Search form

Rom eyŋ e lɛl 8

Nyam ecʼAbŋ a bʼↄŋ sos ok ɛy es

1Sica low ↄb kaka anm agŋ a eke okr af Jesu Krist ab a eci ij. 2Nawrɛ tasi, eke wɛl okr af Jesu Krist ab a, ke Abŋ Lala ecʼol a anake bʼↄŋ ɛgŋ sel a, ɛtŋ ol na sↄgʼm sikpl ecʼol a eke bʼↄŋ ɛgŋ luw a ecʼabu ɛm. 3Mois ecʼol a ↄtum eke ki kok ɛbɛn, aŋke agŋ eci sos ↄnym a ↄↄmʼn ow e kok ecʼabusu. Gbɛkↄ Nyam ↄtu kok: lʼɛrm Jim ɛli sos eke otarir es sikpl ɛsɛl ecʼab ab ow sↄg ɛl sikpl ecʼabu ɛm. Ɛtŋ nɛnɛ a, Nyam ↄŋ sikpl a eke am kok juma agŋ e sos ɛm a abur es. 4Li kok nɛnɛ, yecʼɛtŋ ke sʼↄ́ny abusu sʼir ɛb nyim nyim a eke ol am ibrm a. Sica, ow elm elel eke agŋ bʼir ɛb a sʼirm ij, kↄ ɛsɛ elel eke Abŋ Lala bʼerur ab af. 5Tasi ɛm a, agŋ a eke bʼir ɛb ɛsɛ elel eke -nʼam ɛkan ab af a, bʼɛlum ɛl ecʼów eke bʼakpl ɛl sos ɛm a, gbɛkↄ agŋ eke bʼir ɛb ɛsɛ elel eke Abŋ Lala bʼerur ab af a, bʼɛlum yecʼa eke Abŋ Lala bʼerur a. 6Ɛgŋ eke bʼus ów eke li bʼerur a jam a, li bʼim luw ɛm, kↄ eke li bʼus Abŋ Lala jam a, li bʼim sel eke ↄnym uwr lele ɛrm es ɛy ab ogŋ. 7Tasi, ɛgŋ ecʼów eke bʼerur a ókrm af Nyam ecʼab ab, -lʼɛluamn Nyam ecʼol a. Ɛl ecʼa, ow el low eke -li kʼↄtumn -li kokmn. 8Ɛtŋ agŋ a eke bʼus ów aw amua jam a, e low kʼↄtum akplm Nyam sos ɛm ij.

9Gbɛkↄ ↄny ecʼa, írmn ɛb ɛsɛ elel eke bʼerurir ab af, kↄ ɛsɛ Abŋ Lala ecʼelel eke bʼerur ab af, aŋke Nyam ecʼAbŋ a anŋ ↄny ecʼɛrm ab ɛm. Eke Krist ecʼAbŋ a anm ɛgŋ ɛm, ɛgŋ ikŋ a, lʼelm Krist eci. 10Nawrɛ eke ↄny e sos megl a bʼow uw sikpl sosiɛm, gbɛkↄ eke Krist anŋ ↄny ɛm a, Abŋ Lala bʼow ↄŋ ↄny sel, aŋke Nyam oc ↄny ɛsɛ agŋ nyim nyim af. 11Nyam igbm Jesu luw ɛm. Eke in ecʼAbŋ a anŋ ↄny ɛm, in a cɛ eke lʼigbm Jesu agŋ ekʼuw ab ɛm a, li bʼow lʼɛcr Abŋ Lala ɛm nʼↄŋ ↄny e sos megl a eke bʼow uw a bↄbↄ yɛji sel.

12Na sosiɛm agŋ lisijimɛl, sʼↄny labm. Gbɛkↄ ow elm ɛy ecʼów a eke bʼaw ɛy a e labm sʼↄnym. Ow sosiɛm, ow itm eke si kʼir ɛb eke ɛy ecʼów aw a bʼerur a. 13Eke am iir ɛb ów a eke bʼaw ↄny ke bʼerurir a e kok eci, bʼow uwr; kↄ eke Abŋ Lala ecʼabu ɛlum ɛm waal ↄny e sos megl ecʼów a e bʼerur e ki kok a ɛlul es a, bʼow anŋn owr. 14Nawrɛ ɛm a, agŋ a fɛŋ eke Nyam ecʼAbŋ a bi nyimn a, el Nyam ecʼey. 15Ɛtŋ Abŋ a eke ɛŋan a, ↄ́ↄm ↄny elmn madu eke ɛmɛny am uru Nyam, kↄ li bʼↄŋ ↄny eel Nyam ecʼey. Ɛtŋ Abŋ na eci abu ɛlum ɛm, si bʼɛlu Nyam lebl si dad sʼɛsɛ: «Aba! Ɛs!» 16Abŋ Lala in obi bʼij daŋku dad ɛy ecʼabŋ a eke sʼel Nyam ecʼey. 17Ow sosiɛm, eke sʼel Nyam ecʼey a, si bʼow sʼij aja a eke Nyam bɛbm ɛw in ecʼagŋ es a, ɛtŋ aja na, Krist ab si bʼow sʼij. Ɛɛ, eke sʼanŋ in e gbre ij a e low ɛm, si bʼow sʼanŋ in ecʼanygbɛl a yɛji e low ɛm.

Nyam erur eke kʼↄŋ ɛy sʼanŋ in ecʼanygbɛl ab ɛm

18Ayaf sʼↄtu eke si kʼoc yɛfɛnyna e gbre a si bɛbmn lɛgŋ ekʼam ow ab ɛm eci anygbɛl a eke Nyam bʼow yɛgm ɛy kpata ab ab ee? Ɛm e sos ɛm a, yɛfɛnyna e gbre a elm low kaka. 19Am ɛkan eke wus nimum a eke Nyam kok a am eku lɛgŋ a eke Nyam bʼow ɛlu in ecʼey ecʼanygbɛl ↄkm a. 20Mob amua fɛŋ eke Nyam kok a, itŋn el mob ↄfr ↄfr. Ow elm mob a eke Nyam kok a erurm ɛbɛn, kↄ Nyam anake ↄŋ ɛl -nʼanŋn nɛnɛ a. Gbɛkↄ wus nimum a eke Nyam kok a ↄtu eke ɛmɛny kʼↄmn low. 21Ɛtŋ ɛsɛ elel eke adu bʼŋgboŋ adu el ɛm a, mob mob a fɛŋ eke Nyam kok a bʼow ŋgboŋ ɛl e mob ekʼam ugŋn ɛl es ab ɛm. Ɛtŋ -li bʼow -nʼanŋ Nyam ecʼey a e lewi ij a lele anygbɛl ab ab e low ɛm. 22Sʼuw any tasi eke mob mob a fɛŋ eke Nyam kok a am ikŋ sↄmu ɛtŋ ɛmɛny am ij gbre caca ɛm a, ɛsɛ yↄw eke bʼew iy ab af, 23gbɛkↄ ow elm ɛl sↄny cɛ. Ɛy obi yɛji, sʼam ikŋ sↄmu ɛy e mɛrm ab ɛm, ɛtŋ sʼam eku eke Nyam kʼeb ɛy ɛsɛ in ecʼey tasi af, ke sʼél ewi kpɛkŋ kpɛkŋ. Gbɛkↄ sʼikŋ anym sʼɛŋn Abŋ Lala, ɛsɛ ob ap a eke Nyam ɛwar ɛw es ab ɛm eci krɛkrɛ af. 24Tasi ɛm a, sʼɛŋn sel, kↄ ow el low ↄmn ɛm cɛ. Eke wɛl bʼɛkn ob eke wɛl am ↄmn a, ke wɛl úbmʼn ɛsɛ low ↄmn ob af ij. Ob eke wɛl am ɛkn a, kↄ wɛl ↄtu eke ɛmɛny wɛl kʼↄmnʼn ee? 25Gbɛkↄ eke sʼam ↄmn ob eke sʼɛknm a, si bʼanŋ ow eci eku ɛm ɛrm susu ɛm.

26Ɛtŋ ɛmɛny, ɛy eke sʼↄnym sos a, Abŋ Lala bʼɛlum ɛy abu. Sʼúwm any si ŋↄŋnm Nyam ɛsɛ elel eke ow it ab af. Ow bʼↄŋ Abŋ Lala in obi bi ŋↄŋn Nyam ɛy usu iy, íbrm ów sↄmu ikŋ ebl ɛm eke ɛgŋ e nɛny kʼↄtum dadm. 27Gbɛkↄ Nyam eke bʼɛkn mɛrm lokm a, bʼuw yecʼeke Abŋ Lala erur eke kʼibrm ab any. Ɛɛ, Abŋ Lala bi ŋↄŋn Nyam ɛsɛ elel eke Nyam bʼerur ab af ↄŋ agŋ a eke el Nyam ecʼa.

28Ɛmɛny sʼuw any eke agŋ a ekʼↄny Nyam ecʼerur ecʼa, low fɛŋ eke bʼɛŋn ɛy a, Nyam anake bi kok a, yecʼɛtŋ ke ow ɛ́lum ɛy abu sʼɛŋn low nimamn. Ow el agŋ a eke lʼikŋ anym li bɛbm wɛl ecʼɛsŋ e low lʼɛw es a. 29Tasi ɛm a, agŋ amua eke Nyam ikŋ anym sↄsum ot ecʼa, lʼikŋ anym li bɛbm yɛji eke li ki kok wɛl, wɛl ot in ecʼIy ab es, ke ow ↄ́ŋ in ecʼIy a el bosu ligbɛl a e liy likpekp. 30Sica agŋ a eke Nyam ikŋ anym sↄsum ot a, lʼɛsŋ wɛl yɛji. Agŋ a eke lʼɛsŋ a, lʼot wɛl ɛsɛ agŋ nyim nyim af, ɛtŋ agŋ a eke lʼot ɛsɛ agŋ nyim nyim af a, lʼot lʼok wɛl in ecʼanygbɛl a yɛji ɛm.

Ob kaka kʼↄtum ↄnym kpabm ɛy es Nyam ecʼerur ekʼↄny ɛy ecʼa e lís

31Bla odad iy si ki dad sʼigŋ af ee? Eke Nyam anŋ ɛy ecʼogog, ke bwo ↄtu eke ki kok ɛy low ŋuŋ ee? 32In eke lʼɛdŋnm in ecʼIy lokm a abu any, ke nʼↄŋ ow uw ɛy fɛŋ e sel ɛŋn sosiɛm ecʼa, ayaf eke sʼokr af ow ab, li kʼow nʼↄↄm ɛy ↄfr ɛm, ów amamn fɛŋ ee? 33Bwo ecʼɛgŋ ↄtu eke kʼok agŋ a eke Nyam sↄsum ot a ów af ee? Ɛgŋ kaka anm! Aŋke Nyam in obi ot ɛl ɛsɛ agŋ nyim nyim af. 34Bwo ecʼɛgŋ ↄtu eke kʼↄb agŋ low luw ecʼee? Ɛgŋ kaka anm! Tasi ɛm a, Jesu Krist uw, gbɛkↄ nʼanŋ luw ɛm lʼigb, nʼanŋ Nyam e lidr abu af a ɛtŋ nʼam ŋↄŋn Nyam ɛy eci. 35Bla obi ↄtu eke kʼↄny kpab ɛy es Krist ecʼerur ekʼↄny ɛy ecʼa e lís ee? Kↄ es abur oglog ɛrmij ebr ee? Kↄ agŋ eci milↄlu e bʼↄnyn ɛy ɛy ecʼↄmn a sosiɛm ab ee? Kↄ namn oglog gbↄr ee? Kↄ low ɛyr eke bʼokr ɛy es a oglog luw ee? 36Nyam Lɛl dad ninɛ: ŋ sosiɛm anake sɛgŋ fɛŋ sʼam uw, ke wɛl am kok ɛy ɛsɛ mɛcɛb eke wɛl bʼↄny im ibi usu af a.

37Gbɛkↄ fɛŋ ɛm a, si bʼok ↄkm agbawru, ɛgŋ a eke erur ɛy a eci abu ɛlum ɛm. 38-39Ɛɛ, mʼↄny ↄmn tasi, eke ob kaka kʼↄtum ↄnym kpabm ɛy es erur a eke Nyam ɛlu ↄkm, ɛy Ɛs Kↄtↄkↄ Jesu Krist ɛm a e lís. Ke ow él luw oglog owr anŋ, ke ow él afr ɛrm ɛsɛl oglog es ɛw ɛsɛl oglog lɛc ekʼanŋ lɛf ɛm, ke ow él lɛgŋ na ɛm, lɛgŋ ekʼanŋ anym am ow ab ɛm, ke ow él afr e lɛc oglog wus aŋa e lɛc, ke ow él mob mob fɛŋ eke wɛl kok, ob kaka kʼↄtum ↄnym kpabm ɛy es Nyam ecʼerur ekʼↄny ɛy ecʼa e lís!

Amani Owr

© 1998, Association Ivoirienne pour la traduction de la Bible; Wycliffe Bible Translators, Inc.

More Info | Version Index