Search form

Lucas 4

Ri c'ambal upa ri Jesús

(Mt. 4:1-11; Mr. 1:12-13)

1Ec'u ri Jesús xel bi che ri luwar re ri nimaya' Jordán yey lic c'o ri Ruxlabixel ri Dios ruc'. Xc'am c'u bi ruma ri Ruxlabixel ri Dios pa jun luwar catz'intz'otic. 2Xc'oji' chila' cuarenta k'ij y xc'am upa ruma ritzel winak. Yey chupa tak wa' wa k'ij na jinta c'o xutijo. Chuq'uisbal c'u re ri cuarenta k'ij, lic xnumic.

3Ec'uchiri', ritzel winak jewa' xubi'ij che:

—We katzij at Uc'ajol ri Dios, chat-takan che cha' wa'baj cu'an wa —xcha che.

4Ri Jesús xuc'ul uwach:

—Jewa' tz'ibital can chupa Rutzij Upixab ri Dios:

Na xew ta ruma ri wa e c'as ri ticawex;

ma e c'aslic ruma tak ronoje rubi'im ri Dios Dt. 8:3

—xcha'.

5Ec'uchiri', ritzel winak xuc'am bi ri Jesús chutza'm jun nimalaj juyub y xa pa jok'otaj xuc'ut c'u chwach, ronoje ri takanic ca'an puwi tak ri tinamit che ruwachulew 6y jewa' xubi'ij che:

—Ronoje wa cawilo ruc' ronoje ruchomalil tak wa', canya pak'ab, ma ya'tal can panuk'ab ri'in yey panuk'ab c'o wi china che cuaj canya wi. 7Canya c'u ronoje wa' pak'ab ri'at we caxucuba' awib chinuwach y calok'nimaj nuk'ij —xcha che.

8Ri Jesús xuc'ul uwach:

—Chatela chinuwach Satanás, ma jewa' tz'ibital can chupa Rutzij Upixab ri Dios:

Lic chalok'nimaj uk'ij ri Dios Kajawxel

y xew Rire chanimaj uk'ij Dt. 6:13

—xcha'.

9Tec'uchiri', ritzel xuc'am bi ri Jesús chupa ri tinamit Jerusalem c'a chicaj che ruwi ri Rocho Dios y jewa' xubi'ij che:

—We katzij at Uc'ajol ri Dios, chac'aka bi awib c'a chu'lew 10yey na jinta c'o cac'ulumaj, ma jewa' tz'ibital can chupa Rutzij Upixab ri Dios:

Ri Dios quebutak lo ru ángeles awuc' cha' catquichajij.

11Catquichap c'u ruc' ri quik'ab

cha' na ca'chika ta rawakan che juna abaj Sal. 91:11,12

—xcha'.

12Ri Jesús xuc'ul uwach:

—Jewa' tz'ibital can chupa Rutzij Upixab ri Dios:

Mac'am upa ri Dios Kajawxel Dt. 6:16

—xcha'.

13Echiri' ritzel winak na xurik ta chic su'anic cuc'am upa ri Jesús, xel chiri' y xroye'ej na c'u ri' jampala' cuc'am tanchi upa.

Ri Jesús cujek cac'utun chwi rutakanic ri Dios

(Mt. 4:12-17; Mr. 1:14-15)

14Ec'uchiri', ri Jesús xe'ec tanchi Galilea y lic c'o ruchuk'ab ri Ruxlabixel ri Dios ruc'. Y xe'ec utzijoxic puwi Rire pa tak tinamit y pa tak raldeas re Galilea. 15Cac'utun c'u pa tak sinagogas y conoje ri quetaw re lic caquiyac uk'ij.

Ri Jesús copon pa ri tinamit Nazaret

(Mt. 13:53-58; Mr. 6:1-6)

16Xopon c'u ri Jesús chupa ri tinamit Nazaret pa xq'uiy wi. Y chupa ri k'ij re uxlanibal xoc chupa ri sinagoga jela' pacha' xex cu'an wi. Xtaq'ui' c'u ri' cha' carajilaj Rutzij Upixab ri Dios. 17Y xya' che Rire ri jubotaj wuj+ re ri k'alajisanel Isaías. Y echiri' xujak upa, xurik pa cubi'ij wi:

18Ri Ruxlabixel ri Dios Kajawxel c'o panuwi',

ma inucha'om lok cha' co'lnuya'a ri Utzilaj Tzij chique ri niba'ib.

Inutakom lok cha' cambochi'ij quic'u'x ri lic e c'o pa bis,

co'lnutzijoj quelebal lo que ri e c'o chi presoyil,

quebenutzu'nisaj ri e potz',

quebenuwesaj lo pa c'ax ri lic quitijom c'axc'olil,

19y co'lnutzijoj ruk'ijol ri c'utubal re ri rutzil uc'u'x ri Dios Kajawxel. Is. 61:1-2

20Ec'uchiri' xuq'uis rajilaxic Rutzij Upixab ri Dios, xuboto y xuya tanchi che ri aj chac re ri sinagoga, y xtz'uyi' chiquiwach ri e c'o chiri'. Y conoje lic caquitzutza' pan uwach. 21Ec'uchiri', xubi'ij chique:

«Wa' wa xinwajilaj che Ruch'a'tem ri Dios, wak'ij xujek bi rilic chiwach alak» xcha'.

22Conoje ri xetaw re, caquiyac uk'ij y lic caminak canima' che ri chomilaj uch'a'tem, jewa' caquibi'ij: «¿Na e ta neba uc'ajol ri José wa'?» quecha'.

23Y ri Jesús xubi'ij chique:

«Laj ne cabi'ij alak chwe: “Cunanel, chacunaj awib chawibil awib. Cha'ana c'u ri' chupa wa tinamit tak ri c'utubal re ruchuk'ab ri Dios jela' pacha' ri katom xa'an chila' Capernaúm” cacha alak chwe.»

24Y xubi'ij tanchi wa':

«Pakatzij wi cambi'ij che alak: Na jinta juna k'alajisanel cac'ul chi utz chupa rutinamit. 25Pakatzij wi cambi'ij che alak: Rojertan lic e q'ui rixokib e malca'nib e c'o chupa ri tinamit Israel chwach ri k'alajisanel Elías echiri' na xu'an ta jab oxib junab ruc' nic'aj y xpe c'u ri jun unimal numic chupa ronoje wa tinamit.+ 26Na ruc' ta c'u ri', ri Dios na xutak tubi ri Elías ruc' junok chique wa malca'nib aj Israel; ma e xutak bi ruc' jun ixok malca'n aj Sarepta,+ jun tinamit c'o chunakaj ri tinamit Sidón. 27Yey ojertan lic e q'ui ri c'o ri yabil lepra chique echiri' ri k'alajisanel Eliseo c'o chupa ri tinamit Israel. Na ruc' ta c'u ri', na jinta junok chique xcunutajic, ma xew xcunutaj ri Naamán, ri jun aj Siria»+ xcha'.

28Echiri' xquita wa', conoje ri e c'o chupa ri sinagoga lic xpe coyowal. 29Xeyactaj c'ut y xquesaj lo ri Jesús pa ri tinamit y xquic'am bi c'a chutza'm jun nimalaj juyub cha' caquic'ak bi pa siwan. 30No'j ri Jesús xa xic'ow chiquixo'l y xe'ec.

Ri Jesús cucunaj jun achi c'o puk'ab jun itzelilaj uxlabixel

(Mr. 1:21-28)

31Ri Jesús xopon chupa ri tinamit Capernaúm re Galilea y xujek cac'utun chiquiwach ri winak chupa tak ri k'ij re uxlanibal. 32Y conoje lic cacam canima' che, ma ruma ruc'utunic cak'alajinic lic c'o uwach.

33C'o c'u chiri' chupa ri sinagoga jun achi c'o puk'ab jun itzelilaj uxlabixel, yey wa' lic co xch'awic, jewa' xubi'ij:

34—Jesús, lal aj Nazaret, ¿su'chac co'lmina ib la kuc'? ¿Lal cami petinak ri' re co'lsacha la kawach? Ri'in weta'am lal chinok, rilal lal ri Santo C'ajolaxel re ri Dios —xcha'.

35Ec'u ri Jesús xuk'atej, jewa' xubi'ij che:

—¡Match'a't chic! Chatelubi che la'chi —xcha'.

Ewi ri itzel uxlabixel xuc'ak rachi pulew chiquixo'l ri winak y xel bi ruc'. Yey na jinta c'ax xu'an can che.

36Y conoje ri winak lic cacam canima' che y jewa' caquibi'ij chiquiwach: «¿Sa' chi ch'a'temal wa'? Ma lic c'o puk'ab quebutak bi ri itzelilaj uxlabixel. Quebutak bi ruc' ruchuk'ab y quebel bi» quecha'.

37Che ronoje tak ri luwar c'o lo xa nakaj, xe'ec utzijoxic janipa tak ri cu'an ri Jesús.

Ri Jesús cucunaj ruchu-uji' ri Pedro

(Mt. 8:14-15; Mr. 1:29-31)

38Ec'uchiri' xel bi ri Jesús chupa ri sinagoga, xopon chirocho ri Simón.+ Y ruchu-uji' ri Simón lic cakopow pa ak'. Xquitz'onoj c'u che ri Jesús cha' cucunaj canok. 39Ec'u ri Jesús xyuxi' puwi', xuk'atej ri ak' chirij y jela' xic'ow ri ak' chirij. Na jampatana xyactaj rixok y xujeko quebunimaj.

Ri Jesús quebucunaj uq'uiyal yewa'ib

(Mt. 8:16-17; Mr. 1:32-34)

40Chutzakibal k'ij conoje ri c'o quiyewa' ruma uq'uiyal uwach yabil xequic'am lo ruc' ri Jesús. Rire xuya ruk'ab paquiwi' chiquijujunal y xebucunaj. 41Jenela' xebel bi itzelilaj uxlabixel chique uq'uiyal winak. Echiri' quebel bi, quesiq'uinic, jewa' caquibi'ij: «¡Rilal lal Ruc'ajol ri Dios!» quecha'. No'j ri Jesús xebuk'atej y na xuya ta luwar chique quech'awic, ma rique queta'am chic Rire e Ucha'o'n lo ri Dios.

Ri Jesús catzijon pa tak ri luwar re Galilea

(Mr. 1:35-39)

42Echiri' xsakiric, ri Jesús xel bi chupa ri tinamit y xe'ec chupa jun luwar catz'intz'otic. Y ri winak xe'quitzucuj. Ec'uchiri' xebopon c'a pa la c'o wi, xcaj caquik'atej cha' na quebuya ta canok.

43No'j Rire jewa' xubi'ij chique: «Lic chirajawaxic quin'ec pa tak tinamit re cantzijoj ri Utzilaj Tzij re rutakanic ri Dios chique ri ticawex c'amaja' caquita wa', ma ruma wa' intakom lok» xcha'.

44Xe'ec c'u che utzijoxic ri Utzilaj Tzij pa tak ri sinagogas re Galilea.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index