Search form

Efɛs eyŋ e lɛl 4

Krist ɛm ecʼaf okr

1Ɛm eke mʼel sobel ɛm ɛs Ɛs Kↄtↄkↄ sosiɛm a, kin yecʼeke mʼam ok ↄny mɛrm sabu af mi dad ↄny: ↄny eke Nyam ɛsŋ ↄny a, ↄnyn es an ekʼot ↄny ecʼɛsŋ ab es. 2Sɛgŋ fɛŋ ìsr es, èel frↄrↄ, ↄnyan sos es low ɛm, ɛ̀gŋn ɛgŋ ɛgŋ ecʼelel eke anŋn a ebr erur ɛm. 3Àtar sos es ucur af okr a eke Abŋ Lala bʼↄŋ ↄny a ↄnyn es, ɛrm es ɛy a eke bʼↄny okr ↄny af ↄny ↄfr ɛm a; 4aŋke Nyam kok sos megl nyam, nʼↄŋ ↄny Abŋ Lala nyam, ɛtŋ low ↄmn nyam ɛm cɛ lʼɛsŋ ↄny. 5Ɛtŋ ↄnyn Ɛs Kↄtↄkↄ nyam, ↄmn nyam lele mij ok nuŋ nyam ab, 6Nyam nyam cɛ eke el agŋ fɛŋ ecʼƐs eke ɛw fɛŋ es, bi kok low fɛŋ agŋ fɛŋ ɛm, ke ir agŋ fɛŋ ɛm a.

7Gbɛkↄ ɛy ɛm ecʼɛgŋni nyam nyam ɛŋn in ecʼob ap ekʼit a, ob ap ab ɛm eci yecʼa eke Krist ↄnynʼn ɛrm mamn ↄŋʼn a. 8Kin yecʼeke Nyam Lɛl dad:

Eke lʼuyu afr kpoŋ ɛm a,

lʼot sobel ɛm ɛsɛl ab nʼim;

ɛtŋ li cɛc agŋ sob ap.

9Kↄ lʼuyu afr a, in ecʼiri tasi a el bogŋ ecʼee? Ow am yɛgm eke lʼikŋ anym lʼus es nʼim esr ɛm a, ekʼel wus af aŋa a. 10Ɛtŋ ɛgŋ a ekʼus es a, in cɛ lʼel ɛgŋ a ekʼuyu afr kpoŋ ɛm a, yecʼɛtŋ ke li fáf es lʼeb wus na nimum. 11In anake li cɛc ob ap ekʼit a nʼↄŋ agŋ, ke ow ↄŋ agŋ bɛb el Krist ecʼɛrm ɛsɛl, bɛb el kokoba ↄb ɛsɛl, bɛb el Amani Mamn a ecʼes ↄmun ɛsɛl, bɛb el pastɛrɛl oglog low yɛgm ɛsɛl a. 12Li cɛc agŋ amua sob ap amua, yecʼɛtŋ ke wɛl ↄ́ŋ agŋ lala a ekʼel Nyam ecʼa úw juma e ki kok, ke ↄ́ŋ Krist e sos megl a imn anym ecʼab any. 13Nɛnɛ anake ɛy fɛŋ si bʼow sʼↄny ↄmn lele Nyam ecʼIy a ecʼany uw nyam coco ab a. Ɛtŋ si bʼow sʼel agŋ ekʼↄny ↄmn ekʼusu ɛtŋ si bʼow sʼagb sʼanŋ ɛsɛ elel eke Krist anŋn ab af. 14Sica si kʼow sʼelm ey abu ɛm ij. Si kʼow sʼanm ɛsɛ mijɛtŋ gↄŋni eke okij e mra am ↄny wↄwl usu fɛŋ eke lʼerur ab af ij. Ɛtŋ si kʼow si yɛbm sow tutr yadŋ eci lɛf a ɛlulm ɛy, ocm ɛcm ɛy usu fɛŋ ij. Agŋ kʼow ↄtum irmnm ɛy ɛl eci mɛju ab ɛm ij. 15Ɛtŋ eke si bi dad low nɛnyɛmbri nyam erur ɛm, si bʼow sʼagb fɛŋ ɛm sʼimn Krist ekʼel nuŋ a ogŋ. 16In ɛm anake sos ogog ogog a fɛŋ bʼinym es kikri, ke bʼokr af a. Sos ŋgigŋnel usu nↄnↄ bʼↄŋ sos megl a nimum ókr af, ɛtŋ eke sos ogog nyam nyam fɛŋ bi kok in e juma ekʼit a, sos megl a nimum bʼagb ɛtŋ bʼↄny lɛc erur ɛm.

Krist ɛm ecʼɛb ir owr

17Kin low yecʼa eke mʼam dad, ke nɛny am atʼm es mi dad Ɛs Kↄtↄkↄ e nin ɛm a: ow itm eke kʼaan es ɛsɛ Nyam any uwm ɛsɛl eke bʼus ɛl e sow tutr eke low kaka anm ɛm a jam a. 18Tasi ɛm a, ɛl e nuŋ ɛm ↄny a anŋ ncebn ɛm ɛtŋ sel ɛŋn a eke Nyam bʼↄŋ agŋ a, -nʼↄnym ɛl eci kaka anm ɛm, aŋke -lʼuwm ow e low kaka any ɛtŋ -nʼↄny ɛrm tuↄtuↄ yɛji. 19-Lʼirmn agŋ ɛm ecʼɛb ir a e mɛwl a fɛŋ, -lʼocr ɛl sosi -lʼɛlu es an keskes ɛm ɛtŋ -nʼam kok sikpl owi fɛŋ eke bʼaw ɛl a.

20Ɔny, ow elm nɛnɛ wewrmn Krist eci any uw a! 21Ɔny, nawrɛ tasi ɛm irir in e lís e low fɛŋ ɛtŋ wɛl yɛgm ↄny low nɛnyɛmbri nyam ekʼanŋ Jesu ɛm a. 22Eke ow el ɛbɛn a, ìgŋn ↄny ecʼɛb ir sig a ɛlul es. Lɛgŋ ab ɛm a, eel agŋ eke mɛju ecʼów aw iy ɛm ke am ŋuŋn. Ow sosiɛm, elel a eke anŋnin lɛgŋ ab ɛm a, ow it eke kʼigŋn ɛlul es ɛsɛ mob sus ɛm sig af, 23ke yɛ́br wɛl itŋn ↄny nimum ↄny ecʼɛrm ɛm lel tutr ɛm ab, 24ke ɛsɛ mob sus ɛm owr eke wɛl bi sus af, éel agŋ owr. Ɛgŋ owr ikŋ na wɛl kokʼr ɛsɛ elel eke Nyam erur ab af. Low nɛnyɛmbri nyam bʼↄŋʼn lʼel nyim nyim lele lala ab.

25Na sosiɛm, ìgŋn yadŋ ↄny ɛlul es, ke ↄny ɛm ecʼɛgŋ fɛŋ dád lawl low nɛnyɛmbri nyam ɛm, aŋke ɛy fɛŋ sʼel sos megl nyam ecʼagŋ. 26Eke batŋ ɛrm am ebl ↄny, kì kokr sikpl; kì yɛbr toŋ lɛgŋ es ew kʼɛ́ŋan ↄny ecʼɛrm bebl a. 27Kʼɛ̀gbr agn usu kaka fɛŋ es ↄny ɛm. 28Ke ɛgŋ eke bʼiy mil a, ɛ́lu mil iy ab es; ke kók juma nɛnyɛmbri nyam ɛm in obi e sabu ab ɛm, yecʼɛtŋ ke nʼɛ́ŋn ob lʼɛlum es abur ɛsɛl abu. 29Odad ŋuŋ kaka kʼánŋ ↄny nɛnym kʼɛy ↄkm; kↄ dàdr low akpal e sodad eke bʼɛlum low abu, ke bʼatr ↄny lawlɛl sos es ↄ́ŋ ɛl lɛc a, yecʼɛtŋ ke sodad eke bʼow dadr a él low mamn agŋ eke bʼow iri a eci. 30Kʼↄ̀war Nyam ecʼAbŋ Lala a ekʼↄŋ ↄny a sos es, aŋke in anake Nyam ocʼr ↄŋ ↄny ɛsɛ mɛny ɛwr af a. Ɛtŋ mɛny ɛwr na bʼↄŋ ↄny ↄ́nyn ↄmn eke lɛgŋ nyam, Nyam bʼow sↄg ↄny nimum ↄny e sikpl ab ɛm. 31Low ŋuŋ fɛŋ ekʼɛgŋ kok ↄny a, kʼèbr kʼɛwr es ↄny ecʼɛrm ab ɛm. Kʼùcur lokm es, kʼèbal ɛrm; ke likekr owi, wɛwr owi lel ów eŋuŋ fɛŋ ab óc es ↄny ecʼaraŋn. 32Ke ɛgŋ ɛgŋ ákpl lawl eci, ke sↄrŋ ikŋ íy ↄny ɛrm ɛm gbↄŋ. Ke áparir low ɛsɛ elel eke Nyam ap ↄny low Jesu Krist sosiɛm ab af.

Amani Owr

© 1998, Association Ivoirienne pour la traduction de la Bible; Wycliffe Bible Translators, Inc.

More Info | Version Index