Search form

1 Tilmolseiq 2

Geeqlaoq hal nail ganl saol bhiq-a nail ganl

1Iqmoeq khe phaq, ngal naoq bhai gaq niailhai bivq nail ngaol. Miqyail bhai geeqlaoq hal nail, yu nail haqbhoil geeqlaoq hal nail khi, Miqyail bhai tsiq eeq nail juq, tsaol-aq iqsanl nail haqbhoil hal yaoq. 2Heeqphaq juq khi uvthaiq nail juq nail haqbhoil iqsanl alhai hal yaoq. Alhai hal haq neq, ngadao neesal-ovq khi, neema aqsal sal nail lavqkhoel, Miqyail bhai ev khi, aqmeeq aqhaol nail lavqkhoel nee ya doevq nail ngaol. 3Alhai geeqlaoq hal nail neq, ngadao nail Hevqkovq nail gaq pevq nail Miqyail nail sivtavq bhai aqmeeq teevq phaq pevq khi, aivq neekhaol sil nail phaq iqsanl pevq nail ngaol. 4Tsaol-aq iqsanl mail hevqkovq nail phaq bhai ya nail nee ovqtavq, maldil tsaq nail phaq bhai heeq nia lal dai, Miqyail movq deedee nail ngaol. 5Miqyail teevq gaq taivq-ail jaol khi, Miqyail khi tsaol-aq nail gaiqlaq bhai tsaolkhaiq teevq gaq jaol-ail teevq-eel ngaol. Aivq neq, tsaol-aq pevq nail Yeiqsul Khali ngaol. 6Aivq neq, tsaol-aq iqsanl bhai hevqkovq nail dai khi, aivq nail aqmaol laol bhiq-a nail ngaol. Aqyanq tsaq lal-u phao, ganl al bhai ngadao ya moel-a nail ngaol. 7Al nail ganl salkhil khanq nail haqbhoil, ngal neq, daoq cavq cavq nail gaq khi gaqkhoel pevq lal dai maqkhaiq, neema thaqtsaol nail phaq khi maldil tsaq nail phaq nail ganl yu nail jeq-e jaq-a bhai cavq bhiq cov bhiq nail gaq pevq lal dai maqkhaiq, Miqyail ngaq bhai tsel dov lavq-a nail ngaol. Ngal niailhai ge nail neq, goiqbhaoq bhaoq nail maq ngel-ail. Daolcoev dai, ge nail ngaol.

8Alheel ngel-i mail, yaoq dao yaoq-ao nee jaol nail yaqyov-aq juq, neema maq phail nail nee ovqtavq, maq jil pheeljaq dai, meeq nail haol nail lavqkhoel nee aqlavq bavq dil khi, geeqlaoq hal nail bhai ngal oil movq-ail nial.

9Alhai dul dai, yaqmai-aq juq iqsanl, neema neenuq neebeiv aol nail nee ovqtavq, neema thaq nia nail lavqkhoel, aqgaq aqdoi doi heeq phaq-ail doi nail bhai ngal oil movq-ail nial. Uqhuq tsailkheel phaiq nail, heel-i mail lav sav-ai thaq nail nlmaoq goe nail, laoqpav laolpav nail sainl goe nail khi, aqphoiq mao-ail phoiq nail aqgaq aqdoi doi nail bhai ngal maq oil movq-ail. 10Thailhai ngaol-aoq, nuljuq Miqyail bhai ev naol dai, ge nail yaqmai-aq juq ngel-i mail, yovqgavq nl heeq phaq-ail tsaq nail khe-ai, aqmeeq phaq nl nl-ail doevq yaoq.

11Yaqmai-aq juq neq, neema neenuq neebeiv aol nail nee ovqtavq, aqtsi tsu dai jaol khi, yu-i mail cavq lavq cov lavq nail bhai ya saol oil nail ngaol. 12Yaqmai-aq neq, yu bhai cavq bhiq cov bhiq nail maqkhaiq, yaqyov-aq bhai uvthaiq nail maqkhaiq, ngal aqkhaoqanq maq bivq-ail. Aqyu juq neq, aqtsi tsu dai, ya jaol nail ngaol. 13Khul khi mail dai ngal-aq neq, Aqdaq bhai teivq gaq khi mail pultavq, Eilbav bhai teivq-a nail ngaol. 14Al ovqtavq, Aqdaq bhai jalmul mul ya-a nail maq ngel-ail. Yaqmai-aq gaq bhai jalmul mul ya khi, yaqmai-aq gaq nl bheeq-a nail ngaol. 15Thailhai ngaol-aoq, neema thaqtsaol nail, goil nail gaiq-a nail, meeq nail haol nail, neema thaq nia nail, aqyu juq niil juq nail lavqkhoel bhai ivq haq neq, yaq bhao-a nail ngel-i mail, aivq ya jel-ail nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index