Search form

1 Gaolliqthu 13

Goil nail gaiq-a nail ganl

1Ngal neq, tsaol-aq nail daoq juq khi nqtavq gaqkhoel nail daoq juq ge kivq khi ngaol-aoq, goil nail gaiq-a nail phaq maq aol haq neq, bhoeloe deeq nail aqthel khi tsaillail tsiq nail aqthel khe-ai taivq-ail dul nail ngaol. 2Ngal neq, Miqyail nail haqbhoil gedan nail kovpavq ya nail gaq pevq nail maqkhaiq, Miqyail-i mail oil tsail-ai thaq nail iqsanl khi neenoeq neekha iqsanl bhai heeq nia nail maqkhaiq, gaoqjaoq bhai bhi jiiv-ail nia dai, neema thaqtsaol nail neema teevq bhee aol nail maqkhaiq, goil nail gaiq-a nail phaq maq aol haq neq, ngal khul nail ganl maq tsoiq-ail. 3Ngaq nail nlmaoq iqsanl yu bhai bivq gil khi, ngaq nail aqmaol miqjaq bhai bavq poiv khi laol bhiq khi ngaol-aoq, goil nail gaiq-a nail phaq maq aol haq neq, ngaq nail haqbhoil khul nail ganl maq tsoiq-ail.

4Goil nail gaiq-a nail phaq neq, neenoeq heelma ma dai noeq khi, gaoqhaq gaiq-a nia nail ngaol. Goil nail gaiq-a nail phaq neq, yu bhai maivjeel maq jeel-ail. Yovqgavq bhai yovqgavq maq tsiqeeq-ail, eeq movq heel movq nail neema maq aol-ail. 5Goil nail gaiq-a nail phaq neq, khal nl movq-ail maq nl-ail. Yovqgavq nail neekhaol maq halpov-ail. Neema lavqtsail mail maq phail-ail. Yu-i mail nl lavq-a nail oeqbal bhai maq noeq thaq-ail. 6Goil nail gaiq-a nail phaq neq, haqeiv nail phaq bhai lavqkhiq maq tsail-ail. Aqtsaq aqdaol phaq bhai lavqkhiq tsail nail ngaol. 7Goil nail gaiq-a nail phaq neq, iqsanl bhai khanqtsaol khi iqsanl bhai neema thaqtsaol khi, iqsanl bhai noeqthunq khi, iqsanl bhai oltsaol nail ngaol.

8Goil nail gaiq-a nail phaq neq, maq peivq-ail. Thailhai ngaol-aoq, Miqyail nail haqbhoil gedan nail phaq maqkhaiq, daoq mee nia phaq ge nail phaq maqkhaiq, maodai phaq heeq nia nail phaq maqkhaiq, peivq-ail boev-ail nia nail ngaol. 9Niil aq-il, ngadao juq-i mail heeq kivq nail juq neq, maq bhee-ai haq-al. Ngadao Miqyail nail haqbhoil gedan khi ngaol-aoq, maq bhee-ai haq-al. 10Thailhai ngaol-aoq, bhee lovq nail phaq kev lee-u phao, maq bhee lovq nail phaq peivq-ail nail ngaol. 11Ngal yaqnoil-ail jiav-u phao, yaqnoil khe-ai ge nail thail nail nee ovqtavq, yaqnoil nail neema aol khi yaqnoil khe-ai noeq-a nail ngaol. Thailhai ngaol-aoq, ngal yovkav eeq lal-u phao, yaqnoil bhai tavq nail juq khaonq ha-ail ceevq-a nail ngaol. 12Niil aq-il ngadao neq, maq moel haol lal nail phaoqdaiq bhai heldaiq nail khe-ai dul nail ngaol. Aqyanq al kev lee haq neq, ya moel duq nail ngaol. Niil aq-il ngaq-i mail heeq kivq nail niil neq, maq bhee lovq-ai haq-al. Thailhai ngaol-aoq, niil aq-il Miqyail ngaq bhai heeq nia nail khe-ai, aq-u n-gaol kev lee haq neq, ngal teevq bhee teevq lovq ya heeq kivq nail ngaol.

13Niil aq-il neq, neema thaqtsaol nail, noeqthunq nail, goil nail gaiq-a nail, niil hail phaq ivq nail ngaol. Thailhai ngaol-aoq, niil hail phaq nail lavqkhoel, eeq jaiq nail phaq neq, goil nail gaiq-a nail phaq ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index