Search form

1 Gaolliqthu 11

1Ngal Khali bhai saol oil-a nail khe-ai, nuljuq iqsanl ngaq bhai saol oil yaoq.

Uqhuq thaoq-u phao, uqjeeq jeeq heeq phaq-ail tsaq nail ganl

2Nuljuq ngaq bhai khaq mao iqsanl noeq kev khi, ngaq-i mail cavq bhiq cov bhiq-ail ceevq-a nail daoq juq iqsanl bhai tsaothe nail ngel-i mail, ngal nuljuq bhai tsiqeeq naol.

3Thailhai ngaol-aoq, ngal nuljuq bhai niailhai bhi heeq kivq movq-ail nial. Yaqyov-aq nail uqhuq neq, Khali ngaol. Yaqmai-aq nail uqhuq neq, yaqyov-aq ngaol. Khali nail uqhuq neq, Miqyail ngaol. 4Yaqyov-aq teevq gaq, geeqlaoq hal-u phao maqkhaiq, Miqyail nail daoq gedan-u phao maqkhaiq, uqjeeq jeeq haq neq, yovqgavq nail uqhuq pevq nail Khali bhai khal nl movq-ail nl nail ngaol. 5Thailhai ngaol-aoq, yaqmai-aq teevq gaq, geeqlaoq hal-u phao maqkhaiq, Miqyail nail daoq gedan-u phao maqkhaiq, uqjeeq maq jeeq haq neq, yovqgavq nail uqhuq pevq nail aivq nail yovjil bhai khal nl movq-ail nl nail ngaol. Aivq uqjeeq maq jeeq haq neq, aivq uqhuq tsailkheel he ha-ai thaq nail khe-ai, dul nail ngaol. 6Yaqmai-aq uqjeeq maq jeeq haq neq, uqhuq tsailkheel thaiq nail tsaq nail ngaol. Thailhai ngaol-aoq, uqhuq tsailkheel thaiq nail maqkhaiq, uqhuq tsailkheel he ha nail maqkhaiq, yaqmai-aq nail haqbhoil haqsil nail phaq pevq haq neq, uqjeeq jeeq dei-eiq. 7Yaqyov-aq neq, Miqyail khe-ai dul nail phaq aol khi, Miqyail nail seiqleiq khaoqsail bhaq dov duq pevq nail ngel-i mail, uqjeeq jeeq nail maq tsaq-ail. Yaqmai-aq neq, yaqyov-aq nail seiqleiq khaoqsail bhaq dov duq pevq nail ngaol. 8Khul khi mail dai ngal-aq neq, Miqyail tsaol-aq bhai teivq-u phao, yaqmai-aq nee mail yaqyov-aq bhai teivq-ai thaq nail maq ngel-ail. Yaqyov-aq nee mail yaqmai-aq bhai teivq-ai thaq nail ngaol. 9Al ovqtavq, yaqmai-aq nail haqbhoil yaqyov-aq bhai teivq-ai thaq nail maq ngel-ail. Yaqyov-aq nail haqbhoil yaqmai-aq bhai teivq-ai thaq nail ngaol. 10Alheel ngel-i mail, nqtavq gaqkhoel bhai saol-nvq khi, yaqmai-aq juq uqjeeq jeeq nail tsaq nail ngaol.

11Thailhai ngaol-aoq, Yeiqsul nail lavqkhoel-ai yaqmai-aq yaqyov-aq bhai loq nail khe-ai, yaqyov-aq iqsanl yaqmai-aq bhai loq nail ngaol. 12Yaqmai-aq neq, yaqyov-aq nee mail pevq dov lal-a nail khe-ai, yaqyov-aq iqsanl yaqmai-aq nee mail doevq lee-a nail ngaol. Thailhai ngaol-aoq, yaoq phaq yaoq-ao nee Miqyail nail lavqkhoel nee pevq dov lal-a nail ngaol. 13Yaqmai-aq uqjeeq maq jeeq dai, Miqyail bhai geeqlaoq hal heeq phaq-ail tsaq nail, maq tsaq nail, nuljuq nail gaiqlaq bhai nuljuq saol-nvq dai yaoq. 14Yaqyov-aq juq tsailkheel heelma neq, aivq nail haqbhoil haqsil nail phaq pevq nail ngaol dai, aqsivq haqjoil phao nuljuq heeq kivq nail maq ngel-ail laiq. 15Yaqmai-aq tsailkheel heelma neq, aivq nail khaoqsail pevq nail ngaol. Khul khi mail dai ngal-aq neq, aivq nail tsailkheel neq, aivq bhai bhi covq pheeq-ai thaq nail ngaol. 16Tsaol-aq teevq gaq ganav jil pheeljaq movq haq neq, nvjuq iqsanl, Miqyail nail Khali yaq munl juq iqsanl aol yaoq phaq yaoq maq jiav-ail dai, heeq kivq thaq-ai yaoq.

Yeiqsul bhai noeq kev khi jaq nail bhaoqaiq nail ganl

17Aqivq jaqbheq juq-ol, pul-nvq phao cavq bhi cov bhiq-ai thaq nail ganl bhai tavq lai khi, ngal nuljuq bhai maq tsiqeeq-ail. Khul khi mail dai ngal-aq neq, nuljuq teevq dao bhai jil lai khi uqhuq thaoq nail al neq, aqmeeq phaq nee maqtsil aqdoil phaq bhi dov lal jaiq nail ngaol. 18Iqmoeq teevq phaq neq, nuljuq Khali yaq munl jil lai-u phao, munl bhoilpav nail ngaol dai, ngal ya gaiq-a nail ngaol. Ngaq-i mail ya gaiq-a nail khe-ai, tsaq nail ngaol dai, ngal heeq kivq nail ngaol. 19Khul khi mail dai ngal-aq neq, nuljuq nail lavqkhoel tsaol-aq aqmeeq juq dov lal nia dai, munl bhoilpav nail phaq ya jiav nail ngaol. 20Thailhai ngaol-aoq, nuljuq jil lai-u phao, Yeiqsul bhai noeq kev khi jaq nail bhaoqaiq lav sav nail khi jil lai nail, maq ngel-il. 21Khul khi mail dai ngal-aq neq, nuljuq alhai jaq-u phao, yaoq gaq yaoq-ao nee yovqgavq-i mail oil lavq-a nail phaq bhai jaq thailthaiq nail ngaol. Alheel ngel-i mail, teevq pav ganav juq neq, maq ya jaq bov-ail, teevq pav gaq nav juq neq, al jaiq jaq jel khi jaq bov daol bov nail ngaol. 22Nuljuq nail ilkhaol bhai jaq duq daol duq maq jiav nail laiq. Maq ngel haq neq, nuljuq Miqyail nail Khali yaq munl bhai khal nl movq-ail nl khi, haq nail aoq nail juq bhai bhi haqsil nail dai khi, nl movq nail laiq. Ngal nuljuq bhai khalhai ge bhi heeq. Nuljuq alhai nl-a nail ngel-i mail, ngal nuljuq bhai tsiqeeq kivq nail laiq. Maq tsiqeeq kivq-ail.

23-24Ngaq-i mail nuljuq bhai cavq bhiq nail juq, Yeiqsul-i mail ngaq bhai bivq lavq-a nail ngaol. Heeqphaq Yeiqsul neq, yu aivq bhai gaoq jaq-u nqkiv, khaqmul oil khi, Miqyail bhai tsiqeeq-a nail ngaol. A bhai nee ngal-aq, khaqmul ngaoqpav khi ge nail: “Niil neq, nuljuq nail haqbhoil ngaq nail aqmaol ngaol. Ngaq bhai ya noeq kev dai, niailhai nl yaoq” dai, ge bhiq-a nail ngaol. 25Aqyu juq aoq kivq jaq gaq-u phao, alhai dul dai, aivq aqheeq tsilju nail ullul deq nail khaoqanq tsiq khi ge nail: “Khaoqanq niil neq, ngaq nail aqsivq lavqkhoel-ai daoqma saljial aqsivq ngaol. Nuljuq yaoq pov yaoq-ao nee daol-u phao, ngaq bhai noeq kev yaoq” dai, ge bhiq-a nail ngaol. 26Khul khi mail dai ngal-aq neq, nuljuq khaqmul niil jaq khi, aqheeq tsilju nail ullul niil daol-u phao, yaoq pov yaoq-ao nee, Yeiqsul yavq kha lee-u phao kev dai, aivq sil-a nail al, nuljuq salkhil khanqdaiq bhiq nail phaq pevq nail ngaol.

Maq geel-nvq nail bhai Yeiqsul bhai noeq kev khi jaq nail ganl

27Alheel ngel-i mail, tsaol-aq khul gaq maqkhaiq, maq geel-nvq nail bhai khaqmul jaq khi Yeiqsul nail khaoqanq bhai daol haq neq, Yeiqsul nail aqmaol khi aivq nail aqsivq bhai nl bheeq-a nail ngaol. 28Tsaol-aq yaoq gaq yaoq-ao nee, yovqgavq bhai yovqgavq iqmoeq saol-nvq daiq khi pultavq, khaqmul jaq khi khaoqanq tsiq daol nail neq, tsaq nail ngaol. 29Khul khi mail dai ngal-aq neq, “Niil neq, Yeiqsul nail aqmaol ngaol” dai, maq noeq kev mail khaqmul jaq khi khaoqanq tsiq daol haq neq, alhai jaq daol-a nail bhaqda nee, yovqgavq nail kovtavq bhai yalkhaq dal nail phaq kev lee dai, nl nail khe-ai, dul nail ngaol. 30Alheel ngel-i mail, gaq bhaq nail juq khi mail nal nail juq nuljuq nail lavqkhoel bhai maodai gaq jaol nail ngaol. Sil-a nail juq iqsanl, teevq pav ganav juq jaol nail ngaol. 31Ngadao yovqgavq bhai yovqgavq iqmoeq tsao tseldaiq gaq haq neq, Miqyail-i mail yalkhaq dal nail phaq bhai maq ya daq-ail. 32Haoqnao naosaq n-gaol, Heeqphaq Miqyail ngadao bhai yalkhaq dal-u phao, miltsaq yaq nee mail teevq gaq khe-ai dal lavq nail bhai maq ya daq dai, niil aq-il aivq ngadao bhai cavq lavq cov lavq khi deeq lavq thailthaiq nail ngaol.

33Alheel ngel-i mail, ngaq nail aqivq jaqbheq juq-ol, nuljuq Yeiqsul bhai noeq kev khi jaq nail daol nail haqbhoil jil lai-u phao, teevq gaq khe-ai daonq jil daonq ja yaoq. 34Tsaol-aq teevq pav ganav juq aoq moevq haq neq, aivq nail ilkhaol bhai jaq nail tsaq nail ngaol. Maq ngel haq neq, nuljuq-i mail jil lai nail al, nuljuq nail kovtavq bhai yalkhaq bhi dal nail dai khi, jil lai nail phaq pevq nail ngaol. Ganl yaoq juq yaoq neq, ngal nuljuq jaol nail bha lal-u phao, aqmeeq-ai ge bhiq naol dei-eiq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index