Search form

Hechos 10

Ri xuk'alajisaj ri Dios che ri Cornelio

1Pa ri tinamit Cesarea c'o jun achi Cornelio rubi'. Rire e capitán que ri soldados e cuq'uil ri cabi'x chique “E aj Italia”. 2Ri Cornelio lic jusuc' rubinic usilabic y lic c'o xi'in ib pa ranima' chwach ri Dios junam cuc' conoje ri ralc'o'al. Rire lic cuya puak re to'bal que ri niba'ib e aj judi'ab y lic cu'an orar chwach ri Dios.

3C'o c'u jun k'ij ri', laj che ri urox ora+ benak k'ij xk'alajisax jun c'utubal re ri Dios chwach. Ri xc'ut che, e jun ángel re ri Dios e ri' xoc chiri' pa c'o wi rire y jewa' xubi'ij che:

—¡Cornelio! —xcha che.

4Ri Cornelio lic xutzu' ri ángel y ruc' xi'in ib xubi'ij che:

—¿Sa' ri ca'aj la, wajawal? —xcha'.

Ri ángel xuc'ul uwach:

—E tak ra oración y ri to'bal que ri niba'ib a'anom ri'at, wa' uc'ulum ri Dios pacha' jun kasa'n chwach Rire. 5Ec'u ri ca'an wo'ora e chebataka bi achijab pa ri tinamit Jope re que'quisiq'uij jun achi Simón rubi', ri cabi'x Pedro che. 6Wa' wa'chi jekel chuchi' ri mar pa rocho ri Simón, jun aj t'isol tz'u'um. Wa' wa Pedro cubi'ij chawe sa' ri lic chirajawaxic wi ca'ano —xcha'.

7Echiri' xel bi ri ángel xch'a't ruc', ri Cornelio xebusiq'uij ca'ib raj chac y jun soldado lic c'o xi'in ib pa ranima' chwach ri Dios, wa' e jun chique ri e c'o puk'ab. 8Xutzijoj na c'u chique ronoje ri xrilo; tec'uchiri', xebutak bi pa ri tinamit Jope.

Ri xuk'alajisaj ri Dios che ri Pedro

9Chuca'm k'ij c'ut echiri' e c'o pan pa be e ri' catajin coponic chunakaj ri tinamit, ri Pedro xak'an chwi ri ja cha' cu'ana orar echiri' ya catic'oj ri k'ij.+ 10Xpe c'u jun unimal numic che y lic xraj cawa'ic.

Catajin c'u uyijbaxic ruwa echiri' xakic'ate't c'o xuc'ut ri Dios chwach. 11Xril ruwa caj jakalic. C'o c'u pacha' jun nimalaj c'ul caripipic y ximital lo che ri cajib utza'm, e ri' cakasax lo che ruwachulew. 12Chupa wa' wa c'ul e c'o ronoje quiwachlibal awaj: wa' e ri c'o cajib cakan, ri quecharar pulew yey ri quexiq'uic' che ruwa caj.+

13Yey xuta jun kulaj jewa' xubi'ij:

—Chatyactajok Pedro; chacamisaj y chatija' —xcha che.

14Pero ri Pedro xubi'ij che:

—Na can'an ta c'ana ri', Wajawal, ma ri'in na jinta c'ana c'o nutijom e la' ch'ul o na takal taj catijic —xcha'.

15Xch'aw tanchi c'u ri jun kulaj, jewa' xubi'ij che:

—Ri ujosk'im chi ri Dios, ri'at mabi'ij ch'ul che —xcha che ri Pedro.

16Wa' oxlaj xu'ano; tec'uchiri', ri nimalaj c'ul xtzelej tanchi chila' chicaj. 17Ec'u ri Pedro catajin che utz'onoxic chiribil rib sa' que'elawi ri xc'ut chwach, echiri' xec'un rachijab etakom lo ruma ri Cornelio. Rique quitz'onobem lo ri rocho ri Simón ri cut'is tz'u'um, yey wo'ora e c'o chwa ri puerta. 18Xech'aw c'u apanok y xquitz'onoj we chiri' jekel wi ri Simón, ri cabi'x Pedro che.

19Ec'u ri Pedro c'a catajin ne che uch'obic rakan puwi ri xc'ut chwach, echiri' ri Ruxlabixel ri Dios xubi'ij che: «Chawila', ma le' oxib achijab catquitzucuj. 20Chatyactajok, chatkajok y jat cuc'. Muxi'ij rib ac'u'x cate'ec cuc', ma in ri intakayom lo que» xcha che.

21Xkaj c'u lo ri Pedro pa e c'o wi rachijab etakom lo ruma ri Cornelio, y xubi'ij chique:

—Ri' in c'olic, in ri quintzucuj alak. ¿Sa' ri petinak wi alak wuc'? —xcha chique.

22Rique xquibi'ij che:

—C'o jun capitán+ aj Roma, Cornelio rubi'. Rire e jun achi lic jusuc', c'o xi'in ib ruc' chwach ri Dios, yey chom ruch'a'tibexic ca'an cuma conoje raj judi'ab. Xbi'x c'u che rire ruma jun santowilaj ángel re ri Dios, cutak lo c'amic la re que'ec la chirocho y jec'ula' cuta ri cabi'ij la che —xecha'.

23Ec'u ri Pedro xebucoj bi pa ja y xuya luwar chique quecanaj can la jun ak'ab chiri'. Chuca'm k'ij c'ut xe'ec cuc', yey xecachbilaj bi jujun hermanos e aj pa ri tinamit Jope.

24Chuca'm k'ij c'ut xebopon pa ri tinamit Cesarea pa eroye'em wi ri Cornelio. Rire umolom chi quichi' ri ratz-uchak' y ri ramigos ri c'ax caquina' quib ruc'. 25Echiri' xopon ri Pedro, xel lo ri Cornelio che uc'ulic y xuxucuba' rib chwach re culok'oj uk'ij.

26Pero ri Pedro xuyaco y xubi'ij che:

—Yactaja la, ma ri'in xa in jun achi pacha' rilal —xcha'.

27Cach'a't c'u ruc' ri Cornelio, xoc bi y xebu'rika uq'uiyal ticawex quimolom quib chiri'. 28Xubi'ij c'u ri Pedro chique:

—Lic eta'am ralak, chikaxo'l ri oj aj judi'ab lic na ube taj we junok chike cujunimaj rib o cakib ruc' junok na e ta cuq'uil raj judi'ab. No'j ri Dios xuc'ut chinuwach ri'in na ube taj canch'ob rakan wa'.+ 29E uwari'che, echiri' xine'siq'uixok, na jampatana ximpetic y na jinta ne xintz'onoj we utz can'an wa'. Ec'u wo'ora cantz'onoj che alak, ¿su'chac xtak alak nuc'amic? —xcha'.

30Ri Cornelio xuc'ul uwach:

—E ucaj k'ij wa' ic'owinak je u'orayil wa', ri'in in c'o pa ayuno laj che ri urox ora+ benak k'ij, yey in c'o pa oración chiwocho echiri' xwinakir c'u chinuwach jun achi ucojom uk'u' lic cawolk'inic 31y jewa' xubi'ij chwe: “Cornelio, ri Dios utom ra oración y c'o chuc'u'x janipa ri to'bal que ri niba'ib a'anom. 32Chataka junok chupa ri tinamit Jope re cu'siq'uij ri Simón ri cabi'x Pedro che. Rire c'o pa rocho ri Simón, jun achi aj t'isol tz'u'um c'o rocho chuchi' ri mar. Yey echiri' cac'unic, e rire ri cach'a't awuc'” xcha'.

33»Jec'uri'la', xintakala' c'amic la; y lic utz ri x'an la, ma xpe la. Ec'u wo'ora, konoje oj c'o wara chwach ri Dios cha' cakata ronoje ri utakom wi lo la cha' cabi'ij la chike —xcha'.

Ri Pedro cutzijoj ri Utzilaj Tzij chirocho ri Cornelio

34Ec'uchiri', xujek cach'a't ri Pedro, jewa' xubi'ij:

«Pakatzij wi wo'ora canmaj usuc' ri Dios na cacha'w ta chiquixo'l ri ticawex. 35Ma ri cu'ano e lic cuc'ul uc'u'x echiri' ri ticawex pa tak ronoje tinamit c'o xi'in ib cuc' chwach Rire y caqui'an ri lic jusuc'. 36C'o c'u ri xuk'alajisaj ri Dios chique ri e aj Israel; wa' e ri Utzilaj Tzij, ri cuc'am lo utzil chomal ruma ri Jesucristo ri Kajawal konoje.

37»Eta'am c'u ralak sa' tak ri xu'an ri Jesús echiri' ic'owinak chi ri tzijonic re ri Juan chwi ri bautismo ruc' ya'. Ri tzijonic puwi ri Jesús xujek lo c'a Galilea y xe'ec utzijoxic che ronoje ri luwar re Judea. 38Xeta'maj c'u ralak sa' ri xu'an ri Dios; xuya che ri Jesús ri aj Nazaret lic cac'oji' ri Santowilaj Ruxlabixel y ruchuk'ab Rire ruc'. Ec'u ri Jesús xe'ec pa tak luwar re cu'an ri utz y quebucunaj conoje ri eya'om pa c'ax ruma ritzel winak. Xu'an tak c'u wa' ma ri Dios lic c'o ruc'.

39»Ec'u ri'oj lic keta'am wa' ma xkil ronoje ri xu'an ri Jesús pa tak ri luwar re Judea y chila' Jerusalem. E wa' Rire ri xya'i' chwa cruz y xcamisaxic. 40Pero churox k'ij ri Dios xuc'astajisaj lo ri Jesús chiquixo'l ri ecaminak y xuya che xuc'ut uwach chikawach. 41Na xuc'ut ta uwach chiquiwach conoje ri tinamit, ma xew chiquiwach ri ebucha'om chi lo ri Dios ojertan; wa' e ri'oj, ri xojwa' junam ruc' y xkatij kamik'ina' junam ruc' echiri' c'astajinak chi lo Rire chiquixo'l ri ecaminak.

42»Yey xojutak c'u che utzijoxic che ri tinamit cha' cakak'alajisaj e Rire ri Aj K'atal Tzij ucojom ri Dios paquiwi ri e c'aslic y ri ecaminak. 43Puwi ri Jesús xetzijon lo conoje ri k'alajisanelab ojertan. Rique xquibi'ij e janipa ri quecojow re Rire, caquic'ul ri cuybal quimac ruma quicojom rubi'» xcha'.

Ri na e ta aj Israel caquic'ul ri Ruxlabixel ri Dios

44C'a cach'a't ne ri Pedro cuc' chwi tak wa' echiri' xkaj ri Santowilaj Ruxlabixel ri Dios paquiwi conoje ri quetaw re. 45Yey e petinak ruc' ri Pedro jujun e aj judi'ab quicojom rubi' ri Cristo. Wa' lic xcam canima' che, ma ri Santowilaj Ruxlabixel ri Dios xkaj paquiwi ri na e ta aj judi'ab. 46Quequitata' c'u ri' quech'a't pa jujun chic ch'a'tem ya'tal chique ruma ri Ruxlabixel ri Dios y lic caquiyac uk'ij ri Dios.

47Ec'u ri Pedro xubi'ij: «¿C'o neba junok cak'aten que caquic'ul ri bautismo ruc' ya'? Ma rique xquic'ul ri Santowilaj Ruxlabixel ri Dios jela' pacha' ri'oj» xcha'.

48Xtakan c'u che caya' ri bautismo chique pa rubi' ri Kanimajawal Jesucristo. Ec'uchiri', xebelaj che ri Pedro cha' cacanaj chi queb oxib k'ij cuc'.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index