Search form

أَعْمَالْ 21

فِي أُورْشَلِيمْ

1وْبَعْدْ مَا تْفَارِقْنَا سَافِرْنَا، فِي البْحَرْ وِمْشِينَا لْجِيهِةْ كُوسْ، وْمِنْ غُدْوَة وْصُلْنَا لْجَزِيِرةْ رُودُسْ وْمِنْ غَادِي مْشِينَا لْبُرْطْ بَاتْرَا. 2وِلْقِينَا سْفِينَة مَاشْيَة لْفِينِيقْيَة، رْكِبْنَا فِيهَا وْسَافِرْنَا. 3وْظُهْرْتِلْنَا جَزِيرِةْ قُبْرُصْ، خَلِّينَاهَا عْلَى يْسَارْنَا وْكَمِّلْنَا السْفَرْ مَاشِينْ لْجِيهِةْ سُورْيَة. وْصُلْنَا لْبُرْطْ مْدِينِةْ صُورْ وِهْبَطْنَا فِيهْ بَاشْ السْفِينَة تْهَبِّطْ السِّلْعَة الِّي فِيهَا. 4لَوِّجْنَا عْلَى التْلاَمْذَة، وِقْعَدْنَا عِنْدْهُمْ سَبْعَة أَيَّامْ وِالرُّوحْ القُدُسْ خَلاَّهُمْ يْقُولُوا لْبُولُسْ الِّي مَا يِلْزْمُوشْ يِمْشِي لْأُورْشَلِيمْ. 5وَقْتِلِّي وْفَاتْ مُدِّةْ قْعَادْنَا عِنْدْهُمْ، خْرَجْنَا بَاشْ نْكَمّْلُوا السْفَرْ مْتَاعْنَا وِمْشَاوْ مْعَانَا هُومَا وِنْسَاهُمْ وِوْلاَدْهُمْ حَتَّى لِينْ خْرَجْنَا البَرَّة مِنْ المْدِينَة بَاشْ يْوَدّْعُونَا، وْكِقْرُبْنَا مِالشَّطْ هْبَطْنَا عْلَى رْكَايِبْنَا وِطْلَبْنَا رَبِّي. 6مِنْ بَعْدْ سَلِّمْنْا عْلِيهُمْ وِرْكِبْنَا فِي السْفِينَة، وْهُومَا رَجْعُوا لِدْيَارْهُمْ.

7وْكَمِّلْنَا السْفَرْ عْلَى البْحَرْ مِنْ صُورْ لِبْتُولِمَايِسْ، سَلِّمْنَا عْلَى الإِخْوَة المُوجُودِينْ الغَادِي وْعَدِّينَا مْعَاهُمْ نْهَارْ وَاحِدْ. 8وْمِنْ غُدْوَة مْشِينَا لِمْدِينِةْ قَيْصَرِيَّة وِمْشِينَا ضْيُوفْ لْدَارْ وَاحِدْ مُبَشِّرْ إِسْمُو فِيلِبُّسْ وْهُوَ وَاحِدْ مِالسَّبْعَة رْجَالْ الِّي خْتَارُوهُمْ فِي أُورْشَلِيمْ. 9وْعِنْدُو أَرْبْعَة بْنَاتْ صْبَايَا كَانُوا يِتْنَبّْأُوا. 10وِقْعَدْنَا عَنْدُو أَيَّامَاتْ، وَقْتِلِّي أَحْنَا الغَادِي جَانَا نَبِي إِسْمُو أَغَابُوسْ مِنْ جِيهِةْ اليَهُودِيَّة. 11خْذَا حْزَامْ بُولُسْ وِرْبَطْ بِيهْ يْدِيهْ وْسَاقِيهْ وْقَالْ: «الرُّوحْ القُدُسْ يْقُولْ الِّي مُولَى الحْزَامْ هَاذَا بَاشْ يَرْبْطُوهْ اليْهُودْ كِيمَا هَكَّا فِي أُورْشَلِيمْ وِيْسَلّْمُوهْ لِلنَّاسْ الِّي مَا هُمْشْ يْهُودْ.» 12وَقْتِلِّي سْمَعْنَا الكْلاَمْ هَاذَا، أَحْنَا صْحَابْ بُولُسْ وِالنَّاسْ الِّي مِنْ غَادِي وَلِّينَا الكُلْنَا نِتْشَحّْتُوا فِي بُولُسْ بَاشْ مَا يِمْشِيشْ لْأُورْشَلِيمْ 13آمَا بُولُسْ قَلْنَا: «عْلاَشْ تِبْكِيوْ وِتْوَجّْعُولِي فِي قَلْبِي؟ آنَا مُوشْ مُسْتْعَدْ بَرْكْ بَاشْ يْكَتّْفُونِي فِي أُورْشَلِيمْ، رَانِي مُسْتْعَدْ حَتَّى بَاشْ نْمُوتْ عْلَى خَاطِرْ اسْمْ الرَّبْ يَسُوعْ.» 14وَقْتِلِّي مَا نَجِّمْنَاشْ نَقْنْعُوهْ سْكِتْنَا وْقُلْنَا: «خَلِّي يْصِيرْ الشَّيْء الِّي خَطِطْلُو رَبِّي.»

15وْبَعْدْ أَيَّامَاتْ حَضِّرْنَا رْوَاحْنَا لِلسْفَرْ وِمْشِينَا لْأُورْشَلِيمْ 16وِمْشَاوْ مْعَانَا تْلاَمْذَة مِنْ قَيْصَرِيَّة وْهَزُّونَا لْدَارْ وَاحِدْ مِنْ قُبْرُصْ إِسْمُو مَنَاسُونْ وِلِّي هُوَ تِلْمِيذْ قْدِيمْ بَاشْ نُقْعْدُوا عَنْدُو.

بُولُسْ يْزُورْ يَعْقُوبْ

17وَقْتِلِّي وْصُلْنَا لْأُورْشَلِيمْ رَحّْبُوا بِينَا الإِخْوَة وْهُومَا فَرْحَانِينْ 18وْمِنْ غُدْوَة مْشَى مْعَانَا بُولُسْ لْدَارْ يَعْقُوبْ، وْكَانُوا شْيُوخْ الكَنِيسَة الكُلْهُمْ عَنْدُو فِي دَارُو. 19سَلِّمْ عْلِيهُمْ بُولُسْ وِبْدَا يَحْكِيلْهُمْ بِالتَّفْصِيلْ عْلَى الحَاجَاتْ الِّي رَبِّي عْمَلْهُمْ عْلَى طْرِيقْ خِدْمْتُو لِلنَّاسْ الِّي مَا هُمْشْ يْهُودْ. 20وَقْتِلِّي سَمْعُوا أَخْبَارُو حِمْدُوا رَبِّي وْقَالُوا: «إِنْتِ تَعْرِفْ يَا خُونَا بُولُسْ الِّي ثَمَّة آلاَفْ مِاليْهُودْ امّْنُوا بِالرَّبْ وْهُومَا تَوَّا مِتْحَمّْسِينْ بَرْشَة لِلشَّرِيعَة. 21وْسَمْعُوا الِّي إِنْتِ تْعَلِّمْ فِي اليْهُودْ الِّي يُسْكْنُوا مْعَ الأَجَانِبْ بَاشْ مَا عَادِشْ يْتَبّْعُوا مُوسَى وِتْوَصِّي فِيهُمْ بَاشْ مَا يْطَهّْرُوشْ وْلاَدْهُمْ وْمَا يْتَبّْعُوشْ عْوَايِدْهُمْ. 22شْنُوَّة بَاشْ نَعْمْلُوا تَوَّا؟ أَكِيدْ رَاهُمْ بَاشْ يِسْمْعُوا الِّي إِنْتِ جِيتْ. 23أَعْمِلْ الشَّيْء الِّي بَاشْ نْقُولُولِكْ عْلِيهْ. عِنْدْنَا أَرْبْعَة رْجَالْ وَاعْدِينْ وِعْدَة. 24هِزّْهُمْ لِلهَيْكِلْ وْأَعْمِلْ مْعَاهُمْ الحَاجَاتْ الِّي لاَزْمَة فِي العَادَة مْتَاعْ التَّطْهِيرْ وْأَعْطِيهُمْ فْلُوسْ بَاشْ يْحَجّْمُوا شْعُورَاتْهُمْ وْهَكَّا النَّاسْ الكُلْ بَاشْ يَعْرْفُوا الِّي الشَّيْء الِّي سَمْعُوهْ عْلِيكْ مُوشْ صْحِيحْ وِلِّي إِنْتِ قَاعِدْ تْحَافِظْ عْلَى الشَّرِيعَة كِيفْهُمْ 25وِالمُؤْمْنِينْ الِّي مَا هُمْشْ يْهُودْ بْعَثْنَالْهُمْ جْوَابْ وْوَصِّينَاهُمْ بَاشْ مَا يَاكْلُوشْ مِالضْحِيَّاتْ المَذْبُوحَة لِلصْنَبْ وِالدَّمْ وِلْحَمْ الحَيَوَانَاتْ المَخْنُوقَة وْيِبْعْدُوا عْلَى الزْنَى.» 26وْهَاذَا الِّي صَارْ، مِنْ غُدْوَة هَزْ بُولُسْ الأَرْبْعَة رْجَالْ وْبَعْدْ مَا عْمَلْ هُوَ زَادَا الحَاجَاتْ الِّي لاَزْمَة فِي العْوَايِدْ مْتَاعْ التَّطْهِيرْ، دْخَلْ لِلهَيْكِلْ بَاشْ يْقيِّدْ النْهَارْ الِّي يُوفَى فِيهْ الأُسْبُوعْ مْتَاعْ التَّطْهِيرْ وْكُلْ وَاحِدْ مِنْهُمْ يْقَدِّمْ القُرْبَانْ المَطْلُوبْ مِنُّو.

بُولُسْ يِتْشَدْ فِي الهَيْكِلْ.

27وْكِقْرِيبْ تُوفَي السَّبْعَة أَيَّامْ ثَمَّة جْمَاعَة مِاليْهُودْ مِنْ جِيهِةْ أَسِيَّة شَافُوا بُولُسْ قَاعِدْ فِي الهَيْكِلْ. يَاخِي هَيّْجُوا عْلِيهْ النَّاسْ وْشَدُّوهْ. 28وْهُومَا يْصِيحُوا: «عَاوْنُونَا يَا بَنِي إِسْرَائِيلْ، هَاذَا هُوَ الرَّاجِلْ الِّي يِدْعِي فِي النَّاسْ فِي كُلْ بُقْعَة لْتَعْلِيمْ ضِدْ شَعْبْنَا وْشَرِيعِتْنَا وْضِدْ البْلاَصَة هَاذِي زَادَا، وْزَادْ دَخِّلْ اليُونَانِيِّينْ لِلهَيْكِلْ وْنَجِّسْ البْلاَصَة المُقَدّْسَة هَاذِي.» 29عْلَى خَاطِرْهُمْ شَافُوا تُرُوفِيمُسْ الِّي مِنْ أَفَسُسْ مْعَ بُولُسْ فِي المْدِينَة يَاخِي مْشَى فِي بَالْهُمْ الِّي هُوَ دَخّْلُو مْعَاهْ لِلهَيْكِلْ. 30وَقْتْهَا امَّالِي المْدِينَة الكُلْهُمْ هَاجُوا وْجَرُّوا بُولُسْ لْبَرَّة مِالهَيْكِلْ وْفِي الوَقْتْ هَاذَاكَا البِيبَانْ تْسَكّْرِتْ. 31وَقْتِلِّي حَاوْلُوا بَاشْ يُقْتْلُوهْ وْصُلْ الخْبَرْ لْقَايِدْ العَسْكِرْ الِّي أُورْشَلِيمْ الكُلْهَا خَايْضَة. 32وْبِالوَقْتْ هَزْ مْعَاهْ العَسْكِرْ وِالقَادَة مْتَاعْ المِئَاتْ وْجَا فِيسَعْ، وْوَقْتِلِّي اليْهُودْ شَافُوا العَسْكِرْ وِالقَايِدْ مْتَاعْهُمْ جَايِينْ بَطّْلُوا مَا عَادِشْ يَضْرْبُوا فِي بُولُسْ. 33قْرُبْ القَايِدْ وْشَدْ بُولُسْ وِأْمَرْ العَسْكِرْ مْتَاعُو بَاشْ يَرْبْطُوهْ بْزُوزْ سْلاَسِلْ وِبْدَا يِسْإِلْ: شْكُونُو هَاذَا وْآشْ عْمَلْ؟ 34يَاخِي بْدَاوْا جْمَاعَة مِنْهُمْ يْصِيحُوا وِيْقُولُوا فِي شَيْء وِجْمَاعَة أُخْرِينْ يْقُولُوا فِي شَيْء آخَرْ. وْكِمَا نَجِّمْشْ يَعْرِفْ شْنُوَّة الِّي وْقَعْ بِالضَّبْطْ بِسْبَبْ الهِيجَة مْتَاعْ النَّاسْ أْمَرْ بَاشْ يْهِزُّوا بُولُسْ لِلقَازَرْنَة. 35وَقْتِلِّي وُصْلُوا بِيهْ لِلدْرُوجْ مْتَاعْ القَازَرْنَة تْلَزُّوا العَسْكِرْ بَاشْ يْهِزُّوهْ الفُوقْ وِيْبَعّْدُوهْ عْلَى النَّاسْ بَاشْ مَا يَضْرْبُوهِشْ. 36عْلَى خَاطِرْهُمْ كَانُوا يْتَبّْعُوا فِيهْ وْكَانُوا يْصِيحُوا: «أُقْتْلُوهْ!»

بُولُسْ يْدَافِعْ عْلَى رُوحُو

37وِقْبَلْ مَا يُدْخُلْ بُولُسْ لِلقَازَرْنَة قَالْ لِلقَايِدْ بِاللُّغَة اليُونَانِيَّة: «انَّجِّمْشِي نْقُلِّكْ حَاجَة؟» قَالْ القَايِدْ: «تِتْكَلِّمْ بِاليُونَانِيَّة؟ 38إِمَّالاَ إِنْتِ مَاكِشْ هَاكَا المَصْرِي الِّي عْمَلْ ثَوْرَة فِي المْدِينَة المُدَّة الِّي فَاتِتْ وْخَرِّجْ مْعَاهْ أَرْبْعَة آلاَفْ مِنْ قَتَّالِينْ الأَرْوَاحْ لِلصَّحْرَاء وْحَطْ رُوحُو قَايِدْ عْلِيهُمْ؟» 39قَالْ بُولُسْ: «آنَا يْهُودِي مِنْ طَرْسُوسْ المْدِينَة المَشْهُورَة الِّي فِي جِيهِةْ كِيلِيكِيَّة وْنُطْلُبْ مِنِّكْ بَاشْ تْخَلِّينِي نْكَلِّمْ الشَّعْبْ.» 40آذِنْلُو القَايِدْ يَاخِي وْقُفْ بُولُسْ فُوقْ الدْرُوجْ وْشَارْ بِيدُو لِلشَّعْبْ، وْكِسِكْتُوا بْدَا يْكَلِّمْ فِيهُمْ بِاللُّغَة العِبْرِيَّة وْقَالْ:

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index