Search form

الرُّؤْيَا 9

1نَادَى المَلاَكْ الخَامِسْ بِالبُوقْ مْتَاعُو، وْشُفْتْ نِجْمَة طَايْحَة مِالسْمَاءْ لِلأَرْضْ وْتِعْطَالْهَا المِفْتَاحْ مْتَاعْ حُفْرِةْ الهَاوْيَة. 2- تْحَلِّتْ الحُفْرَة مْتَاعْ الهَاوْيَة، وِطْلَعْ مِنْهَا دُخَّانْ كِيفْ دُخَّانْ مْتَاعْ حْرِيقَة كْبِيرَة، وِالسْمَاءْ وِالجَّوْ ظْلاَمُوا مِالدُّخَّانْ مْتَاعْ الحُفْرَة. 3- وِخْرَجْ مِالدُّخَّانْ جْرَادْ وْغَطَّى الأَرْضْ، وْتِعْطَاتْلُو سُلْطَة كِيفْ سُلْطِةْ عْقَارِبْ الأَرْضْ، 4- وِتْقَالُّو إِنُّو مَا يْضُرِّشْ الحْشِيشْ مْتَاعْ الأَرْضْ وِلاَّ أَيْ حَاجَة خَضْرَاء وِلاَّ شَجْرَة، آمَا يْضُرْ النَّاسْ الِّي مَا عِنْدْهُمْشْ الخَاتِمْ مْتَاعْ اللهْ عْلَى جْبِينْهُمْ. 5وْقَالُولُو إِنُّو مَا يُقْتُلْهُمْشْ، آمَا يْعَذِّبْهُمْ خَمْسَة شْهُرْ عْذَابْ كِيفْ قَرْصَانْ العْقَارِبْ. 6- وْفِي النْهَارَاتْ هَاذُوكُمْ النَّاسْ بَاشْ يُطْلْبُوا المُوتْ، وْمَا هُمْشْ بَاشْ يَلْقَاوْهَا مَهْمَا عَمْلُوا، وْبِشْ يِشْتْهَاوْ بَاشْ يْمُوتُوا وِالمُوتْ بَاشْ تُهْرُبْ مِنْهُمْ. 7- وِالجْرَادْ يُظْهُرْ كَإِنُّو حْصُنَّة حَاضْرَة بَاشْ تْحَارِبْ، فُوقْ رُوسْهُمْ حَاجَة تِشْبِهْ لْتِيجَانْ ذْهَبْ وِوْجُوهْهُمْ كِيفْ وْجُوهْ البَشَرْ، 8- عِنْدْهُمْ شْعَرْ كِشْعَرْ النْسَاء وْسِنِّيهُمْ كِسِنِّينْ الصْيُودَا، 9- وِالدْرُوعْ الِّي عْلَى سْدُورَاتْهُمْ كِيفْ دْرُوعْ الحْدِيدْ، وِالحِسْ مْتَاعْ جْنَاوِحْهُمْ كِيفْ حِسْ بَرْشَة كْوَالِيسْ وِحْصُنَّة مَاشِينْ لِلحَرْبْ، 10وْعَنْدْهُمْ ذْيَالْ كِيفْ أَذْيَالْ العْقَارِبْ، وْعَنْدْهُمْ شُوكْ فِي آخِرْ ذْيَالْهُمْ، وْعَنْدْهُمْ سُلْطَة بَاشْ يْضُرُّوا النَّاسْ لْمُدِّةْ خَمْسَة شْهُرْ، 11وْعَنْدْهُمْ مَلِكْ هُوَ مَلاَكْ الهَاوْيَة وْإِسْمُو بِالعِبْرِيَّة أَبَدُّونْ وْبِاليُونَانِي أَبُولِّيُونْ.

12مْشَى الوِيلْ الأُوِّلْ وِيْجِيوْ وِيلِينْ أُخْرِينْ بَعْدُو.

13- وْنَادَى المَلاَكْ السَّادِسْ بِالبُوقْ مْتَاعُو، وِسْمَعْتْ صُوتْ خَارِجْ مِالأَرْبْعَة قْرُونْ مْتَاعْ مَذْبَحْ الذْهَبْ الِّي قُدَّامْ اللهْ. 14وْقَالْ لِلمَلاَكْ السَّادِسْ الِّي عَنْدُو البُوقْ: «سَيِّبْ الأَرْبْعَة مْلاَيْكَة الِّي مَرْبُوطِينْ فِي نَهْرْ الفُرَاتْ!» 15وِتْسَيّْبُوا المْلاَيْكَة الأَرْبْعَة الِّي كَانُوا مْحَضّْرِينْ رْوَاحْهُمْ لِلسَّاعَة وِاليُومْ وِالشْهَرْ وِالعَامْ بَاشْ يُقْتْلُوا ثْلُثْ البَشَرْ. 16وِسْمَعْتْ الِّي عْدَدْ الخَيَّالَة كَانْ مِيتِينْ مَلْيُونْ. 17وْهَكَّا شُفْتْ الحْصُنَّة فِي الرُّؤْيَا، وِالخَيَّالَة مْتَاعْهُمْ الِّي كَانِتْ عِنْدْهُمْ دْرُوعْ عْلَى سْدُورَاتْهُمْ لُونْهَا كِيفْ لُونْ النَّارْ وِاليَاقُوتْ الأَزْرِقْ وِالكِبْرِيتْ وِالحْصُنَّة رْيُوسْهَا كِيفْ رْيُوسْ الصْيُودَا وْخَارْجَة مِنْ فُمّْهَا النَّارْ وِالدُّخَّانْ وِالكِبْرِيتْ 18وِثْلُثْ النَّاسْ قَتْلُوهُمْ المْصَايِبْ الثْلاَثَة هَاذُومَا، بِالنَّارْ وِالدُّخَّانْ وِالكِبْرِيتْ الِّي يُخْرُجْ مِنْ افَّامْ الحْصُنَّة. 19وِالقُوَّة مْتَاعْ الحْصُنَّة فِي افَّامْهُمْ وْفِي ذْيَالْهُمْ. وِذْيَالْهُمْ كِيفْ الحْنَاشْ وْعَنْدْهُمْ رُوسْ يْضُرُّوا بِيهُمْ.

20- وِبْقِيِّةْ البَشَرْ الِّي مَا قَتْلُوهُمْشْ المْصَايِبْ هَاذُومَا، مَا تَابُوشْ مِنْ عْمَايِلْ يْدِيهُمْ وْلاَ بَطّْلُوا مَا عَادِشْ يِعْبْدُوا الشْوَاطِنْ وِصْنَبْ الذْهَبْ وِالفِضَّة وِالنْحَاسْ وِالحْجَرْ وِاللُّوحْ الِّي هِيَ لاَ تْنَجِّمْ تْشُوفْ وِلاَّ تِسْمَعْ وِلاَّ تِمْشِي، 21وْلاَ تَابُوا لاَ عْلَى القَتْلْ وْلاَ عْلَى السِّحْرْ وْلاَ الزْنَى وْلاَ السِّرْقَة.

العربية التونسية

Scripture text © 2011 SIL-WMG / United Bible Societies, UK

© 2011 United Bible Societies, UK

More Info | Version Index