Search form

Hechos 13

Ri Bernabé y ri Saulo caquijek ri nabe quibenam che utzijoxic ri Utzilaj Tzij

1Chila' Antioquía chiquixo'libal ri quicojom rubi' ri Cristo, e c'o ek'alajisay runa'oj ri Dios y e c'utunel re Rutzij. Wa' e:

ri Bernabé,

ri Simón ri cabi'x k'ek che,

ri Lucio aj Cirene,

ri Manaén ri xq'uiyisax pa rocho ri Herodes ri rey re Galilea

y ri Saulo.

2C'o c'u jun k'ij echiri' rique quimolom quib re caquilok'nimaj uk'ij ri Kanimajawal yey e c'o pa ayuno, ri Santowilaj Ruxlabixel ri Dios xubi'ij chique:

«Chebicha'a ri Bernabé y ri Saulo chwe cha' caqui'an ri chac+ nuya'om chi lo paquik'ab» xcha'.

3Echiri' xquiq'uis ri oración y ayuno, xquiya ri quik'ab paquiwi rique y xequitak c'u bi.

Ri Pablo y ri Bernabé quebopon pa ri isla Chipre

4Ec'u ri Bernabé y ri Saulo e la' etakom bi ruma ri Santowilaj Ruxlabixel ri Dios, xebopon c'u Seleucia. Chiri' xebel bi pa barco y xebec pa ri isla Chipre.+ 5Echiri' xebopon Salamina, jun tinamit re Chipre, xquijek utzijoxic Rutzij ri Dios puwi ri Kanimajawal Jesucristo pa tak sinagogas que raj judi'ab. Yey c'o ri Juan+ cuc' re quito'bel.

6Xebic'ow c'u chupa ronoje ri isla Chipre y xebopon c'a chupa ri tinamit Pafos. Chiri' xquirik jun achi e cuq'uil raj judi'ab; rire aj k'ij yey e jun k'alajisanel xa casocoso'nic. Wa' wa'chi Barjesús+ rubi', yey pa ri ch'a'tem griego “Elimas” quecha che. 7Wa' wa aj k'ij c'o ruc' ri takanel Sergio Paulo, jun achi lic c'o una'oj. Ri takanel xebusiq'uij ri Bernabé y ri Saulo, ma lic curayij cuta Rutzij ri Dios puwi ri Kanimajawal Jesucristo.

8Pero rachi aj k'ij xutij ri' che quebuk'atej ri Bernabé y ri Saulo cha' ri takanel na cucuba' ta uc'u'x che ri Utzilaj Tzij re ri Jesucristo.

9Ec'u ri Saulo (ri cabi'x Pablo che) ruc' ruchuk'ab ri Santowilaj Ruxlabixel ri Dios xuch'iquiba' ruwach puwi ri Elimas, 10y jewa' xubi'ij che:

«¡Rilal lal nojinak che ronoje socoso'nic y che ronoje itz! ¡Lal ralc'o'al ritzel winak, ri jun aj retzelal c'u'x chirij ronoje ri jusuc'! ¿Su'chac na cok'otaj ta la ri cajech'ij la ri jusuc' be re ri Kanimajawal? 11Ec'u wo'ora ruk'ab ri Kanimajawal cayactaj chi'ij la y cu'an potz' che'la; xew c'u ri Dios eta'mayom janipa k'ij na quil ta la ri k'ijsak» xcha'.

Na jampatana c'ut ronoje xu'an k'eku'm chwach y xujek camalal pa tak utzal y chirij, cutzucuj china cac'amaw bi che ruk'ab.

12Ec'uchiri' ri takanel xril wa xuc'ulumaj ri Elimas, xucoj rubi' ri Kanimajawal Jesucristo, y lic caminak ranima' che ri c'utunic chwi ri Kanimajawal.

Ri Pablo y ri Bernabé quebopon Antioquía re Pisidia

13Ri Pablo junam cuc' ri rachbi'il xebel bi Pafos pa barco y xebopon Perge pa ri luwar re Panfilia. Pero ri Juan xresaj can rib chiquij y xtzelej Jerusalem.

14Ec'u rique xebic'ow Perge y xebopon Antioquía pa ri luwar re Pisidia. Chupa c'u jun k'ij re uxlanibal xeboc pa ri sinagoga y xetz'uyi'ic. 15Ec'uchiri' ajilam chi jujun che Rutzij Upixab ri Dios tz'ibital can ruma ri Moisés y cuma ri k'alajisanelab, raj wach re ri sinagoga xquitak lo ubi'xiquil chique:

«Alak katz-kachak', we c'o juna ch'a'tem alak re pixabanic che ri tinamit, ch'aw alak» xecha'.

16Xtaq'ui' c'u ri Pablo y xu'an jun c'utubal ruc' ruk'ab cha' na jinta c'o cach'awic y xubi'ij:

«Alak achijab aj Israel y onoje alak ri c'o xi'in ib pa anima' alak chwach ri Dios, tape alak. 17Ri Dios re wa tinamit Israel xebucha' ri kati'-kamam ojertan y xu'an jun nimalaj tinamit chique echiri' c'a e c'o Egipto, tob rique na e ta aj chiri'. Ruc' c'u unimal uchuk'ab ri' xeberesaj lo Egipto.

18»Laj juna cuarenta junab c'u ri' xebucuy ri Dios rutinamit ruc' ri quimacunic pa ri luwar catz'intz'otic. 19Tec'uchiri', xusach quiwach wukub nimak tinamit pa ri luwar re Canaán+ y xuya c'u chique ri kati'-kamam quecanaj can ruc' wa ulew. 20Laj ic'owinak chi cajib ciento junab ruc' nic'aj chwi lo echiri' rutinamit ri Dios xebopon Egipto, c'a ec'uchiri' xecanaj can pa rulew ubi'tisim lo ri Dios chique.

»Ec'uchiri', ri Dios xebuya e aj k'atal tzij re quetakan paquiwi rutinamit. Jela' u'anom c'a chwa ri k'alajisanel Samuel. 21Chupa c'u rutakanic ri Samuel, ri tinamit xquitz'onoj che ri Dios cuya juna quirey. Ec'u ri Dios xucoj ri Saúl paquiwi'. Ri Saúl e uc'ajol ri Cis, jun achi upetebem chique ri ralc'o'al can ri Benjamín.+ Cuarenta junab c'u xtakan paquiwi'. 22Ec'uchiri' ri Dios xresaj ri rey Saúl paquiwi', e xucoj ri David re catakan puc'axel. Chwi c'u ri David lic chom xch'a't ri Dios, ma jewa' xubi'ij:

E wilom che ri David ruc'ajol ri Isaí,

rire jun achi lic caqui'cot nuc'u'x ruc'

ma cuya ranima' cu'ano janipa ri cantak che 1 S. 13:14

xcha'.

23»Ec'u chirij rubi'tisim lo chique ri e ralc'o'al can ri David, ri Dios e xuyac ri Jesús re Colobenel que raj Israel. 24Echiri' ri Jesús c'amaja' cujek ri chac takom lo che u'anic chiquiwach ri winak, xtzijon ri Juan puwi ri bautismo re tzelebal tzij chique conoje ri tinamit Israel. 25Ec'uchiri' ri Juan catajin che uq'uisic ruchac, xubi'ij: “Chiwach ri'ix ¿in china ri'in? Ri'in na in ta ri Colobenel oye'em alak. No'j catajin c'u lo uc'unic Jun chwij, yey ri' na takal tane chwe ri'in canquir ruxajab che ri rakan” xcha'.

26»Alak katz-kachak', alak ralc'o'al can ri Abraham y onoje alak ri c'o xi'in ib uc' alak chwach ri Dios, che c'u ralak takom wi lo ri Utzilaj Tzij re colobetajic. 27Yey ri ejekel Jerusalem cuc' ri e aj wach que, na xqueta'maj taj ri Jesús e Ucha'o'n lo ri Dios y na xquimaj tane usuc' ri tz'ibital can cuma ri k'alajisanelab puwi ri Jesús, tob wa' cacajilaj ronoje k'ij re uxlanibal. Yey echiri' rique xquitz'onoj rucamic ri Jesús, e xqui'an c'u ri tz'ibital can puwi Rire. 28Y tob na jinta c'o xquirik chirij ri Jesús re cacamisaxic, xquitz'onoj che ri Pilato cutak ucamisaxic. 29Echiri' xquiq'uis u'anic ruc' ri Jesús janipa ri tz'ibital can puwi Rire, xquikasaj lo chwa ri cruz y xe'quimuku'.

30»Pero ri Dios xuc'astajisaj lo ri Jesús chiquixo'l ri ecaminak. 31Tec'uchiri', ri Jesús uq'uiyal k'ij xuc'ut uwach chiquiwach ri xerachbilaj chwi echiri' xebel lo Galilea y xebec ruc' c'a Jerusalem.+ E tak c'u ri' wa' ri quetzijow re ri Jesús chiquiwach ri tinamit wo'ora.

32»Jec'ula' ri'oj cakatzijoj che alak ri Utzilaj Tzij, ri bi'tisim lo chique ri kati'-kamam ojertan. 33Yey wa bi'tisinic ya'om chi chike ri'oj ri oj calc'o'al can rique. Ma ri Dios xu'an wa' echiri' xuc'astajisaj lo ri Jesús chiquixo'l ri ecaminak, jela' pacha' ri tz'ibital chupa ruca'm Salmo:

Ri'at at Nuc'ajol yey Ri'in in Akaw;

wak'ij c'u ri' cank'alajisaj wa' Sal. 2:7

cacha'.

34»Yey ri Dios ubi'im cuc'astajisaj lo ri Jesús chiquixo'l ri ecaminak cha' jela' rucuerpo na cak'ay taj, ma jewa' xubi'ij pa Ruch'a'tem puwi wa':

Canc'ut na ri c'axna'bal nuc'u'x chiwach,

jela' pacha' ri nubi'tisim lo che ri David. Is. 55:3

35E uwari'che jewa' cubi'ij pa jun chic Salmo:

Rilal na caya ta la luwar che cak'ay rucuerpo

ri Jun lic uya'om rib pak'ab la Sal. 16:10

xcha'.

36»Ma pakatzij wi ri David xu'an ri xraj ri Dios ruc' echiri' c'o che ruwachulew, pero xopon ri k'ij xcamic y xmuk pa emukum wi ruchu-ukaw, y rucuerpo xk'ayic. 37No'j rucuerpo ri Jun ri xuc'astajisaj bi ri Dios, na xk'ay taj.

38»Cheta'maj c'u alak wa', alak watz-nuchak': Ruma ri xu'an ri Cristo, catzijox che alak su'anic carik alak ri cuybal mac chwach ri Dios. 39Ruma c'u ri Cristo, conoje ri cacubi' quic'u'x ruc' Rire, ca'ani' jusuc' chique. Yey wa' na carikitaj ta c'ana ruma ri catakex ri Tzij Pixab tz'ibital can ruma ri Moisés.

40»Chajij c'u ib alak cha' na cape ta pawi' alak ri ubi'im lo ri Dios chupa ri tz'ibital can cuma ri k'alajisanelab:

41Chiwilape', ix aj ch'aminel re ri Nutzij,

lic cacam na c'u iwanima' che

y casach ne iwach ruma wa':

Ri'in can'an jun chac chupa tak wa k'ij ix c'o wi,

jun chac na quicoj taj,

tob ne c'o junok catzijow re chiwe Hab. 1:5

xcha ri Dios.»

Ruc' wa' xuq'uisbej ri Pablo.

42Ec'uchiri' ri Pablo y ri Bernabé xebel bi pa ri sinagoga, ri e c'o chiri' xebelaj chique cha' ri jun chic k'ij re uxlanibal quech'a't cuc' rique chwi tak wa'. 43Echiri' xebel bi conoje ri quimolom quib pa ri sinagoga, e q'ui xeterej bi chiquij ri Pablo y ri Bernabé. Chiquixo'l wa' e c'o raj judi'ab y jujun chic quitakem lo ri c'utunic que raj judi'ab (tob na e ta aj judi'ab, pero lic caquilok'oj uk'ij ri Dios). Ec'u ri Pablo y ri Bernabé lic xequipixabaj cha' quetiqui' chupa ri unimal rutzil uc'u'x ri Dios.

44Chupa c'u ri jun chic k'ij re uxlanibal, ya laj conoje ri winak re ri tinamit xquimol quib cha' caquita Rutzij ri Dios puwi ri Kanimajawal. 45Pero echiri' raj judi'ab xequil ruq'uiyal winak, xujek cati'tot quic'u'x chirij ri Pablo. Y xquijek c'u caquic'ulali'aj uwach ronoje ri cubi'ij ruc' c'axlaj ch'a'tem.

46Ec'uchiri', ri Pablo y ri Bernabé, ruc' unimal quichuk'ab, xquibi'ij chique:

—Pakatzij wi lic chirajawaxic nabe na catzijox che ralak ri alak aj judi'ab Rutzij ri Dios puwi ri Kanimajawal. Pero ruma c'u ri na cac'ul ta alak, jela' cak'alajinic na takal ta ri c'aslemal na jinta utakexic che alak. Ruma c'u la' que'katzijoj chique ri na e ta aj judi'ab, 47ma jela' ri ojutakom lo ri Dios Kajawxel che u'anic. E pacha' ri ubi'im lo Rire echiri' xubi'ij:

Ri'in atnucojom re K'ijsak

chiquiwach tak ri tinamit

cha' jela' cu'ana at c'amal bi re ri colobetajic

c'a pa tak ri luwar lic naj che ruwachulew Is. 49:6

—xecha'.

48Echiri' xquita wa' ri na e ta aj judi'ab, lic xequi'cot che y xquijeko caquiyac uk'ij ri Utzilaj Tzij puwi ri Kanimajawal. Jec'ula' xquicoj rubi' ri Cristo conoje ri echa'om chi ulok re cac'oji' quic'aslemal na jinta utakexic. 49Y xe'ec utzijoxic ri Utzilaj Tzij puwi ri Kanimajawal chupa tak ronoje wa luwar.

50No'j raj judi'ab xquicoj pa quijolom raj wach re ri tinamit y jujun ixokib lic c'o quiwach yey quitakem ri tzijpixab que raj judi'ab, cha' quequiternabej ruc' c'axc'obic ri Pablo y ri Bernabé. Jec'ula' ri' xebequesaj bi pa wa tinamit.

51Ec'u ri Pablo y ri Bernabé xquipupa' can rulew che ri cakan, c'utubal re ri na utz taj xqui'an ri e aj chila' y xebec c'u pa ri tinamit Iconio. 52Pero ri quicojom rubi' ri Cristo chila' Antioquía lic c'o qui'cotemal cuc' yey ri Santowilaj Ruxlabixel ri Dios lic c'o cuc'.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index