Search form

لُوقَا 4

بْلِيسْ يْجَرَّبْ يَسُوعْ

(مَتَّى ‏4‏:‏1‏-11؛ مَرْقُسْ ‏1‏:‏12‏-13)

1وِرْجَعْ يَسُوعْ مِالأُرْدُنْ مَلْيَانْ بِالرُّوحْ القُدُسْ، وْهَزُّو الرُّوحْ القُدُسْ لِلخْلاَء. 2- وِلْمُدِّةْ أَرْبْعِينْ يُومْ وِبْلِيسْ يْجَرَّبْ فِيهْ وِالمُدَّةْ هَاذِيكَا الكُلْهَا مَا كْلَى حَتَّى شَيْء، وْكِوْفَاوْ الأَرْبْعِينْ يُومْ جَاعْ. 3يَاخِي قَالُّو بْلِيسْ: «إِذَا كَانِكْ إِنْتِ إِبْنْ اللهْ قُولْ لِلحَجْرَة هَاذِي تْوَلِّي خُبْزْ.» 4جَاوْبُو يَسُوعْ وْقَالْ: «مَكْتُوبْ فِي الكْتَابْ المُقَدَّسْ: "مُوشْ بِالخُبْزْ بَرْكْ يْعِيشْ الإِنْسَانْ."» 5مِنْ بَعْدْ طَلّْعُو بْلِيسْ لْبُقْعَة عَالْيَة وْوَرَّاهْ المَمَالِكْ الكُلْهَا مْتَاعْ الدِّنْيَا فِي لَحْظَة مِالزْمَانْ. 6وْقَالُّو: «نَعْطِيكْ السُّلْطَة عْلَى المَمَالِكْ هَاذِي الكُلْهَا، وِالمَجْدْ الِّي فِيهَا الكُلُّو، هِيَ تِعْطَاتْلِي، وْآنَا نَعْطِيهَا لِلِّي نْحِبْ. 7إِذَا تُسْجُدْ قُدَّامِي وْتِعْبِدْنِي الكُلْهَا تْوَلِّي مِلْكِكْ.» 8- جَاوْبُو يَسُوعْ وْقَالْ: «رَاهُو مَكْتُوبْ فِي الكْتَابْ المُقَدَّسْ

تُسْجُدْ لِلرَّبْ إِلاَهِكْ

تِعْبْدُو هُوَ وَحْدُو.»

9مِنْ بَعْدْ هَزُّو بْلِيسْ لْأُورْشَلِيمْ وْوَقّْفُو عْلَى حَرْفْ السْطَحْ مْتَاعْ الهَيْكِلْ وْقَالُّو: «إِذَا كَانِكْ إِنْتِ إِبْنْ اللهْ ارْمِي رُوحِكْ مِنْ هْنَا. 10- عْلَى خَاطِرْ مَكْتُوبْ فِي الكْتَابْ المُقَدَّسْ:

يْوَصِّى عْلِيكْ المْلاَيْكَة مْتَاعُو بَاشْ يَحْفْظُوكْ.

11يْهِزُّوكْ فِي يْدِيهُمْ

بَاشْ رِجْلِكْ مَا تِتْضْرَبْشْ فِي حَجْرَة.»

12- يَاخِي جَاوْبُو يَسُوعْ وْقَالْ: «تْقَالْ زَادَا فِي الكْتَابْ المُقَدَّسْ: "مَا تْجَرِّبْشْ الرَّبْ إِلاَهِكْ."» 13وْبَعْدْ مَا كَمِّلْ بْلِيسْ التَّجَارِبْ الكُلْهَا بْعِدْ عْلَى يَسُوعْ لْمُدَّة مِالزْمَانْ.

يَسُوعْ يِبْدَى خِدْمْتُو فِي الجَلِيلْ

(مَتَّى ‏4‏:‏12‏-17؛ مَرْقُسْ ‏1‏:‏14‏-15)

14وِرْجَعْ يَسُوعْ لْمَنْطِقْةْ الجَلِيلْ مَلْيَانْ بْقُوِّةْ الرُّوحْ القُدُسْ وْتِنْشَرْ خَبْرُو فِي المَنَاطِقْ الِّي دَايْرَة بِيهَا الكُلْهَا. 15وْكَانْ يْعَلِّمْ فِي المَجَامِعْ مْتَاعْ اليْهُودْ، وِالكُلْهُمْ كَانُوا يَحْكِيوْ عْلِيهْ بِالبَاهِي.

النَّاصْرَة مَا تِقْبِلْشْ يَسُوعْ

(مَتَّى ‏13‏:‏53‏-58؛ مَرْقُسْ ‏6‏:‏1‏-6)

16وْجَا لِمْدِينِةْ النَّاصْرَة الِّي تْرَبَّى فِيهَا وْكِالعَادَة دْخَلْ لِلمَجْمَعْ نْهَارْ السِّبْتْ وِوْقُفْ بَاشْ يَقْرَى فِي الكْتَابْ المُقَدَّسْ. 17وِعْطَاوْهْ كْتَابْ النَّبِي إِشَعْيَاءْ، وْكِحَلُّو لْقَى البُقْعَة الِّي مَكْتُوبْ فِيهَا:

18- رُوحْ الرَّبْ عْلِيَّ

مْسَحْنِي بَاشْ نْبَشِّرْ المْسَاكِينْ.

بْعَثْنِي بَاشْ نْخَبِّرْ المْرَابِيطْ بِالحُرِّيَّة،

وِالعِمْيَانْ يْوَلُّوا يْشُوفُوا،

وِنْحَرِّرْ المَظْلُومِينْ.

19وِنْخَبِّرْ عْلَى العَامْ مْتَاعْ رَبِّي.

يْكُونُوا شَعْبُو مَقْبُولِينْ.

20وْمِنْ بَعْدْ سَكِّرْ يَسُوعْ الكْتَابْ المُقَدَّسْ وِعْطَاهْ لِلرَّاجِلْ الِّي يِخْدِمْ فِي المَجْمَعْ وِقْعَدْ. وِالنَّاسْ الِّي فِي المَجْمَعْ الكُلْهُمْ بْقَاوْ يُخْزْرُولُو. 21وِبْدَا يْكَلِّمْ فِيهُمْ وْقَالِلْهُمْ: «الآيَاتْ الِّي سْمَعْتُوهُمْ تَمُّوا اليُومْ.» 22وِالحَاضْرِينْ الكُلْهُمْ كَانُوا يَحْكِيوْ عْلِيهْ بِالبَاهِي وْهُومَا مِتْعَجّْبِينْ مِنْ الكْلاَمْ البَاهِي الِّي خَارِجْ مِنْ فُمُّو وْكَانُوا يْقُولُوا: يَاخِي هَاذَا مُوشْ وِلْدْ يُوسُفْ؟ 23يَاخِي قَالِلْهُمْ يَسُوعْ: «أَكِيدْ رَاكُمْ بَاشْ تْقُولُوا المَثَلْ هَاذَا: "يَا طْبِيبْ دَاوِي رُوحِكْ! الشَّيْء الِّي سْمَعْنَا بِيكْ عْمَلْتُو فِي كَفْرْنَاحُومْ، أَعْمْلُو هْنَا زَادَا فِي بْلاَدِكْ."» 24وْزَادْ قَالْ: «نْقُلْكُمْ الحَقْ: حَتَّى نَبِي مَا هُوَ مَقْبُولْ فِي بْلاَدُو. 25- وِنْقُلْكُمْ الحَقْ: كَانُوا ثَمَّة بَرْشَة نْسَاء رْجَالْهُمْ مُوتَى فِي بَنِي إِسْرَائِيلْ فِي وَقْتْ النَّبِي إِيلِيَّا، وَقْتْهَا المْطَرْ مَا صَبِّتْشْ لْمُدِّةْ ثْلاَثَة سْنِينْ وْسِتَّة شْهُرْ حَتَّى لِينْ وَلاَّتْ ثَمَّة مَجَاعَة كْبِيرَة فِي الأَرْضْ الكُلْهَا. 26وْإِيلِيَّا مَا تِبْعَثْشْ لْحَتَّى وَحْدَة مِنْهُمْ كَانْ لِمْرَا رَاجِلْهَا مِيتْ فِي صَرْفَةْ ‌صَيْدَا. 27- وْكَانُوا ثَمَّة بَرْشَة نَاسْ فِي بَنِي إِسْرَائِيلْ مُرْضَى بِالبْرَصْ فِي وَقْتْ النَّبِي أَلِيشَعْ آمَا أَلِيشَعْ مَا شْفَى حَتَّى وَاحِدْ مِنْهُمْ كَانْ نُعْمَانْ الِّي مِنْ سُورْيَة.» 28وِالحَاضْرِينْ فِي المَجْمَعْ الكُلْهُمْ تْغَشَشُوا بَرْشَة كِسَمْعُوا الكْلاَمْ هَاذَا. 29وْخَرّْجُوهْ لْبَرَّة مِالمْدِينَة وْهَزُّوهْ لْحَرْفْ الجْبَلْ الِّي تِبْنَاتْ عْلِيهْ مْدِينِتْهُمْ بَاشْ يُرْمُوهْ اللُّوطَا. 30آمَا يَسُوعْ تْعَدَّى فِي وُسْطْهُمْ وِمْشَى.

رَاجِلْ سَاكْنُو رُوحْ مَنْزُوسْ يِتْشْفَى

(مَرْقُسْ ‏1‏:‏21‏-28)

31وِهْبَطْ يَسُوعْ لْكَفْرْنَاحُومْ الِّي هِيَ مْدِينَة فِي مَنْطِقْةْ الجَلِيلْ وْكَانْ يْعَلِّمْ فِي النَّاسْ فِي أَيَّامَاتْ السِّبْتْ. 32وِبْقَاوْ مِتْعَجّْبِينْ مِنْ التَّعْلِيمْ مْتَاعُو عْلَى خَاطِرْ كْلاَمُو كَانِتْ فِيهْ سُلْطَة. 33وْكَانْ ثَمَّة رَاجِلْ فِي المَجْمَعْ سَاكْنُو رُوحْ مَنْزُوسْ صَاحْ بْصُوتْ عَالِي: 34«آهْ، آشْ بِينَّا وْبِينِكْ يَا يَسُوعْ النَّاصْرِي؟ يَاخِي جِيتْ بَاشْ تِهْلِكْنَا؟ آنَا نَعْرِفْ إِنْتِ شْكُونْ، إِنْتِ قُدُّوسْ اللهْ.» 35يَاخِي يَسُوعْ أُمْرُو وْقَالُّو: «اسْكُتْ وْأُخْرُجْ مِنُّو.» يَاخِي الشِّيطَانْ طَيِّحْ الرَّاجِلْ فِي وُسْطْ النَّاسْ وِخْرَجْ مِنُّو مِنْ غِيرْ مَا ضَرُّو. 36وِالنَّاسْ الكُلْهُمْ بْقَاوْ مِتْعَجّْبِينْ وْوَلُّوا يِحْكُوا مْعَ بْعَضْهُمْ وِيْقُولُوا «شْنُوَّة الكْلاَمْ هَاذَا؟ رَاهُو يُأْمُرْ فِي الأَرْوَاحْ المَنْزُوسَة بْسُلْطَة وِبْقُوَّة وْهُومَا يُخْرْجُوا.» 37وْتِنْشَرْ خَبْرُو فِي المَنَاطِقْ القْرِيبَة الكُلْهَا.

نْسِيبِةْ بُطْرُسْ تِتْشْفَى

(مَتَّى ‏8‏:‏14‏-17؛ مَرْقُسْ ‏1‏:‏29‏-34)

38وِخْرَجْ يَسُوعْ مِالمَجْمَعْ وِدْخَلْ لْدَارْ سِمْعَانْ. وِنْسِيبِةْ بُطْرُسْ كَانِتْ مْرِيضَة وْعَنْدْهَا بَرْشَة سْخَانَة يَاخِي طَلْبُوا مِنُّو بَاشْ يِشْفِيهَا. 39وْقُفْ بِجْنَبْ فَرْشْهَا، أْمَرْ السْخَانَة يَاخِي مْشَاتْ عْلِيهَا وْبِالوَقْتْ قَامِتْ وِبْدَاتْ تِخْدِمْ فِيهُمْ.

40وِمْعَ غْرُوبْ الشَّمْسْ الِّي عِنْدْهُمْ نَاسْ مُرْضَى بْبَرْشَة أَمْرَاضْ جَابُوهُمْلُو وْكَانْ يْحُطْ عْلِيهُمْ فِي يْدِيهْ وْيِشْفِي فِيهُمْ. 41وْبَرْشَة شْوَاطِنْ خَرْجُوا مِنْ بَرْشَة نَاسْ وْهُومَا يْصِيحُوا: «إِنْتِ إِبْنْ اللهْ!» وْكَانْ يَسُوعْ يُأْمُرْ فِيهُمْ بَاشْ يُسْكْتُوا وْمَا خَلاَّهُمْشْ يِتْكَلّْمُوا، عْلَى خَاطِرْهُمْ عَرْفُوا الِّي هُوَ المَسِيحْ.

يَسُوعْ يْعَلِّمْ فِي المَجَامِعْ

(مَرْقُسْ ‏1‏:‏35‏-39)

42وْكِطْلَعْ النْهَارْ خْرَجْ يَسُوعْ وِمْشَى لْبُقْعَة خَالْيَة، وْلَوّْجُوا عْلِيهْ النَّاسْ حَتَّى لِينْ لْقَاوْهْ وْشَدُّوا فِيهْ صْحِيحْ وْطُلْبُوا مِنُّو بَاشْ مَا يِمْشِيشْ مِنْ بِحْذَاهُمْ. 43آمَا يَسُوعْ قَالِلْهُمْ: «لاَزِمْ نِمْشِي لِلمُدُنْ الأُخْرِينْ وِنْبَشِّرْ فِيهُمْ بْمَمْلِكْةْ اللهْ، عْلَى خَاطِرْ هَاذَا هُوَ الشَّيْء الِّي اللهْ بْعَثْنِي بَاشْ نَعْمْلُو.» 44وِمْشَى يْبَشِّرْ فِي المَجَامِعْ مْتَاعْ مَنْطِقْةْ اليَهُودِيَّة.

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index