Search form

مَرْقُسْ 13

يَسُوعْ تْنَبَّأ بْطِيحَانْ الهَيْكِلْ

(مَتَّى ‏24‏:‏1‏-2؛ لُوقَا ‏21‏:‏5‏-6)

1وْوَقْتِلِّي كَانْ يَسُوعْ خَارِجْ مِالهَيْكِلْ، قَالُّو وَاحِدْ مِنْ تْلاَمِذْتُو: «يَا مُعَلِّمْ، شُوفْ مَلاَّ حْجَرْ وْمَلاَّ بَنْيْ!» 2جَاوْبُو يَسُوعْ: «شُفْتْ البَنْيْ العْظِيمْ هَاذَا؟ حَتَّى حَجْرَة لِهْنَا مَا هِي بَاشْ تَبْقَى فُوقْ أُخْتْهَا، الكُلُّو بَاشْ يْطِيحْ.»

نْهَايِةْ الزْمَانْ

(مَتَّى ‏24‏:‏3‏-14؛ لُوقَا ‏21‏:‏7‏-19)

3وْوَقْتِلِّي كَانْ يَسُوعْ قَاعِدْ فِي جْبَلْ الزِّيتُونْ مْقَابِلْ الهَيْكِلْ سِأْلُوهْ بُطْرُسْ وْيَعْقُوبْ وْيُوحَنَّا وْأَنْدَرَاوُسْ عْلَى جْنَبْ 4«قُلْنَا وَقْتَاشْ الحَاجَاتْ هَاذِي بَاشْ تَاقَعْ وِشْنُوَّة الأَمَارَة الِّي تْوَرِّي الِّي هِيَ بَاشْ اتِّمْ.» 5وْقَالِلْهُمْ يَسُوعْ: «رُدُّوا بَالْكُمْ مَا تْخَلِّيوْشْ حَتَّى وَاحِدْ يْغَلِّطْكُمْ 6رَاهُمْ بَرْشَة نَاسْ بَاشْ يْجِيوْ بْإِسْمِي وِيْقُولُوا: "آنَا هُوَ المَسِيحْ!" وِيْغَلّْطُوا بَرْشَة نَاسْ 7آمَا وَقْتِلِّي تِسْمْعُوا بِحْرُوبْ قْرِيبَة وِحْرُوبْ فِي بْلاَيِصْ بْعِيدَة مَا تْخَافُوشْ. رَاهُو الشَّيْء هَاذَا يِلْزْمُو يَاقَعْ، آمَا مَا هِيشْ هَاذِيكَا النْهَايَة. 8شَعْبْ بَاشْ يْجِي ضِدْ شَعْبْ وْمَمْلْكَة ضِدْ مَمْلْكَة، وْبِشْ يَاقَعْ جُوعْ وِزْلاَزِلْ فِي بَرْشَة بْلاَيِصْ آمَا هَاذَا الكُلُّو مَاهُو إِلاَّ أَوِّلْ الوْجَايِعْ مْتَاعْ الوْلاَدَة. 9آمَا رُدُّوا بَالْكُمْ عْلَى رْوَاحْكُمْ. رَاهُمْ بَاشْ يْهِزُّوكُمْ لِلمَجْلِسْ مْتَاعْ اليْهُودْ وْبِشْ تِتْضَرْبُوا فِي المَجَامِعْ وْبِشْ تَاقْفُوا قُدَّامْ الحُكَّامْ وِالمُلُوكْ عْلَى خَاطْرِي بَاشْ تِشْهْدُولْهُمْ. 10وِقْبَلْ مَا تْجِي النْهَايَة لاَزِمْ الإِنْجِيلْ يُوصِلْ لِلشْعُوبْ الكُلْهَا. 11وْوَقْتِلِّي يْهِزُّوكُمْ بَاشْ يْسَلْمُوكُمْ مَا تْخَمَمُوشْ مِنْ قْبَلْ فِي شْنُوَّة بَاشْ تْقُولُوا: آمَا قُولُوا الكْلاَمْ الِّي يِتْعْطَالْكُمْ فِي الوَقْتْ هَاذَاكَا عْلَى خَاطِرْ مَا كُمْشْ إِنْتُومَا الِّي بَاشْ تِتْكَلّْمُوا آمَا رَاهُو الرُّوحْ القُدُسْ هُوَ الِّي بَاشْ يِتْكَلِّمْ. 12وِالخُو بَاشْ يْسَلِّمْ خُوهْ لِلمُوتْ، وِالبُو وِلْدُو، وِيْدُورْ الوْلِدْ عْلَى وَالْدِيهْ وْيُقْتُلْهُمْ. 13وْبِشْ تْكُونُوا مَكْرُوهِينْ عِنْدْ النَّاسْ الكُلْ عْلَى خَاطِرْ إِسْمِي. آمَا الِّي يِثْبِتْ لِلإِخْرْ رَاهُو بَاشْ يُخْلُصْ.»

الضِّيقَة العْظِيمَة

(مَتَّى ‏24‏:‏15‏-28؛ لُوقَا ‏21‏:‏20‏-24)

14- «وْوَقْتِلِّي تْشُوفُوا نْجَاسِةْ الخْرَابْ مُوجُودَة فِي البْلاَصَة الِّي مَا حَقّْهَاشْ تْكُونْ فِيهَا. (بَاشْ الِّي يَقْرَى يِفْهِمْ!) الوَقْتْ هَاذَاكَا الِّي فِي مَنْطِقْةْ اليَهُودِيَّة يِلْزِمْهُمْ يُهْرْبُوا لِلجْبَالْ. 15وِلِّي هُوَ فُوقْ السْطَحْ مَا يِلْزْمُوشْ لاَ يَهْبِطْ لْدَارُو وْلاَ يُدْخْلِلْهَا بَاشْ يَاخُذْ حَاجَة مِنْ وُسْطْهَا. 16وِلِّي يِخْدِمْ فِي السَّانْيَة مَا يِلْزْمُوشْ يَرْجَعْ لِلدَّارْ بَاشْ يْهِزْ الكَبُّوطْ مْتَاعُو. 17وْيَا وِيلْهُمْ النْسَاء الحْبَالَى وِلِّي يْرَضّْعُوا فِي الأَيَّامَاتْ هَاذُوكُمْ! 18يِلْزِمْكُمْ تْصَلِّيوْ بَاشْ الشَّيْء هَاذَاكَا مَا يَاقِعْشْ فِي الشْتَاء 19فِي الأَيَّامَاتْ هَاذُوكُمْ بَاشْ تَاقَعْ ضِيقَة مَا وُقْعِتْشْ كِيفْهَا مِنْ أَوِّلْ مَا خْلَقْ اللهْ الدِّنْيَا لْتَوَّا وْمَا هِيشْ بَاشْ تَاقَعْ بِالكُلْ. 20وْإذَا كَانْ الرَّبْ مَا قَصِّرْشْ فِي النْهَارَاتْ هَاذُوكُمْ تَالِي رَاهُو مَا نْجَى حَتَّى بَشَرْ، آمَا هُوَ قَصِّرْهُمْ عْلَى خَاطِرْ النَّاسْ الِّي خْتَارْهُمْ. 21إِذَا قَالِلْكُمْ وَاحِدْ الوَقْتْ هَاذَاكَا: "هَاوْ المَسِيحْ هْنَا!" وِلاَّ "هَاوِّينُو الغَادِي"، مَا تْصَدّْقُوهِشْ! 22رَاهُو بَاشْ يُظْهْرُوا بَرْشَة نَاسْ دَجَّالِينْ يِدَّعُوا الِّي هُومَا المَسِيحْ وْبَرْشَة أَنْبِيَاءْ كَذَّابِينْ وْبِشْ يَعْمْلُوا مُعْجْزَاتْ وِعْجَايِبْ بَاشْ كَانْ نَجّْمُوا يْغَلّْطُوا حَتَّى النَّاسْ الِّي خْتَارْهُمْ اللهْ. 23رُدُّوا بَالْكُمْ. هَانِي خَبِّرْتْكُمْ بْكُلْ شَيْء قْبَلْ مَا يَاقَعْ.»

جَيَّانْ المَسِيحْ مَرَّة ثَانْيَة

(مَتَّى ‏24‏:‏29‏-31؛ لُوقَا ‏21‏:‏25‏-28)

24«آمَا رَاهُو فِي الأَيَّامَاتْ هَاذُوكُمْ بَعْدْ الضِّيقَة هَاذِيكَا

الشَّمْسْ تْوَلِّي ظَلْمَة

وْيِتْحْجِبْ ضَوْ القَمْرَة

25النْجُومْ بَاشْ اطِّيحْ مِالسْمَاءْ

وْتِتْزَلْزِلْ القُوَّاتْ الِّي فِي السْمَاءْ.

26- وِالوَقْتْ هَاذَاكَا بَاشْ تْشُوفُونِي آنَا إِبْنْ الإِنْسَانْ جَايْ فِي السْحَابْ بْقُوَّة عْظِيمَة وْمَجْدْ. 27وِالوَقْتْ هَاذَاكَا بَاشْ نَبْعِثْ المْلاَيْكَة مْتَاعِي وْبِشْ نْلِمْ الِّي خْتَرْتْهُمْ مِالجِهَاتْ الأَرْبْعَة مِنْ إِخْرْ الدِّنْيَا لْإِخْرْ السْمَاءْ.»

تْعَلّْمُوا مِنْ الكَرْمَة

(مَتَّى ‏24‏:‏32‏-35؛ لُوقَا ‏21‏:‏29‏-33)

28«خُوذُوا العِبْرَة مِالكَرْمَة: دُوبْ مَا عِيدَانْهَا تِخْضَارْ وْتَعْمِلْ الوْرَقْ، تَعْرْفُوا الِّي الصِّيفْ قْرُبْ. 29إِمَّالاَ إِنْتُومَا زَادَا كِتْشُوفُوا الحَاجَاتْ هَاذِي قَاعْدَة تَاقَعْ. أَعْرْفُوا الِّي آنَا قْرِيبْ وِلِّي آنَا عْلَى الأَبْوَابْ. 30نْقُلْكُمْ الحَقْ: الجِيلْ هَاذَا مُوشْ بَاشْ يُوفَى حَتَّى لِينْ تَاقَعْ الحَاجَاتْ هَاذِي الكُلْهَا. 31السْمَاءْ وِالأَرْضْ بَاشْ يَفْنَاوْ آمَا كْلاَمِي عُمْرُو مَا يِفْنَى.»

اليُومْ هَاذَاكَا حَتَّى وَاحِدْ مَا يَعْرْفُو

(مَتَّى ‏24‏:‏36‏-44)

32«وِاليُومْ هَاذَاكَا وِالسَّاعَة هَاذِيكَا حَتَّى حَدْ مَا يَعْرِفْهُمْ، لاَ المْلاَيْكَة الِّي فِي السْمَاءْ وْلاَ الإِبْنْ، آمَا كَانْ الآبْ وَحْدُو يَعْرِفْهُمْ. 33رُدُّوا بَالْكُمْ وْفِيقُوا عْلَى خَاطِرْكُمْ مَا تَعْرْفُوشْ وَقْتَاشْ يْجِي الوَقْتْ. 34كِيفْ إِنْسَانْ سَافِرْ وْخَلَّى دَارُو وِعْطَى الحُكْمْ لِلخُدَّامْ مْتَاعُو وْوَرَّى لْكُلْ وَاحِدْ فِيهُمْ شْنُوَّة بَاشْ يِخْدِمْ وْوَصَّى العَسَّاسْ الِّي فِي البَابْ بَاشْ يْرُدْ بَالُو. 35فِيقُوا، رَاكُمْ مَا تَعْرْفُوشْ وَقْتَاشْ مُولَى الدَّارْ يْجِي، يَامَا فِي العْشِيَّة امَّخَّرْ وِلاَّ فِي نُصْفْ اللِّيلْ وِلاَّ وَقْتِلِّي يْصِيحْ السَّرْدُوكْ وِلاَّ فِي الصْبَاحْ. 36خِيرْ مَا يْجِي صُدْفَة وْيَلْقَاكُمْ رَاقْدِينْ. 37الشَّيْء الِّي نْقُولْهُولْكُمْ إِنْتُومَا نْقُولُو لِلنَّاسْ الكُلْ: رُدُّوا بَالْكُمْ!»

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index