Search form

Mateo 20

Jun c'ambal na'oj puwi rutakanic ri Dios

1»Ri cu'an chupa rutakanic ri Dios petinak chila' chicaj e jela' pacha' ri xu'ano echiri' juna rajaw chac anim tan xel bi che quitzucuxic aj chaquib quebajawax chupa rutico'n re uva. 2Xch'a't cuc' raj chaquib puwi ri cajil y xcanajic cuya jun denario re jun k'ij chac chique. Tec'uchiri', xebutak bi chupa rutico'n. 3Laj che ri ubelej ora+ anim, xel tanchi ubi y xeburik jujun chic quimolom quib pa c'ayibal na jinta caqui'ano.

4»Xubi'ij c'u chique: “Jix ri'ix, jixe'chacuna wuc' chupa ri nutico'n re uva y tz'akat quixintojo” xcha'. Ec'u rique xebec.

5»Pa tiq'uil k'ij+ c'u ri', ri rajaw ri chac xel tanchi ubi che quitzukuxic más aj chac. Yey je tanchi la' xu'an che ri urox ora benak k'ij.

6»Laj che c'u ri uro' ora benak k'ij, xel tanchi ubi y xebu'rika lo jujun chic na jinta caqui'ano. Xubi'ij c'u chique: “¿Su'chac ri'ix ix c'o wara y na jinta c'o xi'an wa jun k'ij?”

7»Xquic'ul c'u uwach rique: “E ruma na jinta junok xojchocowic.”

»Ec'uchiri', xubi'ij ri rajaw ri chac chique: “Jix, jixe'chacuna chupa ri nutico'n re uva y tz'akat quixintojo.”

8»Echiri' xoc rak'ab, ri rajaw ri chac xubi'ij che ri caporal: “Chebasiq'uij conoje raj chaquib y chebatojo bi. E quebatoj nabe ri xeboc c'unaj, y q'uisbal c'u re, quebatoj ri xeboc nabe pa chac.”

9»Ec'uchiri', xec'un raj chac ri xeboc benak k'ij che ri uro' ora. Y chiquijujunal c'u ri' xquic'ul jun denario. 10Tec'uchiri', xec'un lo ri eboquinak nabe pa chac. E chiquiwa rique más q'ui ri cajil caquic'ulu. No'j na je ta la' xu'ano, ma xquic'ul chiquijujunal jun denario, pacha' ri xquic'ul ri jujun chic.

11»Echiri' xquic'ul ri cajil re jun k'ij, xquijeko quech'a't chirij ri rajaw ri tico'n, 12jewa' xquibi'ij che: “Wa' wa xeboc benak k'ij chic, xa jun ora xechacunic yey xetoj la junam kuc' ri'oj, tob c'u ri' ri'oj xkacuy lo ruc'atanil ri k'ij” xecha'.

13»No'j ri rajaw chac xuc'ul uwach, jewa' xubi'ij che jun chique: “Wamigo, mabi'ij we na usuc' ta ri xin'an chawe. ¿Na xojcanaj ta neba la' catintoj jun denario? 14Chac'ama c'u rawajil ri'at y jat. Yey we ri'in cuaj canya che ri xoc c'unaj pa chac, junam ruc' ri xinya chawe ri'at, 15¿na jinta neba panuk'ab ri'in can'an sa' ri cuaj ruc' ri nupuak? ¿O c'ax ac'u'x chwij xa ruma xinc'ut ri rutzil nuc'u'x chique jujun chic?” xcha ri rajaw ri chac.

16»Jela' c'u ri', lic e q'ui chique ri na jinta quiwach wo'ora, e lic cac'oji' quiwach chwach apanok; yey lic c'u e q'ui chique ri lic c'o quiwach wo'ora, chwach apanok na jinta chi quiwach. Ma lic e q'ui ri esiq'uim, tob c'u xa e jujun ri echa'talic —xcha ri Jesús.

Ri Jesús cach'a't tanchi puwi rucamic

(Mr. 10:32-34; Lc. 18:31-34)

17Echiri' c'o chi ri Jesús chi be re que'ec Jerusalem, xebuc'am bi ri cablajuj utijo'n quituquel pa jun luwar y xubi'ij chique:

18«Chitape': E wa' cojpaki' Jerusalem, yey ec'u Ralaxel Chiquixo'l Ticawex caya' paquik'ab ri nimak e aj chacunel pa Rocho Dios y raj c'utunel re ri tzijpixab cha' caquik'at tzij puwi' re camic. 19Tec'uchiri', caquiya paquik'ab ri na e ta aj judi'ab cha' rique caquich'amij, caquijich' upa y caquicamisaj chwa cruz. No'j churox k'ij c'ut cac'astaj bi chiquixo'l ri ecaminak» xcha'.

Ri xutz'onoj ri quichu ri Jacobo y ri Juan che ri Jesús

(Mr. 10:35-45)

20Ec'uchiri', xkib ruc' ri Jesús ri quichu ri queb uc'ajol ri Zebedeo,+ y ec'u la' e rachbi'il ri ralab; xuxucuba' rib chwach ri Jesús ma c'o caraj cutz'onoj che.

21Ri Jesús xutz'onoj che:

—¿Sa' ri ca'aj la? —xcha'.

Rixok xuc'ul uwach:

—Wajawal, ya'a la chique wa queb walab quetz'uyi' uc' la pa ri takanic la, jun pawiquik'ab la y ri jun chic, pa mox la —xcha'.

22Ec'u ri Jesús xuc'ul uwach, y jewa' xubi'ij chique ri queb utijo'n:

—Ri'ix na iweta'am taj sa' ri quitz'onoj. ¿Quich'ij neba ri'ix ri quinic'ow wi ri'in y ri c'ax cape panuwi'? —xcha'.

Rique xquibi'ij:

—Cakach'ijo —xecha'.

23Ri Jesús xubi'ij chique:

—Katzij, ri'ix quich'ij na ri c'ax quinic'ow wi ri'in y ri c'axc'obic cape panuwi'. Pero ri quixtz'uyi' pa nuwiquik'ab y pa numox, ri' na in ta quinya'w re. Ma xew caya'taj chique ri echa'tal chi ruma ri Nukaw cha' cu'ana na que —xcha'.

24Echiri' xquita wa' ri lajuj chic utijo'n, lic xpe coyowal chiquij ri queb quichak' quib. 25Ec'u ri Jesús xebusiq'uij y xubi'ij chique:

—Iweta'am ri'ix, ri quetakan paquiwi ri nimak tinamit quebu'ana pacha' e rajaw ronoje; yey ri lic c'o quiwach quic'ow uwi' ri takanic caqui'an paquiwi ri eya'tal paquik'ab. 26No'j chixo'l ri'ix na ube taj jela' cu'ano. Ma we c'o junok chiwe ri'ix caraj cu'ana aj wach, e chuya'a rib cu'an nimanel iwe'ix. 27Yey e junok chiwe caraj cu'ana nabe chixo'libal, e chuya'a rib cu'an nimanel que conoje 28jela' pacha' ri cu'an Ralaxel Chiquixo'l Ticawex. Ma Rire na xc'un taj re canimaxic; xc'unic re co'lnimanok y re colu'ya'a rib pa camic che quicolobexic uq'uiyal ticawex —xcha'.

Ri Jesús quebucunaj ca'ib potz'

(Mr. 10:46-52; Lc. 18:35-43)

29Echiri' ri Jesús cuc' rutijo'n catajin bi quelic pa ri tinamit Jericó, lic uq'uiyal winak xeterej bi chirij Rire. 30E c'o c'u ca'ib potz' etz'ul chuchi' ri be. Echiri' xquito catajin ric'owic ri Jesús, lic xesiq'uin pan che:

—¡Kajawal, lal ri Ralc'o'al can ri rey David, choj-juch' ca'n co che'la! —xecha'.

31Ec'u ri winak xequich'a'bej quipa cha' na quesiq'uin ta chic, no'j ri ca'ib potz' más ne co xesiq'uinic, xquibi'ij:

—¡Kajawal, lal ri Ralc'o'al can ri rey David, choj-juch' ca'n co che'la! —xecha'.

32Ec'uchiri', xtaq'ui' ri Jesús, xebusiq'uij y xutz'onoj chique:

—¿Sa' ri quiwaj can'an chiwe? —xcha'.

33Ri ca'ib potz' xquic'ul uwach:

—Kajawal, chojcunaj co la cha' cojtzu'nic —xecha'.

34Ec'u ri Jesús xejuch' ca'n pa ranima' y xuya ruk'ab puwi ri quiwach. Na jampatana c'u ri' xetzu'nic y xeterej bi chirij ri Jesús.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index