Search form

أَعْمَالْ 4

بُطْرُسْ وْيُوحَنَّا فِي المَجْلِسْ

1وَقْتِلِّي كَانْ بُطْرُسْ وْيُوحَنَّا يِتْكَلّْمُوا مْعَ الحَاضْرِينْ، جَاوْهُمْ جْمَاعَة مِنْ الكُهَّانْ وْقَايِدْ حَرَسْ الهَيْكِلْ وِجْمَاعَة مِالصَّدُّوقِيِّينْ. 2وْهُومَا مِتْغَشَشِينْ عْلَى خَاطِرْ بُطْرُسْ وْيُوحَنَّا كَانُوا يْعَلّْمُوا فِي النَّاسْ وِيْقُولُوا الِّي قْيَامِةْ الأَمْوَاتْ صْحِيحَة وِالدَّلِيلْ هُوَ الِّي يَسُوعْ قَامْ مِالمُوتْ. 3يَاخِي شَدُّوهُمْ وْحَطُّوهُمْ فِي الحَبْسْ حَتَّى الغُدْوَة عْلَى خَاطِرْ الدِّنْيَا ظْلاَمِتْ. 4آمَا بَرْشَة مِالنَّاسْ الِّي كَانُوا يِسْمْعُوا فِي الكْلاَمْ هَاذَا امّْنُوا. وِالرْجَالْ الِّي امّْنُوا تَقْرِيبْ وَلاَّوْ خَمْسَة آلاَفْ.

5وْمِنْ غُدْوَة فِي الصْبَاحْ تْلَمُّوا رُؤَسَاءْ اليْهُودْ وِالشْيُوخْ وِالكُتَّابْ مْتَاعْ اليْهُودْ فِي أُورْشَلِيمْ. 6وِمْعَاهُمْ حَنَّانْ أَعْلَى وَاحِدْ فِي رُؤَسَاءْ الكُهَّانْ وْقِيَافَا وْيُوحَنَّا وِاسْكَنْدَرْ وِالنَّاسْ الِّي كَانُوا تَابْعِينْ لْرُؤَسَاءْ الكُهَّانْ. 7جَابُوا بُطْرُسْ وْيُوحَنَّا وْسِأْلُوهُمْ: «بْأَيْ قُوَّة وِبْإِسْمْ شْكُونْ عْمَلْتُوا الشَّيْء هَاذَا؟» 8يَاخِي تِمْلَى بُطْرُسْ بِالرُّوحْ القُدُسْ وْجَاوِبْهُمْ: «يَا رُؤَسَاءْ الشَّعْبْ وْيَا الشْيُوخْ. 9إِذَا كَانْكُمْ اليُومْ تَبْحْثُوا فِينَا كِعْمَلْنَا الخِيرْ مْعَ وَاحِدْ مْرِيضْ، وِتْحِبُّوا تَعْرْفُوا كِيفَاشْ بْرَى. 10إِمَّالاَ نِعْلِمْكُمْ وْخَلِّي شَعْبْ إِسْرَائِيلْ الكُلُّو يَعْرِفْ الِّي يَسُوعْ المَسِيحْ النَّاصْرِي الِّي إِنْتُومَا عَلِّقْتُوهْ عْلَى الصَّلِيبْ وِلِّي اللهْ قَوّْمُو مِنْ بِينْ المُوتَي بْإِسْمُو يَاقِفْ المَشْلُولْ هَاذَا وْيِتْشْفَى بْكُلُّو. 11- يَسُوعْ هَاذَا، هُوَ

الحَجْرَة الِّي إِنْتُومَا البَنَّايَا رْفَضْتُوهَا،

هُوَ بِيدُو وَلَّى حَجْرِةْ السَّاسْ.

12وْمَا ثَمَّاشْ خَلاَصْ كَانْ عْلَى طْرِيقُو هُوَ عْلَى خَاطِرْ مَا ثَمَّاشْ إِسْمْ آخَرْ تِعْطَى لِلنَّاسْ انَّجّْمُوا نُخْلْصُوا بِيهْ.» 13يَاخِي تْعَجّْبُوا المِتْجَمّْعِينْ مِنْ الشَّجَاعَة مْتَاعْ بُطْرُسْ وْيُوحَنَّا وَقْتِلِّي عَرْفُوا الِّي هُومَا مَا هُمْشْ مِثَّقْفِيينْ وِلِّي هُومَا نَاسْ عَادِيِّينْ وْزَادَا عَرْفُوا الِّي هُومَا كَانُوا مْعَ يَسُوعْ. 14آمَا وَقْتِلِّي شَافُوا المَشْلُولْ الِّي تِشْفَى وَاقِفْ مْعَاهُمْ مَا لْقَاوْ مَا يْقُولُوا 15يَاخِي أُمْرُوهُمْ بَاشْ يُخْرْجُوا مِنْ اجْتِمَاعْ المَجْلِسْ مْتَاعْ اليْهُودْ بَاشْ يِتْشَاوْرُوا مْعَ بْعَضْهُمْ. 16وْقَالُوا: «شْنُوَّة بَاشْ نَعْمْلُوا مْعَ الرْجَالْ هَاذُمْ، أَهْلْ أُورْشَلِيمْ يَعْرْفُوا الِّي ثَمَّة مُعْجْزَة كْبِيرَة صَارِتْ عْلَى يْدِيهُمْ وْإِحْنَا مَا انَّجّْمُوشْ نُنْكْرُوا هَاذَا. 17آمَا بَاشْ مَا يْزيدِشْ الشَّيْء هَاذَا يُكْثُرْ، نْهَدَدُوهُمْ بَاشْ مَاعَادُوشْ يَحْكِيوْ عْلَى الإِسْمْ هَاذَا لْحَتَّى وَاحِدْ آخَرْ.» 18مِنْ بَعْدْ جَابُوهُمْ وْأَمْرُوهُمْ بَاشْ مَا عَادِشْ يَنْطْقُوا بْإِسْمْ يَسُوعْ وِلاَّ يْعَلّْمُوهْ لِلنَّاسْ. 19آمَا بُطْرُسْ وْيُوحَنَّا جَاوْبُوا: «يَاخِي شْنُوَّة الصْحِيحْ عِنْدْ اللهْ، يَاخِي نْطِيعُوكُمْ إِنْتُومَا وْمَا نْطِيعُوشْ اللهْ؟ تْرَى احْكْمُوا إِنْتُومَا! 20مَا انَّجّْمُوشْ نْبَطّْلُوا الكْلاَمْ عْلَى الشَّيْء الِّي رِينَاهْ وِسْمَعْنَاهْ.» 21يَاخِي زَادُوا هَدَدُوهُمْ وْمَا لْقَاوْشْ كِيفَاشْ بَاشْ يْعَاقْبُوهُمْ، وَلُّوا سَيّْبُوهُمْ، عْلَى خَاطِرْهُمْ خَافُوا مِالشَّعْبْ الِّي الكُلْهُمْ كَانُوا يِحْمْدُوا فِي اللهْ عْلَى الشَّيْء هَاذَا. 22وِالرَّاجِلْ الِّي بْرَى بِالمُعْجْزَة عُمْرُو مَا فَاتِشْ الأَرْبْعِينْ سْنَة.

صْلاَةْ المُؤْمْنِينْ

23وَقْتِلِّي سَيّْبُوهُمْ، رَجْعُوا بُطْرُسْ وْيُوحَنَّا لِصْحَابْهُمْ وِحْكَاولْهُمْ عْلَى كُلْ الِّي قَالُوهُولْهُمْ رُؤَسَاءْ الكُهَّانْ وِالشْيُوخْ. 24كِسَمْعُوا الشَّيْء هَاذَا بْدَاوْا يْعَلِّيُوا فِي صْوَاتْهُمْ وِيْصَلِّيوْ بْقَلْبْ وَاحِدْ: «يَا رَبِّي، يَا خَالِقْ الأَرْضْ وِالسْمَاءْ وِالبْحَرْ وْكُلْ مَا فِيهُمْ. 25- يَلِّي قُلْتْ بِالرُّوحْ القُدُسْ عْلَى لْسَانْ عَبْدِكْ بُونَا دَاوُدْ:

عْلاَشْ النَّاسْ هَاجُوا؟

وِالشْعُوبْ مِنْ غِيرْ فَايْدَة تْآمْرُوا؟

26مُلُوكْ الأَرْضْ قَامُوا

وْرُؤَسَاءْهَا تْلَمُّوا

وِمْعَ بْعَضْهُمْ تْعَاوْنُوا

بَاشْ يْقَاوْمُوا رَبِّي وْمَسِيحُو.

27- وْبِالحَقْ الكْلاَمْ هَاذَا وْقَعْ اليُومْ. هِيرُودُسْ يِتْعَاوِنْ مْعَ بِيلاَطُسْ البُنْطِي وِالشْعُوبْ الأُخْرِينْ وْشَعْبْ إِسْرَائِيلْ الِّي جَاوْ مِنْ بَرْشَة بْلاَيِصْ بَاشْ يْقَاوْمُوا الخَادِمْ القُدُّوسْ يَسُوعْ الِّي إِنْتِ اخْتَرْتُو بَاشْ يْكُونْ هُوَ المَسِيحْ. 28وْعَمْلُوا فِيهْ الشَّيْء الِّي إِنْتِ قَدِّرْتْهُولُو الكُلْ بْقُدْرْتِكْ وْحِكْمْتِكْ. 29وْتَوْ يَا رَبْ أُخْزْرُلْهُمْ كِيفَاشْ يْهَدَدُوا فِينَا، وْأَعْطِينَا أَحْنَا خُدَّامِكْ بَاشْ نْقُولُوا كْلاَمِكْ جْهَارْ. 30وْمِدْ يِدِّكْ بَاشْ تِشْفِي، بَاشْ تْصِيرْ مُعْجْزَاتْ وِعْجَايِبْ بْإِسْمْ ابْنِكْ القُدُّوسْ يَسُوعْ.» 31وَقْتِلِّي كَانُوا يْصَلِّيوْ تْحَرّْكِتْ البُقْعَة الِّي مُوجُودِينْ فِيهَا وْتِمْلُوا الكُلْهُمْ بِالرُّوحْ القُدُسْ وِبْدَاوْا يْقُولُوا فِي كْلاَمْ اللهْ مِنْ غِيرْ مَا يْخَافُوا.

المُؤْمْنِينْ يِتْشَارْكُوا فِي كُلْ شَيْء

32وِالمُؤْمْنِينْ كَانُوا عَايْشِينْ بْقَلْبْ وَاحِدْ وِبْنَفْسْ وَحْدَة، وِلِّي عَنْدُو حَاجَة مَا كَانِشْ يْقُولْ هَاذِي مْتَاعِي آمَا كَانُوا مِتْشَارْكِينْ فِي كُلْ شَيْء. 33وْكَانُوا الرُّسُلْ يِشْهْدُوا بِقْيَامِةْ الرَّبْ يَسُوعْ بْقُوَّة عْظِيمَة وِالله نْعِمْ عْلِيهُمْ الكُلْهُمْ. 34وْمَا كَانِشْ ثَمَّة حَتَّى وَاحِدْ مِحْتَاجْ عْلَى خَاطِرْ الِّي عِنْدْهُمْ دْيَارْ وِلاَّ أَرْضْ الكُلْهُمْ يْبِيعُوهُمْ وِيْجِيبُوا فْلُوسْهُمْ. 35وِيْحُطُّوهُمْ قُدَّامْ الرُّسُلْ. وْهُومَا يْوَزّْعُوا عْلَى كُلْ مِحْتَاجْ حَسْبْ حَاجْتُو. 36وْمِنْهُمْ يُوسُفْ الِّي الرُّسُلْ سَمَّاوْهْ بَرْنَابَا (مَعْنَاهَا إِبْنْ التَّشْجِيعْ) وْهُوَ مِنْ عَرْشْ لاَوِي وْمُولُودْ فِي قُبْرُصْ. 37كَانْ يِمْلِكْ سَانْيَة بَاعْهَا وْجَابْ سُومْهَا وْحَطُّو قُدَّامْ الرُّسُلْ.

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index