Search form

Hechos 14

Ri Pablo y ri Bernabé quebopon Iconio

1Chila' c'ut chupa ri tinamit Iconio, ri Pablo y ri Bernabé junam xeboc chupa ri sinagoga que raj judi'ab. Ruma c'u ri Utzilaj Tzij xquitzijoj, lic e q'ui ri e aj judi'ab y ri na e ta aj judi'ab xquicoj rubi' ri Cristo. 2No'j ri e aj judi'ab ri na caquicoj ta ri Utzilaj Tzij, xquitic oyowal pa canima' ri na e ta aj judi'ab yey xequituc wa' wa winak cha' queyactaj chiquij ri quicojom rubi' ri Cristo. 3Na ruc' ta c'u ri', lic naj xec'oji' ri Pablo y ri Bernabé chiri' y na caquixi'ij ta c'ana quib quech'a't chiquiwach conoje. Ec'u ri Kanimajawal xujiquiba' uwach ri quich'a'tem chwi ri unimal rutzil uc'u'x, ma xuya chique caqui'an nimak tak c'utubal re ruchuk'ab ri Dios. 4Ec'u ri winak re ri tinamit quijachom quipa; jujun chique equiternabem raj judi'ab y jujun chic equiternabem ri e tako'n re ri Jesús.

5Ec'u ri e aj judi'ab junam cuc' ri na e ta aj judi'ab xqui'an tzij chiquiwach cuc' ri e aj wach cha' queyactaj chiquij ri Pablo y ri Bernabé re caqui'an c'ax chique y quequi'an pa'baj. 6Echiri' ri Pablo y ri Bernabé xqueta'maj wa', xebel bi chiri' y xebec pa ri luwar re Licaonia pa tak ri tinamit Listra y ri tinamit Derbe y pa tak ri luwar chunakaj wa queb tinamit. 7Y chiri' c'u ri' caquitzijoj ri Utzilaj Tzij.

Ri Pablo ca'an pa'baj pa ri tinamit Listra

8Chupa wa tinamit Listra c'o jun achi siquirinak ucabichal ri rakan y na bininak ta q'uenok ma ralaxibem sic. Wa' wa'chi tz'ulic, 9e ri' cutata' ri cubi'ij ri Pablo.

Ec'uchiri' ri Pablo xuch'iquiba' ruwach puwi' y xrilo c'o cubulibal uc'u'x cha' cacunutajic, 10lic co xubi'ij che:

—¡Chatyactajok y chat-tac'ala jusuc' chwi rawakan! —xcha'.

Ec'u rachi xch'oplin chicaj y xbinic.

11Ec'u ri winak echiri' xquilo sa' ri xu'an ri Pablo, xquijek quesiq'uin pa quich'a'tem rique, wa' e ri ch'a'tem re Licaonia. Jewa' caquibi'ij: «¡Wa' e tiox qui'anom lo achijab che quib y xekaj lo wara kuc'!» quecha'.

12Che ri Bernabé xquibi'ij e tiox Júpiter, yey che ri Pablo xquibi'ij e tiox Mercurio+ ma e rire ri más cach'awic. 13Ec'u raj chacunel re ri tiox Júpiter, ri c'o rocho pa oquibal lo re ri tinamit, xebuc'am lo toro'ib y cotz'i'j yijbam re wikonic chwach tak ri oquibal re ri templo. Yey junam cuc' ruq'uiyal winak xcaj quequicamisaj rawaj re quikasa'n chiquiwach ri Bernabé y ri Pablo.

14Echiri' xquita wa' ri queb tako'n Bernabé y Pablo, xquirich'ij ri quik'u' y xquimin quib chiquixo'l ruq'uiyal winak; quesiq'uinic jewa' caquibi'ij:

15«¡Achijab!, ¿su'chac ca'an alak wa'? Ma ri'oj xa oj achijab junam kawach uc' alak. Wa Utzilaj Tzij cakatzijoj che alak e cha' caya can alak ri na il ta uwach y catzucuj alak ri Dios c'aslic, ri x'anaw re ruwa caj, ruwachulew, ri mar y ronoje ri c'o che tak wa'. 16Tob rojertan ri Dios xuya luwar chique tak ri tinamit quebin chupa tak ri be cacaj rique, 17na ruc' ta c'u ri', ri Dios na rok'otam ta c'ana uk'alajisaxic china Rire ruma tak ri utz cu'ano. Ma cuya lo ri jab y cuya lo ruk'ijol echiri' lic c'o molonic. E Rire ri ca'anaw re lic c'o cakatijo y c'o qui'cotemal chupa ri kanima'» quecha'.

18Ri Bernabé y ri Pablo, tob quetajin che ubi'xiquil wa', lic c'ayew xequik'atej ruq'uiyal winak cha' na quequicamisaj ta rawaj re kasa'n chiquiwach rique.

19Chupa c'u la' la' jok'otaj xec'un lo jujun aj judi'ab e aj pa ri tinamit Antioquía y ri tinamit Iconio. Rique xquicoj pa quijolom ruq'uiyal winak caqui'an ri Pablo pa'baj. Y ec'u xqui'ano. Tec'uchiri', xquichararej bi ri Pablo tza'm tinamit. E chiquiwach rique, caminak chic. 20Pero echiri' ri quicojom rubi' ri Cristo xquisut rij ri Pablo, rire xyactajic y xoc tanchi chupa ri tinamit. Chuca'm k'ij xel bi ruc' ri Bernabé y junam xebec pa ri tinamit Derbe.

21Xquitzijoj c'u ri Utzilaj Tzij chupa wa tinamit y uq'uiyal ticawex xquicoj rubi' ri Cristo. Tec'uchiri', xetzelej tanchi lo chupa ri tinamit Listra, ri tinamit Iconio y ri tinamit Antioquía. 22Xquinimarisaj c'u can quic'u'x ri hermanos y lic xequipixabaj cha' catiqui' chi utz ri cubulibal quic'u'x ruc' ri Jesús, jewa' caquibi'ij chique: «Lic chirajawaxic ruc' uq'uiyal c'axc'obic cojoc chupa rutakanic ri Dios» quecha'.

23Yey xequicoj can e aj wach chujujunal tak iglesia. Xqui'an c'u orar y ayunar cuc'. Tec'uchiri', xquitz'onoj che ri Kanimajawal quebuchajij janipa ri lic cubul quic'u'x ruc' Rire.

Ri Pablo y ri Bernabé quetzelej tanchi Antioquía re Siria

24Xebic'ow c'u pa tak ri luwar re Pisidia y xebopon pa ri luwar re Panfilia. 25Xquitzijoj c'u ri Utzilaj Tzij chupa ri tinamit Perge. Tec'uchiri', xquimaj bi pa ri tinamit Atalia.

26Chiri' c'u ri' xquimaj bi pa barco y xetzelej Antioquía.+ Wa' e ri tinamit pa xtz'onox wubi ruto'bal ri Dios paquiwi ri Pablo y ri Bernabé cha' caqui'an ri chac ya'om paquik'ab,+ yey wa' wa chac quiq'uisom chi rique.

27Echiri' xeboponic, xequimol quichi' conoje ri quicojom rubi' ri Cristo y xquitzijoj c'u chique ronoje ri xu'an ri Dios cuc' y su'anic xuya chique ri na e ta aj judi'ab quebu'an xa jun cuc' ri quicubam quic'u'x ruc' ri Kanimajawal Jesucristo. 28Xecanaj c'u can chiri' uq'uiyal k'ij cuc' ri quicojom rubi' ri Cristo.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index