Search form

Korɛnt eyŋ e lɛl krɛkrɛ 14

Sob ap ekʼel Abŋ Lala ecʼa it eke kʼↄŋ Nyamel agb

1Ow sosiɛm a, ìkŋn anym ↄↄl erur es. Ɔ̀ↄl ɛrm fɛŋ ɛm Abŋ Lala e sob ap ab es, ab brobro sodad eke bʼanŋ Nyam ogŋ ow ke si bʼeb sʼↄŋ agŋ a, ecʼob ap a. 2Eke batŋ ↄny ɛm a ɛgŋ nyam am dad odad sɛbr eke wɛl uwm any ɛm, ow elm agŋ li dadm odad, kↄ Nyam nʼam dad, aŋke ɛgŋ kaka irim. Abŋ Lala ecʼabu ɛlum ɛm, li bi dad ów ekʼↄtu nↄnↄ ke lↄl es. 3Gbɛkↄ eke ɛgŋ nyam am dad odad eke bʼanŋ Nyam ogŋ ow a, ke agŋ nʼam dad lʼok, lʼɛ́lum abu agb ↄmn ɛm, lʼátr sos es ke lʼɛ́yr ɛrm es. 4Ɛgŋ a eke am dad odad sɛbr eke wɛl uwm any ɛm a, am ↄtur in sosi cɛ sos. Kↄ ɛgŋ a ekʼin am dad odad eke bʼanŋ Nyam ogŋ ow ok agŋ a, am ↄtur Nyamel a nimum sos.

5Mʼerur eke ↄny fɛŋ kʼɛbar sɛbr eke wɛl uwm any a, gbɛkↄ yecʼeke mʼerur tasi a el ke ám dadr sodad eke bʼanŋ Nyam ogŋ ow a. Dád sodad eke bʼanŋ Nyam ogŋ ow a, akpl nↄnↄ akm sɛbr eke wɛl uwm any ecʼɛbr a. Sica ekʼɛgŋ nyam anŋ eke kʼitŋn ɛbr a eke wɛl uwm any ecʼodad a, yecʼɛtŋ ke ow ↄ́ŋ Nyamel a nimum agb ↄmn ɛm a, ke ow akpl. 6Agŋ lisijimɛl, sʼócr low nyam sʼↄbar any: eke mʼow mʼam ɛkn ↄny ɛtŋ mʼam dad ↄny odad ɛbr nyam eke írimn ɛm, ke mi kok low nyam mʼↄŋ ↄny ee? Gbɛkↄ eke mʼotar ów a eke Nyam ↄŋʼm a akr sɛnyn sɛnyn irir, oglog eke mi dad ↄny Nyam e lís ecʼany uw e low ayl, oglog mi dad ↄny odad eke bʼanŋ in ogŋ ow a, oglog eke mi yɛgm ↄny low, ow ↄtu eke kʼɛlum ↄny abu.

7Simob eke wɛl bʼot ɛgŋn ɛj a yɛji, am ↄŋ ɛy low any ↄbar nyam: ɛsɛ kete af oglog saŋgo af, eke ɛl ecʼikŋ a kpakpabm es aylm, ayaf wɛl kʼuwr ɛj yecʼeke -nʼam afl ab any ee? 8Ɛtŋ eke kↄkr a ecʼikŋ a aylm okm es, bwo ecʼɛgŋ bʼow bɛbm ar ogŋ e sos ee? 9Ɔny ecʼa yɛji ɛbɛn! Eke am dadr ów sodad ebl eke wɛl írim ab, ayaf wɛl kʼuwr yecʼa ekʼam dadr ab any ee? Ow anŋ ɛsɛ odad ekʼam dadr okr wus af. 10Sɛbr ɛrŋ ɛrŋ anŋ wus af aŋa, ɛtŋ -li bi dad ów eke bʼok agŋ a e bʼiri a es sos ɛm. 11Eke mʼuwm ɛgŋ a ekʼam dadʼm odad a ecʼɛbr ab any, mʼel utu ɛgŋ in ecʼany af ɛtŋ ɛm yɛji lʼel utu ɛgŋ ɛm ecʼany af. 12Ɔny yɛji ɛbɛn cɛ! Sica eke am erurir Abŋ Lala eci sob ap a, ìbrmn Nyam atrm ɛm ɛl a ekʼↄtu eke kʼↄŋ Nyamel agb a.

13Na sosiɛm anake ɛgŋ a eke am dad odad sɛbr eke wɛl uwm any ɛm a, ki ŋↄŋn Nyam, ow ↄ́ŋʼn odad itŋn e bibm a. 14Eke mi bi ŋↄŋn Nyam sɛbr eke wɛl uwm any ɛm a, ɛm ecʼabŋ a bi ŋↄŋn Nyam a, kↄ ɛm e nuŋ ɛm ↄny a am kokm low kaka. 15Ayaf mi ki kokr ab ee? Mi bʼow mi ŋↄŋn Nyam ɛm ecʼabŋ ab ab, gbɛkↄ mi bʼow mi ŋↄŋn sodad ebl eke bʼok es ɛm. Mi bʼow mʼɛgŋ ɛj ɛm ecʼabŋ ab ab, gbɛkↄ mi bʼow mʼɛgŋ ɛj a sodad ebl e bʼok es ɛm. 16Sica ekʼow el abŋ ɛm bʼↄŋ Nyam bia, ɛgŋ a eke irim low a ɛwm es, ke uwm yecʼeke am dad ab any a, ayaf li kʼↄtu li dad «amɛn», ŋ e Nyam bia ɛlu e ŋↄŋn a ecʼee? 17Eke ŋ e Nyam bia ɛlu e ŋↄŋn a akpl nↄnↄ yɛji, ow ɛ́luam agŋ ɛjecʼa abu agbm ↄmn ɛm.

18Mʼam ↄŋ Nyam bia eke mi bʼɛbr sɛbr nↄnↄ eke wɛl uwm any mʼakm ↄny fɛŋ. 19Gbɛkↄ Nyamel bʼas luku a, mʼerur eke mi ki dad sodad ebl yen eke ayl wɛl bʼiri mi yɛgmn agŋ low, ow a eke mi ki dad sodad fandi lɛw eke wɛl írim kaka a.

20Agŋ lisijimɛl, kì tutar ów ɛsɛ etuey af, kↄ tùtar ów ɛsɛ agŋ any es ɛdŋu af. Sica low ŋuŋ ecʼa gbɛ, ànŋn ɛsɛ etuey eke ɛknm low ɛm af. 21Nyam ecʼol ab ɛm Ɛs Kↄtↄkↄ dad ninɛ:

Mi bʼow mʼɛcr agŋ eke bʼɛbr etu ecʼɛbr ɛm,

mi dad Israɛl eyŋ odad,

mi bʼow mʼoc etu agŋ e nɛny mi dadr ɛl odad.

Ɛtŋ ɛbɛn yɛji, -li kʼow -lʼirimn ɛm owi.

22Ow am yɛgm eke sɛbr eke wɛl uwm any ecʼɛbr a, el mɛny ɛwr agŋ a ekʼubm nawrɛ a eci, gbɛkↄ ow elm low kaka nawrɛ ub ɛsɛl a eci. Ɛbɛn nɛny nyam, sodad eke bʼanŋ Nyam ogŋ ow a, el mɛny ɛwr agŋ a ekʼel nawrɛ ub ɛsɛl a eci, gbɛkↄ ow elm low kaka agŋ ekʼubm nawrɛ a eci.

23Kʼaw ke Nyamel nimum ás luku, ke agŋ a pupukpaŋ ám dad odad sɛbr eke wɛl uwm any ɛm. Eke agŋ ekʼirim ɛy e low a oglog agŋ eke ubm nawrɛ ow ok ↄny ɛm, -li bʼow -li tutr eke nuŋ ɛm uŋ ↄny! 24Gbɛkↄ eke agŋ a fɛŋ am dad sodad ekʼanŋ Nyam ogŋ ow, ɛtŋ ɛgŋ nyam ekʼubm nawrɛ oglog irim ɛy e low a kaka ow ɛy ↄny ɛm, li bʼow lʼitŋn ɛrm ɛm sodad eke nʼam iri a sosiɛm. 25Ow bʼow ↄŋ ɛtŋ ów a eke lↄl es in ecʼɛrm ab ɛm a bʼow ayl, ɛtŋ li bʼow lʼok ↄwrↄkp wus, lʼubu any es. Li bʼow lʼigŋ Nyam nuŋ ke li dád lʼɛsɛ: «Ɛɛ, Nyam anŋ ↄny araŋn tasi!»

Nyam nuŋ igŋ ɛm ecʼów sisigm

26Sica agŋ lisijimɛl ayaf si ki dadr ab ee? Eke bʼasr luku Nyam nuŋ igŋ ecʼa, ɛgŋ nyam ↄtu eke kʼɛgŋ ɛj nyam, ɛjeci nyam ɛ́ŋn low e ki yɛgm agŋ, ɛjeci nyam ɛ́lu Nyam e lís e low nyam ↄkm, ɛjeci nyam dád odad ɛbr eke wɛl uwm any ɛm, ke ɛjeci nyam, in ítŋn odad a eke wɛl dad a. Gbɛkↄ ke fɛŋ ɛ́lum Nyamel a abu agb ↄmn ɛm. 27Eke wɛl am dad ów sɛbr eke wɛl uwm any ɛm, agŋ yony oglog nyahan ↄtu eke ki kok, kↄ ke ow él ɛgŋ nyam nyam, ke ɛgŋ ánŋ am itŋn yecʼa eke -nʼam dad a. 28Sica ekʼɛgŋ anm yogŋ eke kʼitŋn ɛl e sodad a, ow akpl eke -li ki yewal tiŋ agŋ a ecʼaraŋn, ke ɛgŋ ɛgŋ dad odad a lokm ɛm in obi in obi lele Nyam ab eci. 29Agŋ a eke ɛl, bi dad sodad eke bʼanŋ Nyam ogŋ ow a ecʼa, agŋ yony oglog nyahan ↄtu eke ki dad ów a eke -nʼɛŋan a, ke agŋ likpr a ↄ́ny ɛl e dad ebl a igbl ogŋ ɛkn. 30Eke agŋ ab ɛm, Nyam ↄŋ ɛgŋ nyam odad eke ki dad, ɛtŋ ɛgŋ ɛjeci nyam odad anŋ nɛnym am dad a, lʼók odad ab es ke yecʼa yɛji dád. 31Nawrɛ, ↄtur eke ↄny fɛŋ kʼɛŋan sodad eke bʼanŋ Nyam ogŋ ow a, gbɛkↄ ke ow él ɛgŋ nyam nyam ki dad, yecʼɛtŋ ke agŋ a fɛŋ íri low yɛgm ekʼanŋ ɛm a, ke ↄ́ny sos es atr. 32Agŋ a eke bʼɛŋn sodad eke bʼanŋ Nyam ogŋ ow a, ↄtu eke kʼↄnyn sos es bibm a eke -nʼɛŋan a e low kok ɛm. 33Nyam elm ów wuwal ɛs, kↄ ɛrm es ɛy e Nyam.

Ɛtŋ ɛsɛ elel eke ow bʼɛcr Nyam nuŋ igŋ ɛsɛl fɛŋ ecʼaraŋn ab af, 34ow it eke ↄyↄw ki yewal tiŋ agŋ araŋn. -Nʼↄnym abusu eke -li kʼigb -lʼeb odad -lʼibrm low, kↄ -lʼok es tiŋ ke -lʼiri low, ɛsɛ elel eke Jwifɛl ecʼol a am dad ab af. 35Eke -nʼↄny low eke -li kʼibrm -lʼiri a, -lʼibrm ɛl ɛcɛl akŋ ɛm. Ow akplm eke yↄw kʼigb agŋ araŋn eb odad.

36Ɔny bi tutar a ke Nyam odad a, ↄny ogŋ yogŋ ow anŋ ow ee? Ɔny sↄny cɛ eel agŋ ekʼɛŋnʼn ee? 37Ekʼɛgŋ nyam am ocr in sosi Nyam e kokoba ↄb ɛs, oglog ɛgŋ ekʼɛŋn Abŋ Lala ecʼob ap ab ɛm e nyam, ke lʼↄtu eke li kʼɛkn odad na eke mʼam nↄn mʼawŋ ↄny a ɛsɛ Ɛs Kↄtↄkↄ ecʼol af. 38Gbɛkↄ eke lʼuwm any ɛbɛn a, in yɛji Nyam kʼow uwmʼn any.

39Agŋ lisijimɛl, ow ecʼuwrm ɛm a, mʼam dad mʼɛsɛ: ow akpl eke kʼerurir ɛŋan sodad eke bʼanŋ Nyam ogŋ ow a; ke kʼɛ́dŋnmn agŋ a eke bʼɛbr sɛbr eke wɛl uwm any a. 40Gbɛkↄ, ke ↄny ecʼaraŋn a, ów a fɛŋ él sɛjɛm sɛjɛm lele sisigm ɛm ab.

Amani Owr

© 1998, Association Ivoirienne pour la traduction de la Bible; Wycliffe Bible Translators, Inc.

More Info | Version Index