Search form

Hechos 2

Ruc'unibal ri Ruxlabixel ri Dios

1Echiri' xopon ri nimak'ij re Pentecostés+ e tak rutijo'n ri Jesús quimolom quib, conoje u'anom xa jun quic'u'x. 2Xakic'ate't c'ut chila' chicaj xpe pacha' uch'awibal juna unimal tew lic cajuxuxic, yey wa' xunojisaj ronoje upa ri ja pa quimolom wi quib. 3Ec'uchiri', xewinakir pacha' urepebal ak' y wa' xc'oji' paquiwi' chiquijujunal rique. 4Yey conoje ri e c'o chiri' xquic'ul ruchuk'ab ri Santowilaj Ruxlabixel, y xquijek c'u ri' quech'a't pa jujun chic ch'a'tem junwi. Chiquijujunal quech'a't pa ri ch'a'tem xya'taj chique ruma ri Ruxlabixel.

5Chiri' c'ut Jerusalem e c'o e aj judi'ab lic caquilok'nimaj uk'ij ri Dios. Rique e petinak pa tak uq'uiyal tinamit che ruwachulew. 6Echiri' xquita wa' wa ch'awibal, xepe che rilic. Yey lic xsach quina'oj ma chiquijujunal xequito quech'a't pa tak ri quich'a'tem que rique. 7Ec'u la' lic caminak canima' che, xquijek caquibi'ij chiquiwach: «¡Chilape alak! ¿Na e ta neba aj Galilea conoje wa quech'a'tic? 8¿Cha'ta c'u ri' chikajujunal quekato quech'a't pa tak ri kach'a'tem oj alaxinak wi ri'oj? 9Yey lic pa uq'uiyal tinamit oj petinak wi. Chikaxo'l e c'o e aj Partia, e aj Media y e aj Elam. Yey e c'o ri ejekel Mesopotamia, Judea, Capadocia, Ponto y Asia, 10Frigia y Panfilia, Egipto y pa tak ri luwar re Libia chwach pana ri tinamit Cirene. Yey e c'o ri e petinak Roma; chiquixo'l wa' e c'o e aj judi'ab y e c'o ne ri na e ta aj judi'ab quitakem lo ri c'utunic que raj judi'ab. 11E c'o e aj Creta y ri e aj Arabia. Yey chikajujunal ri'oj cakato quech'a't pa kach'a'tem puwi tak ri c'utubal re runimal uchuk'ab ri Dios» quecha'.

12Conoje c'ut lic caminak canima' che y na caquirik ta chic sa' ri caquich'ob puwi', jec'uwa' caquibi'ij chiquiwach: «¿Sa' que'elawi wa'?» quecha'. 13Yey e c'o c'u jujun chic quech'amin que y jewa' caquibi'ij: «La' quek'abaric» quecha'.

Ri nabe tzijonic xu'an ri Pedro puwi ri Jesús

14Ec'uchiri', ri Pedro xtaq'ui'ic junam cuc' ri junlaluj chic tako'n y lic co xch'awic, jewa' xubi'ij:

«Achijab alak aj judi'ab y onoje ri alak jekel wara Jerusalem, tape alak chi utz ri cank'alajisaj che alak. 15Ma e chiwach ralak, wa' wa'chijab quek'abaric, no'j ¡na e ta u'anom ri'! Ma c'a e ne belejeb ora+ la' che wa anim. 16Janipa wa cata alak y quil alak wo'ora, wa' e ri ubi'im chi can ri k'alajisanel Joel ojertan, echiri' jewa' xubi'ij:

17“Che tak ruq'uisbal k'ij” cubi'ij ri Dios,

“cantak bi ri Wuxlabixel paquiwi conoje ri ticawex che ruwachulew.

E tak c'u ri mi'al alc'o'al alak caquik'alajisaj ri Nutzij.

Ralabo caquilo janipa ri canc'ut chiquiwach;

yey e ri nimak winak, pa wachic' caquil wi janipa ri cank'alajisaj chiquiwach.

18Chupa tak c'u ri' la' la k'ij, paquiwi ri e waj chac ixokib y achijab cantak bi ri Wuxlabixel

cha' jela' caquik'alajisaj ri Nutzij chiquiwach ri ticawex.

19Chwa ri caj canc'ut tak c'utubal re nuchuk'ab yey wa' na jinta ilitajinak wi

y che ruwachulew can'an c'utubal ruc' quic', ruc' ak' y ruc' mayul re sib.

20Ec'u ri k'ij cu'an k'eku'm uwach

yey ri ic' cu'an cak uwach pacha' quic';

wa' e cu'ana echiri' ya copon ruk'ijol ri Kanimajawal.

Wa' wa jun k'ij lic nim y na jinta c'o cajunimax wi ruchomalil.

21Y conoje c'u ri caquicoj quib chwach ri Kanimajawal re quebucolobej, ri' quecolobetajic” Jl. 2:28-32

xcha'.

22»Achijab alak aj Israel, tape alak janipa wa cambi'ij che alak wo'ora: Ri Jesús ri aj Nazaret, Rire e ri Jun takom lo chixo'l alak ruma ri Dios. Lic eta'am c'u alak ri xu'an ri Dios ruma ri Jesús chixo'l alak, wa' e uq'uiyal milagros y tak c'utubal re ri unimal uchuk'ab ri Dios. 23Yey ri Dios lic uch'obom chi ulok y reta'am su'chac xuya ri Jesús pak'ab alak. Ec'u ralak xchap bi alak y xtak alak ucamisaxic chwa cruz cuma winak na jinta Rutzij Upixab ri Dios cuc'.+ 24Pero ri Dios xuc'astajisaj lok y xresaj chupa ruc'axc'olil ri camic, ma ri camic na jinta uchuk'ab puwi Rire y ruma ri', Rire na xc'oji' ta puk'ab ri camic.

25»Rojertan xubi'ij can ri rey David puwi ri Cristo:

Ri'in canwil ri Wajawal xaki e la' c'o chinuwach.

Ruma c'u c'o Rire pa nuwiquik'ab,

na jinta c'ana cayuch'uyu'n we'in.

26E uwari'che ri wanima' lic xqui'cotic

y ruchi' nukul xbixon ruc' qui'cotemal.

Ec'u ri'in, tob ne weta'am quincamic,

e la' c'o chi ri nucubam pan nuc'u'x che;

27ma Rilal na quinya ta can la chiquixo'l ri ecaminak,

yey na caya tane la luwar cak'ay rucuerpo ri aj chac la,

ri jun lic uya'om rib pak'ab la.

28Rilal xc'ut la chinuwach ri be re c'aslemal.

Ruma c'u xaki Lal c'o la wuc' ri'in,

canojisaj la ri wanima' che qui'cotemal Sal. 16:8-11

xcha'.

29»Hermanos, pakatzij wi lic usuc' cancuxtaj wa' che alak: Ri rey David ojertan, xcamic y xmukic, y c'a k'alaj ne chikawach ri'oj wak'ij ora pa c'o wi rumukubal. 30Yey ri rey David e jun k'alajisanel; xreta'maj c'u ri' ri Dios ruc' jun tzij xujiquiba' uwach che rire: “Chiquixo'l tak ri awalc'o'al, cayactaj lo ri Cristo cha' cu'an Rey y catz'uyi' pac'axel ri'at.”

31»Yey ri rey David xch'a'tic e pacha' rilom chi ruc'astajibal ri Cristo echiri' xubi'ij: “Na cacanaj ta can Rire chiquixo'l ri ecaminak y na cak'ay tane rucuerpo.”+ 32Ec'u wa' wa Jesús ri xuc'astajisaj ri Dios che ri camic; yey wa' lic katzij, ma konoje ri'oj xkilo. 33Lic c'u xyac uk'ij echiri' xtz'uyi' puwiquik'ab ri Dios. Yey xya'taj che Rire cutak lo pakawi ri'oj ri Santowilaj Ruxlabixel, ri ubi'tisim lo ri Kakaw Dios chike ri'oj. Y ec'u ri' wa' ri quil alak y cata alak.

34»Ma na e ta ri David ri xak'an chila' chicaj, pero e rire ri xubi'ij:

Ri Dios Kajawxel xubi'ij che ri Wajawal:

“Chat-tz'ula pa nuwiquik'ab,

35y chawoye'ej na ri k'ij

echiri' quebenuya ri tzel quebilow awe

chuxe' rawakan” Sal. 110:1

xcha'.

36»Tape alak onoje ri alak aj Israel, ma lic chirajawaxic queta'maj c'u alak: Wa Jesús ri xcamisaj alak chwa cruz, e cha'tal lo ruma ri Dios re cu'an Kajawal y Colobenel» xcha ri Pedro chique.

37Ec'uchiri' xquita wa', lic xoc bis chiquic'u'x y jewa' xquibi'ij che ri Pedro y chique ri jujun chic e tako'n:

—Hermanos, ¿sa' c'u ri' caka'an ri'oj? —xecha'.

38Y ri Pedro xubi'ij chique:

—Tzelej tzij alak chwach ri Dios y chijujunal alak c'ulu alak pa rubi' ri Kanimajawal Jesucristo ri bautismo re cuybal mac alak y jela' cac'ul na c'u alak ri Santowilaj Uxlabixel, wa' e sipanic re ri Dios che alak. 39Ma ri Dios ubi'tisim wa' chique conoje janipa ri quebusiq'uij: che ralak, chique tak ri alc'o'al alak y chique ne conoje ri ejekel lic naj che ri tinamit re Israel —xcha ri Pedro chique.

40Jec'ula', xebupixabaj ruc' uq'uiyal ch'a'tem y jewa' xujiquiba' uwach chique:

—Chesaj lo ib alak chiquixo'l wa' wa winak lic na jusuc' ta ri qui'anom, cha' jela' cacolobetaj alak chwach ri k'atbal tzij cape paquiwi' —xcha chique.

41Janipa c'u ri' ri xecojow Rutzij ri Dios ruma ri xubi'ij ri Pedro, xquic'ul ri bautismo. Yey chupa c'u la' la jun k'ij, laj e oxib mil ri xquicoj rubi' ri Cristo. 42Y conoje lic junam quebin chupa ri sakil c'utunic que ri e tako'n re ri Jesús, junam quic'u'x, junam quewa' chiquiwach y junam caqui'an orar.

Ri quibinic quisilabic ri nabe ticawex xecojow rubi' ri Cristo

43Conoje c'u ri ticawex xoc xi'in ib pa canima' ruma tak ri milagros y c'utubal cu'an ri Dios cuma ri e utako'n ri Cristo. 44Conoje c'u ri xecojow rubi' ri Cristo, lic xu'an xa jun quic'u'x chiquiwach y rubitak que chiquijujunal xu'an re chinima ronoje. 45E c'o ri xquic'ayij culew y ubitak que, yey ec'u ri rajil wa', caquijach chiquiwach e chirij tak ri cajawax wi chique chiquijujunal. 46Ronoje k'ij caquimol quib chupa ri Rocho Dios. Yey pa tak ri cocho caquijach chiquiwach ri caquitijo, junam quewa' ruc' qui'cotemal y ruc' uch'uti'nal quic'u'x. 47Caquiyac c'u uk'ij ri Dios y lic chom ri quich'a'tibexic ca'an cuma conoje ri ticawex re ri tinamit. Yey ronoje k'ij e c'o más ticawex catajin quicolobetajic ruma ri Kanimajawal, y jela' xq'uiyar riglesia.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index