Search form

Galat eyŋ e lɛl 4

Ŋ elm adu ij, kↄ iy

1Kin ɛm e tutr e mʼↄny a: ekʼiy a ekʼel aja ij ɛs a anŋ gↄŋni a, li bʼɛw ɛsɛ adu af. Ke tasi ɛm a, ob a fɛŋ in eci cɛ. 2Gbɛkↄ, ow it ke nʼám ɛlum agŋ a ekʼam ɛkn in e lís e low, ke am ↄsu in ecʼob a fɛŋ a, toŋ ke lɛgŋ a ekʼɛs ɛw a ów. 3Ɛy yɛji ɛbɛn nɛny nyam. Eke sʼanŋ ɛsɛ etuey af a, sʼel wus aŋa e sabusu e lɛc a e madu. 4Gbɛkↄ, eke lɛgŋ a e Nyam bʼɛbm ɛw es a ow a, lʼɛrm Jim ow. Wɛl ewʼr yↄw ɛm ɛtŋ lʼir ɛb ol ɛm, 5yecʼɛtŋ ke li sↄ́g agŋ a fɛŋ ekʼanŋ ol ecʼabusu ab ɛm a, ke sʼↄ́tu sʼel Nyam ecʼey.

6Gbɛkↄ, ke wɛl úw any eke eel in ecʼey a, Nyam ↄŋ Jim ecʼAbŋ a ow ɛy ɛy ecʼɛrm ab ɛm; ɛtŋ Abŋ na anake bʼↄŋ ɛy si dad «Aba!» ow e nyandrɛ el, «ɛm Ɛs!» 7Ow sosiɛm a, ŋ elm adu ij, kↄ iy; ɛtŋ ekʼel iy a sosiɛm, Nyam bʼow ↄŋ aja eke li bɛbm lʼɛw in ecʼey ab es a.

Eke Galat eyŋ ɛwm ɛrm -li bʼow -lʼɛwl mɛny -lʼel ol e madu

8Lɛgŋ sig ɛm a, uwmn Nyam any ɛtŋ eel sabusu ekʼelm sinyam tasi yɛjʼa e madu. 9Sica yɛfɛnyna ɛm ekʼuwr Nyam any, oglog yɛfɛnyna ɛm eke Nyam uw ↄny any a, ayaf ow it eke kʼɛwal ɛlumn wus aŋa e sabusu e lɛc ekʼelm low kaka ab ee? Ayaf ɛmɛny ↄtur eke kʼɛwal eel ɛl e madu ee? 10Bʼucur sɛgŋ bɛb, awl bɛb, akpo e sɛgŋ bɛb lel akpo bɛb ab e low ↄnyn es. 11Mʼam ↄny ɛrmij ↄny eci: eke juma e mi kok ↄny ecʼaraŋn a kʼélm ↄfr ↄfr sosiɛm.

12Agŋ lisijimɛl mʼam ŋↄŋn ↄny, kòkr ɛsɛ ɛm af, aŋke ɛm yɛji mi kok ɛsɛ ↄny af. Kokmnʼm low ŋuŋ kaka. 13Ɔny, am ↄkan low ɛm eke mʼↄg es mʼↄb ↄny Amani Mamn e kokoba a, ow el ɛm ecʼↄl ɛm. 14Ɛtŋ ɛm e sos megl a eke ɛm ecʼↄl ab ɛm itm eke wɛl ki lɛr a, ↄnym ↄny nɛnŋn walmn ɛlumnʼm es. Kↄ ↄny kↄtↄkↄ, ebrʼm ɛsɛ Nyam ecʼɛrm ɛs nyam af, oglog ɛsɛ Jesu Krist af. 15Lɛgŋ a, anŋn sos ɛm iŋn ɛm. Ɛtŋ sica bla lowi ɛŋn ↄny ee? Mʼↄtu eke mi dad mʼɛsɛ: lɛgŋ a, blel ↄnyn abusu eke ki sↄsmn ↄny ecʼanyamn ab es ↄŋnʼm, blel kokr. 16Kↄ sica ↄny ecʼifnu mʼɛwl mʼel low nɛnyɛmbri nyam e mʼam dad ↄny a sosiɛm ee?

17Agŋ amua ekʼam kok ɛsɛ ↄny e lís e low cɛ wɛʼn am ɛw any af a, ɛl e sow tutr a akplm ↄny eci. Ɛl e low eke -nʼam ↄl a cɛ el: ke -nʼↄny -li kpab ↄny es ɛm e lís, yecʼɛtŋ ke ↄ́tur lɛɛr ɛl. 18Tasi, ow akpl ekʼɛgŋ kʼↄny ↄny e lís ecʼerur, gbɛkↄ ke ow el low nimamn eci, ow it ekʼow kʼel sɛgŋ fɛŋ, kↄ ke ow kʼélm lɛgŋ eke mi bʼanŋ ↄny ecʼaraŋn a cɛ. 19Ɛm ecʼey, ɛmɛny mʼam ij ↄny e gbre, gbre ekʼotarir es ɛsɛ yↄw ekʼam ew iy ecʼab af, ɛtŋ mi bʼow mʼanŋ ɛm ɛbɛn toŋ ow áylʼm sos ɛm ekʼↄny fɛŋ Krist ir ↄny ɛm. 20Mʼerur eke blel mʼanŋ ↄny saw wanci na af, ke mʼↄ́tu mi dad ↄny odad akunda ɛjecʼɛm. Tasi ɛm a, mi kʼuwm elel eke mi ki kokr ↄny e lís ab any.

Agar lele Sara ab

21Dàdrʼm, ↄny ekʼam erurir ekʼol kʼɛw ↄny es a: irimn yecʼa ekʼol a am dad ab ee? 22Nyam Lɛl dad eke Abraham in ew ey yony, Agar ekʼel adyↄw ab ab owʼn ew nyam ɛtŋ Sara ekʼel yↄw lewi ab ab yɛji owʼn ew nyam. 23Adyↄw iyŋ a, wɛl ewʼr igŋ nyam lele yↄw nyam ab ecʼerur ɛm, kↄ yↄw lewi a ecʼiy a, wɛl ewʼr Nyam e low a eke ɛwar ab ɛm. 24Odad na ↄny akr otar ɛjeci. Ɔyↄw yony a anŋ ɛsɛ sinm yony af. Krɛkrɛ e sinm a, el Sinayi lafɛny af ecʼa, ɛtŋ li bʼew ey eke bʼel madu: ke Agar ana, 25ɛtŋ Agar anake el Sinayi lafɛny a ekʼanŋ Arabi wus af a. Ɛtŋ in cɛ anake yɛfɛnyna ɛm a, nʼanŋ ɛsɛ Jerusalɛm ecʼɛb a ekʼin ecʼey ab ab el madu a. 26Kↄ Jerusalɛm ekʼanŋ afr a el lewi, ɛtŋ in anake lʼel ɛy lis a. 27Tasi ɛm a, Nyam Lɛl dad ninɛ:

Sos ɛm íŋnʼŋ itr yↄw!

Ɛ̀lu sos ɛm iŋn e lebl,

ŋ ekʼuwm iy ew e dudu any a;

aŋke yↄw a eke wɛl igŋ ɛlu es a,

bʼow ew ey akm yↄw a ekʼↄny igŋ a.

28Sica agŋ lisijimɛl ↄny ecʼa, ɛsɛ Isak af, eel ey eke wɛl ew ɛsɛ elel eke Nyam ɛwar ab af. 29Gbɛkↄ ɛsɛ lɛgŋ sig ɛm ecʼa eke Abraham ecʼiy a eke wɛl ew igŋ lele yↄw ab ecʼerur ɛm a, ijr iy a eke wɛl ew Nyam ecʼAbŋ ecʼerur ɛm a gbre a, yɛfɛnyna ɛm yɛji, ɛbɛn cɛ ow anŋ. 30Kↄ Nyam Lɛl ɛm a, ayaf wɛl dadr ee? Wɛl dad ninɛ: ògŋ adyↄw a lel in ecʼiy ab ab, aŋke adyↄw iyŋ a kʼↄtum ijm aja yↄw lewi a ecʼiy ab ab. 31Na sosiɛm a, agŋ lisijimɛl, ɛy sʼelm adyↄw a ecʼey, kↄ ɛy yↄw lewi a ecʼey.

Amani Owr

© 1998, Association Ivoirienne pour la traduction de la Bible; Wycliffe Bible Translators, Inc.

More Info | Version Index