Search form

1 Theilsaqlolni 2

Paolluv-i mail Theilsaqlolni meenq bhai nl-a nail ganl

1Aqivq jaqbheq juq-ol, nvjuq nuljuq jaol nail bha lal-a nail neq, aqnieivq maq ngel-ail dai, nuljuq iqsanl heeq nia nail ngaol. 2Nuljuq heeq nia nail khe-ai, nvjuq neq, nuljuq jaol nail Theilsaqlolni meenq bhai maq lee kev-u nee mail, Pillilpiv meenq lavqkhoel bhai khoeq nail jiovq nail phaq khi, khal nl movq-ail nl lavq-a nail phaq bhai ya daq-a nail ngaol. Nuljuq bhai Miqyail nail lavqkhiq tsail nail geeqlaoq daoq cavq lal-u phao, lav tsoiq nail maodai phaq jiav khi ngaol-aoq, ngadao nail Miqyail bhaqda nee nvjuq geesil nail neema maq aol dai, cavq lal-a nail ngaol. 3Nvjuq khaq mao iqsanl cavq bhiq cov bhiq-u phao, noeq bheeq noeq leel-ai thaq nail lavqkhoel nee cavq bhiq cov bhiq-a nail maq ngel-ail. Al ovqtavq, neema maq haol nail lavqkhoel nee maqkhaiq, goiqbhaoq bhaoq nail lavqkhoel nee maqkhaiq, cavq nail cov nail iqsanl maq ngel-ail. 4Nvjuq lavqkhiq tsail nail geeqlaoq daoq cavq nail neq, Miqyail neema tsaq nail nee ovqtavq, aivq bhi cavq lavq-a nail khe-ai taivq-ail nvjuq cavq nail ngaol. Alheel ngel-i mail, tsaol-aq neekhaol sil dai cavq nail maq ngel. Nvjuq nail neema bhai tsao tsel daiq nail Miqyail neekhaol sil dai, cavq nail ngaol.

5Nuljuq heeq nia nail khe-ai, nuljuq bhai nvjuq tsiqphoiq khi cavq bhiq-a nail maq ngel-ail. Yu nail nlmaoq bhai maivjeel jeel nail ngel-i mail cavq bhiq-a nail iqsanl maq ngel-ail. Miqyail neq, nvjuq nail haqbhoil salkhil pevq nail ngaol. 6Maldil dai, ge haq neq, nvjuq Khali nail gaqkhoel pevq nail ngel-i mail, nvjuq bhai bhi ev movq haq neq, bhi ev kivq nail ngaol. Thailhai ngaol-aoq, tsaol-aq-i mail bivq lavq nail seiqleiq khaoqsail bhai maqkhaiq, nuljuq-i mail bivq lavq nail seiqleiq khaoqsail bhai maqkhaiq nvjuq maq halpov-ail. 7Nvjuq nuljuq nee mail jaol-u phao, neema neenuq neebeiv aol nail lavqkhoel nee aqtsil cuvq yaq aqma aivq nail yaq bhai heldaiq phail nail khe-ai, nvjuq heldaiq phail-a nail ngaol. 8Nvjuq nuljuq bhai gaiq-a deedee nail ngel-i mail, Miqyail nail lavqkhiq tsail nail geeqlaoq daoq taivq-ail nuljuq bhai cavq bhiq nail maq ngel dai, nvjuq nail aqmaol iqsanl nuljuq nail haqbhoil bivq movq nail neema jiav nail ngaol. Khul khi mail dai ngal-aq, nuljuq neq, nvjuq mailma-ail gaiq-a nail tsaol-aq pevq lal-a nail ngaol. 9Alheel ngel-i mail, aqivq jaqbheq juq-ol, nvjuq khadai haq haq-ail laijai khi ganl nl-a nail bhai nuljuq heeq nia nail ngaol. Nuljuq bhai Miqyail nail lavqkhiq tsail nail geeqlaoq daoq cavq-u phao, nvjuq nail haqbhoil nuljuq bhai khul nail ganl iqsanl maq bhi dal dai, nvjuq nqkiv n-gaol maqkhaiq, ganl nl-a nail ngaol.

10Neema thaqtsaol nail nuljuq bhai, nvjuq-i mail khal nl khal hal bhiq-a nail phaq neq, meeq nail haol nail phaq, tsaq nail daol nail phaq khi mail oeqbal thaq duq maq jiav nail phaq pevq nail ngaol dai, nuljuq iqsanl, Miqyail iqsanl salkhil pevq nail ngaol. 11Al ovqtavq, aqbhu teevq gaq yovqgavq nail yaq juq bhai heldaiq phail nail khe-ai, nuljuq yaoq gaq yaoq-ao nee bhai nvjuq cavq bhiq cov bhiq khi gaq bivq-a nail ngaol dai iqsanl, nuljuq heeq nia nail ngaol. 12Aivq nail milkhaoq khi seiqleiq khaoqsail nail lavqkhoel bhai aol lal yaoq dai, nuljuq bhai khul thailthaiq nail Miqyail neema tsaq dai, aqdoevq doevq nia nail haqbhoil, nvjuq nuljuq bhai gaq bivq khi hal nail ngaol.

13Miqyail bhai nvjuq maq ceiv lai dai tsiqeeq nail ganl yaoq phaq yaoq neq, niailhai jiav nail ngaol. Nvjuq nuljuq jaol nail bha Miqyail nail daoq cavq lee-u phao, tsaol-aq nail daoq dai, saol-nvq khi nuljuq hav bhoel-a nail maq ngel-ail. Maldil Miqyail nail daoq nial dai, saol-nvq khi hav bhoel-a nail ngaol. Daoq al daoq neq, neema thaqtsaol nail tsaol-aq pevq nail nuljuq nail lavqkhoel bhai ganl nl thailthaiq nail ngaol. 14Aqivq jaqbheq juq-ol, Yuldav milkhaoq bhai jaol nail Miqyail nail munl pevq nail Yeiqsul Khali bhai neema thaqtsaol nail juq bhai nuljuq saol oil-a nail ngaol. Yuldav nail tsaol-aq aqyu juq bhai khoeq bhiq jiovq bhiq-a nail khe-ai, nuljuq nail milkhaoq bhai jaol nail tsaol-aq nuljuq bhai iqsanl, alhai khoeq lavq jiovq lavq nail ngaol. 15Yuldav nail tsaol-aq al juq neq, Heeqphaq Yeiqsul bhai tavq heivq-a nail ngaol. Al ovqtavq, Miqyail nail haqbhoil gedan nail juq bhai iqsanl deeq heivq khi nvjuq bhai iqsanl khoeq lavq jiovq lavq khi the dov lavq-a nail ngaol. Aqyu juq neq, Miqyail neema tsaq dai maq nl nail nee ovqtavq, tsaol-aq iqsanl bhai neejiav jiav nail ngaol. 16Yu nail jeq-e jaq-a hevqkovq nail phaq ya nia dai, nvjuq cavq bhiq nail bhai, Yuldav nail tsaol-aq al juq lav tsoiq nail ngaol. Aqyu juq khaq mao iqsanl nl nail oeqbal bhee lal dai, niailhai nl-a nail ngaol. Thailhai ngaol, haoqnao naosaq neq, Miqyail nail neema phail nail phaq, aqyu juq nail kovtavq bhai kev lee nail ngaol.

Paolluv aqyu juq jaol nail bha maq ya lai-a nail ganl

17Aqivq jaqbheq juq-ol, nvjuq nail aqmaol nuljuq nee teevq yanq ya pav-ail khi ngaol-aoq, neema neq, nuljuq nee mail jiav nail ngaol. Alheel ngel-i mail, nuljuq nail maivphaoq bhai moel movq deedee lal khi, laijai-a nail ngaol. 18Nvjuq nuljuq jaol nail bha kovq lal movq nail ngaol. Ngal iqsanl nuljuq jaol nail bha mee nia pov bhee dai lal movq nail ngaol. Thailhai ngaol-aoq, neivq Saqdaq neq, nvjuq bhai lav tsoiq nail ngaol. 19Ngadao nail Heeqphaq Yeiqsul yavq kha lee khi mail, ngadao aivq nail sivtavq bhai ya jaol-u phao, nvjuq nail noeqthunq duq, lavqkhiq tsail duq khi mail, nvjuq nail neema eeq duq heel uqtsaoq neq, nuljuq ngaol. 20Khul khi mail dai ngal-aq nuljuq neq, maldil nvjuq nail lavqkhiq tsail duq khi neema eeq duq pevq nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index