Search form

يُوحَنَّا 11

لَعَازَرْ يَحْيَى مِنْ جْدِيدْ

1وْكَانْ ثَمَّة وَاحِدْ مْرِيضْ إِسْمُو لَعَازَرْ مِنْ قَرْيِةْ بِيتْ عَنْيَا، الِّي تُسْكُنْ فِيهَا مَرْيَمْ وْأُخْتْهَا مَرْثَى. 2وْمَرْيِمْ هَاذِي هِيَ الِّي دِهْنِتْ سَاقِينْ الرَّبْ بِالعِطْرْ وْمَسْحِتْهُمْ بِشْعَرْهَا. وْلَعَازَرْ المْرِيضْ كَانْ خُوهَا. 3وِالإِخْوَاتْ بَعْثُوا لْيَسُوعْ وْقَالُولُو: «يَا رَبْ، رَاهُو الِّي تْحِبُّو تَوَّا مْرِيضْ.» 4وْوَقْتِلِّي سْمَعْ يَسُوعْ قَالْ: «المْرَضْ هَاذَا مَا يُقْتُلْشْ. آمَا رَاهُو لْمَجْدْ اللهْ بَاشْ يِتْمَجِّدْ بِيهْ إِبْنْ اللهْ.» 5وْيَسُوعْ كَانْ يْحِبْ مَرْثَى وْأُخْتْهَا وْلَعَازَرْ. 6وْوَقْتِلِّي سْمَعْ بْلَعَازَرْ مْرِيضْ زَادْ قْعَدْ نْهَارِينْ فِي البْلاَصَة الِّي هُوَ فِيهَا. 7وِمْبَاعِدْ قَالْ لِلتْلاَمْذَة: «هَيَّا نَرْجْعُوا لِليَهُودِيَّة مَرَّة أُخْرَى.» 8قَالُولُو التْلاَمْذَة: «يَا مُعَلِّمْ، قْبَلْ شْوَيَّة اليْهُودْ كَانُوا يْحِبُّوا يُرْجْمُوكْ وْإِنْتِ تْحِبْ تَرْجِعْ لْغَادِي.» 9جَاوِبْ يَسُوعْ: «يَاخِي النْهَارْ مُوشْ فِيهْ ثْنَاشِنْ سَاعَة؟ الِّي يِمْشِي فِي النْهَارْ مَا يِدَّعْثِرْشْ عْلَى خَاطْرُو يْشُوفْ ضَوْ الدِّنْيَا هَاذِي. 10آمَا الِّي يِمْشِي فِي اللِّيلْ رَاهُو يِدَّعْثِرْ عْلَى خَاطْرُو مَا عِنْدُوشْ نُورْ فِي دَاخْلُو.» 11وِمْبَاعِدْ مَا قَالْ الشَّيْء هَاذَا زَادْ قَالِلْهُمْ: «حْبِيبْنَا لَعَازَرْ رْقَدْ آمَا آنَا بَاشْ نِمْشِي نْقَيّْمُو.» 12قَالُولُو التْلاَمْذَة: «يَا رَبْ: إِذَا كَانُو رَاقِدْ إِمَّالاَ رَاهُو بَاشْ يِتْشْفَى.» 13يَسُوعْ كَانْ يَحْكِي عْلَى مُوتُو آمَا هُومَا مْشَى فِي بَالْهُمْ الِّي هُوَ يَحْكِي عْلَى النُّومْ مْتَاعُو. 14وَلَّى قَالِلْهُمْ يَسُوعْ بْصَرَاحَة: «لَعَازَرْ مَاتْ. 15آنَا نَفْرْحِلْكُمْ كِمَا نِيشْ غَادِي بَاشْ إِنْتُومَا تِمّْنُوا. آمَا خَلِّينَا نِمْشِيوْلُو.» 16تُومَا الِّي يْسَمِّيوْا فِيهْ التُّومِي وِلِّي هُوَ وَاحِدْ مِالتْلاَمْذَة الأُخْرِينْ قَالْ: «هَيَّا أَحْنَا زَادَا نِمْشِيوْا وِنْمُوتُوا مْعَاهْ.»

يَسُوعْ هُوَ القْيَامَة وِالحَيَاةْ

17وْوَقْتِلِّي جَا يَسُوعْ لْقَاهْ عَنْدُو أَرْبْعَة أَيَّامْ مِلِّي دَفْنُوهْ. 18وْكَانِتْ بِيتْ عَنْيَا تِبْعِدْ عْلَى أُورْشَلِيمْ قْرِيبْ ثْلاَثَة كِيلُومِتْرْ. 19وْجَاوْ بَرْشَة يْهُودْ لْمَرْثَى وْمَرْيِمْ بَاشْ يْعَزِّيوْهُمْ عْلَى خُوهُمْ. 20وَقْتِلِّي مَرْثَى سَمْعِتْ الِّي يَسُوعْ جَايْ خَرْجِتْ مِالدَّارْ بَاشْ تْعَرِّضْلُو. آمَا مَرْيَمْ بْقَاتْ لْدَاخِلْ. 21قَالِتْ مَرْثَى لْيَسُوعْ: «يَا رَبْ، كَانْ جِيتْ إِنْتِ هْنَا، رَاهُو خُويَا مَا كَانِشْ بَاشْ يْمُوتْ. 22آمَا حَتَّى تَوَّا نَعْرِفْ الِّي أَيْ حَاجَة تُطْلُبْهَا مِنْ عِنْدْ اللهْ يَعْطِيهَالِكْ.» 23قَالِلْهَا يَسُوعْ: «خُوكْ بَاشْ يْقُومْ.» 24قَالِتْلُو مَرْثَى: «آنَا نَعْرِفْ الِّي هُوَ بَاشْ يْقُومْ فِي الآخْرَة.» 25قَالِلْهَا يَسُوعْ: «آنَا هُوَ القْيَامَة وِالحَيَاةْ. الِّي يِمِّنْ بِيَّ بَاشْ يَحْيَى حَتَّى لُوكَانْ مَاتْ. 26وِلِّي هُوَ حَيْ وْيِمِّنْ بِيَّ عُمْرُو مَا يْمُوتْ. يَاخِي تِمِّنْ بِالشَّيْء هَاذَا؟.» 27قَالِتْلُو: «إِي نْعَمْ يَا رَبْ، آنَا نِمِّنْ الِّي إِنْتِ هُوَ المَسِيحْ ابْنْ اللهْ الِّي جَا لِلدِّنْيَا.»

يَسُوعْ يِبْكِي

28وْبَعْدْ مَا قَالِتْ الكْلاَمْ هَاذَا، رَجْعِتْ مَرْثَى لِلدَّارْ وْنَادِتْ مَرْيَمْ أُخْتْهَا وْقَالْتِلْهَا فِي وْذِنْهَا: «المُعَلِّمْ جَا وْرَاهُو يْنَادِيلِكْ.» 29وْدُوبْ مَا سَمْعِتْ قَامِتْ فِيسَعْ وِمْشَاتْلُو. 30وْمَازَالْ يَسُوعْ مَا وْصُلْشْ لِلقَرْيَة آمَا قْعَدْ فِي البْلاَصَة الِّي لْقَاتُو فِيهَا مَرْثَى. 31يَاخِي اليْهُودْ الِّي كَانُوا مْعَ مَرْيَمْ فِي الدَّارْ يْعَزِّيوْ فِيهَا وَقْتِلِّي شَافُوهَا قَامِتْ بْسُرْعَة وْخَرْجِتْ تَبّْعُوهَا وِمْشَى فِي بَالْهُمْ الِّي هِيَ مَاشْيَة لِلقْبَرْ بَاشْ تِبْكِي لْغَادِي. 32وْوَقْتِلِّي وُصْلِتْ مَرْيَمْ لِلبْلاَصَة الِّي فِيهَا يَسُوعْ وْدُوبْ مَا شَافِتُّو تِرْمَاتْ عِنْدْ سَاقِيهْ وْقَالِتْلُو: «يَا رَبْ، كَانْ جِيتْ هْنَا، تَالِي رَاهُو خُويَا مَا كَانِشْ بَاشْ يْمُوتْ.» 33وْوَقْتِلِّي شَافْهَا يَسُوعْ تِبْكِي وِاليْهُودْ الِّي جَاوْ مْعَاهَا زَادَا يِبْكِيوْ غَاضِتُّو وِحْزِنْ وِتْقَلِّقْ بَرْشَة. 34وْقَالْ: «وِينْ حَطِّيتُوهْ؟» قَالُولُو: «يَا رَبْ، إِيجَا وْشُوفْ.» 35يَاخِي يَسُوعْ بْكَى. 36وِاليْهُودْ قَالُوا: «شُوفُوا قَدَّاشْ كَانْ يْحِبُّو!» 37وْثَمَّة شْكُونْ مِنْهُمْ قَالْ: «يَاخِي نَجِّمْ يْحِلْ عِينِينْ الأَعْمَى وْمَا يْنَجِّمْشْ يْخَلِّي هَاذَا مَا يْمُوتْشْ؟»

لَعَازَرْ يْقُومْ مِالمُوتْ

38وْحَسْ يَسُوعْ رُوحُو حْزِينْ بَرْشَة مَرَّة أُخْرَى وْجَا لِلقْبَرْ الِّي كَانْ دَامُوسْ مْسَكِّرْ بْحَجْرَة. 39وْقَالِلْهُمْ يَسُوعْ: «نَحِّيوْ الحَجْرَة!» قَالِتْلُو مَرْثَى أُخْتْ المَيِّتْ: «يَا رَبْ رَاهُو نْتِنْ عْلَى خَاطْرُو مِيتْ عَنْدُو أَرْبْعَة أَيَّامْ.» 40قَالِلْهَا يَسُوعْ: «مُوشْ قُتْلِكْ إِذَا كَانْ تِمِّنْ رَاكْ بَاشْ تْشُوفْ مَجْدْ اللهْ.» 41نَحَّاوْ الحَجْرَة وْهَزْ يَسُوعْ عِينِيهْ لِلسْمَاء وْقَالْ: «يَا بَابَا. نُشْكْرِكْ عْلَى خَاطِرْ سْمَعْتْلِي. 42نَعْرِفْ الِّي إِنْتِ دِيمَا تْجَاوِبْ صْلاَتِي. آمَا رَانِي قُلْتْ الشَّيْء هَاذَا عْلَى خَاطِرْ النَّاسْ الِّي دَايْرِينْ بِيَّ بَاشْ يِمّْنُوا الِّي إِنْتِ بْعَثْتْنِي.» 43وْبَعْدْ مَا قَالْ الشَّيْء هَاذَا نَادَى بْصُوتْ عَالِي: «لَعَازَرْ، اخْرُجْ.» 44خْرَجْ المَيِّتْ وِيْدِيهْ وْسَاقِيهْ مَرْبُوطِينْ بِالكْفَنْ. وْوِجْهُو مَلْفُوفْ بْمِنْدِيلَة. قَالِلْهُمْ يَسُوعْ: «حِلُّولُو الكْفَنْ وْخَلِّيوْهْ يِمْشِي!»

اليْهُودْ يْحَاوْلُوا يُقْتْلُوا يَسُوعْ

(مَتَّى ‏26‏:‏1‏-5؛ مَرْقُسْ ‏14‏:‏1‏-2؛ لُوقَا ‏22‏:‏1‏-2)

45وْبَرْشَة مِاليْهُودْ الِّي جَاوْ لْمَرْيَمْ بَاشْ يْعَزِّيْوْهَا وْشَافُوا آشْ عْمَلْ يَسُوعْ. امّْنُوا بِيهْ 46آمَا ثَمَّة شْكُونْ مِنْهُمْ مْشَاوْ لِلفَرِّيسِيِّينْ وِحْكَاوْلْهُمْ عَلِّي عَمْلُو يَسُوعْ. 47وْعَمْلُوا رُؤَسَاءْ الكُهَّانْ وِالفَرِّيسِيِّينْ اجْتِمَاعْ المَجْلِسْ مْتَاعْ اليْهُودْ وْقَالُوا: «آشْ بَاشْ نَعْمْلُوا؟ الرَّاجِلْ هَاذَا قَاعِدْ يَعْمِلْ فِي بَرْشَة مُعْجْزَاتْ. 48إِذَا كَانْ نْخَلِّيوْهْ هَكَّا النَّاسْ الكُلْ بَاشْ يِمّْنُوا بِيهْ وِيْجِيوْ الرُّومَانْ وِيْدَمّْرُولْنَا الهَيْكِلْ وِالأُمَّة مْتَاعْنَا.» 49وْقَالْ وَاحِدْ مِنْهُمْ إِسْمُو قَيَافَا وِلِّي كَانْ أَعْلَى وَاحِدْ فِي رُؤَسَاءْ الكُهَّانْ الكُلْ فِي العَامْ هَاذَاكَا: «إِنْتُومَا مَا تَعْرْفُوشْ حَتَّى شَيْء! 50وْمَا كُمْشْ فَاهْمِينْ الِّي كِيْمُوتْ وَاحِدْ بَرْكْ فِي عُوضْ الشَّعْبْ خِيرْ مِلِّي تْمُوتْ الأُمَّة الكُلْهَا» 51وْمَا قَالِشْ الشَّيْء هَاذَا مِنْ رَاسُو آمَا عْلَى خَاطْرُو كَانْ أَعْلَى وَاحِدْ فِي رُؤَسَاءْ الكُهَّانْ العَامْ هَاذَاكَا اللهْ وْحَالُو الِّي يَسُوعْ بَاشْ يْمُوتْ فِي عُوضْ الأُمَّة. هَاذَاكَا عْلاَشْ تْنَبَّأْ الِّي يَسُوعْ بَاشْ يْمُوتْ فِي عُوضْ الأُمَّة. 52وْمُوشْ فِي عُوضْ الأُمَّة آكَاهُو آمَا بَاشْ يْلِمْ وْلاَدْ اللهْ المْفَرّْقِينْ وِيْرُدّْهُمْ وَاحِدْ 53وْمِنْ النْهَارْ هَاذَاكَا تْفَاهْمُوا القَادَة مْتَاعْ اليْهُودْ بَاشْ يُقْتْلُوهْ 54يَاخِي يَسُوعْ مَا عَادِشْ يُظْهُرْ بَرْشَة لِليْهُودْ وِمْشَى لِبْلاَصَة قْرِيبَة مِالصَّحْرَاء لِمْدِينَة إِسْمْهَا أَفْرَايِمْ وِقْعَدْ الغَادِي هُوَ وِتْلاَمِذْتُو.

55وِقْرُبْ عِيدْ الفِصْحْ مْتَاعْ اليْهُودْ، وْطَلْعُوا بَرْشَة نَاسْ مِالأَرْيَافْ لِمْدِينِةْ أُورْشَلِيمْ بَاشْ يَعْمْلُوا اللاَّزِمْ بَاشْ يْكُونُوا طَاهْرِينْ قْبَلْ مَا يْجِي العِيدْ 56وْكَانُوا يْلَوّْجُوا عْلَى يَسُوعْ وْوَقْتِلِّي تْلَمُّوا فِي الهَيْكِلْ سِأْلُو بْعَضْهُمْ: «شْنُوَّة رَايْكُمْ زَعْمَة يْجِي لِلعِيدْ وِلاَّ لاَ؟» 57وْرُؤَسَاءْ الكُهَّانْ وِالفَرِّيسِيِّينْ أَمْرُوا إِنُّو أَيْ وَاحِدْ يَعْرِفْ هُوَ وِينْ لاَزِمْ يِعْلِمْهُمْ عْلِيهْ بَاشْ يْشِدُّوهْ.

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index