Search form

1 Bheiqtuvluv 3

Miqyaq yovyaq nail gaiqlaq bhai nl heeq phaq-ail tsaq nail phaq

1-2Alhai dul dai, khaqma juq-ol. Yovqgavq nail yovjil nail kov-uvq bhai jaol yaoq. Alhai nl nail bhaqda nee, yaqyov-aq teevq pav ganav juq Miqyail nail daoq bhai neema maq thaqtsaol khi ngaol-aoq, nuljuq Miqyail bhai ev khi aqsee aqdaol daol dai doevq nail bhai aqyu juq ya moel haq neq, nuljuq khul teevq phaq iqsanl maq cavq khi ngaol-aoq, nuljuq alhai doevq nail ngel-i mail, aqyu juq neema thaqtsaol lal nia nail ngaol. 3Tsailkheel al jaiq jel dai lav sav nail, phul heel al jaiq jel dai goe nail, aqgaq aqdoi doi nail, alhai aqmaol nail lavqniil phao heldaiq meeq lal dai, thaq lav sav. 4Nuljuq nail aqmaol heldaiq meeq lal dai, neema lavqkhoel phao niailhai lav sav yaoq. Neema neenuq neebeiv aol khi, neema aqmeeq phaq aol yaoq. Alhai heldaiq meeq lal dai lav sav nail phaq neq, maq cov-ail nia nail nee ovqtavq, Miqyail nail sivtavq bhai aqphoiq phoiq deedee nail phaq pevq nail ngaol. 5Milnee uqnee nee Miqyail bhai ev nail yaqmai-aq juq iqsanl, aivq bhai noeqthunq khi yovqgavq nail aqmaol heldaiq meeq lal dai, alhai lav sav-a nail ngaol. Aqyu juq neq, yovqgavq nail yovjil nail kov-uvq bhai aqmeeq-ai jaol-a nail ngaol. 6Saqlal neq, Aqbhaqlaqhaq nail kov-u bhai jaol khi, aivq bhai heeqphaq dai, khul-a nail ngaol. Nuljuq aqmeeq phaq nl nail nee ovqtavq, geesil nail neema maq aol haq neq, Saqlal nail yaqmiq khe-ai, dul nail ngaol.

7Alhai dul dai, yaqyov-aq juq-ol, yovqgavq nail khaqma nee mail jaol-u phao, aivq nail haqbhoil saol-nvq bhiq nail neema aol yaoq. Aivq naoq-ai nee maqtsil gaq bhaq khi ngaol-aoq, naoq-ai nee mail aqdoevq bhi doevq nail kovpavq ya-a nail ngel-i mail, aivq bhai ev bhiq yaoq. Alhai nl haq neq, nuljuq geeqlaoq hal nail bhai lav tsoiq nail phaq maq jiav-ail.

Heeq nia nail neema aqhaol haol dai bhi jiav yaoq

8Haoqnao naosaq niailhai ge movq-ail nial. Nuljuq iqsanl neema teevq heeq bhai tavq yaoq. Teevq gaq nee teevq gaq gaoqhaq yaoq. Aqivq jaqbheq nail gaiqlaq bhai gaiq-a nail khe-ai gaiq-a yaoq. Neema neenuq neebeiv aol khi, aqmeeq phaq nl movq nail neema bhi aol yaoq. 9Yu haqeiv nail phaq nl lal khi ngaol-aoq, haqeiv nail phaq thaq nl kovq bhiq. Yu khal ge movq-ail ge lal khi ngaol-aoq, khal ge movq-ail thaq ge kovq bhiq. Aqyu juq bhai geeqlaoq bivq yaoq. Khul khi mail dai ngal-aq neq, nuljuq geeqlaoq ya dai, Miqyail nuljuq bhai khul-a nail ngaol. 10Jalliq lavqkhoel bhai gevq-ai thaq nail khe-ai,

“Aqdoevq doevq movq nail

neema aol khi

aqn aqmeeq bhai

moel movq nail tsaol-aq,

yovqgavq nail moeqlal

haqeiv nail daoq thaq ge,

yovqgavq nail

moeqthaoq iqsanl,

goiqbhaoq thaq bhaoq.

11Haqeiv nail phaq bhai

gail jao jao khi,

aqmeeq phaq nl yaoq.

Tsaq lai jil lai nail

phaq bhai halpov khi,

al nail haoqnao tsaothe yaoq.

12Khul khi mail dai

ngal-aq neq,

Heeqphaq Miqyail neq,

tsaq nail daol nail

tsaol-aq bhai

heldaiq thailthaiq nail ngaol.

Aivq aqyu juq nail

hal daoq bhai

gaiq thailthaiq nail ngaol.

Thailhai ngaol-aoq,

haqeiv nail phaq

khal nl nail tsaol-aq bhai

Miqyail maq heldaiq

tsaoq-ail” dai,

gevq-ai thaq nail ngaol.

13Nuljuq laijai laijai-ail aqmeeq phaq nl haq neq, khaq sil gaq nuljuq bhai lav tsoiq lal nia nail-aiq. 14Thailhai ngaol-aoq, aqtsaq aqdaol daol dai nl-a nail bhaqda nee, nuljuq yaq daq haq neq, geeqlaoq eeq nail ngaol. Nuljuq bhai khoeq lal jiovq lal nail tsaol-aq juq bhai thaq geesil. Thaq tsaoq deel-nq-ail. 15Khali neq, Heeqphaq ngaol dai, yovqgavq nail neema lavqkhoel bhai yovqgavq saol-nvq khi, aivq bhai ev yaoq. Nuljuq-i mail noeqthunq-ai thaq nail ganl bhai yu naldaiq lal haq neq, khalhai ya ge kovq bhiq nail dai, khaq mao iqsanl aqmeeq-ai lainq-ai thaq yaoq. 16Thailhai ngaol-aoq, neema neenuq neebeiv aol khi ev nail lavqkhoel nee ge kovq bhiq yaoq. Nuljuq nail heeq nia nail neema aqhaol haol dai, bhi jiav yaoq. Alhai bhi jiav haq neq, Khali nail lavqkhoel bhai nuljuq aqmeeq phaq nl nail bhai ge doil nail tsaol-aq juq, yovqgavq nail daoq bhai yovqgavq ya haqsil nail ngaol. 17Miqyail neema tsaq haq neq, aqmeeq phaq nl nail ngel-i mail, ya daq-a nail neq, haqeiv nail phaq nl-a nail ngel-i mail ya daq-a nail nee maqtsil, meeq jaiq nail ngaol.

18Khul khi mail dai ngal-aq neq, ngadao nail oeqbal nail haqbhoil Khali teevq pov khanq sil-a nail ngaol. Ngadao bhai Miqyail jaol nail bha hevq kol laivq kivq dai, tsaq nail daol nail al gaq, maq tsaq maq daol nail tsaol-aq nail haqbhoil khanqsil-a nail ngaol. Aivq sil khi ngaol-aoq, Aqhaqlal Miqyail bhaqda nee doevq kovq lal-a nail ngaol.

19Aivq Aqhaqlal lavqkhoel nee ail khi, thaonq bhai laol-ai thaq nail aqhaqlal juq bhai daoq cavq daoq cov cov ail-a nail ngaol. 20Aqhaqlal al juq neq, Nol-avq nail yeel bhai Miqyail nail daoq bhai neema maq thaqtsaol nail tsaol-aq juq nail aqhaqlal ngaol. Nol-avq laovq laovq ma lav sav thailthaiq-u phao, aqyu juq Miqyail nail daoq bhai neema thaqtsaol lal dai, Miqyail ol ol-ail daonq khi ngaol-aoq, aqyu juq neema maq thaqtsaol lal-al. Tsaol-aq eivq gaq taivq-ail ulcuvq lavqkhoel nee ya jel ail-a nail ngaol. 21Alhai dul dai, niil aq-il, ulcuvq saol nail phaq nuljuq bhai bhi jel-ail lavq nail ngaol. Ulcuvq saol nail dai ge nail neq, aqmaol bhai leivq nail aqjiivq aqcavq phaq bhai tsiqhaol nail bhai ge nail maq ngel-ail. Yeiqsul Khali doevq kovq lal-a nail ngel-i mail, Miqyail nail sivtavq bhai heeq nia nail neema haol lal nail bhai ge nail ngaol. 22Yeiqsul Khali neq, nqtavq kovtavq bhai dav lai khi, Miqyail nail lavqmal phao jaoldeel-nvq thaq nail ngaol. Nqtavq gaqkhoel maqkhaiq, uvthaiq nail juq maqkhaiq, bhaqaoq eeq nail juq maqkhaiq, aivq nail kov-uvq bhai jaol nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index