Search form

1 Gaolliqthu 12

Aqhaqlal Miqyail-i mail bivq lavq-a nail kovpavq juq nail ganl

1Aqivq jaqbheq juq-ol, Meeqnail Haolnail Aqhaqlal-i mail bivq lavq-a nail kovpavq juq nail ganl nuljuq heeq nia lal dai, ngal oil movq-ail nial. 2Nuljuq laolkivq yaq pevq-u phao, yu nuljuq bhai hel-aivq nail khe-ai, nuljuq tsaothe khi, daoq maq ge nia nail thaoqphaoq aqma maolkhoel bhai uqhuq thaoq-a nail ngaol. 3Alheel ngel-i mail, ngal nuljuq bhai niailhai bhi heeq kivq movq-ail nial. Tsaol-aq teevq gaq-ail, Miqyail nail Aqhaqlal bhai juq juq-ail, Yeiqsul bhai iqkhail maq yavq-ail. Al ovqtavq, Meeqnail Haolnail Aqhaqlal bhai maq juq haq neq, “Yeiqsul neq, Heeqphaq ngaol” dai, tsaol-aq teevq gaq-ail maq ge nia-ail.

4Kovpavq maodai phaq jiav khi ngaol-aoq, Aqhaqlal Miqyail teevq gaq teevq-eel ngaol. 5Miqyail nail ganl maodai phaq jiav khi ngaol-aoq, Heeqphaq teevq gaq teevq-eel ngaol. 6Nl dol lavq nail ganl maodai phaq jiav khi ngaol-aoq, tsaol-aq yaoq gaq yaoq-ao nee nail lavqkhoel-ai yaoq phaq yaoq-ao nee bhi nl dol lavq nail gaq, Miqyail teevq gaq teevq-eel ngaol.

7Yu nail haqbhoil ganl tsoiq dai, Aqhaqlal Miqyail aivq nail tsaol-aq iqsanl bhai, teevq gaq bhai teevq phaq bhaqlaoq kheq dai, bivq-a nail ngaol. 8Aqhaqlal Miqyail neq, teevq gaq bhai neenoeq neekha aol nail daoq ge nia thail nia dai, bivq-a nail ngaol. Aqhaqlal Miqyail al, teevq gaq bhai maodai phaq heeq nia khi al juq bhai ge nia thail nia nail phaq bivq-a nail ngaol. 9Aqhaqlal Miqyail al, teevq gaq bhai neema thaqtsaol nail phaq ivq dai, bivq-a nail ngaol. Aqhaqlal Miqyail al, teevq gaq bhai nal nail goel nail tsaol-aq bhai lav meeq nia nail kovpavq bivq-a nail ngaol. 10Teevq pav ganav juq bhai neq, noeq-u maq dov nail phaq nl nia dai kovpavq bivq-a nail ngaol. Teevq pav ganav juq bhai neq, Miqyail nail haqbhoil gedan nia nail kovpavq bivq-a nail ngaol. Teevq pav ganav juq bhai neq, aqhaqlal juq bhai tsel pav nia nail kovpavq bivq-a nail ngaol. Teevq pav ganav juq bhai neq, daoq mee nia phaq ge nia dai kovpavq bivq-a nail ngaol. Teevq pav ganav juq bhai neq, daoq al juq nail daoqceevq oil dov nia dai kovpavq bivq-a nail ngaol. 11Kovpavq al juq iqsanl mail Aqhaqlal Miqyail teevq gaq nail lavqkhoel nee taivq-ail dov lee khi, aivq neema tsaq nail khe-ai, teevq gaq nee teevq gaq bhai bhi bivq-a nail ngaol.

Aqmaol bhai covq nail alsail nail ganl

12Aqmaol teevq maol teevq-eel ngaol-aoq, alsail maodai covq nail ngaol. Alsail al juq mao khi ngaol-aoq, aqmaol teevq maol taivq-ail pevq nail khe-ai, Khali iqsanl alheel ngaol. 13Khul khi mail dai ngal-aq neq, Yuldav nail tsaol-aq khi Heiqlaqsal nail tsaol-aq maqkhaiq, yaqkav khi jel ail-a nail tsaol-aq maqkhaiq, ngadao iqsanl mail aqmaol teevq maol taivq-ail pevq dai, Aqhaqlal Miqyail teevq gaq teevq-eel nail lavqkhoel ulcuvq saol-a nail ngaol. Ngadao iqsanl nail neema lavqkhoel bhai, Aqhaqlal Miqyail teevq gaq taivq-ail jaol nail ngaol.

14Aqmaol neq, alsail teevq sail teevq-eel maq ngel-ail. Maodai covq nail ngaol. 15“Ngal aqlavq maq ngel nail ngel-i mail, aqmaol bhai maq tavq-ail” dai, aqkhil ge khi ngaol-aoq, alhai ge nail ngel-i mail, aqmaol bhai maq tavq nail maq ngel-ail. 16“Ngal maivneev maq ngel nail ngel-i mail, aqmaol bhai maq tavq-ail” dai, naqkhaol ge khi ngaol-aoq, alhai ge nail ngel-i mail, aqmaol bhai maq tavq nail maq ngel-ail. 17Aqmaol maol lao-ail maivneev teevq-eel nul neq, khalhai khi gaiq nia nail-aiq. Aqmaol maol lao-ail naqkhaol teevq-eel nul neq, khalhai khi huq nil nia nail-aiq. 18Miqyail aivq neema tsaq nail khe-ai, aqmaol nail alsail juq bhai yovqgavq nail covq duq covq yal bhai bhi covq-a nail ngaol. 19Alsail iqsanl mail teevq phaq taivq-ail pevq haq neq, aqmaol khalhai pevq nia nail-aiq. 20Alsail mee nia phaq dai tselpav khi ngaol-aoq, aqmaol teevq maol teevq-eel ngaol.

21“Ngal naoq bhai maq loq-ail” dai, maivneev aqlavq bhai maq ge nia-ail. “Ngal naoq bhai maq loq-ail” dai, uqhuq iqsanl aqkhil bhai maq ge nia-ail. 22Aqnuq ngaol dai, ngadao-i mail saol-nvq-ai thaq nail alsail juq iqsanl aqmaol bhai ya bhi covq nail ngaol. 23Khaoqsail maq jiav-ail dai, ngadao-i mail saol-nvq nail alsail juq bhai yaoq juq yaoq-ao nee maqtsil khaoqsail bhi jiav jaiq lal dai, ngadao lav sav nail ngaol. Yu bhai maq bhi moel khaoq nail alsail juq bhai yu nee maqtsil ya lav tsoiq nail ngaol. 24-25Heldaiq meeq nail alsail juq bhai alhai nl nail maq loq-ail. Miqyail aqmaol bhai bhi covq cavq-u phao, aqmaol khe alsail juq maq peiv maq leiv-ail dai, teevq phaq nee teevq phaq saol-nvq tsaq khi tsaojao-ai nia dai, aivq alsail aqnuq juq bhai khaoqsail bhi jiav jaiq-a nail ngaol. 26Alsail teevq sail ya daq haq neq, alsail iqsanl mail ya tsao daq nail ngaol. Alsail teevq sail khaoqsail ya haq neq, alsail iqsanl mail lavqkhiq tsao tsail nail ngaol.

27Nuljuq neq, Khali nail aqmaol ngaol. Teevq gaq nee teevq gaq aqmaol al nail alsail juq ngaol. 28Miqyail neq, Khali yaq munl lavqkhoel bhai tsaol-aq niil juq bhi jaol-a nail ngaol. Iqmoeq khe juq neq, gaqkhoel juq ngaol. Nvq munl teevq munl neq, Miqyail nail haqbhoil gedan nail juq ngaol. Hail munl teevq munl neq, cavq bhiq cov bhiq nail juq ngaol. Al ovqtavq, noeq-u maq dov nail phaq nl nia nail juq, nal nail goel nail tsaol-aq bhai lav meeq bhiq nia nail juq, yu bhai tsaojao-ai bhiq nail juq, Khali yaq munl bhai heldaiq phail nail aqivq juq khi, daoq mee nia phaq ge nia nail juq, bhi jaol-a nail ngaol. 29Aqyu juq yaoq gaq yaoq-ao nee gaqkhoel maq ngel-ail. Yaoq gaq yaoq-ao nee Miqyail nail haqbhoil gedan nail tsaol-aq maq ngel-ail. Yaoq gaq yaoq-ao nee cavq bhiq cov bhiq nail tsaol-aq maq ngel-ail. Yaoq gaq yaoq-ao nee, noeq-u maq dov nail phaq nl nia nail tsaol-aq maq ngel-ail. 30Yaoq gaq yaoq-ao nee nalgoel lav meeq nia nail maq ngel-ail. Yaoq gaq yaoq-ao nee daoq mee nia phaq ge ge-ail tsiqeeq nia nail maq ngel-ail. Yaoq gaq yaoq-ao nee daoq al juq nail daoqceevq oil dov nia nail maq ngel-ail. 31Nuljuq eeq jaiq meeq jaiq nail kovpavq bhai oil movq deedee yaoq. A bhai nee ngal-aq, iqsanl nee mail maqtsil meeq nail gailkhaol ngal nuljuq bhai cavq naq lavq bhel.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index