Search form

2 Bheiqtuvluv 3

Heeqphaq Yeiqsul yavq kha lee nail ganl

1Ngal mailma-ail gaiq-a nail aqtsaoq juq-ol, ngal nuljuq jaol nail bha gevq bhoel-ai leevq-a nail haoqgavq niil keiv neq, nvq keiv teevq keiv ngaol. Nuljuq aqmeeq-ai saol-nvq nia dai, ngal nuljuq bhai haoqgavq niil nvq keiv gevq bhoel-ai leevq khi, ge noeq bhiq nail ngaol. 2Miqyail nail haqbhoil gedan nail meeq nail haol nail juq-i mail aq-u nee, gedan-ai thaq nail daoq bhai thaq nioil peivq dei-eiq. Heeqphaq khi mail Hevqkovq nail gaq pevq nail Yeiqsul neq, nuljuq bhai cavq nail gaqkhoel juq bhai juq khi, bivq-ai thaq nail daoq juq bhai iqsanl thaq nioil peivq dei-eiq.

3Haoqnao naosaq khe aqn aqyanq niil nail lavqkhoel, yovqgavq nail aqsivq haqjoil neekhaol nail haoqnao tsaothe khi khal ge movq-ail ge nail tsaol-aq juq dov lal nail ngaol dai, nuljuq iqmoeq heeq kivq nail tsaq nail ngaol. 4Aqyu juq niailhai naldaiq lal nail ngaol: “ ‘Ngal yavq kha lee naol’ dai, Yeiqsul-i mail saljial jaq-ai thaq nail al khaq bha peivq gil ail-aoq thaq nail-aiq. Ngadao nail aqphiq aqbhal juq iqsanl sil gil-aoq nail ngaol. Thailhai ngaol-aoq, miltsaq teivq-u n-gaol nee mail yanqgaol kev dai, yaoq phaq yaoq-ao nee maq phal lal-a nail maq ngel-ail laiq” dai, ge lal nail ngaol. 5Milnee uqnee nee mail Miqyail nail daoq bhaqda nee nqtavq jiav lal-a nail bhai, aqyu juq nioil peivq movq nail ngaol. Al ovqtavq, Miqyail nail daoq bhaqda nee, ulcuvq nee mail miltsaq dov lal khi, ulcuvq bhaqda nee miltsaq pevq lal-a nail ganl iqsanl, aqyu juq nioil peivq movq nail ngaol. 6Milnee uqnee nee miltsaq bhai ulcuvq bhi deq pheeq lal khi, tsaol-aq bhai lav luq lav seil-a nail ngaol. 7Miqyail nail daoq al neq, niil aq-il jiav thailthaiq nail nqtavq khi miltsaq bhai, miqjaq kheq ha nail haqbhoil lainq-ai thaq nail ngaol. Miqyail bhai maq ev nail tsaol-aq bhai yalkhaq dal khi lav luq lav seil-u n-gaol kev dai, lainq-ai thaq nail ngaol.

8Ngal mao-ail gaiq-a nail aqtsaoq juq-ol, daoq niil daoq bhai thaq nioil peivq dei-eiq. Heeqphaq Miqyail nail sivtavq bhai, teevq n khi teevq hinl kovq neq, khul maq bheeq-n-ail. 9Miqyail-i mail jaq-ai thaq nail saljial bhai aivq lavqtsail mail maq bhi bhee lal-il dai, tsaol-aq teevq pav ganav juq noeq thailthaiq nail ngaol. Aivq lavqtsail mail maq bhi bhee lal nail maq ngel-ail. Tsaol-aq teevq gaq-ail maq luq maq seil-ail dai, tsaol-aq iqsanl mail oeqbal noeqpov lal nail bhai, aivq oil movq nail ngel-i mail, nuljuq bhai aivq ol lavq nail ngaol.

10Khoiqbhaoq bhaoq lal nail aqyanq maq heeq kivq nail khe-ai, Heeqphaq Yeiqsul nail aqn kev lee nail ngaol. Aq-u n-gaol, nqtavq aqthel mailma-ail meel meel-ail peivq-ail nail ngaol. Aqlaol laol deedee nail ngel-i mail, nlma bhala aqgil iqsanl mail, phaq gil lai nail ngaol. Miltsaq khi miltsaq kovtavq bhai khal jiav nail iqsanl mail poiv ha gil nail ngaol.

11-12Al juq iqsanl mail phaq gil-ail nail ngaol dai, heeq kivq nail ngel-i mail, nuljuq Miqyail nail aqn bhai noeqthunq khi daonq thailthaiq-u phao, aqmeeq aqhaol haol dai, taivq-ail doevq khi, Miqyail bhai ev nail tsaol-aq pevq heeq phaq-ail tsaq nail maq ngel ail laiq. Aqn al n kev lee haq neq, nqtavq bha miqjaq-i mail poiv ha khi, aqlaol laol deedee nail ngel-i mail, yaoq phaq yaoq-ao nee phaq gil lai nail ngaol. 13Thailhai ngaol-aoq, Miqyail-i mail saljial jaq-ai thaq nail khe-ai, nqtavq aqsivq miltsaq aqsivq jiav lal nail ngaol dai, ngadao noeqthunq khi daonq nail ngaol. Al bhai neq, tsaq nail daol nail phaq taivq-ail jiav nail ngaol.

14Alheel ngel-i mail, ngal mao-ail gaiq-a nail aqtsaoq juq-ol, nuljuq al juq bhai noeqthunq khi daonq nail ngel-i mail, nuljuq aqjiivq aqcavq phaq maq leivq mail, oeqbal thaq duq iqsanl maq jiav nail lavqkhoel nee, Miqyail nail sivtavq bhai neesal-ovq nail lavqkhoel bhai ya jaol dai, laijai yaoq. 15Ngadao hevqkovq nail phaq ya dai, ngadao nail Heeqphaq Miqyail ol thailthaiq nail ngaol dai, heeq kivq thaq-ai yaoq. Ngadao mao-ail gaiq-a nail aqivq jaqbheq Paolluv iqsanl, Miqyail aivq bhai neenoeq neekha bivq-a nail khe-ai, ganl niil juq nuljuq bhai haoqgavq gevq bhoel-ai leevq-a nail ngaol. 16Aivq-i mail gevq-a nail haoqgavq iqsanl nail lavqkhoel-ai, ganl niil juq aivq gevq-a nail ngaol. Haoqgavq al juq nail lavqkhoel-ai ganl teevq pav ganav juq neq, gov heeq lal nail haq nail ngaol. Maq heeq nia-ail neema maq ivq nail tsaol-aq neq, gov heeq lal nail haq nail daoq al juq bhai maqkhaiq, Jalliq yaoq juq yaoq nail lavqkhoel bhai gevq bhoel-ai thaq nail daoq juq bhai maqkhaiq, daoqceevq lav phal nail ngaol. Aqyu juq alhai nl nail ngel-i mail, ya luq ya seil-ail nail ngaol.

17Alheel ngel-i mail, ngal mao-ail gaiq-a nail aqtsaoq juq-ol, nuljuq iqmoeq-u nee mail ganl niil juq heeq nia nail ngel-i mail, haqeiv nail tsaol-aq nl bheeq nail haoqnao aqyu juq nuljuq bhai maq ya hevq bheel-aivq mail, yovqgavq ivqdao dai, thulphaol-nvq thaq nail bhai maq ya tsu-ail dai, yaolphaol yaoq. 18Ngadao nail Heeqphaq khi Hevqkovq nail gaq pevq nail Yeiqsul Khali nail geeqlaoq eeljaol nail lavqkhoel nee maqkhaiq, aivq bhai heeq nia nail lavqkhoel nee mail maqkhaiq, nuljuq eeq lal moe lal yaoq. Niil aq-il nee, nqmaq maqluv halyeel aivq bhai tsiqeeq tsiqheel bhel. Aqmiq.

Jalliq aqsivq Gaolkheel daoq

© Wycliffe Bible Translators, Inc. All rights reserved. 

Print publication: The Bible Society of Myanmar

More Info | Version Index