. Lic chirajawaxic c'ut cakacoj junok chique wa' wa'chijab cha' junam cojtzijon puwi ruc'astajibal ri Jesús» xcha ri Pedro chique.

23Xequicha' c'u ca'ib achijab. Jun e ri José, ri cabi'x Barsabás che y cojom jun retzelal ubi' “Justo” quecha che. Ri jun chic, Matías rubi'. 24Y xqui'an orar, jewa' xquibi'ij: «Kajawal, Rilal eta'am la ri quic'u'x conoje ri ticawex. C'utu c'u la chikawach chinok chique wa ca'ib achijab cha'om la 25cha' cuc'am bi wa chac y ca'an tako'n la che; jec'ula' cac'oji' puc'axel ri Judas aj Iscariot, ri xrok'otaj can ri chac xya' che y xe'ec c'u pa ri luwar takal che» xecha'.

26Ec'uchiri', xqui'an jun sorteo cha' cak'alajinic china chique wa ca'ib cacanaj can puc'axel ri Judas; y wa' xtzak puwi ri Matías. Chwi c'u ri', rire xu'ana e jun cuc' ri junlajuj chic e tako'n.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index