Search form

Ebre eyŋ e lɛl 8

Jesu el sinm owr a ecʼegb waw ɛs ligbɛl

1Kin low a eke sʼam erur eke si ki dad a e liy a tasi: ɛy sʼↄny egb waw ɛs ligbɛl nyam ɛsɛ na eke si dad in e low ab af. Li sig es afr, Nyam ekʼↄny abusu a e lidr abu af. 2Li bi kok in e juma a usu lala a, afr eci nuŋ igŋ usu tasi a. Ɛɛ, afr eci gbad ɛm êl tasi a, ow elm Israɛl ecʼagŋ a usm, kↄ Ɛs Kↄtↄkↄ in obi anake usʼr a.

3Egb waw ɛs fɛŋ eke wɛl sigm es a e juma eke bi kok a el ob ap lele egb waw ab. Ow it eke ɛy ecʼa yɛji kʼↄny ob ap nyam ↄŋ Nyam. 4Blel Krist anŋ wus af aŋa yɛji, li kʼelm egb waw ɛs, aŋke egb waw ɛsɛl ikŋ anym anŋ eke am kok juma na ɛsɛ elel eke Mois ecʼol a ibrm ab af. 5Egb waw ɛsɛl amua am kok juma usu lala ekʼel afr ecʼusu lala tasi a e sɛwl a lele ow ecʼes otarir ab ab eci. Tasi ɛm a, lɛgŋ a eke Mois am ow us gbad ɛm êl a, Nyam dadʼr ninɛ: Lɛ̀r, bʼow kok fɛŋ ɛsɛ sɛwl a eke mi yɛgmʼŋ ɛkn lafɛny af ab af.

6Kↄ sica, ɛy ecʼegb waw ɛs ligbɛl Jesu, wɛl abul il juma ekʼagb nↄnↄ akm egb waw ɛsɛl ɛjecʼa ecʼa. Ɛbɛn nɛnyɛmbri nyam, nʼam ism sinm owr nyam ekʼel Nyam eci, ke ↄny any nↄnↄ akm sinm sig a. Ɛtŋ Nyam ɛwar ów amamn nↄnↄ eke li bʼow nʼↄŋ ɛy a, lʼɛw es sinm owr na ɛm.

Sinm owr a akpl akm sinm sig a

7Blel krɛkrɛ e sinm a itam ɛm ana, blel ow ibram Nyam kokm yony ɛm eci usrmʼn usu. 8Gbɛkↄ, kin low a eke Nyam am ɛnym in ecʼagŋ a, ow ecʼabr a:

Ɛs Kↄtↄkↄ dad ninɛ:

Sɛgŋ am ow eke mi bʼow mi kok sinm owr

Israɛl ecʼagŋ a lele Juda ecʼagŋ ab ab.

9Sinm na kʼow anm ɛsɛ yecʼa eke mi kok ɛl lagŋɛl ab,

lɛgŋ a eke mʼↄny ɛl abu

mʼot mʼok ɛl ↄkm Ejipt a.

Ɛtŋ -lʼɛgŋm -lʼijm nɛny nyam ɛm e sinm a e lís;

ow ↄŋ, ɛm yɛji, mʼigŋ mʼɛlu ɛl es.

10Gbɛkↄ kin sɛgŋ na ɛm a,

sinm a eke mʼam mʼow mi kok Israɛl ecʼagŋ ab ab a:

Ɛm, Ɛs Kↄtↄkↄ, mi bʼow mʼoc ɛm e sol a

mʼɛlu ɛl e tutr ab ɛm,

mi bʼow mi nↄn sol a ɛl e mɛrm ab ɛm.

Mi bʼow mʼel ɛl e Nyam ɛtŋ -li bʼow -lʼel ɛm ecʼagŋ.

11Ɛtŋ ow kʼow ibram eke ɛgŋ kaka fɛŋ ki yɛgm in ecʼɛb iy oglog lisijim ɛm ecʼany uw e low ij,

aŋke ɛl pupukpaŋ -li bʼow -lʼuwʼm any,

ɛl kpaŋ, igŋ ey toŋ ok ɛgbɛl.

12Low nawrɛ, aŋke mi bʼow mʼap ɛl e sikpl a

ɛtŋ mi kʼow mʼↄknm ow e low mru mru mru.

13Eke Nyam bi dad sinm owr e low, ke sinm krɛkrɛ a, lisig nʼↄŋ ow el a. Sica ob nyam ekʼel lisig ke am usu a, el ob eke in ecʼirm ibnm.

Amani Owr

© 1998, Association Ivoirienne pour la traduction de la Bible; Wycliffe Bible Translators, Inc.

More Info | Version Index