Search form

لُوقَا 19

يَسُوعْ وْزَكَّا

1مِنْ بَعْدْ دْخَلْ يَسُوعْ لِمْدِينِةْ أَرِيحَا وِتْعَدَّى فِي وُسْطْهَا. 2وْكَانْ ثَمَّة رَاجِلْ إِسْمُو زَكَّا يِخْدِمْ الأَمِينْ مْتَاعْ المَكَّاسَة وْكَانْ غْنِى. 3وْحَبْ يْشُوفْ شْكُونْ هُوَ يَسُوعْ، آمَا مَا نَجِّمْشْ عْلَى خَاطِرْ كَانُوا ثَمَّة بَرْشَة نَاسْ وْزِيدْ عْلَى هَاذَا هُوَ قْصِيرْ. 4يَاخِي جَا فِيسَعْ وِطْلَعْ فُوقْ كَرْمَة بَالِكْشِي يْشُوفْ يَسُوعْ الِّي كَانْ مِتْعَدِّى مِالغَادِي. 5وْكِوْصُلْ يَسُوعْ لِلبُقْعَة هَاذِيكَا، هَزْ رَاسُو وْشَافُو وْقَالُّو: «يَا زَكَّا أَهْبِطْ فِيسَعْ، آنَا اليُومْ لاَزِمْنِي نُقْعُدْ فِي دَارِكْ.» 6هْبَطْ فِيسَعْ وِفْرَحْ بِيهْ بَرْشَة. 7وِالنَّاسْ بْدَاوْا يِتْشَكَّاوْ كِشَافُوا الشَّيْء هَاذَا وْقَالُوا: «دْخَلْ بَاشْ يُقْعُدْ بِحْذَا رَاجِلْ مِذْنِبْ.» 8آمَا زَكَّا وْقُفْ وْقَالْ لِلرَّبْ: «يَا رَبْ آنَا نَعْطِي نُصْ ثَرْوْتِي لِلفُقَرَاءْ وْإِذَا كَانْ فَكِّيتْ حَاجَة لْوَاحِدْ آنَا نْرَجَّعْلُو أَرْبْعَة مَرَّاتْ قَدْ الِّي فَكِّيتْهُولُو.» 9يَاخِي قَالُّو يَسُوعْ: «اليُومْ الخَلاَصْ جَا لِلدَّارْ هَاذِي عْلَى خَاطْرُو هُوَ زَادَا وِلْدْ إِبْرَاهِيمْ. 10رَانِي آنَا إِبْنْ الإِنْسَانْ جِيتْ بَاشْ نْلَوِّجْ عْلَى الضَّايْعِينْ وِنْخَلِّصْهُمْ.»

مَثَلْ العَشْرَة دِينَارَاتْ ذْهَبْ

11وَقْتِلِّي كَانُوا يِسْمْعُوا فِي الكْلاَمْ هَاذَا، زَادْ يَسُوعْ عْطَاهُمْ مَثَلْ عْلَى خَاطْرُو قْرُبْ مِنْ أُورْشَلِيمْ وِالنَّاسْ كَانُوا يْفَكّْرُوا الِّي مَمْلِكْةْ اللهْ بَاشْ تُظْهُرْ بِالوَقْتْ. 12قَالْ يَسُوعْ: «ثَمَّة رَاجِلْ مِنْ عَايِلْةْ المَلِكْ مْشَى لِبْلاَدْ بْعِيدَة بَاشْ يْحُطُّوهْ مَلِكْ عْلَى بْلاَدُو وِمْبَاعِدْ يَرْجَعْ. 13عَيِّطْ لِلعَشْرَة خُدَّامْ مْتَاعُو وِعْطَاهُمْ عَشْرَة مْلاَيِنْ وْقَالِلْهُمْ: "تَاجْرُوا بِيهُمْ حَتَّى لِينْ نَرْجَعْ." 14آمَا وْلاَدْ بْلاَدُو كَانُوا يَكْرْهُوهْ وْبَعْثُوا وْرَاهْ جْمَاعَة يْمَثّْلُوهُمْ وْقَالُوا: "هَاذَا مَا نْحِبُّوهِشْ يْوَلِّي مَلِكْ عْلِينَا." 15وْوَقْتِلِّي رْجَعْ، بَعْدْ مَا وَلَّى مَلِكْ، أْمَرْ بَاشْ يْعَيّْطُوا عْلَى الخُدَّامْ هَاذُوكُمْ الِّي عْطَاهُمْ الفْلُوسْ بَاشْ يَعْرِفْ قَدَّاشْ رِبْحُوا فِي التِّجَارَة. 16جَا الأُوِّلْ وْقَالْ: "يَا سِيدِي فْلُوسِكْ جَابِتْ عَشْرَة مْلاَيِنْ." 17يَاخِي قَالُّو: "صَحِّيتْ يَا خْدِيمْ يَا صَالِحْ، عْلَى خَاطْرِكْ كُنْتْ ثِيقَة فِي القْلِيلْ إِمَّالاَ رَاكْ بَاشْ تْوَلِّي وَالِي عْلَى عَشْرَة مُدُنْ. 18وْجَا الثَّانِي وْقَالْ: "يَا سِيدِي المَلْيُونْ مْتَاعِكْ جَابْ خَمْسَة مْلاَيِنْ." 19يَاخِي قَالُّو: "إِنْتِ زَادَا بَاشْ تْوَلِّي وَالِي عْلَى خَمْسَة مُدُنْ." 20وْجَا الثَّالِثْ وْقَالْ: "يَا سِيدِي هَاوْ المَلْيُونْ مْتَاعِكْ مْخَبِّيهْ فِي مِنْدِيلَة 21رَانِي خُفْتْ مِنِّكْ عْلَى خَاطْرِكْ إِنْسَانْ صْعِيبْ تَاخُذْ الِّي مَا عْطِيتُوشْ وْتَحْصِدْ الِّي مَا زْرَعْتُوشْ." 22قَالُّو: "بِكْلاَمِكْ هَاذَا بَاشْ نُحْكُمْ عْلِيكْ، يَا خْدِيمْ يَا شِرِّيرْ. كِعْرَفْتْ الِّي آنَا إِنْسَانْ صْعِيبْ، نَاخُذْ الِّي مَا عْطِيتُوشْ، وْنَحْصِدْ الِّي مَا زْرَعْتُوشْ. 23إِمَّالاَ عْلاَشْ مَا حَطِّيتْلِيشْ فْلُوسِي فِي البَانْكَا، تَالِي رَانِي خْذِيتْهَا مْعَ الفَايْدَة وَقْتِلِّي نَرْجَعْ؟" 24مِنْ بَعْدْ قَالْ لِلمُوجُودِينْ الغَادِي: "خُوذُوا مِنْ عَنْدُو المَلْيُونْ وِاعْطِيوْهْ لِلِّي عَنْدُو العَشْرَة مْلاَيِنْ." 25يَاخِي قَالُولُو: "يَا سِيدْنَا رَاهُو عَنْدُو عَشْرَة مْلاَيِنْ." 26يَاخِي قَالْ: "آنَا نْقُلْكُمْ رَاهُو الِّي عَنْدُو بَاشْ يِتْزَادْلُو أَكْثِرْ، وِلِّي مَا عِنْدُوشْ، حَتَّى الِّي عَنْدُو بَاشْ يِتْفَكّْلُو. 27آمَا الأَعْدَاءْ مْتَاعِي الِّي مَا حَبُّونِيشْ نِمْلِكْ عْلِيهُمْ جِيبُوهُمْ لِهْنَا وْأَذْبْحُوهُمْ قُدَّامِي."»

يَسُوعْ يُدْخُلْ لْأُورْشَلِيمْ

(مَتَّى ‏21‏:‏1‏-11؛ مَرْقُسْ ‏11‏:‏1‏-11؛ يُوحَنَّا ‏12‏:‏12‏-19)

28وْبَعْدْ مَا قَالْ الكْلاَمْ هَاذَا، مْشَى وِطْلَعْ لْأُورْشَلِيمْ وِالنَّاسْ يْتَبّْعُوا فِيهْ. 29وْكِقْرُبْ مِنْ قَرْيِةْ بِيتْ ‌فَاجِي وْبِيتْ‌ عَنْيَا بِحْذَا الجْبَلْ المَعْرُوفْ بِجْبَلْ الزِّيتُونْ بْعَثْ زُوزْ مِنْ تْلاَمِذْتُو. 30وْقَالْ: «امْشِيوْ لِلقَرْيَة الِّي مْقَابْلِتْكُمْ وْدُوبْ مَا تُدْخْلُوهَا تَلْقَاوْ جَحْشْ مَرْبُوطْ مَا رْكِبْ عْلِيهْ حَتَّى حَدْ، حِلُّولُو الرْبَاطْ وْجِيبُوهْ لِهْنَا. 31وْإِذَا كَانْ وَاحِدْ سْإِلْكُمْ عْلاَشْ سَيِّبْتُوهْ، قُولُولُو: "الرَّبْ مِحْتَاجْ لِيهْ."» 32مْشَاوْ التْلاَمْذَة الإِثْنِينْ الِّي بْعَثْهُمْ يَسُوعْ وِلْقَاوْ الجَّحْشْ كِيفْ مَا قَالِلْهُمْ. 33وَقْتِلِّي كَانُوا يْحِلُّولُو فِي الرْبَاطْ، سِأْلُوهُمْ امَّالِي الجَّحْشْ: «عْلاَشْ تْحِلُّولُو فِي الرْبَاطْ؟» 34قَالُوا: «الرَّبْ حَاجْتُو بِيهْ.» 35مِنْ بَعْدْ جَابُوا الجَّحْشْ لْيَسُوعْ وْحَطُّوا عْلِيهْ كْبَابِطْهُمْ وْرَكّْبُوا يَسُوعْ. 36- وَقْتِلِّي هُوَ مَاشِي بْدَاوْا النَّاسْ يِفْرْشُوا فِي اللِّبْسَة مْتَاعْهُمْ فِي الطْرِيقْ. 37وْكِقْرُبْ مِنْ أُورْشَلِيمْ وِوْصُلْ لِلثْنِيَّة الِّي تْهَبِّطْ لِجْبَلْ الزِّيتُونْ بْدَاوْا التْلاَمْذَة الكُلْهُمْ يْسَبّْحُوا فِي اللهْ بْصُوتْ عَالِي عْلَى المُعْجْزَاتْ الِّي شَافُوهَا الكُلْهَا. 38- وِيْقُولُوا:

مُبَارَكْ المَلِكْ الِّي جَايْ بْإِسْمْ الرَّبْ،

سَلاَمْ فِي السْمَاءْ،

وْمَجْدْ فِي الأَعَالِي.

39آمَا ثَمَّة جْمَاعَة مِالفَرِّيسِيِّينْ المُوجُودِينْ الغَادِى قَالُوا: «يَا مُعَلِّمْ سَكِّتْ تْلاَمِذْتِكْ.» 40جَاوِبْهُمْ يَسُوعْ وْقَالْ: «نْقُولِلْكُمْ: إِذَا كَانْ هَاذُمْ يُسْكْتُوا الحْجَرْ بَاشْ يَنْطِقْ.»

يَسُوعْ يِبْكِى عْلَى أُورْشَلِيمْ

41وْكِقْرُبْ وْشَافْ أُورْشَلِيمْ بْكَى عْلِيهَا. 42وْقَالْ: «يَا لِيتِكْ إِنْتِ زَادَا عْرَفْتْ فِي نْهَارِكْ هَاذَا، الحَاجَاتْ الِّي تْخَلِّيكْ تِطْمَانْ، آمَا رَاهُو الشَّيْء هَاذَاكَا تَوْ مَحْجُوبْ عْلَى عِينِيكْ. 43وْبِشْ تْجِي عْلِيكْ نْهَارَاتْ وَقْتِلِّي أَعْدَاءِكْ يْدَوّْرُوا بِيكْ الأَسْوَارْ وْيَحْصْرُوكْ وِيْضَيّْقُوا عْلِيكْ مِنْ الجِيهَاتْ الكُلْ 44وِيْهَدّْمُوكْ وِوْلاَدِكْ فِي وُسْطِكْ، وْمَا يْخَلِّيوْشْ فِيكْ حَجْرَة فُوقْ الأُخْرَى عْلَى خَاطْرِكْ مَا عْرَفْتِشْ الوَقْتْ الِّي بَاشْ يْجِي فِيهْ اللهْ وِيْخَلّْصِكْ.»

تَطْرِيدْ البَيَّاعَة مِالهَيْكِلْ

(مَتَّى ‏21‏:‏12‏-17؛ مَرْقُسْ ‏11‏:‏15‏-19؛ يُوحَنَّا ‏2‏:‏13‏-22)

45وْكِدْخَلْ لِلهَيْكِلْ بْدَا يْطَرِّدْ فِي البَيَّاعَة. 46وْقَالِلْهُمْ: «مَكْتُوبْ فِي الكْتَابْ:

بِيتِي بَاشْ تْكُونْ بِيتْ صْلاَةْ،

آمَا إِنْتُومَا رَدِّيتُوهَا دَامُوسْ السُّرَّاقْ.»

47وْكَانْ يْعَلِّمْ فِي الهَيْكِلْ كُلْ يُومْ، وْحَاوْلُوا رُؤَسَاءْ الكُهَّانْ وِالكُتَّابْ مْتَاعْ اليْهُودْ وِالأَعْيَانْ مْتَاعْ الشَّعْبْ بَاشْ يُقْتْلُوهْ. 48آمَا مَا عَرْفُوشْ كِيفَاشْ. عْلَى خَاطِرْ الشَّعْبْ الكُلْهُمْ كَانُوا يْحِبُّوا يِسْمْعُوا كْلاَمُو.

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index