Search form

2 Bheiqtuvluv 2

Maldil saqlaq maq ngel nail juq

1Milnee uqnee khe, Yuldav tsaol-aq nail lavqkhoel Miqyail nail haqbhoil gedan naol dai ge khi ngaol-aoq, maldil maq ngel nail juq dov lal daiq-a nail ngaol. Alhai dul dai, niil aq-il, nuljuq nail lavqkhoel bhai iqsanl, maldil maq ngel nail saqlaq juq dov lal nail ngaol. Aqyu juq neq, yu bhai luq-ail seil-ail nail neema thaqtsaol nail phaq oil bhoel khoiq lal nail ngaol. Aqyu juq neq, aqyu juq bhai ul kovq bhiq-a nail Heeqphaq bhai khaonq ha-a nail ngel-i mail, lavqtsail mail luq-ail seil-ail dai, yovqgavq bhai yovqgavq nl nail ngaol. 2Thailhai ngaol-aoq, aqyu juq haqeiv nail phaq nl nail haoqnao tsaol-aq maodai tsaothel-aivq nail ngaol. Aqyu juq alhai nl nail bhaqda nee, maldil tsaq nail gailkhaol bhai yu ge doil nail ngaol. 3Maq ngel nail saqlaq al juq, phul heel ildaoq maoqgaiq bhai maivjeel jeel nail ngel-i mail, aqyu juq nail haqbhoil jail jeq aol dai, nuljuq bhai goiqbhaoq bhaoq lal nail ngaol. Thailhai ngaol-aoq, aq-u nee mail Miqyail aqyu juq bhai dalceiv-ai thaq nail al neq, aqnieivq-ail maq pevq-ail nia-ail. Aqyu juq maldil ya luq ya seil-ail nail ngaol.

4Khul khi mail dai ngal-aq, oeqbal nl-a nail nqtavq gaqkhoel bhai iqsanl Miqyail maq phaiq-ail. Aqyu juq bhai daqovq laoma bhai bavq bhoel khi, yalkhaq dal-u n-gaol kev dai, navtsee deel aqduq bhai hailcav-i mail pheethaiq khi laol-ai thaq nail ngaol. 5Milnee uqnee khe tsaol-aq bhai iqsanl, Miqyail maq phaiq-ail. Aivq bhai maq ev nail tsaol-aq bhai ulcuvq-i mail bhi deq pheeq heivq gil-a nail ngaol. Thailhai ngaol-aoq, tsaq nail daol nail ganl daoq cavq daoq cov cov-a nail Nol-avq khi mail tsaol-aq sivq gaq bhai Miqyail bhi jel ail-a nail ngaol. 6Saoldoq meenq khi mail Gaolmaollav meenq iqsanl, Miqyail miqjaq-i mail bhi poiv heivq gil-a nail ngaol. Yaqhao aivq bhai maq ev nail tsaol-aq juq bhi saol oil nail dai khi, aivq alhai yalkhaq dal bhiq-a nail ngaol.

7Thailhai ngaol-aoq, tsaol meeq tsaol haol Laoltavq bhai aivq bhi jel ail-a nail ngaol. Haqeiv nail tsaol-aq al juq aqjiivq aqcavq phaq nail aol thaoq nail ngel-i mail, Laoltavq noeqhaq deedee nail ngaol. 8Khul khi mail dai ngal-aq, tsaol meeq tsaol haol al gaq, aqyu juq nee mail jaol-u phao, aqyu juq nl thail hal thailthaiq nail haqeiv nail phaq bhai ya gaiq ya moel nail ngel-i mail, yaoq n yaoq n nee aivq nail neema lavqkhoel bhai maq khanqtsaol-ail. 9Alheel ngel-i mail, Miqyail bhai ev nail tsaol-aq laonqdaiq nail phaq bhai ya daq-u phao, aqyu juq bhai khalhai ya bhi jel-ail nail dai, Miqyail heeq nia nail ngaol. Thailhai ngaol-aoq, Yalkhaq dal-u n-gaol kev dai, aivq haqeiv nail tsaol-aq bhai bhi jaol khi khoeq bhiq jiovq bhiq nail ngaol. 10Aqjiivq aqcavq cavq nail aqsivq haqjoil nail neenoeq haoqnao tsaothe khi, Miqyail uvthaiq nail phaq bhai khal ge movq-ail ge nail juq bhai neq, yu nee maqtsil khoeq nail jiovq nail phaq bhai ya daq nail ngaol.

Maq ngel nail saqlaq al juq neq, geesil nail neema maq aol dai, yovqgavq nail neema khal noeq nail khe-ai, nl nail ngaol. Nqtavq khi miltsaq nail gaiqlaq bhai jaol nail bhaqaoq eeq nail juq bhai iqsanl, khal ge movq-ail ge tseq nail ngaol. 11Nqtavq gaqkhoel juq neq, aqyu juq nee maqtsil gaq bhee jaiq khi, bhaqaoq eeq jaiq nail juq pevq khi ngaol-aoq, Heeqphaq Miqyail nail sivtavq bhai, nqtavq khi miltsaq nail gaiqlaq bhai jaol nail juq bhai khal ge movq-ail maq ge nail nee ovqtavq, oeqbal maq thaq-ail. 12Thailhai ngaol-aoq, maq ngel nail saqlaq al juq neq, maq heeq nia nail phaq bhai khal ge movq-ail ge doil nail ngaol. Aqyu juq neq, nieivq khi bhi deeq heivq jaq nail haqbhoil doevq lee-a nail khul maq saol-nvq nia dai, nl nail hal nail jaiqyaq khe-ai, dul nail ngaol. Haqtsoiq jaiqyaq bhai lav cov nail khe-ai, aqyu juq iqsanl, ya daq nail ngaol.

13Maq tsaq maq daol nail phaq nl nail bhaqda nee, maq tsaq maq daol nail phaq ya daq nail ngaol. Aqyu juq neq, n-gaol phao iqsanl aljaiq jaq bov daol bov nail bhai lavqkhiq tsail deedee nail ngaol. Aqyu juq nuljuq nee mail jaq tavq daol tavq-u phao, haqeiv nail phaq bhai neekhaol teevq sil nl nail ngaol. Aqyu juq neq, nuljuq bhai bhi niaoq lal nail malyal khe-ai, dul nail ngaol. 14Aqyu juq nail maivneev neq, yu nee mail bheeq movq nail neema aol nail ngaol. Aqyu juq neq, teevq thal-iq oeqbal nl bov nail maq bhao-ail. Aqyu juq neq, neema maq ivq nail tsaol-aq bhai jalmul mul nail nee ovqtavq, phul heel ildaoq maoqgaiq bhai maivjeel jeel deedee nail ngaol. Aqyu juq neq, Miqyail-i mail iqkhail yavq nail bhai ya daq nail juq ngaol. 15Aqyu juq neq, gailkhaol aqdaol khaol bhai khaonq ha-ail ceevq khi, gail bheeq bheeq ail-a nail ngaol. Aqyu juq neq, Bhaolsaoq nail yaqyov Bhaqlaq nail aqkhil phaqyal haoqnao tsaothe thailthaiq nail ngaol. Bhaqlaq neq, maq tsaq maq daol nail yalgaq aqphoiq ya movq deedee-ai bhiq nail ngaol. 16Aivq nail oeqbal bhaqda nee, khaq khaq-ail cavq nail cov nail bhai ya daq-a nail ngaol. Daoq maq ge nia nail aivq nail moeqphaq laljieiv tsaol-aq khe-ai, daoq ge dol lavq khi, Miqyail nail haqbhoil gedan nail tsaol-aq pevq nail Bhaqlaq-i mail naiquq khe-ai, nl nail phaq bhai lav naq-a nail ngaol.

17Aqyu juq neq, tsil lai-a nail ulcuvq laolbev khi mail, lilmoel lil ma-i mail bhi oil jal-aivq-a nail nqdil khe-ai dul nail ngaol. Aqyu juq nail haqbhoil navtsee deel jaol duq Miqyail lav sav-ai thaq nail ngaol. 18Khul khi mail dai ngal-aq, aqyu juq neq, khul teevq phaq-ail ganl maq tsoiq nail khaoqsail he nail daoq ge nail ngaol. Aqsivq haqjoil nail neekhaol teevq sil aqjiivq aqcavq phaq nl nail bhai juq khi, gail bheeq bheeq nail tsaol-aq lavqkhoel nee dov lal nail dai khi, laijai thailthaiq nail juq bhai jalmul mul nail ngaol. 19“Nuljuq yu nail yaqkav maq ya jiovq-ail” dai, ge bhiq khi ngaol-aoq, aqyu juq neq, oeqbal nail kov-uvq bhai yaqkav jiovq thailthaiq nail ngaol. Khul khi mail dai ngal-aq, tsaol-aq bhai gaq lai nail khul phaq maqkhaiq, tsaol-aq neq, al phaq nail yaqkav jiovq thailthaiq nail ngaol. 20Tsaol-aq yaq neq, ngadao nail Heeqphaq khi mail Hevqkovq nail gaq pevq Yeiqsul Khali bhai heeq nia nail ngel-i mail, miltsaq khe aqjiivq aqcavq phaq nee, ya jel ail-a nail ngaol. Ya jel-ail khi ngaol-aoq, aqjiivq aqcavq nail lavqkhoel bhai gaoq aol-ail khi, gaoq bhi gaq lai haq neq, iqmoeq-u nee maqtsil haoqnao naosaq neq, doil jaiq nail ngaol. 21Aqyu juq neq, tsaq nail daol nail gailkhaol bhai heeq nia khi ngaol-aoq, khaonq ha-ail ceevq khi, aqyu juq bhai bivq-ai thaq nail meeq nail haol nail aoldaoq kovqdaoq bhai iqsanl khaonq ha-ail ceevq haq neq, tsaq nail daol nail gailkhaol bhai heeq nia-a nail nee maqtsil, maq heeq nia nail neq, aqyu juq nail haqbhoil meeq jaiq nail ngaol. 22“Kheeq neq, aivq nail aoqpeivq bhai aivq gaoq jaq kovq nail ngaol” dai, daoq daq daq nail daoq khi mail, “Wavq bhai aqmaol bhi jiivq khi ngaol-aoq, niaoq lao gaoq lao ail nail ngaol” dai, ge nail daoq daq daq nail daoq al daoq neq, aqyu juq nail haqbhoil tsaq deedee nail ngaol.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index