Search form

Tit e lɛl 3

Nawrɛ ub ɛsɛl ecʼes an owr

1Ɔ̀kn nawrɛ ub ɛsɛl a fɛŋ, ow it eke -li kʼis es es ɛw ɛsɛl lele abusu ɛsɛl ab ecʼany af, -nʼↄny wɛl ecʼɛlum, ke -nʼↄny sos bɛbm low mamn fɛŋ e kok eci. 2-Li ki dadmn low ŋuŋ ɛl lawl e lís, kↄ -lʼel ɛrm es ɛy ecʼagŋ, -lʼel agŋ amamn, ke -lʼɛlu ɛl e frↄrↄ el ↄkm agŋ fɛŋ e lís. 3Gbuŋ ke sʼúb Jesu nawrɛ a, sʼel agŋ ekʼuwm low kaka any, ↄnym ɛlum kaka, irm itm es, el low aw lele low e bʼiŋn sos ɛm ab eci madu ɛtŋ sʼir ɛb low ŋuŋ ɛm lele nyamnɛyr ɛm ab. Wɛl bʼↄny ɛy e sifn ɛtŋ ɛy ↄfr ɛm yɛji si bʼifanin. 4Gbɛkↄ Nyam ɛy e Sↄg Ɛs ɛlu in e sↄrŋ ikŋ lel in ecʼerur ab ab ↄkm agŋ fɛŋ eci, 5ɛtŋ li sↄg ɛy, ow elm ɛy ecʼów amamn eke si kok a sosiɛm, kↄ eke nʼↄny ɛy e sↄrŋ ikŋ a sosiɛm. Li sↄg ɛy mij a eke bʼayal ɛy sʼel agŋ owr ab ɛm; ɛtŋ ow ecʼiri tasi a el: ɛb ir owr a ekʼAbŋ Lala bʼↄŋ ɛy a. 6Abŋ Lala na, Nyam in ecʼɛrm mamn ab ɛm ↄmun in es ɛy af, Jesu Krist ɛy e Sↄg Ɛs ab ecʼaf okr a sosiɛm. 7Ɛbɛn anake in e sↄrŋ ikŋ ab ɛm, li bʼↄŋ ɛy sʼel nyim nyim in ecʼany af, ke ow bʼɛlu ɛy abusu es sʼɛŋn sel a ekʼↄnym uwr ke sʼam ↄmn a.

8Odad na el odad nawrɛ tasi, ɛtŋ mʼam erur eke nɛny kʼatʼŋ es nↄnↄ ow e dad ab ɛm, yecʼɛtŋ ke agŋ a ekʼub Nyam nawrɛ a, át any kok ów amamn mɛwl ɛm. Na el low akplu ɛtŋ el agŋ fɛŋ ecʼabu ɛlum. 9Gbɛkↄ àru ów ekʼↄnym low yɛgm a ɛgb es ɛsɛ: agŋ lagŋɛl e mew ecʼes ↄsŋm, ów ɛsu lele Mois ecʼol a ecʼów es atar owi ab ab. Amua fɛŋ el ów ↄfr ↄfr eke low kaka anm ɛm. 10Ɛgŋ yecʼeke bʼis ɛm bubr owi a, ɛ̀war ir akp nyam, sakp yony gbuŋ ke ɛgŋ ikŋ na, kpábʼr es Nyamel e lís. 11Ɔtu eke kʼuw any ekʼɛgŋ ikŋ na ejagb ŋuŋ nʼam eb. Ɛtŋ sikpl a eke nʼam kok nʼim ab ɛm, ow el in sosi eke nʼam ↄbr low.

Ów ↄm es abal el

12Ba mi bʼɛrm Artemas oglog Tisik ow a, àtr sos es ow ɛŋnʼm Nikopolis, aŋke mi bɛbm eke mi kʼanŋ yogŋ lɛfr lɛgŋ iy a. 13Ɛ̀gŋ eb ɛlum Zenas eke jɛj ok owi ɛm el ɛgŋ dogŋn ɛs a lel Apolↄs ab abu ɛl ecʼejagb us ab ɛm, yecʼɛtŋ ke -li kʼↄnymn ob kaka ecʼes abur. 14Ow akpl eke ɛy ecʼagŋ ekʼub Krist nawrɛ a yɛji, ki wewr ɛrm mamn ↄny, yecʼɛtŋ ke -lʼↄtu -li kok es abur fɛŋ eke bʼowr ɛl a, ke ɛl ecʼɛb ir a kʼélm ↄfr ↄfr.

15Agŋ a fɛŋ ekʼanŋ ɛm ab a am ɛsŋnʼŋ. Ɛ̀sŋn ɛy lawlɛl a ekʼↄny ↄmn nyam coco ɛy ab a.

Ke Nyam ecʼↄwrↄ a ánŋ ↄny fɛŋ ab.

Amani Owr

© 1998, Association Ivoirienne pour la traduction de la Bible; Wycliffe Bible Translators, Inc.

More Info | Version Index