Search form

1 Tilmolseiq 5

Yu bhai khalhai ya nl bhiq nail ganl

1Aqbhal joiqmaoq juq bhai khaq khaq-ail thaq cavq bhiq. Aqyu juq bhai naoq nail aqbhu khe-ai, saol-nvq-ai thaq khi cavq bhiq yaoq. Yaqyov-aq yaqnoil juq bhai naoq nail mailnail khe-ai saol-nvq yaoq. 2Aqphiq joiqmaoq juq bhai naoq nail aqma khe-ai saol-nvq-ai thaq khi, yaqmai-aq yaqnoil juq bhai neema aqhaol haol deel teevq bhee aol nail lavqkhoel naoq nail nailma khe-ai saol-nvq yaoq.

3Heldaiq phail bhiq nail gaq maq jaol nail miqtsiq miqma juq bhai ev khi heldaiq phail bhiq yaoq. 4Thailhai ngaol-aoq, miqtsiq miqma aivq nail yaq maq ngel haq neq, aivq nail aqjievq lilheel jaol haq neq, yaq al juq yovqgavq nail ilkhaol khe tsaol-aq bhai heldaiq phail bhiq khi, aqbhu aqma aqphiq aqbhal juq bhai geeqlaoq nl kovq bhiq nail phaq neq, Miqyail bhai ev nail phaq pevq nail ngaol dai, aqyu juq bhai cavq bhiq cov bhiq yaoq. Khul khi mail dai ngal-aq, alhai heldaiq phail bhiq nail phaq bhai Miqyail neema tsaq nail ngaol. 5Aivq teevq gaq taivq-ail doevq khi, heldaiq phail bhiq nail gaq maq jaol nail miqtsiq miqma bhai neq, Miqyail bhai noeqthunq khi, nqkiv n-gaol maqkhaiq, “Tsaojao-ai lavq-o” dai, geeqlaoq hal nail ngaol. 6Thailhai ngaol-aoq, aqsivq haqjoil phao lavqkhiq tsail nail phaq bhai taivq-ail halpov nail miqtsiq miqma neq, doevq khi ngaol-aoq, sil-a nail khe-ai, dul nail ngaol. 7Yu oeqbal thaq duq maq jiav dai, alhai nl yaoq dai, miqtsiq miqma nail yaq juq bhai daoq bivq yaoq. 8Tsaol-aq teevq gaq ganav yovqgavq nail jeq-e jaq-a bhai maqkhaiq, a dai nee maqtsil yovqgavq nail ilkhaol khe tsaol-aq bhai maqkhaiq, maq heldaiq phail haq neq, Yeiqsul bhai neema thaqtsaol nail phaq bhai khaonq ha-ail ceevq-a nail khe-ai dul khi, neema maq thaqtsaol lal-a nail tsaol-aq nee maqtsil doil jaiq nail ngaol.

9Miqtsiq miqma nail aqmil gevq bhoel nail phaldoiq nail ganl niailhai ngaol. Aqkovq kovq tsel kovq bhee lal-a nail yovqgavq nail yovjil bhai saljial ivq-a nail miqtsiq miqma juq nail aqmil bhai gevq bhoel yaoq. 10Aqmeeq phaq nl thail hal thailthaiq nail ngaol dai, yu salkhil khanq nail, yaq juq bhai lav sav nail, daq-i bhai hav nia nail, Miqyail nail tsaol-aq nail aqkhil bhai tsiq bhiq nail, haq nail aoq nail juq bhai tsaojao-ai bhiq khi, aqmeeq yaoq phaq yaoq-ao nee nl thail hal thailthaiq nail miqtsiq miqma juq nail aqmil taivq-ail gevq bhoel yaoq.

11Thailhai ngaol-aoq, aqkovq maq jiav lal thaq nail miqtsiq miqma juq nail aqmil gevq bhoel nail phaldoiq bhai thaq gevq bhoel. Khul khi mail dai ngal-aq neq, aqyu juq maol ail movq lal bhiq haq neq, Khali nail uvthaiq nail kov-uvq nee dov-ail nail ngaol. 12Alhai nl haq neq, aqyu juq-i mail iqmoeq phao ge-ai thaq nail daoqma saljial bhai aqyu juq lav cov-a nail ngel-i mail, Miqyail-i mail dal bhiq nail bhai ya daq nail ngaol. 13Al ovqtavq, aqyu juq teevq il nee teevq il nalga nalga-ail, aqdoil doil-ail nail ngaol. Aqdoil doil-ail nail taivq-ail maq ngel-ail. Aqyu juq moeqjaiq jaiq lal khi, maq ge khaoq nail phaq ge lal nail ngaol. Aqyu juq bhai maq tavq nail, yu nail ganl bhai lav suqsaq nail tsaol-aq pevq lal nail ngaol. 14Alheel ngel-i mail, aqkovq mao-ail maq jiav lal thaq nail miqtsiq miqma juq neq, maol ail khi yaq jaol lee nail nee ovqtavq, yovqgavq nail ilkhaol bhai aqmeeq-ai heldaiq phail nail bhai, ngal oil movq-ail nial. Alhai nl haq neq, ngadao bhai neejiav jiav nail tsaol-aq, ngadao bhai khal ge movq-ail ge duq maq jiav-ail. 15Khul khi mail dai ngal-aq neq, niil aq-il iqsanl miqtsiq miqma teevq pav ganav juq laiq-ail thailthaiq khi, neivq Saqdaq nail haoqnao tsaothel laivq-aoq nail ngaol.

16Yeiqsul bhai neema thaqtsaol nail yaqmai-aq teevq gaq ganav nail ilkhaol lavqkhoel bhai miqtsiq miqma juq jaol haq neq, aqyu juq aivq bhai tsu heeq phaq-ail tsaq nail ngaol. Alhai tsuq haq neq, kavbavq al Khali yaq munl bhai maq dal mail, Khali yaq munl neq, tsaojao-ai nail gaq maq jaol nail miqtsiq miqma juq bhai aqmeeq-ai tsu nia nail ngaol.

17Khali yaq munl bhai aqmeeq-ai heldaiq phail nail aqivq aqtsu juq neq, ev nail phaq khi danq nail phaq bhai oil nail geel-nvq nail ngaol. Daoq cavq daoq cov cov nail khi yu bhai cavq bhi cov bhiq nail aqivq aqtsu juq bhai a dai nee maqtsil iqsanl ev khi danq bhiq heeq phaq-ail tsaq nail ngaol. 18Khul khi mail dai ngal-aq neq, “Gov bhai naoq thailthaiq nail niaoqnel bhai moeqkeivq maq ya keivq-ail” dai, Jalliq lavqkhoel bhai gevq-ai thaq nail ngaol. “Ganl nl nail tsaol-aq, ganl nl nail aqphoiq ya nail tsaq nail ngaol” dai iqsanl, gevq-ai thaq nail ngaol. 19Salkhil khanq nail tsaol-aq nvq gaq hail gaq maq jaol haq neq, aqivq aqtsu juq bhai oeqbal thaq nail daoq bhai thaq naldaiq. 20Oeqbal nl thailthaiq nail juq bhai, tsaol-aq iqsanl nail sivtavq bhai khaq khaq-ail cavq bhiq yaoq. Alhai nl haq neq, yu iqsanl geesil nail neema aol lal nail ngaol.

21Naol al juq nl-u phao, maq tselpav maq bhoilpav nail nee ovqtavq, maivphaoq eeq nil maq tsel dai nl yaoq dai, Miqyail khi Yeiqsul Khali nail sivtavq bhai maqkhaiq, tsel dov-ai thaq nail nqtavq gaqkhoel nail sivtavq bhai maqkhaiq, ngal naoq bhai daoq bivq nail ngaol.

22Khaq sil gaq nail kovtavq bhai maqkhaiq, lavqtsail mail aqlavq thaq bavq dav. Yu oeqbal nl nail bhai naol teevq peivq-ail thaq aol lai. Aqhaol haol dai, doevq yaoq.

23Niai nee pultavq neq, ulcuvq taivq-ail thaq daol. Naol jaol hal maq dov nail haqbhoil khi ovqmav nail haqbhoil maq gal lal dai, aqheeq tsilju nail ullul iqsanl micil daol yaoq.

24Tsaol-aq teevq pav ganav juq nail oeqbal bhaqlaoq kheq dai dov lal khi, yalkhaq dal nail jaol duq bhai aqyu juq bhai hel-aivq nail ngaol. Tsaol-aq teevq pav ganav juq nail oeqbal neq, haoqnao taivq-ail dov lal nail ngaol. 25Alhai dul dai, nl-ai hal-ai thaq nail aqmeeq juq iqsanl bhaqlaoq kheq dai dov lal nail ngaol. Niil aq-il bhaqlaoq kheq dai maq dov lal nail aqmeeq phaq juq iqsanl, khaq mao kev dai maq oil-uvq thaq nia-ail.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index