Search form

Mateo 28

Ruc'astajibal ri Jesús

(Mr. 16:1-8; Lc. 24:1-12; Jn. 20:1-10)

1Ic'owinak chi ri k'ij re uxlanibal, e ri' catajin usakiric ri nabe k'ij che ri semana, ri María ri aj Magdala y ri jun chic María xe'quila ri mukubal. 2Xakic'ate't xpe jun nimalaj cabrakan, yey wa' e x'anaw jun ángel re ri Dios xkaj lo chicaj. Echiri' xopon chwach ri mukubal, xresaj rabaj utz'apim uchi' ri mukubal y xtz'uyi' c'u puwi'. 3Ri ángel lic cawolk'inic, catzu'n jela' pacha' ruxe' caj echiri' cayoc' ca'nic; yey ruk'u' lic sak pacha' ri nieve.+ 4Ri soldados echiri' xquil ri ángel, lic xquixi'ij quib che; xquijek quebirbotic y xecanaj canok pacha' chi ecaminak.

5Ec'uchiri', xubi'ij ri ángel chique rixokib:

—Mixi'ij iwib. Ma ri'in weta'am e quitzucuj ri Jesús, ri xcamisax chwa cruz. 6Rire na jinta chi wara, ma c'astajinak chubi jela' pacha' rubi'im chi ulok. Cho'liwilape wa luwar pa xya'i' wi ri Kanimajawal. 7Jix c'u ri'ix, lic chiwilij bi y ji'bi'ij chique rutijo'n: “Ri Jesús xc'astaj bi chiquixo'l ri ecaminak. Chiwilape', Rire que'ec Galilea, canabej bi chiwach; chila' c'u ri' qui'wila wi uwach.” Ec'u xo'lnubi'ij wa' chiwe —xcha'.

8Echiri' rixokib xebel bi chuchi' ri mukubal, lic quixi'im quib pero c'o unimal qui'cotemal cuc'. Queban c'u ri' xebec cha' que'quibi'ij chique rutijo'n janipa ri xquilo y ri xbi'x bi chique. E c'o c'u chi be 9echiri' ri Jesús xebuc'ulu y xuya rutzil quiwach. Ec'u rique xekib ruc' y xquixuc quib chwach; xquilak'apuj ri rakan y xquilok'nimaj uk'ij.

10Ri Jesús xubi'ij c'u chique:

—Mixi'ij iwib. Jix, ji'bi'ij chique ri nu hermanos cha' quebec chila' Galilea y chiri' caquil wi nuwach —xcha'.

Ri rak'ubal xqui'an ri e chajinel re ri mukubal

11Ec'uchiri' e c'o pan rixokib pa be, jujun chique ri e chajinel xebec pa ri tinamit y xe'quitzijoj chique ri nimak e aj chacunel pa Rocho Dios ronoje ri xquic'ulumaj. 12Ec'u ri nimak e aj chacunel pa Rocho Dios cuc' ri nimak winak re ri tinamit, xquich'a'bej quib cha' caqui'an tzij chiquiwach. Xquiya c'u uq'uiyal puak chique ri soldados 13y xequitak che jewa' caquibi'ij: «Echiri' oquinak lo kawaram chak'ab, xec'un rutijo'n ri Jesús y xquelak'aj bi rucuerpo. 14Yey we xreta'maj wa' ri takanel, ri'oj cakacoj pujolom cha' na jinta c'o cu'an chiwe» quecha'.

15Ri soldados xquic'am c'u ri puak y e xqui'ano janipa ri xbi'x chique. Ec'u raj judi'ab c'a e ubi'xiquil wa' caqui'an wak'ij ora.

Ri takanic xya' can ruma ri Jesús

(Mr. 16:14-18; Lc. 24:36-49; Jn. 20:19-23)

16E tak c'u ri junlajuj utijo'n xebec Galilea chwa ri jun juyub pa ubi'im wi ri Jesús chique. 17Echiri' xquil uwach ri Jesús, lic xquilok'nimaj uk'ij, tob c'u e c'o jujun chique c'amaja' caquicojo we pakatzij wi ri Jesús xc'astaj lo chiquixo'l ri ecaminak.

18Ec'uchiri', xkib ri Jesús cuc' y xubi'ij chique:

—Ri'in ya'tal lo panuk'ab ronoje ri takanic chila' chicaj y che ruwachulew. 19Ruma c'u wa', jix cuc' conoje ruq'uiyal quiwach tak ri tinamit che ruwachulew, chi'ana c'u e nutijo'n chique y chiya'a ri bautismo chique pa rubi' ri Kakaw Dios, Ruc'ajol y ri Santowilaj Ruxlabixel. 20Chic'utu chiquiwach rique cha' e caqui'an ronoje janipa ri ixnutakom ri'in che. Lic chiweta'maj c'ut: Ri'in quinc'oji' iwuc' ronoje k'ij c'a che ri q'uisbal re ruwachulew —xcha'. Amén.

Ri utzilaj tzij re ri kanimajawal Jesucristo

© 2009, Wycliffe Bible Translators, Inc. All rights reserved. More Info | Version Index