Search form

Hechos 5

Ri Dios cuk'at tzij paquiwi ri Ananías y ri Safira

1C'o c'u jun achi Ananías rubi', junam ruc' ri rixokil Safira xquic'ayij ch'akap ulew. 2Ec'u rachi c'o xresaj can che ri rajil rulew, yey junam ruc' ri rixokil xqui'an tzij chiquiwach cha' caqui'an rak'ubal puwi ri rajil rulew. Ec'u ri nic'aj chic che ri rajil xuc'am bi, xu'ya'a paquik'ab ri e tako'n+ y xubi'ij wa' e rajil rulew.

3Ec'u ri Pedro xubi'ij che:

—Ananías, ¿su'chac xaya luwar che ri Satanás coc pa awanima' cha' jela' ca'an rak'ubal chwach ri Santowilaj Ruxlabixel ri Dios? Ma xabi'ij xaya ronoje ri rajil rulew, pero c'o xawesaj can che. 4Echiri' c'amaja' cac'ayij rawulew, ¿na awe'at ta neba la'? Y echiri' ac'ayim chic, ¿na pak'ab ta neba c'o wi ca'an ruc' ri rajil sa' ri cawaj? ¿Su'chac c'u ri' xa'an wa'? ¡Na chiquiwach ta c'u achijab a'anom wi rak'ubal ma e chwach ri Dios! —xcha'.

5Xew c'u xuta wa' wa ch'a'tem, ri Ananías xtzak pulew y asu xcamic. Ruma c'u wa', xpe jun xi'in ib paquiwi conoje ri xebeta'man re. 6Xec'un c'u lo jujun alabo, xquipis rucuerpo, xquic'am bi y xe'quimuku'.

7Laj oxib ora ric'owic wa' echiri' xoc lo ri Safira ri rixokil ri Ananías; yey rire na reta'am ta c'u ri' sa' ri xuc'ulumaj ri rachijil.

8Ec'uchiri', xutz'onoj ri Pedro che:

—Chabi'ij chwe: ¿E rajil wa' rulew xic'ayij? —xcha che.

Rixok xuc'ul uwach che:

—Are', e rajil la' —xcha'.

9Xubi'ij c'u ri Pedro che:

—¿Su'chac xi'an tzij chiwach cha' quic'am upa ri Ruxlabixel ri Dios Kajawxel? ¡Chawila'! Ralabo catajin lo coquic che ruchi' ja, e la' xetzelej lo che umukic rawachijil, yey ec'u wo'ora e catquic'am bi ri'at —xcha'.

10Na jampatana xtzak ri Safira chwach ri Pedro y asu xcamic. Ec'uchiri' xeboc lo ralabo, xo'lquirika' caminak chic. Xquic'am c'u bi y xe'quimuku putzal ri rachijil. 11Y xoc c'u jun unimal xi'in ib cuc' conoje ri tinamit re ri Cristo y cuc' conoje ri xebeta'man re tak wa'.

Quilitaj uq'uiyal milagros y c'utubal re ruchuk'ab ri Dios

12Cuma c'u ri e tako'n re ri Cristo, uq'uiyal c'utubal re ruchuk'ab ri Dios y nimak tak chac catajin rilic chiquiwach tak ri ticawex. Yey tak ri quicojom rubi' ri Cristo, lic xa jun quic'u'x caquimol quib pa ri luwar cabi'x che “Ruchi' Ja re Salomón”.+

13E tak c'u ri c'amaja' caquicoj rubi' ri Cristo, caquixi'ij quib caquijunimaj quib cuc', tob conoje ri ticawex lic caquiyac quik'ij. 14Y catajin c'u quiq'uiyaric ri quicojom rubi' ri Kanimajawal, wa' e uq'uiyal achijab y uq'uiyal ixokib.

15Ruma tak c'u ri c'utubal re ruchuk'ab ri Dios caqui'an rutako'n ri Jesús, tak ri winak quequesaj tak ne lo ri e yewa'ib pa tak ri be. Equiya'om chwa ch'at y chwa pop, cha' we xic'ow ri Pedro, tob xew lu'mu'j catzak paquiwi', quecunutaj c'u ri'. 16E q'ui ne ri e petinak pa tak ri tinamit c'o lo chunakaj Jerusalem. Equic'amom lo ri yewa'ib y ri ech'u'jerinak cuma itzelilaj uxlabixel; y conoje c'ut quecunutajic.

Rutako'n ri Cristo eternabem ruc' c'axc'obic

17Ri cajawal raj chacunel pa Rocho Dios y conoje ri e c'o ruc', wa' e ri saduceos, xujek cati'tot quic'u'x chiquij rutako'n ri Jesús ruma lic e q'ui ri winak eteran chiquij. 18Xequichap c'u bi rutako'n ri Jesús y xebe'quiya'a pa ri cárcel re ri tinamit.

19Xopon c'u jun ángel re ri Kanimajawal chak'ab, xu'jaka tak ri oquibal re ri cárcel y xeberesaj lok. Ec'uchiri', xubi'ij chique: 20«Jix, jixe'tac'ala pa ri Rocho Dios y chitzijoj chique ri winak re ri tinamit ronoje puwi ri c'ac' be re c'aslemal» xcha'. 21Ruma c'u ri xquita che ri ángel, anim tan xeboc pa ri Rocho Dios y xquijek quec'utunic.

Ec'u ri cajawal raj chacunel pa Rocho Dios yey ri e c'o ruc', c'amaja' caquina'bej ri' we rutako'n ri Jesús ebesam chi lo pa ri cárcel. Xquimol c'u quichi' tak ri uchapom wi rib ri k'atbal tzij, cuc' conoje ri nimak winak que raj Israel. Xequitak c'u ri e chajinel re ri Rocho Dios che quic'amic rutako'n ri Jesús pa ri cárcel. 22Ec'uchiri' xebopon ri e chajinel pa ri cárcel, na xequirik ta chi rutako'n ri Jesús. Xetzelej c'u lok 23y jewa' xo'lquibi'ij: «Ri cárcel xkariko lic tz'apil chi utz, yey raj chajinel e c'o ne chwach tak ri oquibal re ri cárcel. Pero echiri' xkajako, na jinta chi junok chique rutako'n ri Jesús chupa» xecha'.

24Echiri' xquita wa', xsach quina'oj ri cajawal raj chacunel y raj wach que ri e chajinel cuc' ri nimak e aj chacunel re ri Rocho Dios. Conoje xquijek quech'a't puwi', ma na queta'am taj sa' cuq'uisbej wi ronoje wa'.

25Ec'uchiri', xc'un lo jun y jewa' xubi'ij: «E rachijab xeya' alak pa cárcel, e c'o pa ri Rocho Dios y na cok'otam ta quec'utun chiquiwach ri tinamit» xcha'.

26Ec'u raj wach que ri e chajinel re ri Rocho Dios xe'ec junam cuc' jujun e aj chajinel y xe'quic'ama lo rutako'n ri Jesús. Yey na jinta c'o xqui'an chique ma caquixi'ij quib we caqui'an c'ax chique, laj que'an pa'baj cuma ri tinamit. 27Ec'uchiri' xequic'am lok, xequiya chiquiwach ri uchapom wi rib ri k'atbal tzij. Ec'u ri cajawal raj chacunel pa Rocho Dios xutz'onoj chique rutako'n ri Jesús:

28—¿Na xixkatak ta neba che cha' na quixc'utun ta chi chupa rubi' wa jun achi? Yey wo'ora iwuma ne ri'ix xe'ec utzijoxic wa c'utunic che ronoje Jerusalem; y na xew ta la', ma quiwaj ne quiya keklabal che ruquiq'uel la' la jun achi —xecha'.

29Ri Pedro cuc' ri jujun chic e tako'n re ri Jesús xquic'ul uwach:

—Lic chirajawaxic wi nabe na e cakacoj utzij ri Dios chwach ri cakacoj quitzij rachijab. 30Ma ri Dios que ri kati'-kamam e xc'astajisan lo ri Jesús chiquixo'l ri ecaminak. Yey e ralak ri xcamisan alak ma uma ralak xya'i' ri Jesús chwa ri cruz. 31Pero ri Dios lic xuyac uk'ij ri Jesús, xuya puwiquik'ab y xu'an Kajawal y Colobenel che; cha' ruma ri Jesús, raj Israel caquitzelej quitzij chwach y caquirik na ri cuybal quimac.

32»Ec'u ri'oj, e janipa ri xkilo, e cakatzijoj. Yey ri Santowilaj Ruxlabixel ri Dios, ri Jun ya'tal chique ri caquicoj utzij ri Dios, e cajiquiban uwach wa' —xecha'.

33Echiri' xquita wa' ri e aj wach, lic xpe coyowal chiquij rutako'n ri Jesús y xcaj quequicamisaj.

34Ec'uchiri', chiquixo'l ri e aj k'atal tzij xyactaj jun fariseo Gamaliel rubi', aj c'utunel re ri tzijpixab yey lic yacom uk'ij ruma ri tinamit. Rire xtakan che quebesax bi jok'otaj ri e tako'n re ri Jesús. 35Tec'uchiri', xubi'ij:

«Achijab, alak aj Israel, ch'obo na alak rakan chi utz sa' ri ca'an alak chique wa'chijab. 36Ma c'o tan k'ij xyactaj jun achi Teudas rubi', yey chiribil rib xubi'ij e jun achi lic c'o uwach. Laj e cajib ciento rachijab xeterej chirij. Pero xopon jun k'ij rire xcamisaxic. Y conoje ri xesocotaj ruma rire, xequicher bi; jec'ula', xsach uwach janipa ri xuno'jij.

37»Chwi c'u ri' wa', xyactaj jun chic chupa tak ri k'ij echiri' x'an jun ajilanic. Wa' e ri Judas aj Galilea. Yey uq'uiyal ticawex xeterej chirij. Pero xopon ruk'ijol echiri' xcamisaxic; y conoje c'u ri xesocotaj ruma rire, xequicher bi.

38»Cambi'ij c'u wo'ora che alak: Mech'ich'a' chi alak wa'chijab; ri 'ana alak e cheyolopij bi alak. Ma we xa quino'jibal achijab wa caquic'utu, ri' casach na uwach. 39No'j we wa' re ri Dios, na cach'ij ta alak usachic quiwach; y c'ate c'u cana' alak ri' cach'o'jin alak ruc' ri Dios» xcha'.

40Conoje xuc'ul quic'u'x ri xubi'ij ri Gamaliel. Xequisiq'uij c'u ri e tako'n re ri Jesús; tec'uchiri', xjich' quipa ruc' colob y xequitak che na quetzijon ta chi chupa rubi' ri Jesús y xequiyolopij c'u bi.

41Xebel c'u bi ri e tako'n chiquiwach raj k'atal tzij. Lic quequi'cotic ma xya'taj chique caquitij c'ax ruma quicojom rubi' ri Jesús. 42Jec'ula', ronoje k'ij na cacok'otaj taj quec'utunic y caquitzijoj ri Utzilaj Tzij chwi ri Jesucristo chupa ri Rocho Dios y chi' tak ja.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index