Search form

مَرْقُسْ 9

1وْقَالِلْهُمْ يَسُوعْ: «نْقُلْكُمْ الحَقْ: ثَمَّة شْكُونْ مِنْ الوَاقْفِينْ هْنَا مَا هُمْشْ بَاشْ يْشُوفُوا المُوتْ إِلاَّ بَعْدْ مَا يْشُوفُوا مَمْلِكْةْ اللهْ جَايَة بْقُوَّة.»

يَسُوعْ يْظَهِّرْ مَجْدُو

(مَتَّى ‏17‏:‏1‏-13؛ لُوقَا ‏9‏:‏28‏-36)

2وْبَعْدْ سِتَّة أَيَّامْ هَزْ يَسُوعْ بُطْرُسْ وْيَعْقُوبْ وْيُوحَنَّا وْطَلْعُوا وَحَّدْهُمْ لِجْبَلْ عَالِي وِتْبَدِّلْ قُدَّامْهُمْ. 3وْوَلَّى دَبْشُو يِلْمَعْ أَبْيِضْ مِالثِّلْجْ مَا يْنَجِّمْشْ حَتَّى صَبَّاغْ فِي الدِّنْيَا يَصْبِغْ لِبْسَة بِالأَبْيِضْ كِيفُو. 4وْظَهْرُولْهُمْ إِيلِيَّا وْمُوسَى وْكَانُوا يْكَلّْمُوا فِي يَسُوعْ. 5وْقَالْ بُطْرُسْ لْيَسُوعْ: «يَا مُعَلِّمْ، رَاهُو بَاهِي الِّي أَحْنَا مُوجُودِينْ هْنَا! خَلِّينَا نُنْصْبُوا ثْلاَثَة خْيَامْ. وَحْدَة لِيكْ وْوَحْدَة لْمُوسَى وْوَحْدَة لْإِيلِيَّا!» 6وْبُطْرُسْ مَا كَانِشْ دَارِي عْلَى رُوحُو آشْ قَاعِدْ يْقُولْ عْلَى خَاطِرْهُمْ كَانُوا خَايْفِينْ بَرْشَة. 7وْجَاتْ سْحَابَة وْغَطَّاتْهُمْ وِخْرَجْ صُوتْ مِالسْحَابَة: «هَاذَا هُوَ ابْنِي الِّي نْحِبُّو. اسْمْعُولُو!» 8وْخَزْرُوا التْلاَمْذَة بِحْذَاهُمْ وْمَا شَافُوا كَانْ يَسُوعْ وَحْدُو مْعَاهُمْ.

9وْوَقْتِلِّي هُومَا هَابْطِينْ مِالجْبَلْ، وَصَّاهُمْ يَسُوعْ بَاشْ مَا يْخَبّْرُوا حَتَّى حَدْ بِالشَّيْء الِّي شَافُوهْ حَتَّى لِينْ إِبْنْ الإِنْسَانْ الِّي هُوَ يَسُوعْ يْقُومْ مِنْ بِينْ المُوتَى. 10عَمْلُوا التْلاَمْذَة بِالشَّيْء الِّي قَالْهُولْهُمْ آمَا بْقَاوْ يِتْنَاقْشُوا مَا بِينَاتْ بْعَضْهُمْ: «آشْ مَعْنَاهَا: يْقُومْ مِنْ بِينْ المُوتَى؟» 11وْكَانُوا يِسْأْلُوا فِيهْ وِيْقُولُوا: «عْلاَشْ الكُتَّابْ مْتَاعْ اليْهُودْ يْقُولُوا الِّي إِيلِيَّا لاَزِمْ يْجِي فِي الأُوِّلْ؟» 12جَاوِبْهُمْ: «بِالحَقْ إِيلِيَّا يْجِي فِي الأُوِّلْ وِيْصَلِّحْ كُلْ شَيْء. إِمَّالاَ عْلاَشْ جَا فِي الكْتَابْ المُقَدَّسْ الِّي آنَا إِبْنْ الإِنْسَانْ لاَزِمْنِي نِتْألِّمْ وْنِتْهَانْ بَرْشَة. 13وْآنَا نْقُلْكُمْ: رَاهُو إِيلِيَّا جَا وْعَمْلُوا فِيهْ الِّي حَبُّوا، كِيفْ مَا حْكَى عْلِيهْ الكْتَابْ المُقَدَّسْ!»

يَسُوعْ يِشْفِي وْلِدْ سَاكْنُو شِيطَانْ

(مَتَّى ‏17‏:‏14‏-21؛ لُوقَا ‏9‏:‏37‏-43)

14وْوَقْتِلِّي وُصْلُوا لِلتْلاَمْذَة الأُخْرِينْ شَافُوا بَرْشَة نَاسْ دَايْرِينْ بِيهُمْ وِالكُتَّابْ مْتَاعْ اليْهُودْ يْنَاقْشُوا فِيهُمْ. 15وْدُوبْ مَا النَّاسْ شَافُوا يَسُوعْ تْعَجّْبُوا وِمْشَاوْلُو يِجْرِيوْ بَاشْ يْسَلْمُوا عْلِيهْ. 16سْإِلْهُمْ: «عْلاَشْ تْنَاقْشُوا فِيهُمْ؟» 17جَاوْبُو وَاحِدْ مِنْهُمْ: «يَا مُعَلِّمْ جِبْتْلِكْ وِلْدِي، رَاهُو سَاكْنُو رُوحْ وْرَدُّو بَكُّوشْ. 18كُلْ مَا يْشِدُّو يَصْرْعُو وِيْخَرِّجْ الكْشَاكِشْ مِنْ فُمُّو وِيْعَظْ عْلَى سِنِّيهْ وْيِيبِسْ وِطْلَبْتْ مِنْ تْلاَمِذْتِكْ بَاشْ يْخَرّْجُوهْ، آمَا هُومَا مَا نَجّْمُوشْ.» 19جَاوِبْهُمْ وْقَالْ: «يَا جِيلْ يَلِّي مَا عِنْدْكُمْشْ إِيمَانْ! لْوَقْتَاشْ بَاشْ نَبْقَى مْعَاكُمْ؟ لْوَقْتَاشْ بَاشْ نِتْحَمِّلْكُمْ؟ جِيبُوهُولِي!» 20جَابُوهْ لْيَسُوعْ وْدُوبْ مَا الرُّوحْ شَافُو صْرَعْ الوْلَدْ وْطَاحْ عْلَى الأَرْضْ يِتْمَرِّغْ وْخَرِّجْ الكْشَاكِشْ مِنْ فُمُّو. 21وِسْإِلْ يَسُوعْ بُو الوْلِدْ: «مِنْ وَقْتَاشْ بْدَا يَجْرَالُو الشَّيْء هَاذَا؟» قَالْ: «مِلِّي هُوَ صْغِيرْ 22وْبَرْشَة مَرَّاتْ طَيّْحُو فِي النَّارْ وْفِي المَاء بَاشْ يُقْتْلُو. آمَا إِذَا كَانِكْ تِقْدِرْ تَعْمِلْ حَاجَة، حِنْ عْلِينَا وْعَاوِنَّا!» 23قَالُّو يَسُوعْ: «قُتْلِي إِذَا كَانِكْ تِقْدِرْ! رَاهُو كُلْ شَيْء مُمْكِنْ عِنْدْ الِّي يِمِّنْ!» 24وْبِالوَقْتْ صَاحْ بُو الوْلِدْ: «آنَا نِمِّنْ! وْإِنْتِ عَاوِنِّي رَانِي إِيمَانِي ضْعِيفْ!» 25وْوَقْتِلِّي شَافْ يَسُوعْ الِّي النَّاسْ الكُلْهُمْ جَاوْ يِجْرِيوْ مْعَ بْعَضْهُمْ أْمَرْ الرُّوحْ المَنْزُوسْ وْقَلُّو: «يَا رُوحْ يَا بَكُّوشْ وْيَا أَطْرِشْ آنَا نُأْمْرِكْ، اخْرُجْ مِنُّو وْمَا تَرْجِعْلُوشْ بِالكُلْ!» 26صَاحْ الرُّوحْ وِصْرَعْ الوْلَدْ بْقُوَّة وِخْرَجْ وْوَلَّى الوْلَدْ كَإِنُّو مِيتْ حَتَّى لِينْ بَرْشَة نَاسْ قَالُوا: «رَاهُو مَاتْ.» 27آمَا يَسُوعْ شَدُّو مِنْ يِدُّو وْقَوّْمُو، يَاخِي قَامْ.

28وْبَعْدْ مَا دْخَلْ يَسُوعْ لِلبِيتْ، سِأْلُوهْ تْلاَمِذْتُو عْلَى جْنَبْ: «عْلاَشْ أَحْنَا مَا نَجِّمْنَاشْ نْخَرّْجُوهْ؟» 29جَاوِبْهُمْ: «النَّوْعْ هَاذَا مَا يِطَّرِّدْ كَانْ بِالصَّلاَةْ.»

يَسُوعْ يَحْكِي مَرَّة أُخْرَى عْلَى مُوتُو وِقْيَامْتُو

(مَتَّى ‏17‏:‏22‏-23؛ لُوقَا ‏9‏:‏43‏-45)

30وِمْبَاعِدْ مْشَى يَسُوعْ وِتْلاَمِذْتُو مِنْ ثَمَّة وِتْعَدَّاوْ عْلَى مَنْطِقْةْ الجَلِيلْ وْمَا حَبِّشْ حَتَّى وَاحِدْ يَعْرِفْ البْلاَصَة الِّي هُوَ مُوجُودْ فِيهَا. 31عْلَى خَاطْرُو كَانْ يْعَلِّمْ فِي تْلاَمِذْتُو وِيْقُولِلْهُمْ: «آنَا إِبْنْ الإِنْسَانْ بَاشْ يْسَلّْمُونِي لِيْدِينْ النَّاسْ وْبِشْ يُقْتْلُونِي وْبِشْ نْقُومْ فِي النْهَارْ الثَّالِثْ.» 32آمَا هُومَا مَا فَهْمُوشْ كْلاَمُو وْخَافُوا بَاشْ يِسْأْلُوهْ.

شْكُونُو هُوَ الأَعْظَمْ

(مَتَّى ‏18‏:‏1‏-5؛ لُوقَا ‏9‏:‏46‏-48)

33وِمْبَاعِدْ جَا يَسُوعْ لْكَفْرْنَاحُومْ. وْوَقْتِلِّي هُوَ فِي الدَّارْ سْإِلْ تْلاَمِذْتُو: «فَاشْ كُنْتُوا تِتْنَاقْشُوا فِي الطْرِيقْ؟» 34بْقَاوْ سَاكْتِينْ عْلَى خَاطِرْهُمْ كَانُوا يِتْنَاقْشُوا فِي شْكُونْ هُوَ أَعْظِمْ وَاحِدْ فِيهُمْ. 35قْعَدْ وْنَادَى الأَثْنَاشِنْ تِلْمِيذْ وْقَالِلْهُمْ: «إِذَا وَاحِدْ يْحِبْ يْكُونْ الأُوِّلْ يِلْزْمُو يْحُطْ رُوحُو آخِرْ النَّاسْ وْيِخْدِمْهُمْ!» 36وْجَابْ وْلِدْ صْغِيرْ وْوَقّْفُو فِي وُسْطْهُمْ وْهَزُّو مَا بِينْ يْدِيهْ وْقَالِلْهُمْ: 37«الِّي يِقْبِلْ بْإِسْمِي وَاحِدْ مِنْ الوْلاَدْ الصْغَارْ هَاذُومَا رَاهُو يِقْبِلْنِي وِلِّي يِقْبِلْنِي رَاهُو مَا يِقْبِلْنِيشْ آنَا بَرْكْ آمَا زَادَا يِقْبِلْ الِّي بْعَثْنِي.»

الِّي مُوشْ ضِدّْنَا رَاهُو مْعَانَا

(لُوقَا ‏9‏:‏49‏-50)

38قَالْ يُوحَنَّا لْيَسُوعْ: «يَا مُعَلِّمْ، شُفْنَا وَاحِدْ يْخَرِّجْ فِي الشْوَاطِنْ بْإِسْمِكْ وَلِّينَا حُزْنَاهْ عْلَى خَاطْرُو مُوشْ يْتَبَّعْ فِينَا.»

39آمَا يَسُوعْ قَالْ: «مَا تْحُوزُوهِشْ! رَاهُو مَا ثَمَّاشْ حَتَّى وَاحِدْ يَعْمِلْ مُعْجْزَة بْإِسْمِي وِمْبَاعِدْ شْوَيَّة يْنَجِّمْ يِتْكَلِّمْ عْلِيَّ بِالخَايِبْ. 40الِّي مُوشْ ضِدّْنَا رَاهُو مْعَانَا. 41الِّي يَعْطِيكُمْ كَاسْ مَاء بْإِسْمِي عْلَى خَاطِرْكُمْ تَابْعِينْ لِلمَسِيحْ. نْقُولِلْكُمْ الحَقْ، رَاهُو أَجْرُو مَا يْضِيعِشْ.»

يَا وِيلْهُمْ الِّي يْعَثّْرُوا غِيرْهُمْ

(مَتَّى ‏18‏:‏6‏-9؛ لُوقَا ‏17‏:‏1‏-2)

42«الِّي يْكُونْ سْبَبْ عَثْرَة لْوَاحِدْ مِالصْغَارْ هَاذُومَا الِّي يِمّْنُوا بِيَّ خِيرْلُو كَانْ تِتْعَلِّقْ حَجْرَة كْبِيرَة مْتَاعْ رْحَى فِي رَقْبْتُو وْيِتْرْمَى فِي قَلْبْ البْحَرْ. 43وْإِذَا كَانْ يِدِّكْ تْخَلِّيكْ تَعْمِلْ الذْنُوبْ قُصّْهَا، رَاهُو كِتُدْخُلْ لِلحَيَاةْ الأَبَدِيَّة وْيِدِّكْ مَقْصُوصَة خِيرْلِكْ مِلِّي تُدْخُلْ لِجْهَنِّمْ وِيْدِيكْ الإِثْنِينْ كَامْلِينْ. 44+ 45وْإِذَا كَانْ سَاقِكْ تْخَلِّيكْ تَعْمِلْ الذْنُوبْ قُصّْهَا، رَاهُو كِتُدْخُلْ لِلحَيَاةْ الأَبَدِيَّة وْسَاقِكْ مَقْصُوصَة خِيرْلِكْ مِلِّي تِتْرْمَى فِي جْهَنِّمْ وْسَاقِيكْ كَامْلِينْ، 46+ 47وْإِذَا كَانْ عِينِكْ تْخَلِّيكْ تَعْمِلْ الذْنُوبْ قَلِّعْهَا، رَاهُو كِتُدْخُلْ لْمَمْلِكْةْ اللهْ بْعِينْ وَحْدَة، خِيرْلِكْ مِلِّي تِتْرْمَى فِي جْهَنِّمْ بْعِينِيكْ لِثْنِينْ. 48وِينْ دُودْهُمْ مَا يْمُوتْشْ وْنَارْهُمْ مَا تَطْفَاشْ. 49وِينْ كُلْ وَاحِدْ بَاشْ يِتْحَاسِبْ عْلَى ذْنُوبُو وْبِشْ تَهْبِطْ عْلِيهْ النَّارْ كِيفْ مَا المِلْحْ يِتْذَرْ فِي المَاكْلَة. 50المِلْحْ بَاهِي. آمَا إِذَا كَانْ المِلْحْ مَا عَادِشْ عَنْدُو مَطْعِمْ، كِيفَاشْ بَاشْ تْرَجّْعُولُو مَطْعْمُو؟ خَلِّي يْكُونْ عِنْدْكُمْ مِلْحْ فِي نْفُوسْكُمْ وْعِيشُوا فِي سَلاَمْ مْعَ بْعَضْكُمْ.»

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index