Search form

2 Gaolliqthu 5

Aqmaol aqlil khi aqsivq nail ganl

1Miltsaq kovtavq-ai aqdoevq doevq nail ngadao nail aqmaol niil neq, gaqnaq yavqtsoel khe-ai dul nail ngaol. Gaqnaq yavqtsoel niil cov-ail haq neq, Miqyail-i mail ngadao nail haqbhoil nqtavq kovtavq bhai cov-ai thaq nail ilkhaol jiav nail ngaol dai, nvjuq heeq kivq nail ngaol. Nqmaq maqluv halyeel ivq nail ilkhaol al neq, tsaol-aq nail aqlavq-i mail cov-a nail maq ngel-ail. 2Aqmaol niil nail lavqkhoel bhai ngadao jaol-u phao, nqtavq kovtavq-ai jiav nail ngadao nail ilkhaol al bhai kovq lai movq deedee-ai bhiq nail ngel-i mail, meel nail ngaol. 3Ya kovq kev lai haq neq, teevq thal-iq maq cov-ail nia nail jaol duq bhai ya jaol nail ngaol. 4Gaqnaq yavqtsoel khe-ai dul nail aqmaol niil nail lavqkhoel bhai ngadao jaol-u phao, yalkav aqliq phi khi, tev nail meel nail ngaol. Aqmaol aqlil niilniai maq loev ha movq nail ngel-i mail, tev nail meel nail maq ngel-ail. Aqdoevq doevq nail phaq neq sil nail phaq bhai ya moevq bhoel dai, ngadao aqmaol aqsivq bhai doi movq-ail nial. 5Alhai pevq lal dai, Miqyail ngadao bhai lav sav lavq-a nail ngaol. Yaqhao ngadao geeqlaoq al bhai ya nail ngaol dai, ya heeq kivq dai, niil aq-il nee mail aivq Aqhaqlal Miqyail ngadao nail neema lavqkhoel bhai bhi jaol lee-a nail ngaol.

6Alheel ngel-i mail, nvjuq aqmaol niil nail lavqkhoel bhai jaol-u phao, Yeiqsul nee mail eq-ai haq nail ngaol dai, heeq kivq khi ngaol-aoq, nvjuq khaq mao iqsanl neema ivqdao dai, jiav nail ngaol. 7Nvjuq neq, maivneev moel moel-ail, aqdoevq doel-aivq nail maq ngel-ail. Neema thaqtsaol thaqtsaol-ail, aqdoevq doevq nail ngaol. 8Nvjuq neema ivqdao dai, aol nail ngaol. Aqmaol niil nee pav-ail khi Yeiqsul nee jaol lai movq jaiq-ail nial. 9Alheel ngel-i mail, nvjuq aqmaol niil nail lavqkhoel bhai jaol-u phao maqkhaiq, aqmaol niil nee pav ail-u phao maqkhaiq, Yeiqsul neema tsaq nail tsaol-aq pevq dai, laijai laijai-ail aqdoevq doevq nail ngaol. 10Khul khi mail dai ngal-aq neq, ngadao yaoq gaq yaoq-ao nee yovqgavq nail aqmaol lavqkhoel bhai jaol-u phao, aqdoevq doevq nail khe-ai, aqmeeq maqkhaiq, maq meeq nail maqkhaiq, ya dai, ngadao Khali nail yalkhaq dal nail doiqbev bev ma nail sivtavq bhai ya kev lai nail ngaol.

Miqyail bhai tsaq lai jil lai dai, nl nail ganl

11Nvjuq Miqyail bhai ev khi ya geesil nail ngaol dai, heeq kivq nail ngel-i mail, tsaol-aq yaq bhai cavq bhiq deedee nail ngaol. Nvjuq khalheel nail tsaol-aq pevq nail ngel-ail dai, Miqyail bhaqlaoq kheq dai heeq nia nail ngaol. Nuljuq iqsanl, neema lavqkhoel bhai alhai heeq nia nail ngaol dai, nvjuq noeq nail ngaol. 12Nvjuq niailhai ge nail neq, nuljuq nail sivtavq bhai yovqgavq nail salkhil yovqgavq khanq nail maq ngel-ail dei-eiq. Tsaol-aq teevq pav ganav juq neq, yovqgavq nail neema lavqkhoel bhai khalhai pevq nail bhai maq saol-nvq dai, lavqniil phao taivq-ail neema eeq nail ngaol. Nuljuq tsaol-aq al juq bhai khalhai ya ge kovq dai, nvjuq bhaqda nee nuljuq neema eeq duq jiav nail ngaol dai, nvjuq gevq bhoel-ai leevq-a nail teevq-eel ngaol. 13Nvjuq naiquq ngel haq neq, Miqyail nail haqbhoil uq ail-a nail ngaol. Nvjuq aqgeel ngel haq neq, nuljuq nail haqbhoil geel nail ngaol. 14Khali nail goil nail gaiq-a nail phaq nvjuq bhai uvthaiq-ai thaq nail ngaol. Khul khi mail dai ngal-aq neq, tsaol-aq teevq gaq tsaol-aq iqsanl nail haqbhoil khanqsil-a nail ngel-i mail, tsaol-aq iqsanl sil-aoq nail khe-ai, dul nail ngaol dai, nvjuq noeqceiv-ai thaq nail ngaol. 15Aqdoevq doevq nail tsaol-aq, yovqgavq nail haqbhoil yovqgavq maq doevq mail, aqyu juq nail haqbhoil khanq sil khi doevq kovq lal-a nail Khali nail haqbhoil aqdoevq doevq dai, tsaol-aq iqsanl nail haqbhoil aivq khanqsil-a nail ngaol.

16Alheel ngel-i mail, yanqgaol nee ngal-aq neq, miltsaq yaq juq saol-nvq nail khe-ai, nvjuq tsaol-aq teevq gaq bhai iqsanl maq saol-nvq bhiq yaoq-aol. Jel lal-u phao, nvjuq Khali bhai miltsaq yaq juq khe-ai, saol-nvq bhiq khi ngaol-aoq, niil aq-il alhai maq saol-nvq bhiq yaoq-aol. 17Tsaol-aq teevq gaq Khali nail lavqkhoel bhai jaol lal haq neq, aivq tsaol-aq aqsivq pevq lal-a nail ngaol. Aqlil juq iqsanl mail peivq gil-ail khi, iqsanl mail aqsivq pevq lal-a nail ngaol. 18Al juq iqsanl mail, Miqyail nee mail pevq dov lee-a nail ngaol. Ngadao aivq bhai tsaq lai jil lai dai, Miqyail Khali bhai juq khi nl lavq-a nail ngaol. Al ovqtavq, yu aivq bhai tsaq lai jil lai dai, aivq nvjuq bhai bhi nl lavq-a nail ngaol. 19Miqyail neq, Khali nail lavqkhoel bhai jaol khi, miltsaq yaq aivq bhai tsaq lai jil lai dai, nl-a nail ngaol. Aivq aqyu juq nail oeqbal aqyu juq nail kovtavq bhai maq thaq-al. Alheel ngel-i mail, tsaol-aq yaq ngaq bhai tsaq lal jil lal dai nl yaoq dai, aivq nvjuq bhai khoel lavq-a nail ngaol. 20Nvjuq Khali nail gaqkhoel pevq nail ngaol. Miqyail nvjuq bhai juq juq-ail nuljuq bhai khul thailthaiq nail ngaol. Miqyail bhai tsaq lal jil lal yaoq dai, Khali nail gaqkhoel pevq khi nuljuq bhai hal nail ngaol. 21Khali neq, oeqbal teevq peivq-ail maq aol khi ngaol-aoq, aivq bhaqda nee, ngadao Miqyail nail tsaq nail daol nail phaq pevq lal dai, ngadao nail haqbhoil Miqyail aivq bhai oeqbal bhi pevq lal-a nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index