Search form

Hechos 8

1Ri Saulo e jun chique ri xuya uch'a'tem cha' cacamisax ri Esteban.

Ri Saulo quebuternabej ruc' c'ax ri quicojom rubi' ri Cristo

Chupa c'u ri' la' la jun k'ij, lic xjeker quiternabexic ruc' c'ax janipa ri quicojom rubi' ri Cristo chila' Jerusalem. Ruma c'u ri', conoje xequich bi chupa tak ri luwar re Judea y re Samaria. Xew chi rutako'n ri Jesús xecanaj can Jerusalem.

2E c'o c'u jujun achijab lic quiya'om quib puk'ab ri Dios; rique xquimuk ri Esteban y lic xcok'ej rucamic.

3No'j ri Saulo ebuternabem ruc' c'ax ri quicojom rubi' ri Cristo. Xoc c'u chi' tak ja re quebu'charej lo rachijab y rixokib yey quebu'ya'a pa cárcel.

Catzijox ri Utzilaj Tzij chupa tak ri tinamit re Samaria

4E tak c'u ri equichom bi caquitzijoj ri Utzilaj Tzij chupa ronoje luwar pa quebopon wi. 5Ri Felipe e jun chique. Rire xopon chupa jun tinamit re Samaria y xujek catzijon puwi ri Cristo chiquiwach ri winak. 6Wa' wa winak xa jun qui'anom che utayic janipa ri cuc'ut ri Felipe, yey caquitzutza' tak ri c'utubal re ruchuk'ab ri Dios cu'an chiquiwach. 7Ma lic e q'ui ri e c'o paquik'ab itzelilaj uxlabixel, yey wa' wa itzelilaj uxlabixel quesiq'uinic quebel bi chique ri winak. Y e c'o uq'uiyal jetz' y sic xecunutajic. 8Ruma c'u ri' wa', tak ri winak re ri tinamit lic quequi'cotic.

Jun achi cubi'tisij puak cha' cac'oji' ruchuk'ab ri Dios ruc'

9C'o c'u jun achi aj chiri' Simón rubi'. E ri petinak lok rire aj k'ij chupa la tinamit; lic quebusoc ri winak e aj Samaria ma cu'an che rib pacha' lic c'o uwach. 10Conoje c'u ri winak chinima'k chich'uti'k, lic caquita ri cubi'ij ri Simón y jewa' caquibi'ij: «E unimal uchuk'ab ri Dios ri c'o ruc' wa'chi» quecha'. 11Lic caquicoj ri cubi'ij, ma lic xex wi ebusocom ruc' ri k'ijonic cu'ano. 12Pero echiri' xquita ri Utzilaj Tzij cutzijoj ri Felipe chwi rutakanic ri Dios y chwi ri Kanimajawal Jesucristo, xquicojo y jec'uri'la' achijab yey ixokib xquic'ul ri bautismo.

13Ec'u ri' wa'chi Simón xucoj rubi' ri Cristo y xuc'ul ne ri bautismo. Xujek c'u ri' carachbilaj ri Felipe y lic cacam ranima' che tak ri c'utubal re ruchuk'ab ri Dios carilo cu'an ri Felipe.

14Yey ri e tako'n re ri Cristo e c'o Jerusalem, echiri' xquito ri e aj Samaria xquicoj ri ubi'im lo ri Dios puwi ri Cristo, xequitak bi ri Pedro y ri Juan chila' Samaria. 15Ec'uchiri' rique xeboponic, xquijek caqui'an orar paquiwi ri aj Samaria ri quicojom chi rubi' ri Cristo cha' rique caquic'ul ri Santowilaj Ruxlabixel ri Dios. 16Ma ri Ruxlabixel ri Dios c'amaja' cakaj puwi junok chique, xew quic'ulum ri bautismo pa rubi' ri Kanimajawal Jesucristo. 17Yey echiri' ri Pedro y ri Juan xquiya ri quik'ab paquiwi', xquic'ul ri Santowilaj Ruxlabixel ri Dios.

18Ec'u ri Simón xrilo su'anic ri ticawex caquic'ul ri Ruxlabixel ri Dios echiri' ri tako'n caquiya ri quik'ab paquiwi'. Xubi'tisij c'u puak chique, 19jewa' xubi'ij:

—Ya'a alak chwe ri'in la' la jun chuk'ab, cha' jela' xa tob china puwi' canya wi ri nuk'ab, cuc'ul ri Santowilaj Ruxlabixel ri Dios —xcha'.

20Ec'uchiri', ri Pedro jewa' xubi'ij che:

—Sach na uwach rapuak junam awuc' ri'at, ma e chawach ri'at, xa ruc' puak calok' rusipanic ri Dios.+ 21Yey ri'at na jinta c'ana awe che wa chac caka'ano ma rawanima' na jusuc' ta chwach ri Dios. 22E uwari'che, chatzelej atzij chwach ri Dios che wa' wa amac y chatz'onoj che Rire cucuy amac. Laj cucuy amac che la na utz taj xach'obo. 23Ma e canwil ri'in, lic u'anom c'ax ac'u'x chikij y lic at yutum ruma ri mac —xcha ri Pedro che.

24Ri Simón xuc'ul uwach:

—Lic ch'aw co alak panuwi' chwach ri Kanimajawal cha' na canc'ulumaj ta c'ana wa xbi'ij alak chwe —xcha'.

25Ec'uchiri' ri Pedro y ri Juan quitzijom chi tak ri xquilo y xquita che ri Jesús y quik'alajisam chi ri Utzilaj Tzij re ri Kanimajawal, xetzelej Jerusalem. Yey xalok' c'u xebic'ow chupa tak uq'uiyal aldeas que raj Samaria, xquitzijoj ri Utzilaj Tzij.

Ri Felipe y rachi aj Etiopía

26C'o jun ángel re ri Kanimajawal xch'a't ruc' ri Felipe, jewa' xubi'ij che: «Chayijba' awib y jat jewa' pa sur. Chamaja bi ri be quel Jerusalem, ri cakaj pa ri tinamit Gaza» xcha'. (Wa be quic'ow pa tak luwar catz'intz'otic.)

27Xyactaj c'u ri Felipe y xumaj bi ube yey pa ri be xu'rika bi jun achi “eunuco”. Wa' wa'chi lic c'o uwach ma puk'ab rire c'o wi ronoje rubeyomal ri Candace.+ Ec'u wa'chi xopon Jerusalem cha' culok'nimaj uk'ij ri Dios, 28yey e ri' catzelej pa rutinamit. Tz'ul c'u chupa jun careta y carajilaj Ruch'a'tem ri Dios tz'ibital can ruma ri k'alajisanel Isaías.

29Ec'u ri Ruxlabixel ri Dios xubi'ij che ri Felipe: «Chatkib pana che la jun careta y chatbin putzal» xcha'.

30Echiri' ri Felipe xkib apanok, xuto rachi e carajilaj ri tz'ibam can ruma ri k'alajisanel Isaías y jec'uwa' xutz'onoj che:

—¿Camaj la usuc' la catajin la che rajilaxic? —xcha che.

31Rachi xuc'ul uwach:

—¿Su'anic canmaj usuc' we na jinta junok cak'alajisan chwe? —xcha che. Y xelaj c'u che ri Felipe cha' cak'an pa ri careta y catz'uyi' ruc'.

32Ec'u ri carajilaj che Ruch'a'tem ri Dios e wa':

Xc'am bi e pacha' juna bexex re cacamisaxic;

e pacha' juna k'apoj bexex

na cach'aw ta q'uenok

echiri' casocax ri rismal;

jec'uri'la' rire na jinta c'ana xubi'ij.

33X'ani' che pacha' lic na jinta uwach;

y echiri' xk'at tzij puwi',

x'an ri lic na e ta usuc' che.

¿China tak c'u ri ticawex caquipetebej lo che rire?

Na e jintaj,

ma xk'at uk'ij che ruwachulew. Is. 53:7-8

E wa' ri catajin che rajilaxic.

34Ec'u wa'chi aj Etiopía xutz'onoj che ri Felipe:

—Ma'an co la ri' bi'ij la chwe, ¿china puwi cach'a't wi ri k'alajisanel echiri' cubi'ij wa'? ¿Chiribil rib nawi cubi'ij wi o cach'a't puwi junok chic? —xcha'.

35Ec'u ri Felipe xch'a't ruc' rachi puwi wa'. Xujek lo ruc' ri catajin che rajilaxic che Ruch'a'tem ri Dios y xutzijoj c'u che puwi ri Utzilaj Tzij re ri Jesús.

36E c'o chi be echiri' xebopon pa jun luwar pa c'o wi ya'.

Ec'u ri' rachi aj Etiopía xubi'ij che ri Felipe:

—Wara c'o ya'. ¿Utz nawi ri'in canc'ul ri bautismo? —xcha che.

37Ri Felipe xubi'ij che:

—We cacoj la rubi' ri Kanimajawal Jesucristo ruc' ronoje anima' la, lic utz ri' —xcha che.

Rachi xuc'ul uwach:

—Ri'in cancojo ri Kanimajawal Jesucristo e Ruc'ajol ri Dios —xcha'. 38Y xutak c'u utac'abaxic ri' ri careta.

Ec'u ri Felipe junam ruc' rachi xekaj chupa ri ya'. Tec'uchiri', ri Felipe xuya ri bautismo che.

39Echiri' xebel lo chupa ri ya', xakic'ate't ri Ruxlabixel ri Dios Kajawxel xuc'am bi ri Felipe. Rachi aj Etiopía na xril ta chi uwach, pero lic caqui'cotic xumaj tanchi ubi rube.

40Ec'u ri Felipe xe'yo'k chupa jun tinamit Azoto rubi'. Echiri' xel bi chiri', xic'ow pa tak tinamit yey chujujunal tinamit pa xic'ow wi, xutzijoj ri Utzilaj Tzij. Ec'u ri' xopon c'a chupa ri tinamit Cesarea.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index