Search form

مَرْقُسْ 14

اليْهُودْ يْحَاوْلُوا يُقْتْلُوا يَسُوعْ

(مَتَّى ‏26‏:‏1‏-5؛ لُوقَا ‏22‏:‏1‏-2؛ يُوحَنَّا ‏11‏:‏45‏-53)

1قْبَلْ عِيدْ الفِصْحْ وْعِيدْ الفْطِيرْ بْيُومِينْ، رُؤَسَاءْ الكُهَّانْ وِالكُتَّابْ مْتَاعْ اليْهُودْ كَانُوا يِتْحَيّْلُوا بَاشْ يْشِدُّوا يَسُوعْ وْيُقْتْلُوهْ. 2آمَا كَانُوا يْقُولُوا: «الشَّيْء هَاذَا مَا يِلْزْمُوشْ يَاقَعْ فِي العِيدْ، بَاشْ مَا تَاقَعْشْ مَشَاكِلْ فِي وُسْطْ الشَّعْبْ!»

صَبَّانْ العِطْرْ عْلَى يَسُوعْ

(مَتَّى ‏26‏:‏6‏-13؛ يُوحَنَّا ‏12‏:‏1‏-8)

3وَقْتِلِّي كَانْ يَسُوعْ قَاعِدْ عْلَى المِيدَة فِي دَارْ سِمْعَانْ الأَبْرِصْ الِّي فِي بِيتْ عَنْيَا جَاتْ مْرَا هَازَّة دَبُّوزَة مْتَاعْ عِطْرْ النَّارْدِينْ الصَّافِي وِالغَالِي وْكَسّْرِتْهَا وْصَبِّتْ العِطْرْ عْلَى رَاسُو. 4وْثَمَّة نَاسْ مِالحَاضْرِينْ تْغَشَشُوا وْقَالُوا: «عْلاَشْ التَّبْذِيرْ هَاذَا الكُلُّو مْتَاعْ العِطْرْ؟ 5رَاهُو كَانْ مُمْكِنْ يِتْبَاعْ بْأَكْثِرْ مِنْ ثْلاَثَة مْيَاتْ قَطْعَة مِالفِضَّة وِالفْلُوسْ تِتْعْطَى لِلفُقَرَاءْ.» وِبْدَاوْا يْلُومُوا فِي المْرَا 6آمَا يَسُوعْ قَالْ: «أَخْطُوهَا! عْلاَشْ تْقَلّْقُوا فِيهَا؟ رَاهِي عَمْلِتْ مْعَايَا حَاجَة بَاهْيَة. 7الفُقَرَاءْ دِيمَا مْعَاكُمْ وِتْنَجّْمُوا تَعْمْلُوا مْعَاهُمْ الخِيرْ وَقْتِلِّي تْحِبُّوا آمَا آنَا مَانِيشْ بَاشْ نْكُونْ مْعَاكُمْ دِيمَا. 8هِيَ عَمْلِتْ الِّي تِقْدِرْ عْلِيهْ وْغَسّْلِتْ بَدْنِي بِالمْسَبِّقْ وْحَضّْرِتُّو لِلدْفِينَة. 9نْقُلْكُمْ الحَقْ: وِينْ يِتْبَشِّرْ بِالإِنْجِيلْ فِي الدِّنْيَا الكُلْهَا، بَاشْ يِتْحْكَى عَلِّي عِمْلاَتُو المْرَا هَاذِي، بَاشْ النَّاسْ دِيمَا يِذَّكْرُوهَا!»

خِيَانِةْ يَهُوذَا

(مَتَّى ‏26‏:‏14‏-16؛ لُوقَا ‏22‏:‏3‏-6)

10وْيَهُوذَا الإِسْخَرْيُوطِي الِّي هُوَ وَاحِدْ مِالأَثْنَاشْ مْشَى لْرُؤَسَاءْ الكُهَّانْ بَاشْ يْخُونْ يَسُوعْ. 11وْوَقْتِلِّي سَمْعُوهْ فَرْحُوا وْوَعْدُوهْ بَاشْ يَعْطِيوْهْ فْلُوسْ وْكَانْ يِسْتَنَّى حَتَّى لِينْ تْجِي فُرْصَة بَاهْيَة بَاشْ يْخُونُو.

عْشَاء الفِصْحْ مْعَ التْلاَمْذَة

(مَتَّى ‏26‏:‏17‏-25؛ لُوقَا ‏22‏:‏7‏-14،‏21‏-23؛ يُوحَنَّا ‏13‏:‏21‏-30)

12وْفِي النْهَارْ الأُوِّلْ مْتَاعْ عِيدْ الفْطِيرْ الِّي كَانُوا يِذْبْحُوا فِيهْ عَلُّوشْ الفِصْحْ قَالُوا التْلاَمْذَة لْيَسُوعْ: «وِينْ تْحِبّْنَا نِمْشِيوْا وِنْحَضّْرُولِكْ عْشَاء الفِصْحْ بَاشْ تَاكْلُو؟» 13وِبْعَثْ يَسُوعْ زُوزْ مِنْ تْلاَمِذْتُو وْقَالِلْهُمْ: «إِمْشِيوْ لِلمْدِينَة وْتَوْ تَلْقَاوْ رَاجِلْ هَازْ قُلَّة مْتَاعْ مَاء تَبّْعُوهْ. 14وِالدَّارْ الِّي يُدْخْلِلْهَا قُولُوا لْمُولاَهَا: "المُعَلِّمْ يْقُولْ: وِينِي بِيتْ الضْيُوفْ الِّي بَاشْ نَاكُلْ فِيهَا عْشَاء الفِصْحْ مْعَ تْلاَمِذْتِي؟" 15وْهُوَ بَاشْ يْوَرِّيكُمْ بِيتْ كْبِيرَة فِي الطَّاقْ الفُوقَانِي فِيهَا دْبَشْ وْحَاضْرَة، فِي البِيتْ هَاذِيكَا حَضّْرُولْنَا عْشَاء عِيدْ الفِصْحْ!»

16وِمْبَاعِدْ خَرْجُوا التْلاَمْذَة وْدَخْلُوا لِلمْدِينَة وِلْقُوا كُلْ شَيْء كِيفْ مَا قَالِلْهُمْ عْلِيهْ وْحَضّْرُوا عْشَاء الفِصْحْ. 17- وْفِي العْشِيَّة جَا يَسُوعْ هُوَ وِالأَثْنَاشِنْ تِلْمِيذْ. 18وَقْتِلِّي كَانُوا قَاعْدِينْ يَاكْلُوا، قَالْ يَسُوعْ: «نْقُلْكُمْ الحَقْ: وَاحِدْ مِنْكُمْ بَاشْ يْخُونِّي وْهُوَ تَوَّا يَاكُلْ مْعَايَ.» 19وِبْدَاوْا التْلاَمْذَة يِحْزْنُوا وِيْقُولُوا بِالوَاحِدْ بِالوَاحِدْ: «يَاخِي آنَا هُوَ؟» 20وْقَالِلْهُمْ: «هُوَ وَاحِدْ مِالأَثْنَاشْ قَاعِدْ يَاكُلْ مْعَايَ تَوَّا فِي الصْحَنْ. 21رَانِي آنَا إِبْنْ الإِنْسَانْ لاَزِمْنِي نْمُوتْ كِيفْ مَا تِكْتِبْ عْلِيَّ فِي الكْتَابْ المُقَدَّسْ وْيَا وِيلُو الرَّاجِلْ الِّي بَاشْ يْخُونِّي! الرَّاجِلْ هَاذَاكَا خِيرْلُو لُوكَانْ مَا تُولِدْشْ.»

عْشَاء الرَّبْ

(مَتَّى ‏26‏:‏26‏-30؛ لُوقَا ‏22‏:‏14‏-20؛ كُورِنْثُوسْ الأُولَى ‏11‏:‏23‏-25)

22وْوَقْتِلِّي كَانُوا يَاكْلُوا خْذَا يَسُوعْ خُبْزَة وْبَارِكْ وِقْسِمْ وِعْطَى لِتْلاَمِذْتُو وْقَالْ: «خُوذُوا، هَاذَا بَدْنِي.» 23وِخْذَا كَاسْ وْكِشْكَرْ عْطَاهُمْ شَرْبُوا الكُلْهُمْ. 24- وْقَالِلْهُمْ: «هَاذَا هُوَ دَمِّي، دَمْ العَهْدْ الِّي جْرَى عْلَى خَاطِرْ بَرْشَة نَاسْ. 25نْقُولِلْكُمْ الحَقْ: مِنْ تَوْ مَا عَادِشْ بَاشْ نُشْرُبْ مِنْ العَصِيرْ مْتَاعْ العْنِبْ حَتَّى لِينْ يْجِي النْهَارْ هَاذَاكَا الِّي نُشْرْبُو فِيهْ جْدِيدْ فِي مَمْلِكْةْ اللهْ.» 26وِمْبَاعِدْ سَبّْحُوا رَبِّي بِالغْنَاء وِمْشَاوْ لِجْبَلْ الزِّيتُونْ.

يَسُوعْ تْنَبَّأ الِّي بُطْرُسْ بَاشْ يُنْكْرُو

(مَتَّى ‏26‏:‏31‏-35؛ لُوقَا ‏22‏:‏31‏-34؛ يُوحَنَّا ‏13‏:‏36‏-38)

27- وْقَالِلْهُمْ يَسُوعْ: «الكُلْكُمْ بَاشْ تِمْشِيوْ وِتْخَلُّونِي، رَاهُو مَكْتُوبْ فِي الكْتَابْ المُقَدَّسْ:

بَاشْ نَضْرِبْ السَّارِحْ

وِالغْنَمْ تِتْفَرِّقْ

28آمَا بَعْدْ مَا نْقُومْ مِالمُوتْ رَانِي بَاشْ نِسْبِقْكُمْ لِلجَلِيلْ.» 29يَاخِي قَالُّو بُطْرُسْ: «حَتَّى لُوكَانْ خَلاَّوْكْ الكُلْهُمْ، آنَا عُمْرِي مَا نْخَلِّيكْ.» 30وْقَالُّو يَسُوعْ: «نْقُلِّكْ الحَقْ، اليُومْ، فِي اللِّيلَة هَاذِي، قْبَلْ مَا يْصِيحْ السَّرْدُوكْ مَرّْتِينْ، تْكُونْ نْكَرْتْ فِيَّ ثْلاَثَة مَرَّاتْ.» 31آمَا بُطْرُسْ شَدْ صْحِيحْ وْقَالْ: «مَا نِيشْ بَاشْ نُنْكْرِكْ بِالكُلْ حَتَّى كَانْ لْزِمْ بَاشْ نْمُوتْ مْعَاكْ!» وِالكْلاَمْ هَاذَا بِيدُو قَالُوهُولُو التْلاَمْذَة الكُلْهُمْ.

يَسُوعْ يْصَلِّي فِي جَثْسَيْمَانِي

(مَتَّى ‏26‏:‏36‏-46؛ لُوقَا ‏22‏:‏39‏-46)

32وِمْشَاوْ لِبْلاَصَة إِسْمْهَا جَثْسَيْمَانِي، وْقَالْ يَسُوعْ لِتْلاَمِذْتُو: «أُقْعْدُوا لِهْنَا خَلِّينِي آنَا نِمْشِي نْصَلِّي.» 33وْهَزْ مْعَاهْ بُطْرُسْ وْيَعْقُوبْ وْيُوحَنَّا وِبْدَا يْحِسْ بِالقْلَقْ وِالحُزْنْ. 34وْقَالِلْهُمْ: «نْحِسْ الِّي رُوحِي حْزِينَة بَرْشَة لْحَدْ المُوتْ. اسْتَنُّوا هْنَا وَابْقَاوْ فَايْقِينْ.» 35وِبْعِدْ عْلِيهُمْ شْوَيَّة وِهْبَطْ عْلَى رْكَايْبُو عْلَى الأَرْضْ وِبْدَا يْصَلِّي بَاشْ إِذَا كَانْ مُمْكِنْ السَّاعَة هَاذِيكَا مَا تِتْعَدَّاشْ عْلِيهْ. 36وْقَالْ: «يَا بَابَا! يَا بُونَا! إِنْتِ قَادِرْ عْلَى كُلْ شَيْء، بَعِّدْ عْلِيَّ الكَاسْ هَاذَا، آمَا خَلِّي يْكُونْ الشَّيْء الِّي تْحِبْ عْلِيهْ إِنْتِ، مُوشْ الِّي نْحِبْ عْلِيهْ آنَا.»

37وِمْبَاعِدْ جَا وِلْقَاهُمْ رَاقْدِينْ وْقَالْ لْبُطْرُسْ: «يَاخِي إِنْتِ رَاقِدْ يَا سِمْعَانْ؟ مَا تْنَجِّمْشْ تَسْهِرْ حَتَّى سَاعَة وَحْدَة؟ 38أَسْهْرُوا وْصَلِّيوْ بَاشْ مَا تُحْصْلُوشْ فِي تَجْرْبَة. رَاهِي الرُّوحْ تْحِبْ تَبْقَى فَايْقَة آمَا البْدَنْ رَاهُو ضْعِيفْ.» 39وِمْشَى مَرَّة أُخْرَى وْصَلَّى وْقَالْ الكْلاَمْ هُوَ بِيدُو. 40وِرْجَعْ مَرَّة أُخْرَى وِلْقَاهُمْ رَاقْدِينْ عْلَى خَاطِرْهُمْ مَا نَجّْمُوشْ يْهِزُّوا رُوسْهُمْ مِالنُّومْ وْمَا لْقَاوْشْ آشْ يْجَاوْبُوهْ. 41وْجَا المَرَّة الثَّالْثَة وْقَالِلْهُمْ: «يَاخِي مَازِلْتُوا لْتَوْ رَاقْدِينْ وْمِرْتَاحِينْ؟ يِكْفِي! رَاهِي السَّاعَة جَاتْ. تَوَّا آنَا إِبْنْ الإِنْسَانْ بَاشْ يْسَلّْمُونِي لِيْدِينْ المِذْنْبِينْ. 42قُومُوا، هَيَّا نِمْشِيوْا! هَاوْ جَا الِّي بَاشْ يْخُونِّي!»

شَدَّانْ يَسُوعْ

(مَتَّى ‏26‏:‏47‏-56؛ لُوقَا ‏22‏:‏47‏-53؛ يُوحَنَّا ‏18‏:‏3‏-12)

43وْبِالوَقْتْ وَقْتِلِّي هُوَ يِتْكَلِّمْ جَا يَهُوذَا الِّي هُوَ وَاحِدْ مِالأَثْنَاشْ وِمْعَاهْ بَرْشَة نَاسْ هَازِّينْ سْيُوفَا وِعْصِي بَعْثُوهُمْ رُؤَسَاءْ الكُهَّانْ وِالكُتَّابْ مْتَاعْ اليْهُودْ وِالشْيُوخْ. 44وِلِّي بَاشْ يْخُونُو عْطَاهُمْ أَمَارَة وْقَالْ: «الِّي بَاشْ نْبُوسُو هَاذَاكَا هُوَ. شِدُّوهْ وْهِزُّوهْ وْعِسُّوا عْلِيهْ بِالقْدَا.» 45وْمِلِّي وْصُلْ مْشَالُو طُولْ وْقَالْ: «يَا مُعَلِّمْ!» وْبَاسُو. 46وِالنَّاسْ شَدُّوهْ 47آمَا وَاحِدْ مِالوَاقْفِينْ جْبِدْ سِيفْ وِضْرَبْ العَبْدْ مْتَاعْ أَعْلَى وَاحِدْ فِي رُؤَسَاءْ الكُهَّانْ قَصّْلُو وِذْنُو. 48وْقَلْهُمْ يَسُوعْ: «يَاخِي رَدِّيتُونِي مُجْرِمْ جَايِينِّي بِالسْيُوفَا وِالعْصِي؟ 49كُلْ يُومْ كُنْتْ مَا بِينَاتْكُمْ نْعَلِّمْ فِي الهَيْكِلْ وْمَا شَدِّيتُونِيشْ آمَا الشَّيْء هَاذَا الكُلُّو وْقَعْ بَاشْ يْتِمْ الِّي تْقَالْ فِي الكْتَابْ المُقَدَّسْ» 50الوَقْتْ هَاذَاكَا التْلاَمْذَة خَلاَّوْهْ وْهَرْبُوا.

51وْثَمَّة وْلَدْ كَانْ يْتَبَّعْ فِيهْ وْكَانْ لاَبِسْ قَطْعَة دْبَشْ وَحْدَة عْلَى اللْحَمْ، يَاخِي شَدُّوهْ 52وَلَّى خَلاَّهَالْهُمْ وِهْرَبْ عِرْيَانْ.

يَسُوعْ قُدَّامْ مَجْلِسْ اليْهُودْ

(مَتَّى ‏26‏:‏57‏-68؛ لُوقَا ‏22‏:‏54‏-55،‏63‏-71؛ يُوحَنَّا ‏18‏:‏13‏-14،‏19‏-24)

53وْهَزُّوا يَسُوعْ لْأَعْلَى وَاحِدْ فِي رُؤَسَاءْ الكُهَّانْ. وِينْ تْلَمُّوا رُؤَسَاءْ الكُهَّانْ الكُلْهُمْ وِالشْيُوخْ وِالكُتَّابْ مْتَاعْ اليْهُودْ. 54وْبُطْرُسْ كَانْ يْتَبَّعْ فِيهْ حَتَّى لِينْ وْصُلْ لِلوُسْطِيَّة مْتَاعْ دَارْ أَعْلَى وَاحِدْ فِي رُؤَسَاءْ الكُهَّانْ وْكَانْ قَاعِدْ مْعَ الحُرَّاسْ مْتَاعْ الهَيْكِلْ يِدَّفَّي عْلَى النَّارْ.

55وْرُؤَسَاءْ الكُهَّانْ وِلِّي فِي المَجْلِسْ مْتَاعْ اليْهُودْ الكُلْهُمْ يْلَوّْجُوا عْلَى شْكُونْ يِشْهِدْ عْلَى يَسُوعْ بَاشْ يُقْتْلُوهْ يَاخِي مَا لْقَاوْشْ 56وْبَرْشَة نَاسْ قَدّْمُوا وْشِهْدُوا بِالبَاطِلْ آمَا شْهَادِتْهُمْ جَاتْ عَكْسْ بْعَضْهَا. 57وِمْبَاعِدْ ثَمَّة شْكُونْ وُقْفُوا وْشِهْدُوا عْلِيهْ بِالكِذْبْ وْقَالُوا: 58«سْمَعْنَاهْ يْقُولْ: "بَاشْ نْطَيِّحْ الهَيْكِلْ هَاذَا الِّي صَنْعِتُّو يْدِينْ البَشَرْ، وْبَعْدْ ثْلاَثَة أَيَّامْ بَاشْ نِبْنِي هَيْكِلْ آخَرْ مُوشْ مَصْنُوعْ بِالِيْدِينْ."» 59آمَا زَادُوا تْخَالْفُوا فِي الشّْهَادَة هَاذِي زَادَا. 60وِوْقُفْ أَعْلَى وَاحِدْ فِي رُؤَسَاءْ الكُهَّانْ فِي الوُسْطْ وِسْإِلْ يَسُوعْ وْقَالْ: «يَاخِي مَا عِنْدِكْ مَا تْجَاوِبْ؟ يَاخِي مَا كِشْ تِسْمَعْ فِي الرْجَالْ هَاذُومَا كِيفَاشْ يِشْهْدُوا عْلِيكْ؟» 61آمَا يَسُوعْ بْقَى سَاكِتْ وْمَا جاوِبْشْ بْحَتَّى شَيْء وْعَاوِدْ أَعْلَى وَاحِدْ فِي رُؤَسَاءْ الكُهَّانْ سِأْلُو وْقَالُّو: «يَاخِي إِنْتِ المَسِيحْ، إِبْنْ اللهْ المُبَارَكْ؟» 62- قَالْ يَسُوعْ: «آنَا هُوَ. وْبِشْ تْشُوفُونِي آنَا إِبْنْ الإِنْسَانْ قَاعِدْ عْلَى يْمِينْ قُدْرِةْ اللهْ وْجَايْ فِي سْحُبْ السْمَاءْ!» 63قَطِّعْ أَعْلَى وَاحِدْ فِي رُؤَسَاءْ الكُهَّانْ دَبْشُو وْقَالْ: «يَاخِي مَازِلْنَا مِحْتَاجِينْ لِشْهُودْ؟ 64هَاكُمْ سْمَعْتُوهْ كِيفَاشْ كْفَرْ. شْنُوَّة رَايْكُمْ؟» الكُلْهُمْ حُكْمُوا عْلِيهْ الِّي هُوَ يِسْتْحَقْ بَاشْ يْمُوتْ. 65وْثَمَّة نَاسْ بْدَاوْا يِبْزْقُوا عْلِيهْ، وْغَمّْضُولُو عِينِيهْ وْيَضْرْبُوا فِيهْ عْلَى وِجْهُو وِيْقُولُولُو: «كَانِكْ نَبِي طَلِّعْ شْكُونْ ضَرْبِكْ!» وِبْدَاوْا الحُرَّاسْ مْتَاعْ الهَيْكِلْ يَضْرْبُوا فِيهْ بِالكَفْ.

بُطْرُسْ يُنْكُرْ يَسُوعْ

(مَتَّى ‏26‏:‏69‏-75؛ لُوقَا ‏22‏:‏56‏-62؛ يُوحَنَّا ‏18‏:‏15‏-18،‏25‏-27)

66وْوَقْتِلِّي بُطْرُسْ كَانْ لُوطَة فِي الوُسْطِيَّة مْتَاعْ الدَّارْ جَاتْ خْدِيمَة مْتَاعْ أَعْلَى وَاحِدْ فِي رُؤَسَاءْ الكُهَّانْ 67وْوَقْتِلِّي شَافِتْ بُطْرُسْ يِدَّفَّى ثَبّْتِتْ فِيهْ وْقَالِتْ: «إِنْتِ زَادَا كُنْتْ مْعَ يَسُوعْ النَّاصْرِي!» 68آمَا هُوَ نْكَرْ وْقَالْ: «مَا نَعْرِفْشْ وْمَا نِفْهِمْشْ آشْ قَاعْدَة تْقُولْ!» وِمْشَى البَرَّا وِقْعَدْ وِينْ البَابْ وْبِالوَقْتْ صَاحْ السَّرْدُوكْ. 69وْوَقْتِلِّي شَافَاتُو الخْدِيمَة قَالِتْ مَرَّة أُخْرَى لِلنَّاسْ الِّي وَاقْفِينْ الغَادِي: «هَاذَا رَاهُو وَاحِدْ مِنْهُمْ!» 70آمَا هُوَ زَادْ نْكَرْ مَرَّة أُخْرَى وِمْبَاعِدْ شْوَيَّة الوَاقْفِينْ الغَادِي قَالُوا مَرَّة أُخْرَى لْبُطْرُسْ: «بِالحَقْ إِنْتِ وَاحِدْ مِنْهُمْ عْلَى خَاطْرِكْ مِنْ مَنْطِقْةْ الجَلِيلْ.» 71آمَا هُوَ بْدَا يِحْلِفْ وْيِتْكَتِّفْ: «رَانِي مَا نَعْرْفُوشْ الرَّاجِلْ الِّي تَحْكِيوْ عْلِيهْ هَاذَا.» 72وْفِي الوَقْتْ هَاذَاكَا صَاحْ السَّرْدُوكْ مَرَّة ثَانْيَة وِتْذَكِّرْ بُطْرُسْ كِلْمِةْ يَسُوعْ كِقَلُّو: «قْبَلْ مَا يْصِيحْ السَّرْدُوكْ مَرّْتِينْ تْكُونْ إِنْتِ نْكَرْتْنِي ثْلاَثَة مَرَّاتْ.» وْوَقْتِلِّي فْهِمْ الكْلاَمْ هَاذَا بْكَى.

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index