Search form

Hechos 7

Ri e aj wach re ri tinamit caquita uchi' ri Esteban

1Ri cajawal raj chacunel pa Rocho Dios xutz'onoj che ri Esteban we katzij xubi'ij wa'.

2Ec'u rire xubi'ij:

«Alak achijab y alak nimak winak, chinta na pe alak. Ri Dios, ri Jun lic c'o unimal chomalil ruc', xuk'alajisaj rib chwach ri kakaw Abraham echiri' rire c'o pa ri luwar re Mesopotamia, wa' e echiri' c'amaja' que'jekela pa ri tinamit Harán. 3Xubi'ij ri Dios che: “Chatelubi chupa ratinamit y chiquixo'l rawatz-achak'; y jat c'u chwach rulew pa canc'ut wi ri'in chawe”+ xcha'. 4Ec'uchiri', xel bi ri Abraham chwach rulew que raj Caldea y xjeki' pa ri tinamit Harán. Chwi c'u rucamic rukaw, xtak lo ruma ri Dios chupa wa luwar pa jekel wi alak wo'ora.

5»Pero ri Dios na xuya tane che ri Abraham cu'an rajaw wa' wu'lew, tob tane xa pa cuya wi juna rakan. No'j xubi'tisij c'u che tob ne rire caminak chic, wa' wu'lew cu'ana na re y que ri ralc'o'al canok; yey echiri' xbi'x wa' che ri Abraham, c'amaja' ne c'o juna ralc'o'al.+

6Ec'u ri Dios xubi'ij che ri Abraham:

Tak rawalc'o'al canok quebe'jekela na pa jun ulew na culew taj.

Y chiri' c'u ri' ca'ani' niba'ib chique y queya'i' pa c'axlaj chac

cajib ciento junab cuma ri ticawex re ri tinamit pa quec'oji' wi.

7Pero In quink'ataw tzij paquiwi wa tinamit, ri caquiya pa c'axlaj chac ri nutinamit.

Tec'uchiri', ri nutinamit quebel lok y quetzelej lok Gn. 15:13-14

y quinquilok'nimaj chupa wa luwar at c'o wi Éx. 3:12

xcha'.

8»Ri Dios xu'an jun tzij ruc' ri Abraham, yey ri c'utubal re wa' wa tzij e ri retalil re circuncisión. E uwari'che ri Abraham xucoj ri retalil re circuncisión che ruc'ajol Isaac echiri' xuq'uis wajxakib k'ij ralaxic.+ Jec'ula' xu'an ri Isaac che ruc'ajol Jacob. Y ri Jacob jela' xu'an chique ri cablajuj uc'ajol, ri e kamam re ri katinamit.+

9»Ec'u rique xoc retzelal c'u'x pa canima' chirij ri quichak' José. Ruma c'u ri', xquic'ayij bi cha' cac'am bi Egipto.+ Pero ri Dios c'o ruc' ri José+ 10y xresaj c'u chupa ronoje tak ri c'axc'obic xic'ow wi. Xuya una'oj y xu'an che lic xuc'ul upuwach ri faraón, ri takanel re Egipto. Ma ri faraón xuya che ri José catakan puwi ri tinamit re Egipto y xuya puk'ab rire ronoje rubitak re.+

11»Xpe c'u jun unimal numic chupa tak ronoje ri luwar re Egipto y re Canaán. Ruma c'u wa' xpe unimal c'axc'obic paquiwi ri kati'-kamam ma na jinta caquitijo.+

12»Echiri' ri Jacob xuna'bej chila' Egipto c'o catijic, xebutak bi ruc'ajol cha' que'quilok'o trigo chila'. Wa' e ri nabe benam xqui'an ri kamam chila' Egipto.+ 13Ec'u che rucalaj quibenam, ri José xuk'alajisaj rib chiquiwach ri ratzixelab. Jec'ula' ri faraón xreta'maj china tak ri e ratz-uchak' ri José.+

14»Yey ri José xutak uc'amic rukaw Jacob y conoje ri e ratz-uchak'.+ Ri cajlibal rique chi conoje e setenta y cinco. 15Jec'ula' xe'jekela ri Jacob pa ri tinamit Egipto. Chila' c'u ri' xcam wi rire y chila' xecam wi ri kamam.+ 16Xc'am c'u bi ri quibakil pa ri tinamit Siquem y xeya' pa ri mukubal ulok'om can ri Abraham ruc' uq'uiyal puak chique ri ralc'o'al can ri Hamor, chila' Siquem.+

17»Yey ec'uchiri' catajin roponic ri k'ij echiri' ri Dios cu'ana na rubi'tisim che ri Abraham, tak ri ralc'o'al rire lic xeq'uiyar chila' Egipto. 18Tec'uchiri', xyactaj jun chic rey chiri' Egipto; ec'u rire na xreta'maj ta uwach ri José.+ 19Wa' wa rey xebusoc ri katinamit ojertan. Lic xebuya ri kati'-kamam pa c'axc'obic, ma xtakan che quecamisax ri quich'uti'k e alabo cha' jela' na caq'uiyar ta quiwach ri katinamit.+

20»Chupa tak c'u ri' la' la k'ij xalax ri Moisés y e jun chomilaj ac'a chwach ri Dios. Ec'u rire oxib ic' xchajix xa xe'lak'ay pa rocho rukaw. 21Pero echiri' na utz ta chi quewax pa ja, xesax bi+ y xe'rikitaj lo ruma rumi'al ri faraón; y wa'li xuq'uiyisaj y xu'an pacha' ralab che. 22Jec'ula', ri Moisés xtijox puwi ronoje ri na'oj que ri aj Egipto, y xu'ana jun achi lic c'o uchuk'ab che janipa tak ri cubi'ij y cu'ano.

23»Echiri' xuq'uis cuarenta junab, xalax pa ranima' que'bina cuc' ri ratz-uchak', ri e aj Israel.+ 24Y xril c'u ri' lic ca'an c'ax che jun chique ruma jun aj Egipto. Xuto' c'u uwi' ri ratz-uchak' yey xucamisaj ri aj Egipto. 25E xuch'ob rire, tak ri ratz-uchak' caquimaj usuc' e ruma rire queberesaj bi ri Dios paquik'ab raj Egipto; no'j rique na je ta la' ri xquimaj usuc'.

26»Chuca'm k'ij c'ut xebu'rika ca'ib aj Israel quech'o'jin chiquiwach y xraj quebuya putzil chomal. Xubi'ij c'u chique: “Achijab, ralak chak' ib alak. ¿Su'chac c'u ri' ca'an c'ax che ib alak chiwach alak?” xcha'.

27»Ec'uchiri', ri jun ri cu'an c'ax che ri ratz-uchak', xupakchi'ij bi ri Moisés y xubi'ij che: “¿China cojoyom e la re takanel y re aj k'atal tzij pakawi ri'oj? 28¿Ca'aj cami la ri' quincamisaj la ri'in jela' pacha' x'an la iwir echiri' xcamisaj la ri aj Egipto?”+ xcha'.

29»Echiri' xuta wa' wa ch'a'tem, ri Moisés asu xanimaj bi, xe'jekela pa ri luwar re Madián, tob rire na aj ta chila'. Yey chila' xebalax ca'ib uc'ajol.+

30»Ic'owinak chi c'u cuarenta junab c'o chila' echiri' xwinakir jun ángel chwach chupa rurepebal ak' c'o che jumocaj xuluquej pa ri luwar catz'intz'otic, chunakaj ri juyub Sinaí. 31Echiri' xril wa' ri Moisés, lic xcam ranima' che ri catajin uc'utic chwach. Yey echiri' xkib che rilic chi utz, xuta rukul ri Dios, jewa' xubi'ij che: 32“In ri Dios que ramam ojertan, wa' e ri Abraham, ri Isaac y ri Jacob” xcha'.

»Ec'u ri Moisés xujek cabirbotic y ruma xi'in ib na xutzu' ta chi ri jumocaj xuluquej.

33»Ec'u ri Dios xubi'ij che: “Chajolo raxajab che rawakan ma wa luwar pa at c'o wi lic santo. 34Pakatzij wi ri'in wilom lic eya'tal pa c'axc'obic ri nutinamit e c'o Egipto, yey nutom lic quetunanic. E uwari'che in petinak re quebe'nuwesaj lok. Ec'u wo'ora chatpetok; ma catintak bi Egipto”+ xcha'.

35»Ec'u Moisés ri' wa', ri xc'ak bi uk'ij echiri' xbi'x che: “¿China cojoyom e la re takanel y re aj k'atal tzij pakawi ri'oj?”+ Na ruc' ta c'u ri', e ri Moisés ri xtak bi ruma ri Dios re cu'ana quitakanel rutinamit y re queberesaj ri tinamit paquik'ab raj Egipto. Xtak c'u che cu'an wa' ruma ri ángel, ri xwinakir chwach pa ri jumocaj xuluquej. 36E Moisés ri' wa', ri xeberesaj lo rutinamit ri Dios Egipto y lic xu'an milagros y tak c'utubal re ruchuk'ab ri Dios pa ri tinamit Egipto, chupa ri Mar Rojo y chupa ri cuarenta junab xebin pa ri luwar catz'intz'otic.+

37»Ec'u Moisés ri' wa', ri xbi'n chique raj Israel:

E ri Dios Kajawxel cuyac na lo chiquixo'l ri katinamit Israel

jun K'alajisanel jela' pacha' ri'in.

Ec'u chita janipa ri cubi'ij Rire chiwe Dt. 18:15

xcha'.

38»E Moisés ri' wa', ri xc'oji' chiquiwach ri tinamit echiri' quimolom quib pa ri luwar catz'intz'otic, y e xesan uchi' ri ángel chiquiwa ri kati'-kamam echiri' xch'a't ruc' chwi ri juyub Sinaí. Yey e rire ri xc'uluw tak ri ch'a'tem re c'aslemal cha' cuk'atisaj lo chikawach ri'oj.

39»Pero ri kati'-kamam na xcaj taj caquicoj utzij; ri xqui'ano e xquic'ak bi uk'ij y e xch'aw quic'u'x che ri quetzelej tanchi Egipto. 40Yey xquibi'ij ne che ri Aarón: “Che'ana la katiox cha' quenabej bi chikawach; ma wa Moisés, ri xesan lo ke'oj chwach rulew re Egipto, na keta'am taj sa' ri xuc'ulumaj.”+ 41Ec'uchiri', xqui'an jun tiox uc'axwach toro. Xequicamisaj c'u awaj re quikasa'n chwach wa tiox y xqui'an nimak'ij chupa rubi' ri tiox, ri xa xqui'an ruc' ri quik'ab.+

42»Ec'u ri Dios xebuya can che ulok'nimaxic quik'ij ronoje ri c'o che ruwa caj. Xqui'an c'ut jela' pacha' ri ubi'im ri Dios chupa ri tz'ibital can cuma ri k'alajisanelab:

Ri'ix ix aj Israel, echiri' xebicamisaj chicop re kasa'n chupa ri cuarenta junab xixbin pa ri luwar catz'intz'otic, ¿xilok'nimaj neba nuk'ij ri'in ruc' wa'?

43Na xi'an taj, ma e ne xitelej ri rocho ri tiox Moloc ubi' y ri ch'umil re ri tiox iwe'ix, Renfán ubi'. Wa' e quic'axwach tak ri tiox xebi'ano re quilok'nimaj quik'ij.

Ruma c'u la' quixintak bi c'a chwach pana ri tinamit Babilonia Am. 5:25-27

cacha'.

44»Echiri' ri kati'-kamam xebin pa ri luwar catz'intz'otic, c'o cuc' rique ri jun Rocho Dios xa caquiric, wa' e c'utubal re c'o ri Dios cuc'. Yey rique xqui'an wa jun Rocho Dios jela' pacha' ri xtakan ri Dios che ri Moisés, e lic pacha' ru'aniquil rilom chi rire.+ 45Ec'u ri kati'-kamam xquiya can wa Rocho Dios (ri xa caquiric) paquik'ab ri calc'o'al rique. Y wa calc'o'al xquic'am bi wa' echiri' xeboc ruc' ri Josué chupa ri ulew que ri na e ta aj Israel, ri xebesax bi ruma ri Dios cha' wa' wu'lew cacanaj can paquik'ab rutinamit Rire. Ec'u wa' wa Rocho Dios xc'oji' cuc' rutinamit ri Dios c'a chupa tak ri k'ij re ri rey David.

46»Ec'u ri David lic c'o ruto'bal ri Dios ruc'. Rire xutz'onoj c'ut caya'taj che cuyac jun c'ac' Rocho ri Dios cha' tak ri ralc'o'al can ri Jacob caquilok'nimaj uk'ij ri Dios chiri'. 47No'j e ri Salomón ri xyacaw wa' wa Rocho Dios; 48tob ri Dios Kajawxel na xew ta cajeki' pa tak ja 'anatal xa cuma ticawex, pacha' ri cubi'ij ri jun k'alajisanel:

49“Ruwa caj e nutz'ulibal re takanic,

yey ruwachulew e utac'alibal ri wakan.

¿Sa' c'u ri' ri ja quiyac chwe?” cacha ri Kajawal.

“¿O pachawi c'owi ri luwar pa quinuxlan wi?

50¿Na e ta neba ri nuk'ab 'anayom ronoje wa' wa c'olic?” Is. 66:1-2

cacha'.

51»Ec'u ralak lic na jinta c'o cata alak. Ri c'u'x alak y ri tanibal alak e pacha' que ri winak na jinta ri Dios cuc', ma na ca'aj ta alak cacoj alak utzij. Ralak alak pacha' ri chu'kaw alak ojertan, ma lic na ca'aj ta alak cata alak ri cubi'ij ri Santowilaj Ruxlabixel ri Dios che alak. 52¿China junok chique ri k'alajisanelab na xternabex ta ruc' c'ax cuma ri chu'kaw alak ojertan? Ma rique e xecamisan que ri xetzijon lo puwi ruc'utunic ri Jun lic jusuc'. Yey echiri' xc'un Rire, ralak xc'ayij alak y xcamisaj alak. 53Ralak xc'ul alak Rutzij Upixab ri Dios cuma tak ri ángeles, no'j na xtakej ta alak janipa ri cubi'ij wa Tzij Pixab» xcha ri Esteban.

Rucamic ri Esteban

54Echiri' xquita ri xubi'ij ri Esteban, lic xpe coyowal y xquijek cakich'ich' ruwi que' chirij rire. 55Pero ri Esteban lic c'o ruchuk'ab ri Santowilaj Ruxlabixel ri Dios ruc'; xtzu'n c'u pana chicaj y xril runimal uchomalil ri Dios yey xrilo ri Jesús c'o puwiquik'ab ri Dios. 56Xubi'ij c'u rire: «¡Ri'in canwilo jakal ruwa caj y canwil pana Ralaxel Chiquixo'l Ticawex c'o puwiquik'ab ri Dios!» xcha'.

57Ec'uchiri', ri winak xquijeko lic quesiq'uinic, xquitz'apij ri quixiquin y xa jumul xebec conoje chirij ri Esteban. 58Xquesaj c'u bi chupa ri tinamit y xquijeko caqui'an pa'baj. Y ri xquimol quib chirij, xquiya can ri quik'u' che jun ala Saulo rubi' cha' cuchajij wa' chique.

59Ec'uchiri' quetajin che u'anic pa'baj ri Esteban, rire xuch'a'bej ri Kanimajawal, jewa' xubi'ij: «Wajawal Jesús, c'ama la ri wanima'» xcha'.

60Tec'uchiri', xuxucuba' rib y co xsiq'uinic: «Kajawal, cuyu la quimac che wa quetajin che u'anic» xcha'. Y ruc' wa', xcamic.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index