Search form

مَرْقُسْ 7

الوْصَايَا مْتَاعْ اللهْ فُوقْ التَّقَالِيدْ مْتَاعْ النَّاسْ

(مَتَّى ‏15‏:‏1‏-9)

1وِمْشَاوْ الفَرِّيسِيِّينْ لْيَسُوعْ وِمْعَاهُمْ جْمَاعَة مِنْ الكُتَّابْ مْتَاعْ اليْهُودْ جَايِينْ مِنْ أُورْشَلِيمْ. 2وْثَمَّة جْمَاعَة شَافُوا تْلاَمِذْتُو يَاكْلُوا مِنْ غِيرْ مَا يَغْسْلُوا يْدِيهُمْ. 3وْكَانُوا الفَرِّيسِيِّينْ وِاليْهُودْ بْصِفَة عَامَّة مَا يَاكْلُوا إِلاَّ بَعْدْ مَا يَغْسْلُوا يْدِيهُمْ بِالقْدَا عْلَى خَاطِرْهُمْ يْحَافْظُوا عْلَى عْوَايِدْ الشْيُوخْ. 4وْوَقْتِلِّي يَرْجْعُوا مِالسُّوقْ مَا يَاكْلُوا كَانْ بَعْدْ مَا يْعُومُوا وْثَمَّة بَرْشَة تَقَالِيدْ أُخْرَى حَافْظُوا عْلِيهَا كِيفْ غَسْلاَنْ الكِيسَانْ وِالصْحَافِي وِالمَاعُونْ النْحَاسْ. 5الوَقْتْ هَاذَاكَا سِأْلُوهْ الفَرِّيسِيِّينْ وِالكُتَّابْ مْتَاعْ اليْهُودْ: «عْلاَشْ تْلاَمِذْتِكْ مَا يِتْصَرّْفُوشْ كِيفْ مَا تْقُولْ العْوَايِدْ مْتَاعْ الشْيُوخْ وْيَاكْلُوا وِيْدِيهُمْ امَّسْخَة؟» 6- جَاوِبْهُمْ يَسُوعْ: «أَحْسِنْ مَا عْمَلْ إِشَعْيَاءْ وَقْتِلِّي تْنَبَّأْ عْلِيكُمْ يَا مُنَافْقِينْ كِيفْ مَا قَالْ الكْتَابْ المُقَدَّسْ:

الشَّعْبْ هَاذَا بْفُمُّو يِكْرِمْ فِيَّ،

وْقَلْبُو بْعِيدْ عْلِيَّ.

7بَاطِلْ يِعْبْدُوا فِيَّ،

وِيْعَلّْمُوا فِي وْصَايَا النَّاسْ.

8هَمِّلْتُوا الوْصِيَّة مْتَاعْ الله وْشَدِّيتُوا فِي عْوَايِدْ النَّاسْ!» 9وْقَالِلْهُمْ: «يَعْطِيكُمْ الصَّحَّة كِمَا قْبِلْتُوشْ وْصِيِّةْ اللهْ بَاشْ تْحَافْظُوا عْلَى العْوَايِدْ مْتَاعْكُمْ. 10- مُوسَى قَالْ: "إِكْرِمْ بُوكْ وْأُمِّكْ، وِلِّي يْسِبْ بُوهْ وِلاَّ أُمُّو يِلْزْمُو يْمُوتْ." 11آمَا إِنْتُومَا تْقُولُوا: "إِذَا وَاحِدْ قَالْ لْبُوهْ وِلاَّ لْأُمُّو الِّي كُنْتْ نْعَاوِنْ فِيكْ بِيهْ رَانِي عْطِيتُو قُرْبَانْ للهْ." 12مَا عَادِشْ تْخَلِّيوْهْ يْعَاوِنْ بُوهْ وِلاَّ أُمُّو بْأَيْ حَاجَة 13وْهَكَّا رَدِّيتُوا كِلْمِةْ اللهْ بَاطْلَة بِالعْوَايِدْ مْتَاعْكُمْ القْدِيمَة الِّي وْرِثْتُوهَا كِيفْ بَرْشَة حَاجَاتْ تَعْمْلُوا فِيهَا.»

الشَّيْء الِّي يْنَجِّسْ الإِنْسَانْ

(مَتَّى ‏15‏:‏10‏-20)

14وْنَادَى يَسُوعْ النَّاسْ مَرَّة أُخْرَى وْقَالِلْهُمْ: «اسْمْعُونِي وِافْهْمُونِي الكُلْكُمْ. 15مَا ثَمَّاشْ حَتَّى حَاجَة لْبَرَّة مِالإِنْسَانْ كِتُدْخُلْ فِي وُسْطُو تْنَجّْسُو آمَا رَاهِي الحَاجَاتْ الِّي خَارْجَة مِالإِنْسَانْ هِيَ الِّي تْنَجّْسُو.» 16+ 17وْوَقْتِلِّي خَلَّى النَّاسْ وِدْخَلْ لْدَارْ سِأْلُوهْ تْلاَمِذْتُو عْلَى المَعْنَى مْتَاعْ المَثَلْ. 18قَالِلْهُمْ: «حَتَّى إِنْتُومَا مَا تِفْهْمُوشْ؟ يَاخِي مَا تَعْرْفُوشْ إِنُّو الحَاجَاتْ الِّي تُدْخُلْ لِلإنْسَانْ مِنْ البَرَّة مَا تْنَجِّمْشْ تْنَجّْسُو. 19عْلَى خَاطِرْهَا تُدْخُلْ لْكِرْشُو مُوشْ لْقَلْبُو وِمْبَاعِدْ تُخْرُجْ مِالبْدَنْ؟» وْهَكَّا رَدْ المَاكْلَة الكُلْهَا طَاهْرَة.

20وِمْبَاعِدْ قَالْ: «الحَاجَاتْ الِّي تُخْرُجْ مِالإِنْسَانْ هِيَ الِّي تْنَجِّسْ الإِنْسَانْ. 21عْلَى خَاطِرْ مِنْ وُسْطْ قْلُوبْ النَّاسْ تُخْرُجْ الأَفْكَارْ الشِّرِّيرَة وِالفْسَادْ وِالسِّرْقَة وِالقَتْلْ 22وِالزْنَى وِالطْمَعْ وِالشَّرْ وِالغَشَّة وِالتَّسَيُّبْ وِالأَنَانِيَّة وِالكُفْرْ وِالتَّكَبُّرْ وِالجَهْلْ. 23الحَاجَاتْ الشِّرِّيرَة هَاذِي الكُلْهَا تُخْرُجْ مِنْ وُسْطْ الإِنْسَانْ وِتْنَجّْسُو.»

المْرَا الِّي عِنْدْهَا إِيمَانْ

(مَتَّى ‏15‏:‏21‏-28)

24وِمْبَاعِدْ خْرَجْ يَسُوعْ مِالمَنْطْقَة هَاذِيكَا وِمْشَى لْجِيهِةْ صُورْ. دْخَلْ لْدَارْ وْمَا حَبِّشْ حَتَّى حَدْ يَعْرِفْ الِّي هُوَ فِيهَا، آمَا مَا نَجِّمْشْ يَبْقَى مِتْخُبِّي، 25وْثَمَّة مْرَا بِنْتْهَا سَاكِنْهَا رُوحْ مَنْزُوسْ، دُوبْ مَا سِمْعِتْ بِيهْ جَاتُو وْتِرْمَاتْ قُدَّامْ سَاقِيهْ. 26وِالمْرَا كَانِتْ يُونَانِيَّة، أَصْلْهَا سُورِيَّة فِينِيقِيَّة وِاشَّحْتِتُّو بَاشْ يْخَرِّجْ الشِّيطَانْ مِنْ بْنِتْهَا. 27آمَا هُوَ قَالِلْهَا: «خَلِّي يِشْبْعُوا الوْلاَدْ فِي الأُوِّلْ! مُوشْ بَاهِي نَاخْذُوا الخُبْزْ مْتَاعْ الوْلاَدْ وْنَرْمِيوْهْ لِلكْلاَبْ.» 28آمَا هِيَ جَاوْبِتُّو وْقَالِتْلُو: «يَا سِيدِي! حَتَّى الكْلاَبْ تَحْتْ الطَّاوْلَة تَاكُلْ مِالفِتْفَاتْ الِّي يْطَيّْحُوهْ الوْلاَدْ.» 29قَالِلْهَا: «عْلَى خَاطْرِكْ قُلْتْ الكِلْمَة هَاذِي إِمْشِي، رَاهُو الشِّيطَانْ خْرَجْ مِنْ بِنْتِكْ!» 30وْوَقْتِلِّي رَجْعِتْ لْبِيتْهَا لْقَاتْ بْنِتْهَا فُوقْ السْرِيرْ وِالشِّيطَانْ خْرَجْ مِنْهَا.

الأَطْرِشْ يِتْشْفَى

31وِمْبَاعِدْ خْرَجْ يَسُوعْ مِنْ جِيهِةْ صُورْ وِرْجَعْ لِلبُحَيْرَة مْتَاعْ الجَلِيلْ بَعْدْ مَا تْعَدَّى عْلَى صَيْدَا وِعْلَى الحُدُودْ مْتَاعْ بْلاَصَة اسْمْهَا العَشْرَة مُدُنْ. 32وْجَابُولُو وَاحِدْ بَكُّوشْ وْأَطْرِشْ وْيِتْكَلِّمْ بِالسِّيفْ وِتْشَحّْتُوهْ بَاشْ يْحُطْ عْلِيهْ يْدِيهْ. 33وَلَّى هَزُّو وَحْدُو بْعِيدْ عْلَى النَّاسْ وْحَطْ صْوَابْعُو لِثْنِينْ فِي وِذْنِيهْ وِدْفِلْ فِي يِدُّو وْمَسّْلُو لْسَانُو. 34وْهَزْ عِينِيهْ لِلسْمَاء وِتْنَهِّدْ وْقَالُّو: «إِفَّتَا!» مَعْنَاهَا إِتْحَلْ 35وْبِالوَقْتْ تْحَلِّتْ وِذْنِيهْ وِلْسَانُو تِطْلَقْ وِبْدَا يْقُولْ فِي كْلاَمْ وَاضِحْ.

36وْوَصَّى النَّاسْ بَاشْ مَا يْقُولُوشْ لْحَتَّى حَدْ. آمَا كُلْ مَا يْوَصِّيهُمْ أَكْثِرْ كُلْ مَا يُنْشْرُوا الخْبَرْ أَكْثِرْ. 37وْكَانُوا مِتْعَجّْبِينْ بَرْشَة وْقَالُوا: «الحَاجَاتْ الِّي يَعْمِلْ فِيهَا الكُلْهَا بَاهْيَة، يْرُدْ الطُّرْشْ يِسْمْعُوا وِالبْكَاكِشْ يِتْكَلّْمُوا.»

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index