Search form

Hechos 6

Quecha' wukub aj chac re ri Dios

1Chupa tak la' la k'ij lic xeq'uiyar ri cajlibal ri quicojom rubi' ri Cristo. Ec'u ri hermanos e aj judi'ab ri quech'a't pa ri ch'a'tem griego, xquijek quech'a'tiben chiquij ri hermanos e aj judi'ab ri quech'a't pa ri ch'a'tem hebreo.+ Ma echiri' ca'an ri jachanic chique ri e niba'ib, ri malca'nib ri quech'a't pa ri ch'a'tem griego na quecajmax ta chi utz ruc' ri to'bal que caquic'ul ri jujun k'ij.

2Ec'u ri cablajuj tako'n xquimol quichi' conoje ri quicojom rubi' ri Cristo y xquibi'ij chique: «Na usuc' taj we ri'oj cakatanaba' utzijoxic Rutzij Upixab ri Dios cha' cakaya kib che ujachic ri cajawax chique ri e niba'ib. 3Ruma c'u la' hermanos, tzucuj alak wukub achijab chixo'l alak, chom ri quibinic quisilabic, lic quiya'om quib puk'ab ri Ruxlabixel ri Dios y lic c'o quina'oj, cha' cakaya wa chac paquik'ab. 4Jec'ula' ri'oj xew cakaya kib che caka'an orar chwach ri Dios y che rutzijoxic Ruch'a'tem» xecha'.

5Conoje c'u ri hermanos quimolom quib, xuc'ul quic'u'x wa xbi'x chique. Xquicha' c'u ri Esteban, jun achi lic cubul uc'u'x ruc' ri Dios yey lic c'o ri Santowilaj Ruxlabixel ri Dios ruc'. Y xequicha' ri Felipe, ri Prócoro, ri Nicanor, ri Timón, ri Parmenas y ri Nicolás, jun achi aj Antioquía xex utakem lo ri c'utunic que raj judi'ab. 6Ewi xequic'am lo chiquiwach rutako'n ri Jesús. Ec'u wa tako'n xquiya ri quik'ab paquiwi' y xqui'an orar cuc'.

7Jec'uri'la' ri Utzilaj Tzij re ri Kanimajawal lic xe'ec utzijoxic y lic catajin quiq'uiyaric ri cajlibal ri quicojom rubi' ri Cristo chiri' Jerusalem. E c'o ne uq'uiyal e aj chacunel pa Rocho Dios xquijek caquitakej ri Utzilaj Tzij.

Ri Esteban cac'am bi pa k'atbal tzij

8Ri Esteban lic c'o ri unimal rutzil uc'u'x y ruchuk'ab ri Dios ruc'. Ruma c'u ri', cu'an nimak tak c'utubal re ruchuk'ab ri Dios chiquiwach ri winak.

9Ec'uchiri', xeyactaj jujun re ri sinagoga, ri cabi'x che “Ri sinagoga que ri ebelinak lo pa ri c'ax”,+ yey cuc' rique xeyactaj jujun e aj Cirene, e aj Alejandría, e aj Chipre y e aj Asia. E tak c'u ri' wa' xquijeko xa pa ch'a'tem quech'o'jin ruc' ri Esteban. 10Yey na caquirik ta uc'ulic uwach ri cubi'ij ri Esteban ma rire cach'a't ruc' ri na'oj uya'om ri Ruxlabixel ri Dios che. 11Ec'u ri xqui'ano e xequipuakij jujun achijab cha' caquibi'ij quitom tzel cach'a't ri Esteban chirij ri Moisés y chirij ri Dios.

12Xa jec'ula' xequich'i' wi tak ri winak re ri tinamit, ri nimak winak e aj wach y raj c'utunel re ri tzijpixab. Conoje c'u ri' wa' xebec chirij ri Esteban; ruc' oyowal xquichapo, xquic'am bi y xe'quiya'a chiquiwach tak ri uchapom wi rib ri k'atbal tzij.

13Xequicoj c'u achijab e aj cojol rak'ubal chirij, jewa' caquibi'ij: «Wa' wa'chi lic xaki tzel cach'a't chirij wa Santowilaj Luwar re ri Rocho Dios y chirij Rutzij Upixab ri Dios. 14Ma katom cubi'ij, la' la Jesús ri aj Nazaret cuwulij wa luwar y cujalc'atij janipa ri c'utunic y cojobal ya'tal can chike ruma ri Moisés» xecha'.

15Conoje c'u ri etz'ul pa ri k'atbal tzij, echiri' xquitzu' uwach ri Esteban, xquil rupalaj e pacha' upalaj juna ángel.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index