Search form

Hechos 15

Raj wach re riglesia caquimol quib Jerusalem

1Chupa tak ri' la' la k'ij xebopon Antioquía jujun achijab e petinak Judea y xquijek quec'utun chiquiwach ri quicojom rubi' ri Cristo, jewa' caquibi'ij: «We na cacoj ta ri retalil re circuncisión che alak jela' pacha' rutakanic can ri Moisés, ri' na cacolobetaj ta alak» quecha'.

2Ec'u ri Pablo y ri Bernabé lic xebec chunimal puwi wa c'utunic cuc' wa'chijab. Q'uisbal re, conoje xquich'ob rakan sa' ri caqui'ano; e quetak bi ri Pablo y ri Bernabé cuc' jujun chic cha' quebec Jerusalem re quebe'ch'a't chwi wa' cuc' ri e tako'n re ri Jesús y jujun chic e aj wach re riglesia.

3E tak c'u ri etakom bi cuma riglesia re Antioquía, xebic'ow pa tak ri tinamit re Fenicia y re Samaria, y chujujunal luwar xquitzijoj su'anic ri na e ta aj judi'ab quiya'om can ri quibinic re ojertan cha' e caquitakej ri Dios. Ruma c'u ri' wa', conoje ri hermanos xetaw re, lic xequi'cot che.

4Echiri' xebopon Jerusalem, xec'ul cuma tak ri hermanos, ri e tako'n y jujun chic e aj wach re riglesia. Xquitzijoj c'u chique ronoje ri u'anom ri Dios cuc'. 5Pero e c'o jujun chique ri quicojom rubi' ri Cristo e cuq'uil ri aj fariseos, rique xeyactajic y jewa' xquibi'ij:

—Lic chirajawaxic cacoj ri retalil re circuncisión chique tak ri na e ta aj judi'ab caquicoj rubi' ri Dios yey quetak che caqui'an janipa ri cubi'ij ri Tzij Pixab re ri Moisés —xecha'.

6Xquimol c'u quib ri e tako'n y jujun chic e aj wach re riglesia cha' quech'a't chwi wa'. 7Lic naj c'ut xquichapala' quib chiquiwach puwi wa'. Tec'uchiri', ri Pedro xyactajic y xubi'ij chique:

—Hermanos achijab, ralak eta'am alak jampa chi lo k'ij wa' ic'owinak chwi xinucha' lo ri Dios cha' chi nuchi' ri'in, ri na e ta aj judi'ab caquita ri Utzilaj Tzij y caquicoj c'u rubi' ri Cristo. 8Ri Dios, ri reta'am sa' ri c'o chupa ri canima' ri ticawex, e xc'uluw que ri na e ta aj judi'ab quicojom rubi' ri Cristo. Yey xuc'ut wa' echiri' xuya lo ri Santowilaj Ruxlabixel chique rique jela' pacha' xu'an kuc' ri'oj. 9Y junam xeril rique kuc' ri'oj, ma xujosk'ij ri canima' che ri mac ruma ri cubulibal quic'u'x.

10»Ec'u wo'ora, ¿su'chac capetisaj alak royowal ri Dios ruma ri queya alak chuxe' uq'uiyal takanic ri na e ta aj judi'ab quicojom rubi' ri Cristo? Wa' e pacha' eka'n cacoj alak chiquikul. Yey wa eka'n, na xquich'ij tane ruc'axic ri kati'-kamam ojertan y na kach'ijom tane ruc'axic ri'oj. 11No'j c'u ri'oj e cakajiquiba' uwach wa': Xa ne ruma ri unimal rutzil uc'u'x ri Kanimajawal Jesús cojcolobetaj ri'oj+ jela' pacha' rique —xcha'.

12Conoje c'u ri' ruq'uiyal ticawex xetz'inca'nic y xquiya quixiquin chique ri Bernabé y ri Pablo, ma caquitzijoj ri nimak tak c'utubal re chuk'ab u'anom ri Dios cuma rique chiquixo'l ri na e ta aj judi'ab.

13Echiri' xquiq'uis quech'a't rique, ri Jacobo jewa' xubi'ij:

—Hermanos, chinta na pe alak: 14Ri Simón xutzijoj puwi ri nabe laj echiri' ri Dios xuk'alajisaj rib chiquiwach ri na e ta aj judi'ab+ cha' chiquixo'l rique quebucha' janipa ri quebu'ana utinamit. 15Y wa' cu'ana xaki jun ruc' ri quitz'ibam can ri k'alajisanelab puwi ri ubi'im lo ri Dios:

16Ic'owinak c'u wa', quintzelej lok

y canyac tanchi ri rocho ri rey David wuluwubinak bi,+

canc'ojoj c'u ri tzakinak bi che y can'an c'ac' che.

17Can'an wa' cha' ri nic'aj chic ticawex caquitzucuj ri Dios,

wa' e tak ri tinamit na e ta aj judi'ab,

conoje ri e nu'anom nutinamit chique ma quicojom ri nubi'.

18E wa' ri xubi'ij ri Dios Kajawxel, yey e ri uk'alajisam chi lo ojertan. Am. 9:11-12

19Ruma c'u la', chinuwach ri'in na utz taj we cakasachisaj quina'oj ri na e ta aj judi'ab quicojom rubi' ri Kanimajawal. 20Ri ka'ana' e chojtz'iban pan chique y kaya'a pan quina'oj cha' caquesaj quib che tak ri cach'ulan re junok pacha' tak ri ic'owisam chwa juna tiox, cha' na caquetz'abej ta uwa quik'ij cuc' jujun chic na quic'ulel taj, cha' na caquitij ta ti'ij que awaj xa ejitz'am y cha' na caquitij ta quic'. 21Ma xex wi chwi lo ojertan, ronoje k'ij re uxlanibal pa tak sinagogas e c'o ri quebajilan re y quetzijon puwi ri Tzij Pixab tz'ibital can ruma ri Moisés —xcha ri Jacobo.

Ri carta re pixabanic chique ri na e ta aj judi'ab

22E tak ri e tako'n y ri jujun chic e aj wach re riglesia cuc' conoje ri hermanos, xuc'ul quic'u'x ri quecha' jujun achijab chiquixo'libal re quetak bi pa ri tinamit Antioquía ruc' ri Pablo y ri Bernabé cha' caquic'am bi jun carta re pixabanic chique ri na e ta aj judi'ab quicojom rubi' ri Cristo. Ec'u xequicha' ri Judas ri cabi'x Barsabás che y ri Silas, ma lic chom ilitajinak ri quibinic quisilabic chiquiwach ri hermanos. 23Xya' c'u bi ri carta paquik'ab, jewa' cubi'ij:

E ri'oj oj tako'n re ri Cristo cuc' ri e aj wach re riglesia y conoje ri hermanos wara Jerusalem, cakaya pan rutzil wach alak hermanos, ri c'o alak chupa ri tinamit Antioquía y pa tak ri tinamit re Siria y re Cilicia. Cakatz'ibaj c'u che ralak, ri na alak ta aj judi'ab yey cojom alak rubi' ri Cristo.

24Ri'oj katom e c'o jujun ebelinak chikaxo'l ri'oj, tob na oj ta xojtakaw bi que; yey rique quetajin che ucojic ri na utz taj pa jolom alak ruc' ri quich'a'tem y jec'ula' quisachisam ri na'oj alak.+

25Ruma c'u la', xojch'a't ri'oj chikawach puwi wa', y ri xojcanaj wi e quekacha' achijab y quekatak bi uc' alak junam cuc' ri hermanos lic c'ax quekana'o, wa' e ri Bernabé y ri Pablo. 26Wa' wa'chijab quiya'om canima' tob ne quecam ruma ri caquitzijoj rubi' ri Kanimajawal Jesucristo. 27Yey quekatak bi ri Judas y ri Silas. Chiquichi' c'u rique cak'alajin wi chiwach alak ronoje wa xkatak ubi'xiquil che alak.

28Ma chwach ri Santowilaj Ruxlabixel ri Dios y chikawach ri'oj, na utz taj cakacoj juna chic eka'n pawi' alak, xew c'u chirajawaxic tak wa':+ 29Matij alak ri ic'owisam chi chiquiwach ri tiox;+ matij alak quic',+ matij alak ti'ij que awaj xa ejitz'am;+ y metz'abej ne uwa k'ij alak cuc' jujun chic na alak ta c'ulan cuc'.+ We quesaj c'u ib alak che ronoje wa',+ catajin alak ri' che u'anic ri jusuc'.

Chila c'u ib alak.

30Ec'u ri echa'talic xquimaj bi quibe pa ri tinamit Antioquía. Ec'uchiri' quimolom chi quichi' ri quicojom rubi' ri Cristo, xquiya ri carta chique.

31Echiri' ri hermanos e c'o Antioquía xcajilaj wa carta, lic xequi'cotic ma ri tz'ibital chupa xucuba' quic'u'x. 32Ec'u ri Judas y ri Silas, ruma e ek'alajisay runa'oj ri Dios, lic naj xech'a't cuc' ri hermanos, xequipixabaj cha' lic caquichuk'ubej quib y jela' xquinimarisaj quic'u'x. 33Xquic'owibej c'u jujun k'ij chiri'.

Tec'uchiri', xetak bi chi utzil chomal cuma ri hermanos chila', cha' jela' quetzelej tanchi cuc' ri etakayom lo que. 34No'j ri Silas xuch'obo utz cacanaj can chiri'. 35Ec'u ri Pablo y ri Bernabé xec'oji' pa ri tinamit Antioquía. Y junam cuc' uq'uiyal cachbi'il, xec'utun chwi Ruch'a'tem ri Dios y ri Utzilaj Tzij puwi ri Kanimajawal.

Rucalaj ubenam ri Pablo che utzijoxic ri Utzilaj Tzij

36Ic'owinak chi c'u jujun k'ij, ri Pablo xubi'ij che ri Bernabé: «Chojtzelej tanchi cuc' ri quicojom rubi' ri Cristo pa tak ronoje ri tinamit pa katzijom wi ri Utzilaj Tzij re ri Kanimajawal, cha' quebe'kila' sa' ri qui'anom» xcha'.

37Yey ri Bernabé xraj cuc'am bi ri Juan cuc', wa' e ri cabi'x Marcos che. 38No'j ri Pablo na xuc'ul ta uc'u'x que'ec ri Marcos cuc', ma ri Marcos xerok'otaj can pa tak ri luwar re Panfilia y na erachbilam ta chi lo che ri chac.+ 39Xebec c'u chunimal puwi wa' yey na jinta xe'ela wi ri quich'a'tem chiquiwach. Ruma c'u ri', ri Pablo y ri Bernabé xquijach bi quib. Ri Bernabé xuc'am bi ri Marcos ruc'. Xebec c'u pa barco y xebopon pa ri isla Chipre.

40Yey ri Pablo xucha' bi ri Silas cha' carachbilaj bi che rubenam. Ec'u ri hermanos e c'o Antioquía xqui'an orar y xquitz'onoj bi ri unimal rutzil uc'u'x ri Dios paquiwi'; tec'uchiri', xquimaj bi quibe. 41Xebic'ow c'u pa tak ri luwar re Siria y re Cilicia, caquinimarisaj can quic'u'x ri caquimol quib pa rubi' ri Cristo pa tak ri tinamit.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index