Search form

Korɛnt eyŋ e lɛl krɛkrɛ 8

Segb waw eke wɛl bi kok ↄŋ sinyam yadŋ

1Sica ↄny e lɛl ekʼawŋnʼm ab ɛm, ibrmnʼm eke wɛl ↄtu ekʼij mindey eke wɛl bi kokr egb waw ↄŋ sinyam yadŋ a. Ow a eke am dadr a, low nawrɛ: «Ɛy fɛŋ sʼↄny low na ecʼany uw tasi.» Gbɛkↄ low any uw na bʼↄŋ ɛgŋ ɛw sos. Kↄ erur bʼↄŋ Nyam ecʼagŋ a agb ↄmn ɛm. 2Ekʼɛgŋ nyam am ↄny tutr eke in uw low nyam any, ke li kʼuwm elel eke wɛl bʼuwr low any a. 3Gbɛkↄ ekʼɛgŋ nyam bʼerur Nyam, ɛgŋ a, in yɛji Nyam bʼuwʼr any.

4Low a ekʼibrmnʼm a el: «Kↄ wɛl ↄtu eke kʼij ndey eke wɛl wawr egb ↄŋ sinyam yadŋ ab ee?» Ɛy sʼuw any tasi eke Nyam nyam cɛ anŋ, ɛtŋ sinyam yadŋ a elm low kaka. 5Nawrɛ, agŋ bɛb bi dad eke sinyam in anŋ afr lele wus aŋa ab. Ɛl ecʼa, sinyam a nↄnↄ gbɛl ɛtŋ -li bʼoc wɛl ɛsɛ Ɛs Kↄtↄkↄ af. 6Gbɛkↄ ɛy ecʼa, sʼuw any eke Nyam nyam coco cɛ anŋ, ekʼel ɛy Ɛs. In anake li kok ob ob fɛŋ a, ɛtŋ in eci anake sʼanŋ owr a. Ɛs Kↄtↄkↄ yɛji, nyam cɛ anŋ, in lʼel Jesu Krist. In e sabu ɛm li kok ob ob fɛŋ ɛtŋ ɛy yɛji, in ecʼabu ab ɛm sʼanŋ owr.

7Gbɛkↄ ow elm ↄmn ɛsɛl a fɛŋ uwm low nawrɛ na any! Lɛgŋ sig ɛm a, agŋ bɛb sinyam yadŋ e nuŋ igŋ a ɛcm ab. Ow ↄŋ caca ɛm a, eke -li bʼij ndey eke wɛl kokr egb waw a, ke -nʼam ↄny tutr eke ndey a, sinyam nawrɛ tasi wɛl oc kokr egb waw ↄŋ. Ɛtŋ eke -lʼeel fuɛfuɛ ↄmn ɛm a, -li bi tutr eke ndey a bʼↄŋ -lʼel agŋ ekʼaylm Nyam ecʼany af. 8Ke ow elm ob ij kʼow ↄↄm ɛy si titam Nyam. Eke sʼijm yɛji, sʼirmnm ob kaka, ɛtŋ eke sʼij yɛji, si kʼow sʼɛŋnm ob kaka.

9Abusu ɛru ↄny es low fɛŋ ekʼerurir e kok eci. Gbɛkↄ ɛ̀wr ɛrm, abusu na ekʼɛru ↄny es a itm eke kʼↄny agŋ a ekʼɛw fuɛfuɛ ↄmn ɛm a ok wus! 10Tasi ɛm a, ŋ ekʼↄny “low any uw” a, eke ɛgŋ nyam ekʼɛw fuɛfuɛ ↄmn ɛm a ɛknʼŋ ekʼanŋ sinyam yadŋ e nuŋ igŋ usu am ij ob, kↄ ow kʼow atrmʼn sos es eke li kʼij ndey eke wɛl kokr egb waw ↄŋ sinyam yadŋ ab ee? 11Ŋ e low any uw a sosiɛm, esŋ jim a eke ɛw fuɛfuɛ ↄmn ɛm a, bʼow ɛy wus, in eke Krist uw in sosiɛm a! 12Eke bi kokr sikpl ɛrŋ na ↄbar ↄny lisijimɛl, ↄ́ŋn ɛl ecʼↄmn fuɛfuɛ a abur es, ke Krist anake am kokr sikpl ↄbar a. 13Na sosiɛm anake ob nyam eke mi bʼow mij, ke bʼow ↄny ɛm lisijim nyam ɛlu sikpl ɛm a sosiɛm, mi kʼow mʼijm ndey ij, yecʼɛtŋ ke mi kʼɛ́lumʼn wus a.

Amani Owr

© 1998, Association Ivoirienne pour la traduction de la Bible; Wycliffe Bible Translators, Inc.

More Info | Version Index