Search form

Hechos 11

Ri Pedro cutzijoj sa' ri xu'an ri Dios cuc' ri na e ta aj Israel

1Ri e tako'n re ri Jesús cuc' ri hermanos e c'o Judea xquito e c'o na e ta aj judi'ab xecojow re Rutzij ri Dios puwi ri Cristo. 2Ruma c'u ri', echiri' xtzelej ri Pedro Jerusalem, ri hermanos e aj judi'ab lic xquichap pa ch'a'oj, 3jewa' xquibi'ij che: «¿Su'chac xatoc pa cocho ri na e ta aj judi'ab y xatwa' ne cuc'?»+ xecha'.

4Ec'u ri Pedro xujek utzijoxic chique chuchola'j su'anic xu'ana wa'. Jec'uwa' xubi'ij chique:

5«E ri'in in c'o pa ri tinamit Jope e ri' can'an orar echiri' xakic'ate't xk'alajisax jun c'utubal re ri Dios chinuwach. Wa' pacha' jun nimalaj c'ul ximital lo che ri cajib utza'm, xkasax lo chila' chicaj c'a pa la in c'o wi ri'in. 6Echiri' xintzu' chi utz sa' ri c'o chupa wa', xebenuwil c'u awaj c'o cajib cakan, itzel tak chicop re upa juyub, awaj quecharar pulew, yey ri quexiq'uic' che ruwa caj.

7»Yey xinta c'u jun kulaj, jewa' xubi'ij chwe: “Chatyactajok Pedro; chacamisaj y chatija'” xcha'.

8»Ximbi'ij c'u ri'in: “Na can'an ta c'ana ri', Wajawal, ma ri'in na jinta c'ana ch'ul o na takal taj catijic oquinak pa nuchi'” xincha'.

9»Ec'uchiri', xch'aw tanchi lo ri jun kulaj chila' chicaj, jewa' xubi'ij chwe: “Ri ujosk'im chi ri Dios, ri'at mabi'ij ch'ul che” xcha'.

10»Wa' oxlaj xu'ano. Tec'uchiri', ronoje xc'am tanchi ubi chicaj.

11»Chupa c'u la' la jok'otaj xec'un oxib achijab chwa ri ja pa in c'o wi; rique e petinak Cesarea, etakom lok cha' quinquitzucuj. 12Ec'u ri Ruxlabixel ri Dios xubi'ij chwe quin'ec cuc' y muxi'ij ne rib nuc'u'x quin'ec. Xin'ec c'u ri' cuc'; yey wa' wa wakib hermanos e aj Jope e c'o wara wuc', xojcachbilaj bi.

»Echiri' xojopon Cesarea, xojoc chirocho jun achi.+ 13Yey wa'chi xutzijoj chike su'anic xril uwach jun ángel chirocho. Wa' xo'ltac'al chwach rire y jewa' xubi'ij che: “Chebataka bi achijab pa ri tinamit Jope re que'quisiq'uij jun achi Simón rubi', ri cabi'x Pedro che. 14Ec'u rire colu'bi'ij chawe su'anic catcolobetaj ri'at cuc' conoje ri ejekel pa wocho” xcha ri ángel che.

15»Yey, echiri' ri'in xinjeko quinch'a't cuc' wa' wa ticawex na e ta aj judi'ab, xkaj ri Santowilaj Ruxlabixel ri Dios paquiwi' jela' pacha' xujekebej lok echiri' xkaj pakawi ri oj aj judi'ab.

16»Ec'uchiri', xc'un chinuc'u'x rubi'im can ri Kanimajawal echiri' xubi'ij: “Pakatzij wi, ri Juan xuya ri bautismo ruc' ya', no'j ri bautismo quic'ul ri'ix e ruc' ri Santowilaj Ruxlabixel ri Dios.”+

17»Ec'u uwari'che, we ri Dios xuya chique rique wa sipanic jela' pacha' ri xuya chike ri'oj ri cubul chi kac'u'x ruc' ri Kanimajawal Jesucristo, ¿in china ri'in cha' cank'atej ri Dios che u'aniquil wa'?» xcha ri Pedro.

18Ec'uchiri' xquita tak wa', na jinta chi xquibi'ij chirij ri Pedro, e xquijek caquiyac uk'ij ri Dios, jewa' xquibi'ij: «¡Uya'om ne ri' ri Dios chique ri na e ta aj judi'ab caquitzelej quitzij chwach cha' jela' c'o quic'aslemal!» xecha'.

Ri jekebal re riglesia pa ri tinamit Antioquía

19Ruc' rucamic ri Esteban, xjeker quiternabexic ruc' c'ax janipa ri quicojom rubi' ri Cristo. E tak c'u ri' wa' xequich bi y xebopon c'a chupa tak ri tinamit re Fenicia, re Chipre y ri tinamit Antioquía.+ Yey xew xquitzijoj can ri Utzilaj Tzij re ri Jesucristo chique ri e aj judi'ab.

20Chiquixo'l c'u wa hermanos e c'o e aj Chipre y e aj Cirene. Ec'u rique echiri' xeboc Antioquía, xquijek caquitzijoj ri Utzilaj Tzij re ri Kanimajawal Jesucristo chique ri na e ta aj judi'ab. 21Yey ruchuk'ab ri Kanimajawal lic c'o paquiwi rique. Lic c'u e q'ui ri ticawex xquicoj rubi' ri Cristo y xquijalc'atij ri quibinic.

22Ri quicojom rubi' ri Cristo e c'o Jerusalem, echiri' xquita wa', xquitak bi ri Bernabé cha' que'ec c'a chila' Antioquía. 23Echiri' xopon ri Bernabé y xril ri unimal rutzil uc'u'x ri Dios cuc' ri quicojom rubi' ri Cristo, lic xqui'cot che. Y xebupixabaj conoje cha' ruc' ronoje quic'u'x caquichuk'ubej quib chwach ri Kanimajawal.

24Ri Bernabé e jun achi lic utz uc'u'x, ruchuk'ab ri Santowilaj Ruxlabixel ri Dios lic c'o ruc' y lic c'o cubulibal uc'u'x. Ruma c'u ruchac rire, lic e q'ui ri ticawex xquicoj rubi' ri Kanimajawal Jesucristo.

25Tec'uchiri', ri Bernabé xe'ec pa ri tinamit Tarso re cu'tzucuj ri Saulo. Echiri' xuriko, xuc'am lo Antioquía. 26Xec'oji' c'u cuc' ri tinamit re ri Cristo ronoje ri jun junab, e ri' quec'utun chiquiwach uq'uiyal winak. Chiri' c'u ri', nabe laj xbi'x “cristianos” chique ri quicojom rubi' ri Cristo.

27Chupa tak ri' la' la k'ij e c'o jujun ek'alajisay runa'oj ri Dios xebel bi Jerusalem y xebopon Antioquía. 28C'o jun chique wa', Ágabo rubi'. Rire xyactajic y ruma ri Ruxlabixel ri Dios, xuk'alajisaj cape jun unimal numic chwi ronoje ruwachulew pa ejekel wi ri winak. (Wa' xu'ana chupa rutakanic ri Claudio.)+

29Ruma c'u wa', ri quicojom rubi' ri Cristo e c'o Antioquía xquiyijba' chiquiwach cha' caquitak pan to'bal chique ri hermanos ejekel Judea; chiquijujunal c'u ri' xquich'ob rakan janipa ri caquiya'o, wa' e chirij tak ri c'o cuc'. 30Y jela' xqui'ano; xquitak bi ri quikasa'n paquik'ab ri Bernabé y ri Saulo cha' caquic'am bi Judea y caquiya chique ri e aj wach re riglesia.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index